دعونا نصارح أنفسنا بالنسبه للأكورد

[شايل الظبي]

بسم الله الرحمن الرحيم

السلام عليكم ورحمة الله وبركاته

ياشباب حبيت اليوم أتطرق الى هذا الموضوع لأن بصراحه الشخص قد يتردد أن يدفع ذاك المبلغ
في الأكورد لأن الكثير من الشباب إذا قلتله أباخذ أكورد فل كامل يرد علي ويقول حرام أحط مبلغ قرابت ال100000الف ريال في هوندا فهل ترون أن عبدالله هاشم قد بالغ في أسعار الأكورد موديل 2008 وهل أنتم راضين أتم الرضا عن هذا المبلغ وهل تضمن نفسك بعدم الندم عندما تدفع هذا المبلغ في الاكورد بعد شرائها دعون نكون واقعين ونرى وجهات نظر الشباب هل يؤيدون أم يأبون علماً بأن الأسعار هي كالتالي :

1/أكورد فل كامل جلد /93800

2/فل مخمل /ينقص عنها قراية الاربعة الاف ريال

3/سبشل/82500

4/سياحي قير اتوماتيك /78500

فالله لايهينكم عطونا ارئكم في الموضوع لاهنتم

الرجاء من الشباب
وضع اسعار تقديريه للسعر المناسب لها
والف شكر

[هـــوندا وبـــس]

اشكرك على هالموضوع

بالنسبه للاسعار أنا اقول أنه مبالغ فيها بعض الشي

[امبراطور الاكورد]

هلا والله وليد انا اقولك
100000 الصراحه حرام ولا يهونون راعين 2008 الموتر بطل ومواصفاته لايعلى عليها

لاكن السعر مبالغ فيه بقوووووه

ثاني شي عندك الوكيل مايحتاج

وغير كذا الموتر توب

عندك جيب مازدا الجديد شبابي +فخامه

وهذا رايي ولا يزعلون راعين 2008

[شايل الظبي]

الف شكر لك اخوي هوندا وبس واخوي ابو محمد على المرور
مع انتظاري لاراء بقية الشباب

7
7
7
7

[AL5FY]

انا اشوف انها غاليه خصوصاً السته سلندر

[شايل الظبي]

اول شي الف شكر على مرورك
وافدنا لاهنت عن سعر ال6 سلندر.
7
7
7
7

[H خالد H]

اول شي الف شكر على مرورك

وافدنا لاهنت عن سعر ال6 سلندر.
7
7
7

7

6 سلندر جلد 113000ومخمل 103000
والاسعار مرتفعه رغم جودة السياره

[شايل الظبي]

الف شكر على مرورك عزوووز
بس وش الفرق بين ال اكس
وال اي اكس
وعلى فكره والله ان سعرها في العلالي من جد

[لصمت ملاك]

انا معي هوندا أكورد 4 سلندر فل كآمل جلد ,


شخصيأ أجد السعر منآسب الى حد بعيد ,


وبالنسبه لـ 6 سلندر ,



فعلا السعر مرتفع كثيرا ,



ومشكوور خيو


ع الموضووع

[alfeed3]

انا حاجز الفل 4 سلندر جلد 95000 ريال لؤلؤي ,,,, طبعا السعر مرتفع ولاكن واقولها بصوت عالي تستاهل الأكورد طبعا بعد مقارنة بعدة سيارات بس انا مايهمني إلا الجودة والخدمة والصناعة المتقنة .
ابعطيك تشبيه سريع لوقالولك هذا لابتوب سوني ياباني الصنع ومواصفاته معقولة( موديل جديد , معالج جديد , كرت شاشة مفصول وغيره) بس بدون بصمة أصبع وسعره 5500 ريال .
او تاخذلك لابتوب توشيبا نفس المواصفات بالضبط والصناعة تجميع صيني بس إضافة بصمة أصبع وسعره 5000 ريال ............... أنت اش بتاخذ ؟؟؟؟

[شايل الظبي]

8888888888888888
الف شكر على المرور ياشباب
وبانتظار راي بقية الشباب

[raptor]

ياترى ماهو سعر الاكورد في باقي الدول العربية
هل هناك من يفيدنا بهذا الخصوص؟
انا ارى بأن السعر مرتفع ... على الرغم من حبي للاكورد

تحياتي

[ACCORD 764]

و الله أنا عن نفسي أشوف السعر مرتفع حبتين .
يعني و الله صعبة أدفع في سيارة 4 سلندر مبلغ 93.500 ريال ( مع احترامي لأصحاب الأكورد 2008 ) .
صحيح السيارة حلوة و فخمة و تستاهل , لكن و الله برضو أنا تهمني القوة .
يعني زمان سنة 2007 لما كانت الـ 6 سلندر بـ 97.000 ريال ما قلنا شي لأن السعر مناسب مقارنة بالمنافسين , لكن اللحين الوضع أختلف .
المنافسين طوروا التقنية بشكل كبير , بينما بقيت الأكورد بلا تغيير . مجرد الشكل الخارجي و الداخلي بس و المسجل حطوه Mp3 بس الباقي كله شكليات لا أكثر .
الموتر يستاهل و شكله رسمي أكثر من إنه شبابي عشين كدا سعره فوق .

أنا مثلا لو أبغى أشتري سيارة بـ 100.000 ريال راح أفكر في شي كبير , مثل الكابريس ( الرحابة فيها عالي ) و الجيب المازدا شكله حلو و جيد .
حقيقة ما راح أفكر في الأكورد رغم إنها ممتازة لكن 100.000 و سيارة 4 سلندر مرة صعبة .

تحياتي .

[Pink Dream]

ببساااااااطه كل شي صاااار غالي ..

95 الف في اكورد امممممم كثير والله لكن ايش نسوي كل الياباني ارتفعت اسعاره

والي خايف منه تهبط الاسعار فجأه ونروووح فيها :d

بعدين جيب المازدا ذا الي راجينا فيه ماقولنا شي حلو وشبابي وكبير

لكن ماسألتوا نفسكم ليش رخيص كدا ؟!!

اولا سوق المازدا مو ماشي لذيك الدرجه

ثانيا اسعااااار القطع ناااااار

ثالثا الكمبيوتر حق المازدا حساااااااس

رابعا توها السيارة جديده كيف يسوقها اذا ماخفضوا اسعارها شوي

اما الفئات المقاربه للاكورد زي الالتيما ولا الكامري ..

فيها صح مواصفات تميزها عن غيرها لكن بدووون جوده للاسف رغم انو اسعارها اقل بشوي

مو ذاك الزود الي يخليك تفكر انك تاخدها بدل الاكورد ..

ومن قاصرها انا اصلا مو مقتنع بالسياره ككل وماطلعت ع قد طموحاتي وتوقعاتي فيها ..

صحيح شكل خطيير وراسيه بس مو لذاك الحد ..

الجوده فيها اكثر من ممتازه - قوتها كـ 4 سلندر ممتازه

وبعدين اذا الرز ارتفع سعره ماتبغى السيارات ترتفع :d

الله يكفينا شر الغلا بس

[هـ ل ن السعوديه 818]

والله انا معك انا يوم اشتري الاكورد 2008 فل مخمل قعدت احوس لين جبت تخافيض لدرجة اني طلعتها من مبيعات الشركات
اقول السعر غالي لكن كل السيات ارتفعت سعرها الاتيما مثل السعر والكامري بعد كلهن هذي اسعارهن يعني الياباني كله مرتفع وانا اقول كل هالسيارات ما تسو هذا السعر
تقبل مروري

[AL5FY]

^^^^^^^

من اللي يقول ان سعر الالتيما غالي


4 سلندر فل اوبشن بـ82 الف يابلاش

[ثــلــج مــشــوي]

انا اشوف ان اسعر غالي موحبتين ثلاث حبات

مع احترامي للملكه 2008 ولاصحابها ...

الموتر صح يستاهل ..

لكن ما احط فيه 100.000

تحياتي لك

[أكورداوي]

السعر مرتفع نوعا ما لكن أنا أشوف انها سياره تستاهل .. ليش ؟

لما كانت 2007 ب 85000 ريال كانت القطع غاليه جدا والضمان معك الى 60000 كم بسسسس ..

الحين تزود 8000 ريال وتضمن بعد الله 40000 كم اضافيه وايضا أسعار القطع رخيصه ..

[الـــظـــل]

بصراحه بنظري أنها غاليه مش مره ثلاث مرات و سعرها 95000 ريال على سياره بالنهايه أنها أربع سلندر حتى لو فيها مواصفات المرسيدس البانوراما راح تبقى أربعه سلندر

[رايح لـ رابح]

خذلك سبشل تراه ممتازه وسعرها مناسب وجنوط وكل شيء يعني اوكي سبشل تقدر تقول منافس للكامري وفئاتها

[مجرد رأي]

الاسعار مبالغ فيها لدرجة عالية ,,

بس هذا حال السوق .. وش الحل في نظركم ,,

نقاطعهم مثلاًً ؟؟

ابعطيك تشبيه سريع لوقالولك هذا لابتوب سوني ياباني الصنع ومواصفاته معقولة( موديل جديد , معالج جديد , كرت شاشة مفصول وغيره) بس بدون بصمة أصبع وسعره 5500 ريال .
او تاخذلك لابتوب توشيبا نفس المواصفات بالضبط والصناعة تجميع صيني بس إضافة بصمة أصبع وسعره 5000 ريال ............... أنت اش بتاخذ ؟؟؟؟

حلللللللوه المقارنة . .

[fhoOodinho]

شوف انا معايه اكورد فل اربعه اسود

السعر الصراحه شويتين مرتفع لوكان سعر الفل 87 الف بدل 94 الف

لاكن السياره تستاهل من ناحيه الجوده والفخامه والشكل حتى الجنووط حق الفل رووعه

[عبدالعزيز11]

انا اقول السعر مو غالي حبتين ولا ثلاث الا عشر حبات
اجل الفل ستة جلد 113000 غالي ومرة بعد
شف عندك كابريس ارخص
افالون فرق 7000 ريال << ولاحظ الفخامة

انا بكل صراحة ابي الاكورد
لكن ما ابي المواصفات الخليجية
ابي الامريكية


شكرا