بسم الله الرحمن الرحيم

السلام عليكم و رحمة الله و بركاته

اليوم عندنا تجربه سريعه لسيارة هوندا الصغيره سيتي الي تم تجديدها بالكامل

طرأت الكثير من التغييرات على الجيل الجديد من السياره في التصميم و الداخليه و حتى المحرك شي بسيط

الشكل اصبح جميل جدا و تحمل من ملامح هونندا سيفيك مع انها تعتبر نسخه صالون من هوندا جاز
و هي تتشارك مع جاز كل شي تقريبا مع هذا سعرها اقل من جاز

لكنها تعتبر من اكثر سيارات الميني صالون جمالا في التصميم.
طبعا السياره تصنيعها في تايلند لكن القطع يابانيه.

السياره تتقارن مع نيسان تيدا و تيوتا ياريس
كل سياره تتفوق على الاخرى في شي الهوندا يمكن تتفوق في التصميم الخارجي جذاب و جميل جدا و الداخليه تحتوي على اشياء اكثر .
اما اليارس تتميز بنعومة القياده و السلاسه اما التيدا يمكن تتميز بالقوه
و معادلة جمع هاذي الاشياء الثلاثه في سياره وحده يمكن يكون صعب في هاذي الفئه
لان هاذي الفئه يوم بتاخذها حط في بالك لازم بيكون فيها شي ناقص و هوندا سيتي تتمتع بالتصميم فقط

السياره من اسمها سيتي فهي السياره الافضل من هوندا للاستعمال في المدن المزدحمه مثل دبي
لكن بالرغم من هذا قيادتها ممله جدا بعكس فورد فييستا الي جربتها سابقا.
التصميم الداخلي كئيب لكنها عمليه فيها تقريبا كل الاشياء المطلوبه
المقاعد جيده و رحابتها معقوله و احسن شي فيها ان جميع الكراسي في السيارة تتعدل وضعياتها
اتوقع صعب نحصل هذا الشي في سيارات من نفس الفئه.

بالنسبه للمحرك فهو 1.5 لتر آي فتيك يولد 118 حصان
لا تسألوني عن الأداء و التسارع لان مهما دست بتنسى انك في وضعية تسارع لان المحرك يفتقر الى النشاط بالرغم من انقوة المحرك جيده الا ممتازه جدا لهذا الحجم من السيارات
لكن مع هذا الاداء متواضع جدا .

سكان السياره ثقيل جدا مقارنه باليارس و الفييستا بالرغم من انه على السرعات المنخفضه المفروض يكون خفيف و على السرعات العاليه يصير اثقل لكنه ثققيل و على السرعات العاليه يصير اثقل و اثقل و يمكن هذا سيفتي فالسياره.

ايضا من انظمة الامان في السياره انك لو كنت تمشي بسرعه و فجأه ضربت بريك شبه قوي السياره فيها سنسر
فأذا ضربت البريك فجأه لكن ما دست البريك كامل هي بنفسها تخليه كاامل كنوع من السيفتي يعني

ما جربت كل شي فالسياره الا اني اعتبرها سياره جدا ممله بصراحه هوندا الي بصراحه ما قصرو لكن السياره جدا ممله و للأسف ما كانت مثل خواتها الكبار السيفيك و الاكورد في
السواقه يعني انا جربت الاكورد حتى ال 4 سلندر بصراحه يعني كانت سياره على مستوى راقي جدا
لكن هاذي خارج السرب مالها شغل في سيارات هوندا الاصيله. قبل ما اكتب التجربه اطلعت على بعض التجارب في المجلات و المواقع و كل التقييمات للسيارة كانت سيئهفي مجلة كارز ميدل ايست اخذت نجمتين و نص من 5 و انا لو بعطها من 20 اعطيها 6 . . . .بصراحه انها خيبة امل

مميزات السياره:
-تصميم جميل جدا
-انظمة امان ممتازه مقارنه بمثيلاتها
-الممقاعد السياره جميعها قابله للتعديل حتى الخلفيه
-رحبه بعض الشيء

عيوب السياره:
-ادائها ضعيف جدا جدا
-قيادتها ممليه (السكان ثقيل)
التصميم الداخلي متواضع
-السعر مرتفع جدا


بس حبيت اذكر سعر السياره فئتين الي جربتها ب 57 و الفل 63
جدا

في الاخير احب اشكر وكالة هوندا على التجربه و اعتذر لهم لكن بصراحه سيارتهم كانت اقل من المستوى المطلوب
تمنيت تكون مثل الاكورد في الجوده و القياده

و الحين بخليكم مع الصور

عدسة فالكون
















الجير اوتو 5 غيارات شي جيد





فتحة السي دي خلف




فتحة الايبود و ايضا فتحة فلاش





الفل فيها ازرار عالسكان



لون القيجات جميل







المحرك الي زادوه 3 احصنه عن الموديل السابق





تبغون تعرفون وين يابو ال 3 احصنه؟

شغلتها ها الفتحه تدخل هوا زياده للمحرك من غير الفلتر



الموضف يجيك المكينه خخخ







جودة البناء احسها افضل من اليارس





بوم



محمد يصور و انا يالس ادور اي شي زين اكتبه عن السياره فالتجربه




كل ما اجوف السياره من ورا اشتهي آكل سمج



ها القيج الي فالنص يبين كم تصرف السياره حسب الاربي ام



صورنا الي فالوكاله لنهن فل



الفل كراسيها غير شويه و فيها سده فالنص و مسند ذراع











هاذي احسن من الي جربناها . . .



اللون الاسود خطير عليها



الي جربناها ما فيها كشافات





تحسون انها غير صح .؟





الرنقات جميله جدا و اضن مقاس 16



الاسعار