سؤال عن سيارة فيها حادث

**هوندا للابد** · 21-01-2009, 01:30 AM

السلام عليكم
عندي سؤال انا عندي اكورد 2008
وكتبت مرة ان سويت حادث شوي قوي
والحمد لله على كل حال وهذا قضاء وقدر
استفساري الحين
التأمين ما رضوا اكنسلون السيارة فبالتالي
صلحوه لي في الوكالة و القطع كلها بتتبدل
بقطع جديدة الي ضررت سؤالي الحين
هل السيارة بترجع زي قبل ما طلعته
من الوكالة يعني بدون مشاكل
وخصوصا ان التاير والجنط اشوي
اتعور فبغيت اسال الي يعرف في
في هل الأمور وخصوصا السيارة جديدة
ومعروفة قطع غيار الهوندا غالية
بس ليش التأمين ما رضوا اكنسلونه
هذا هم اخبر مني هل لان سعر التصليح ما وصل
نص او قريب من بيمة السيارة او ان بيمته مرتفعة
هم اخبر مني في هل الشىء

فسؤالي هل سيارتي بترجع زي قبل واحسن
ان شاء الله
او بتصير لي مشاكل في السيارة

**المباشر** · 21-01-2009, 02:36 AM

الحمدلله على السلامة يالغالي ..

الوكالة ياعزيزي احسن مافيهم انهم يبدلون القطع بجديدة يعني مافي تصليح

والسيارة راح ترجع احسن من أول الا اذا الشاصي تعور فهنا المشكلة من الممكن يبين في الموتر اذا ماتصلح مضبوط او تعور كثير

وماعلمتنا وش اللي تعور بالضبط ؟؟؟ علشان نفيدك بشكل افضل

**هوندا للابد** · 21-01-2009, 03:02 AM

الي اتعور في السيارة
تقريبا البمبرين الامامي والخلفي
والبابين الي على جهة اليمين بس واحد
اتعور والثاني بس صباغ لان ما تعور
وواحد من الليتات الي قدام والبانيت لان نطت
عليه حجرة يعني خفسة صغيرة كلش وما تأثرت
الأشياء الي داخل البانيت من مكنية وغيره كلهم صاحين
ما فيهم شىء
الي اسمونه ( الكبوت ) والتاير والجنطين بس التاير
الي بالخلف صاحي بس الجنط اتشمخ شوي والتاير
الاماممي و والاشياء الي اثبته يعني اتفر السكان
يفتر تاير عدل والثاني
ما يفتر عدل بس شكله الشاصي صاحي لان لو
مو صاحي عالطول تتكنسل السيارة
وهم قالو بيعطوني فترة تجريب السيارة
نص سنة تقريبا على الاشياء الي بدلوه

صراحة اشوي متخوف وخصوصا اشياء
واجد اتضررت بس اهم شىء التاير والي فيه
ما يأثرون اذا اتصلحوا
صراحة مضايق من الي صار في السيارة
وان هم ما كسنلوها بس بصلحونها بس الي ريحني
شوي ان بالوكالة
والحمد لله على كل حال

**المباشر** · 21-01-2009, 04:06 AM

بسيطة يالغالي ولا تشيل هم

البمبر انت تقصد فيه الصدام صح ؟؟ او الرفرف لا اعتقد الصدام :d

المهم الصدامات بسيط امرها

الباب اخبر الوكالة تغيير على طول اذا متعور كثير

طبعآ اهم شي هو المقصات والأذرعة والعكوس وأكيد كلها راح تتغير جديدة وأصلية

وان شاءالله تستلمها مثل العروسة وبدون ملاحظات .

ومادام هي بالوكالة لاتخاف عليها

**B Useful** · 21-01-2009, 06:42 AM

افادك اخوي المباشر ،،

ماعليك لا تخاف ،، امرها بسيط .. يعتبر حادث اغلبة سطحي .. مافية قطع ميكنيكية واجد <<< وكلها تتغير من الوكالة لو فيها خدش بسيط <<< كذا نظام الوكالات عشان يحللون شركة التأمين .

**هوندا للابد** · 21-01-2009, 04:44 PM

مشكورين طمنتوتني
بس الي اقصده غير الخدوش
كانه العكوس والمقصات اتعورت اشوي
هل اذا تغيرت الاشياء الي اثبت التاير الي فيه الجنط
يعني ترجع نفس قبل ( سؤال وش يعني الشاصي)
مشكلتي ما افهم في هل الاشياء من جدي
ابغي اعرف هل الشاصي اتعور اذا واحد من التواير
اتعور
سؤال اذا الشاصي اتعور تتكنسل السيارة لازم
ما يتصلح عدل كلامي لو لا
صار لي فترة وانا افكر احس روحي مأخذ
سيارة جديدة واخرتها مدعومة نفسيا تعبت

**المباشر** · 21-01-2009, 05:46 PM

ريح بالك ياعزيزي التاير بعيد عن الشاصي .

وصدقني الوكالة عارفين شغلهم وبتطلع السيارة عروسة

اصلآ لو السيارة متعورة كثير الوكالة بنفسها بتقولك خارج نطاق الأصلاح علشان ماتوجع راسها بالأصلاحات

حط في بطنك بطيخة صيفي وريح بالك

صدقني انت تهون عن غيرك .. ناس غيرك انعدمت سياراتهم ورجعت احسن من اول