الأساسيات الـخمسه قبل أن تطلع اي قومة لتحصل على افضل النتائج لصالحك .. منقول

**accord-se** · 28-08-2006, 02:16 PM

السلام عليكم ..

وجدت ضرورة لكتابة هذا الموضوع لأن واجد من الشباب معاهم مواتر قوية ولكن شغلات بسيطة جداً تخرب عليهم وتحول النتيجه من إنها تكون له وتصير عليه ...

وكلنا مللنا من الفيديوات الملعوب فيها بإتفاق مسبق مع أصحاب السيارات المنافسة بهدف تغيير الحقائق وإن سيارتي أقوى من السيارة الفلانية ..

أنا بصراحة بتكلم من خبرتي البسيطة مع القومات وللمعلومية ماطلعت إلا بأتوماتيك فأصحاب العادي يضيفون ملاحظاتهم ..

وللمعلومية الموضوع هذا أنا كتبته وهو مفتوح للنقاش و كل معلومة فيه تحتمل الصواب والخطأ ..

الأمور الأساسية التي لاغنى عن التركيز عليها قبل كل قومة :

1- تانكي البنزين : بإختصار فضي أم أمه لاتخلي إلا 10-15 لتر بس يعني حبة ونص بالكثييييير .. الي يكفيك حق عدد معقول من القومات ويوصلك مرتاح للمحطه بعد المقاوم ..
وعشان ماتنتكب إذا صارت لك قومة مفاجأة لاتعبي أكثر من نص التانكي حتى لو ماعندك قومه ..

التأثير : التانكي شبه الفاضي يعطيك نص سيارة فرق حسب تجربتي ..

2- المرافقين : أسوأ شي ممكن تتوقعه ! شخص واحد مرافق بوزن 80 كيلو بدون مبالغة يمكن يحول سيارتك مثلاً إذا كانت أم 6 سلندر لنفس السيارة ولكن بقوة 4 سلندر .. هذا كيف إذا كان معاك 2 ولا 3 إغـــســـل يدك ..

التأثير : شخص واحد أبو 85 كيلو بيعطي فرق من سيارة إلى سيارة ونص .. مجربة أكثر من مرة ..

3- المكيف : معروف إنه يضعف من قوة السيارة .. ما أعرف ليه ولكن يمكن لأنه متصل بنفس السير الي يحرك المكينة ..

التأثير : غير متأكد منه ولكن شيء متعارف عليه لا أكثر ..

4- النوافذ والفتحة : بإختــصــار ســـــــــــكـــــــــرهم كلهم .. لأنها تقلل من إنسيابية السيارة بشكل كبير جداً ..

التأثير : تأثير لايستهان به وقرأت دراسة في مجلة أمريكية قبل فترة تفيد إن فتح النوافذ أثناء سير السيارة يرفع من إستهلاك الوقود بشكل كبير حسب ماذكروه ..

5- حرارة المكينة : لاتحاول تدعس وتحرق المكينة وإنت رايح للقومة أو إنك تطلع كم قومة تجريبية قبل القومة الي عليها الكلام .. سخونة المحرك بتأثر سلباً عليك ..

التأثير : تأثير واضح يزيد مع زيادة حرارة المكينة وبتلاحظ الفرق بنفسك بعد كم قومة ..

إضافة لأصحاب القير العادي :

6- تحكير القير على آر بي إم معقول: بحيث يعطيك قوة معقولة و مع أقل قرص ممكن .. وإذا كنت طالع مع سيارة قوية دور لك شارع خشن شوي عشان يمديك تحكر الآر بي إم صح وتطلع بقوة أكبر بدون دوران الكفرات على نفسها..

7- القير الأتوماتيك لاتحكر أعلى من 1500 لأنك بتعدم القير وخذها مني

ملاحظات :

*إذا كنت مهتم جداً بتصوير المقطع وسيارتك أوتو وتريد في نفس الوقت توفير وزن المصور خلك على يمين الي بتقاوم معاه عشان تصور القومه من خلال المرايا

* الملاحظة الأهم "الأمــانة" إذا كنت بتنزل الفيديو في المنتديات وإنك ماتتلاعب بالفيديو بحيث تقطع الجزء الي سبقك فيه الطرف الثاني ولا لما بدا يقرب منك أو إنك تتفق معاه إنه يخفف بعد سرعة معينة بحيث يظهر إنك طلعت عليه ... لأن وبإختصار وش الفايدة تضيع وقتك ووقتنا معاك !! ..

شاكر لكم قرائتكم للموضوع وأكرر إن الموضوع مفتوح للإضافات والنقاش

**Cool Civic** · 28-08-2006, 10:45 PM

عجبتني آخر ملاحظة Looool يعني يجيك واحد نصاب ب كرولا يقولك طلعت على أكورد قومة بس جابني خط ويصور نفسه معدي جنب أكورد واقف يحط بنزين

أم البكش اللي على أصوله (تراها من راسي هاهاهاها)

**D.AHMED** · 29-08-2006, 02:24 AM

معلومات مثيره ومفيده
يعطيك العافيه وما قصرت

**الاخطبوط** · 29-08-2006, 11:49 AM

القير الأتوماتيك لاتحكر أعلى من 1500 لأنك بتعدم القير وخذها مني

كيف؟؟؟؟؟؟؟؟؟؟؟ وشلون ؟؟؟؟؟؟؟؟؟؟؟ ليه ؟؟؟؟؟؟؟؟؟؟؟؟؟؟
مافهمت هالنقطه

**اكورد الجنوب** · 29-08-2006, 12:55 PM

accord-se
مشكور وبالفعل مجربه كلها النقاط ذي بس تصدق اني مفلل الموتر مره وجبت240كم وزياده كمان على طريق الدمام الرياض لا ولوحدي كمان اخر اليل وجكر انا وكامري2005فل كامل قير اوتو وماجابني وبعيد عنه يجيبني
تقبل مروري

**accord-se** · 29-08-2006, 02:46 PM

شكراٌ لكم شباب فرداً فردا

بالنسبه للأخطبوط .. صاحب الموضوع يقولك خلي الضغط على 1.5 واستفسارك ليش انا اقولك ليش

راح تتعب القير وهو على كل حال القومه من الصفر مضره بالقير الأوتوماتك . ليه ..... راح تفحط او تدور الكفرات مكانها بدل مايكون العزم في الإندفاع

**دحوم** · 30-08-2006, 01:30 AM

يعطيك العافية وعساك على القوة .

**H @ Z ! M** · 30-08-2006, 05:00 AM

مشكور اخوي accord-se على الإفادة والله يعطيك العافية

بس الي مافهمته كلمة ( تحكير )

**accord-se** · 30-08-2006, 11:45 AM

حياك الله دحوم ويعطيك العافيه

H @ Z ! M .. تحكير هذه كلمه عاميه تقدر تفسرها بضبط الـ Rpm على 2 ... بمعنى أخر خلي القير فاضي و أوزن الدعسه على ضغط 2 لاتخليه يوصل 2.5 ويرجع 1.5 خليه 2 فقط

أعتقد وصلة

**H @ Z ! M** · 30-08-2006, 03:17 PM

المشاركة الأصلية كتبت بواسطة accord-se

حياك الله دحوم ويعطيك العافيه

H @ Z ! M .. ... بمعنى أخر خلي القير فاضي و أوزن الدعسه على ضغط 2 لاتخليه يوصل 2.5 ويرجع 1.5 خليه 2 فقط
أعتقد وصلة

وصلت طال عمرك
أنا فاهم التحكير لكن هذا الشرح الي ابغاه

مشكووور يالغالي

**أبو عــــــ863ــــزام** · 05-09-2006, 03:55 PM

المشاركة الأصلية كتبت بواسطة accord-se

شكراٌ لكم شباب فرداً فردا

بالنسبه للأخطبوط .. ((((((صاحب الموضوع))))))))) يقولك خلي الضغط على 1.5 واستفسارك ليش انا اقولك ليش

مشكور على النصائح والتنبهات والمعلومات الرائعة اخوي

بس على فكرة من هو صاحب الموضوع انت ولا واحد ثاني <<<<<<<<<< تراني نبيه:d

**accord-se** · 06-09-2006, 11:16 AM

كاتب الموضوع واحد ثاني وكاتب بعنوان الموضوع منقول واعرفه بأي منتدى

و انا وضحة بعض الأشياء فقط وبالتحديد كلمة تحكير ........ حياك مافي مشكله ههههه

**أبـوسعـود** · 06-09-2006, 02:56 PM

هلا وغلا ..

مشكور حبيبي ع الموضوع ..

وبالنسبة لي بحكم خبرتي في المطارحات حتى الاستبنه الي هي الكفر الاضافي الي في الشنطة يفرق ..

وانا بالنسبة لي مااقاوم مع احد الى وبنزيني فوق الربع حتى ماتخرب البخاخات ..

واهم شي برودة المحرك ..

والسبب الي يخلي عزم الموتر يضعف بعد 4 مقاوامات هو احتماء الكلتشات حقت القير ..

.

**accord-se** · 07-09-2006, 01:18 PM

حياك ابو عابد

وشيء ممتع يكون بيننا شخص خبير في المطارحات ... بالفعل الإطار الإحتياطي يحتوي مالايقل عن 40 كيلو واي شي يخفف وزن السياره شيله هههه بس لاحد يفهم كلامي غلط ويشيل اللوحات وبعد مايصكوه مخالفه يجي منك لله:d

**ن ك د السـعــــوديه 3 5 7** · 07-09-2006, 01:28 PM

هاه شباب فيه قومه

من يتحدى؟؟؟؟؟؟؟؟؟؟؟

***أبوسحاب*** · 12-09-2006, 01:31 PM

ن ك د السـعــــوديه 3 5 7

هاه ودك نجرب مع بعض
أنا موتري أكورد2006سبشل قير اوتو 4سلندر

أنت وش موترك وقير عادي ولا أوتو وكم سلندر

**ن ك د السـعــــوديه 3 5 7** · 12-09-2006, 05:07 PM

المشاركة الأصلية كتبت بواسطة *أبوسحاب*

ن ك د السـعــــوديه 3 5 7

هاه ودك نجرب مع بعض
أنا موتري أكورد2006سبشل قير اوتو 4سلندر

أنت وش موترك وقير عادي ولا أوتو وكم سلندر

يالله قدام سيارتي

اكورد 2005 فل اوبشن اربعه سلندر :d

هاه متى القومه ووين ؟؟؟ ;) :p

واحد متحمممممممممس مرررررررره :p

**أكورداوي** · 12-09-2006, 10:50 PM

والله معلومات قيمه فعلا الله يعطيك العافيه يالغالي ....

**accord-se** · 14-09-2006, 02:10 PM

حياكم الله شباب

**Storm CiViC** · 16-09-2006, 10:46 PM

اشكرك اخوي accord-se على موضوعك المفيد

واطمع في قراءة المزيد من مواضيعك في هذا القسم;)

والى الامام يا بطل

**ملك الـCiViC** · 19-09-2006, 09:44 AM

مشكور يالغالي :(

**accord-se** · 19-09-2006, 03:00 PM

Storm CiViC .. ملك الـCiViC

حياكم الله شباب

**المجــ دمعة ــروح** · 05-10-2006, 05:00 PM

مشكور اخوي على ها المعلومات الحلوه وجميعها مجربه ولاسيما على الهنادي ودوم تعجبك

**و س ح 193** · 22-10-2006, 09:11 AM

انا مافهمت شي ابد
لا تحاولون مافهمت شي
يعني تبون اقاوم والضغط 1,5 ما اعديه
انا وانا امشي عادي
الضغط ياصل 3 او اربعه وشلون وانا ابقاوم
ولا تعنون شي ثاني

**accord-se** · 22-10-2006, 01:41 PM

و س ح

جرب تطلع قومه ومن الصفر تخلي الضغط 3 راح تفحط السياره شوي وكذا تضيع ثواني من الإندفاع للأمام بالدوران في نفس المكان

المقصود فيها من الصفر 1.5 عزم مناسب ولا تفهم منها انك تستمر على هذا الضغط طوال فترت القومه او المطرحه لك المجال بعدين مفتوح