مفاجئات وكيل هوندا الكويت ... على راسي و الله الوكيل و مفاجئاته !

[The Godfather]

السلام عليكم
اللي ما قرأ موضوع البايلوت .. يروح يقرأه و يرجع لي
http://www.hondaarabia.com/club/showthread.php?p=164428#post164428

دخلت الوكاله ... و تفاجأت باكورد كوبيه فيها زوايد .. بلونين مع بعض !
الاحمر + الاسود !
شوفو الصور

بس خلصو الصور

بس الكلام مو على الكوبيه !
الكلام كان لما شفت هذا

ما استوعبت بالبدايه

قربت اكثر علشان اشوف احسن

.. بعد ما استوعبت ..
دخلت السياره !

هنا ما استحملت انا !
دخلت على مكتب شؤون العاملين ( بحكم انه كان الموظف الوحيد المتاح )

قلت له ( هذا جي بي اس ؟ )

قال اي
قلت له جم سعره ؟
قال ما ادري .. بس هذا اكسسوار عندنا !
قلت له شلون اكسسوار !
قال يركب على كل السيارات و كل الموديلات
بس ماني متأكد من سعره .. موظف الاكسسوارات ما يداوم مسائي بس الصبح
فيك تجي باجر الصبح و تسأله عن السعر بالضبط
قلت له : تقريبا ما تقدر تقولي كم؟
قال انا مو متأكد بس هو حول الـ 250 او 300 دينار ( 3250 - 3900 )
و يركب على كل السيارات !
و فيه خرايط الخليج و يوصلك لحد بيتكم بدون اي مشاكل !
قلت له لو جبت لكم اكورد موديل 2006 .. تركبونه ؟
قال نركبه عادي
سبق و ركبنا لسي ار في موديل 2007
قلت له انت على راسي ...
بس متى دوام الموظف مال الاكسسوارات بالضبط .؟
قال 10 الصبح لحد الساعه 4 العصر
قلت له مشكووور خيووو
و مشيت !

هذا اللي عندي اليوم .. و بأقرب فرصه بروح لموظف الاكسسوارات و اعمل له استجواب ! :d

--------------------------------------------
update - تحديث

اليوم الصبح رحت لموظف الاكسسوارات في الوكاله و كان معاه اللقاء التالي المخيب للآمال :
انا : السلام عليكم
الموظف: و عليكم السلام .. اي خدمه ؟
انا : بالنسبه للاكسسوارات .. اشوف عندكم النافيقشن نازل ضمنهم .. و قبل يومين كنت عندكم و سألت و قالو لي يركب على كل السيارات ! صحيح هالكلام ؟
الموظف : النافيقشن اللي " عنااا " يركب فقط للسي ار في حاليا ... بس بالنسبه للاكورد قريبا راح يكون متوفر ... و البايلوت اذا صار في طلب على النافيقشن راح ينزل فيه ان شاء الله
انا : بس الموظف يقول ركبتو على سيارات موديل قديم .. هل هذا ممكن ؟ هل ممكن اركب على الجيل السابق من الاكورد ؟
الموظف : انا مع موظفين الصاله اخذنا دوره تثقيفيه عن الاكسسوارات .. و من ضمنها كان شاشه لكل نوع من انواع سيارات هوندا ما عدا الاس الفين .. الموظفين خبرتهم في هذا المجال سطحيه نوعا ما ..
بالنسبه للتركيب على موديلات قديمه .. هذا راح يكون ممكن .. و ممكن تنزل للاكورد الجيل السابق مع عرض خصم بالسعر .. لان اللي اشترا السياره و استعلمها .. ما يتشجع انه يضيف اكسسوارات مثل اللي اللحين يبي يشتري السياره من المعرض !
( هنا الموظف طلع فورمه طويله و قلم ... و قال : )
الموظف: اذا تحب احنا نقدر نظيف اسمك و رقم تلفونك بالسستم .. و اول ما يوصل اي شي انت تسأل عنه و يدخل السستم اللي بالمخزن .. السستم يرسل لك مسج على طول
( اعطيته البيانات ... و قلت له حط صح على النافيقشن لاي نوع من السيارات .. و الاكورد كوبيه قير عادي ... و اي سياره جديده تنزل )
الموظف: حاضر و الطلب رخيص
انا: الاكورد قير عادي ما وصلت ؟
الموظف : و مااراح توصل .. ما اعطونا عنها شي .. يعني موديل 2009 انسا انه ينزل بقير عادي سواء كوبيه سته سلندر او كوبيه اربعه سلندر او حتى السيدان بأنواعه
انا: ليش ؟
الموظف : راح تنزل بالخارج ممكن .. و ممكن نجيب كم حبه طلبيه .. بس بالمعرض ماراح تنزل لان الوكيل كل ما يجيب سياره قير عادي .. ما تنباع و تطيح بالمعرض
انا : طيب بالنسبه للنافيقشن .. كيف راح يكون ضمانه ؟
الموظف : ضمانه بالنسبه للسيارات الخارجه من المعرض " الجديده " حاله من حال السياره
بالنسبه لسياره موديل قديم و يركبه كأكسسوار .. ضمانه سنه !
و التركيب يكون كله بالفيش .. بدون قطع اي شي .. و بالامكان ارجاع المسجل القديم لمكانه دون اي صعوبات تذكر
انا: اخر العروض اللي عندكم شنو ؟
الموظف : السيارات عليها خصومات رمضان هااائله .. بس الخصم مو محدد .. لانه على حسب السياره و مواصفاتها و انت شنو تضيف عليها اكسسوارات .. بس الام ار في الشكل القديم عليه خصومات هاائله
انا : شكرا عزيزي
الموظف : ولو احنا بخدمتك و حياك

و السلام عليكم و رحمة الله و بركاته

[accord05]

تصدق فرحت وحسيت في امل نتطوور ...
اذا قالولك سيارة كوبية رياضية هذي هي ماهي بالي عندنا .. ما ادري وش تبي !!
والنفقيشن طلاق لحاول اركبة اليوم قبل باجر عندكم :d ...

لكن بيني وبينك وكيلنا ماقصر كل مرة فيه مفاجأت لكن الاسعار لك عليها شوي لكن مصيرها تنزل مع الوقت ..


واشكرك جزيل الشكر على توسيع صدورنا بهذا الخبر الجميل الي مثلك يادب :d .

[wahd]

ماأقول إلا


يالله يارب يرزقنا وكيل زي وكيلهم

[فقير الحظ]

والله الكووبيه يحتك بالس اس من داخل ..!

بالنسبه لنظام الملاحه ياليت تسأله ياعقيل هل يعطون عليه ضمان ؟ وكم مدت الضمان ؟؟ ووش وضع الي بيجيهم من السعوديه ..؟

مشكور وماقصرت على هذا المجهود .. والله يخلف على ابو هاشم بس فالح يحط برادات شاي بكل فرع

[naio0of]

ااااااااااااااااااه يا حضكم

ان شاء الله عبدالله الهاشم يحس و يقوم من النوم ...:p

[أكورداوي]

والله خبر حلو ياعقيلوه ,,

والله ماهي بعيده 400 كم وناخذ لنا الموتر القادم من عندكم

[meshoo]

الكوبيه من برا مو مره حلوه

بس السي ار في حلو جدآآآآآ

:d

[مجرد رأي]

الله يرجك يا عبدالله هاشم .. !! :(

مبروك عليكم التطور خيوووو :d

[أبوعبدالله]

خلف الله علينا

[اكــــ2007ــــورد]

يا سلام سلم وش هالاخبار الحلوه
ياريت تقولنا وش يصير معك بالنسبه للشاشه على اكورد 2006

[أبو الريش]

ما شاء الله تبارك الرحمن

والله بصراحة السي آر في طالع شكلها قوي

طيب يا عقيل كان سألته هل تركب على السيفك او لا :o

من جد حللوه

والله لو تركب على السيفك لي روحة للكويت ضروري

[kakashi-san]

وعليكم السلام ورحمةُ الله وبركآتة ،،

يسعد لي مسآك / صبآحك بكل أنواع الوردْ ،،

بصراحة الوكيل اللي في الكويت مو مقصّر معاكــُمْ ،،

أذكر واحد من الأعضاء قال أنه اشتراها من عِندكــُم أكورد سيدان 08 وعليها حساسات من الوكالة والجناح ..

وغير كِذا كان سعرها أرخص من اللي عندنا ..

الكوبيه ما عجبني اللي بره كثر ما عجبني اللي داخل ..

أما السي آر في .. كنت ما أطيقها أبد ،، واليوم حبيتها ~ حب من اول نظرة :p

وشسمه ؛ تستآهل الشــُكرْ ..

[seraj_9196]

أخ يا عبد الله هاشم النصاب ....:(


مشكور أخوي عقيلوه :d بس لو الزوايد الكوبيه مرشوشه نفس اللون بتصير حلوة ...

[meshoo]

ترا الاسعار غلط لان الدينار الكويتي يساوي 13.88 ريال يعني تضرب المبلغ بـ 13.88 ريال

[awax 18]

احلى خبر مشكوررررر عقيل
على هيك خبريه

[The Godfather]

تم وضع تحديث في الموضوع الرئيسي

[أبوكرم]

في انتظار النفيقيشن
و شكرا أخوي عقيل على الموضوع

[A N M A R]

والله خبر يفرح ويطير العقل

[لصمت ملاك]

مشكووور أخوي ع الموضوووع

[GameOver]

نظام الملاحه حركات

[الحظ الميت]

اكيد ما يركب على السيفيك ،،

[ابوزكي]

يلا ياشباب انشوفكم على خط الكويت ...
والله كأني اشوف جمارك الكويت زحمه .. الا يشوفهم ايفكر تجمع هوندات ..
والكل رايح ايركب نافيقيشن ..
ههههههههههههههههههههه
يسلمووو على الخبريه وتحياتي:d

[ابو سعود]

مداخله بسيطه

انا من محبي الفشخره (الزبرقه - التزيين )

بس والله ما اشوف لها داعي انك تحط 5000 ريال في شاشه ولسياره

بدال ما تدلع موترك

دلع عمرك واشتر تلفزيون سوني 40 بوصه ب4999 وريال ببسي :d

واسف على المداخله يا ابوي الزين (مسوي مترجم ) بس شاري تلفزيون وا حد قالي مبروك