الحمد لك يارب .. وصلنا الى مرحلة ماقبل القبض ..

**أكورداوي** · 17-10-2006, 10:56 PM

أكتب لكم يالغالين وانا مستعجل لأني طالع بعد شوي لتمشيط أحد الأحياء المشبوهه جدا ..

الى امس تحديدا الساعه الثانيه والنصف ليلا ..

تعرفنا على شخص بنفس أشباه السارق .. عرفنا اسمه .. عرفنا الحي الي يسكن فيه .. سألناه عدة أسئله ,.. ارتبك ,, ضيع السالفه ,, تغير وجهه ...

سألنا عنه أشخاص ثقات في نفس الحي .. طلع مجرم ,, حرامي تخصص سيارات .. مروج مخدرات .. وماخفي أعظم .. عرفنا بعض الأماكن الي يخبي فيها السيارات .. عطينا البحث اسم المجرم وقالوا المعروف لايعرف :d الرجال معروف عندهم لأنه من أرباب السوابق ... تم الاتفاق مع البحث الجنائي بالمداهمه لكن بشرط واحد .. أننا نتأكد 100% انه هو .. وان السياره موجوده عنده ..وبعدها نكتب ورقة اتهام عند البحث الجنائي وتتم المداهمه .. كل هذا ان شاء الله سيتم بعد حدود ساعه من الآن وراح أوافيكم بالخبر الأكيد ...

لكن أطلبكم طلب واحد ..

تكفون ادعوا لنا بالتوفيق .. ادعوا لنا في صلاتكم الليله .. فوالله العظيم انه أحرمنا من صلاة القيام .. أحرمنا من أشياء كثيره .. حتى النوم أحرمني منه ..

**أبان الطباع** · 17-10-2006, 11:58 PM

الله ييسر لكم أموركم، بإذن الله تلقاها بأقرب وقت، قلوبنا معكم..

**عبووودي** · 18-10-2006, 01:20 AM

الله ييسر اموركم ويوفقكم وتمسكون الحرامي
بس

**عبووودي** · 18-10-2006, 01:20 AM

الله ييسر اموركم ويوفقكم وتمسكون الحرامي
بس عطنا الاخبار اول باول ترى الواحد على اعصابه

**BLK** · 18-10-2006, 02:16 AM

ها وش جديدك أخووووووي ؟؟؟

***قلبي اكورد*** · 18-10-2006, 03:41 AM

الله يوفقكم والله يسهل اموركم في كل خطوة
وبشرنا بكل جديد .. نحن على احر من الجمر

**black.H.V6** · 18-10-2006, 03:42 AM

أكورداوي قلوبنا ودعواتنا معك بس أهم شي وانا أخوك إنتبه لنفسك ولا تعرض نفسك لأي خطر وإن كان علا السياره تتعوض والله يوفقك وتسمعنا الأخبار اللي تسر إنشاء الله....

**دحوم** · 18-10-2006, 03:42 AM

الله ييسر امورك ان شاء الله تمنايتي لك ودعواتي لك بالتوفيق في القبض على هذا المجرم .

**ن ك د السـعــــوديه 3 5 7** · 18-10-2006, 04:20 AM

الله يوفقك دنيا واخره ان شاء الله اهم شي علمنا وش صار يالغالي

**A C C O R D** · 18-10-2006, 06:21 AM

الله يوفقك وتلقاها سليمه ان شالله .....؟

**حياتي كلها اكورد** · 18-10-2006, 06:29 AM

يارب تمسكونه متلبس وهو بالسياره والسياره مافيها اي شي والله وياكم

**ابوفهد.** · 18-10-2006, 07:00 AM

الله ييسر اموركم ويوفقكم وتمسكون الحرامي

**CR-V** · 18-10-2006, 10:19 PM

يسر الله لكم الأمر ووفقكم إلى ما فيه الخير

**accord 06** · 19-10-2006, 08:49 PM

يا شباب اللي يعرف اكورداوي او قد قابله

يا ليت يطمنا عليه

له الحين يومين غايب عن المنتدى

**ن ك د السـعــــوديه 3 5 7** · 19-10-2006, 09:06 PM

الرجال بخير والحمد لله

بس مانقول الا الله يوفقه ويحصلون الحرامي

قولوا امين ؟؟

**اتــشـــــ** · 19-10-2006, 09:16 PM

المشاركة الأصلية كتبت بواسطة ن ك د السـعــــوديه 3 5 7

الرجال بخير والحمد لله

بس مانقول الا الله يوفقه ويحصلون الحرامي

قولوا امين ؟؟

آآآآآمين

**أكورداوي** · 19-10-2006, 09:35 PM

أشكركم جميعا على أهتمامكم الي بصراحه أحرجنتي كتيييييييييير ..

وبصراحه ماكنت أدري انكم تنتظرون ردي لهاالدرجه الا من أخوي نكد الله يعطيه العافيه اتصل علي وبلغني ..

آخر ماتوصلنا له يالغالين .. اننا أمس افترينا في الحي الي يسكن فيه الشخص الي قلت لكم عنه .. ومعنا صديقي الي شافه في سيارتي .. وحاولنا اننا نصيده في اماكن تجمعاتهم لكن للأسف ماكان موجود ..

فاضطرينا اننا نروح البحث الجنائي ونكتب لهم ورقة الأتهام وعاد احنا وحظنا نلقاه ولا لا ,,

راح لهم الوالد لأن السياره بأسمه وياليته ماراح .. تفاجأنا بردهم الي بدل مايخفف عنا زاد الطين بله ..

قالوا لنا بالحرف الواحد (( اننا شفنا السياره بدون لوح وطردناه وماقدرنا عليه ... :( والشي الثاني الي حارقني زياده .. قالوا وانتم مغرمين 1500 ريال مقابل انكم تاركين السياره شغاله ..

.. طيب والشي الثالث أننا في حالة لو مسكناه راح نطلعه بكفاله ونحدد موعد يراجعنا فيه عند هيئة التحقيق والادعاء العام ..

))

ماشاء الله تبارك الله ... يعني هذا الي عندكم ..؟

((..أنا من وين ماجيبك ... تجيني يالحزن بعناد ..طلبتك رخي شويا .. ويكفينا ألم وسهاد ...))

أنا مستعد أدفع لهم المبلغ بس بشرط يجيبون السياره بعدين أدفع مو أدفع من غير فايده .. وللعلم كل الأخبار الي تجيني والجهود الي تبذل من الشباب الله يجزاهم خير ربعي ومنكم بدعائكم يعني بالعربي البحث الجنائي مافادني بأي شي .. ))

اليوم .. دخل شخص في قائمة المشبوهين .. كيف ..؟

أعرف شخص قريب من بيتنا راح لأخوي وقاله انه يعرف واحد معرفه مضبوطه ويمون عليه زين .. شاف معه مفتاح أكورد ولما سأله قاله هذي سياره سارقينها .. واليوم ضبطنا وضعنا مع هذا الي جانا ووعدناه بمكافأه اذا جاب خبر السياره .. وان شاء الله انها تكون هي .. واذا ماطلعت هي فببلغ اننا لقينا أكورد مسروقه وعرفنا السارق .. سواء كانت سيارتي ولا سيارة غيري ..

**HONDA 888** · 19-10-2006, 11:57 PM

باتوفيق اخوي اكورداوي

ويا ليت توافينا بآخر المعلومات

**ن ك د السـعــــوديه 3 5 7** · 20-10-2006, 01:46 AM

الواجب يا اكورداوي ترى كلنا يد وحده

**أبـوسعـود** · 20-10-2006, 06:44 AM

هلا وغلا ..

الله يوفقك وتلقاها .. كلنا معك ياحبيبي ..

.

**The Black Accord** · 20-10-2006, 02:30 PM

الله يوفقك اخوي وانشاء الله تلقى سيارتك سليمة
ولا تنسى تقلنا على الاشياء اللي تحصل معاك

**حياتي كلها اكورد** · 21-10-2006, 07:56 PM

الله يوفقك من كل قلبي والله اننا نحس باللي تحسبه يا اكورداوي لاكن اللي علينا بنسويه
والباقي على ربك

**أبان الطباع** · 29-10-2006, 05:05 PM

الحمد لله رب العالمين
اتصل بي الآن الأخ خالد (أكورداوي) ليبشرني أن سيارته عادت، وكيف عادت!:
بحال يرثى لها من غير جنوط ومصدومة من الأمام (الصدام الأمامي) وسرق ما بداخلها من أغراض ثمينة كالكمبيوتر وبها جميع أنوع الأوساخ الموجودة في العالم!
الحمد لله أنها عادت والله يعوضه عن الأضرار التي حصلت له، وبإذن الله يسترد حقه في الدنيا قبل الآخرة.

كتبت الرد لأنه حالياً ليس لديه إنترنت ولديه من المشاغل مايكفيه، ادعوا لها دوماً وفي صلاتكم أن يعوضه الله عما حصل له، وأن يجعلها في ميزان حسناته..

**أبان الطباع** · 31-10-2006, 12:02 AM

http://www.hondaarabia.com/club/showthread.php?t=1563

الموضوع: الحمد لك يارب .. وصلنا الى مرحلة ماقبل القبض ..

أدوات الموضوع

عرض

الحمد لك يارب .. وصلنا الى مرحلة ماقبل القبض ..

المواضيع المتشابهه

وين اصحاب Cr-v 2007 ما نزلوا صور

مبروك وصلنا العالمية بــــ .........

مواقع النشر (المفضلة)

مواقع النشر (المفضلة)

ضوابط المشاركة