حاله غريبه جدا اول مره تمر على المنتدى ,,

ماهي سرقه ولا حادث ولاحريق لاسمح الله ..

المره هذي من باب التجديد في المنتدى ,, طلع لنا juventus بشي جديد ,,

شي ماتتصورونه ,,

غريب ..

عجييييييب ..

ادري انكم تقولون لا يكثر عشان كذا بدخل على طول ’’

كلكم تعرفون البش مهندس juventus (( مطفئ فتنة الخوارج )) :d ,,

عضو مميز ,, مهذب ,, حبيب ,, صديق عزيز لي ,,

بس اليوم ما أدري وش الي جاه ,,

طبعا أبو خلود من أهل الرياض ومثل ماتعرفون ان الشرقيه في الإجازات هي جنة أهل الرياض ,,

المهم ان الرجال مثل غيره سافر للشرقيه أمس وتقابلنا أنا وياه وحبيب ألبي نكودي ,,

وطلعنا الخبر وفليناها وبعدها كلن مشى في دربه ,,

اليوم العصر تواعدت أنا و juventus ونكودي نطلع العزيزيه (( شاطئ عندنا بالشرقيه )) ..

نكد اعتذر بسبب الدوام .. طلع juventus قبلي من بدري ووصلت أنا حدود الساعه 2 ظهرا ..

المهم ان أبو الشباب اتصل علي وأنا في الطريق فرحان يقول انه مدخل السياره على حافة الشاطئ ..

قلت له تكفى طلعها لا تبلشنا ,, مو فاضين مصايب ,, الرجال على طول ماقصر جاك بيطلعها الا وتحصل المفاجأه ,,


ياساتر ,,

صار الي توقعتها ,,

زلقت السياره عليه ودخل وجهها في البحر

وصلت أنا طاااااير ,,

وأشوف سياره من بعيد طايحه عرفت انها سيارته ,,

يوم وصلت الا والله السياره رايحه في خرايط أمها ,, وييييل وش سويت انت ؟

يالطيف الطف ,, أنا بصراحه حسيت ان السياره ماراح تطلع والمشكله ماحد عندنا الا كم سياره ..

وحاولنا حاولنا وماطلعت ,, وشي أكيد انها ماراح تطلع لأن الكفرات الأماميه كلها في البحر والكبوت والدفع أمامي وهذي اكبر مشكله ,, وكمبيوتر السياره خايفين عليه لايدخله مويه ,,

ووالله العظيم اننا نسمع صوت المويه في الماكينه ,,:(

الزبده دورنا واحد ينقذنا من هنا ولا من هنا لقينا جيب GM صغير وجانا ,,

طلع الحبل الأول وجاء يسحب ,, ماقدر وانقطع الحبل ,, طلع الحبل الثاني ونفس السالفه ,,

جلسنا يمكن نصف ساعه نحاول مافي امل ,,

يالليييييل ماطولك ,, (( أقصد ياظهر ماطولك ))

وش السوات الحين ؟

رحت انا أدور حبل وسياره زي الناس ,,

لقيت شباب جالسين ومعهم فورد اكسكيرجن ,,

وانا حالتي حاله وملابسي كلها مويه وتراب (( أحلى خلطه )) .. الزبده رحت للشباب ..

السلام عليكم .. وعليكم السلام .. كيف الحال .. هلا والله .. واعطيهم أول بدليه .. عندكم حفل ؟
:d
احس ان وجهي صار 2 سم مربع من الخجل ,, أبي حبل وقلت حفل من جد والله انا اكبر حفل ,,

عطوني حفل على قولتي وقالوا بعد شوي يجي خوينا معه لاند كروزر ويساعدكم ان شاء الله ,,

رحت لبو خلود وربطنا الحبل على مايجي راعي اللاند ..

تجمعوا الناس من هنا وهنا وحاولوا يساعدوننا .. والله ويجينا حرس الحدود .. بسياره باترول ربع ,, ويجينا واحد عنده ربع ,, وواحد عنده للاندكروز ,,

تخيلوا ثلاث جيوب عشان أكورد ,,

طلع اللا ند فيهم وسفط ورا الأكورد ونزل حبل عنده وقال فكوا حبلكم الفله ..

قلت اخاف حبلك ينقطع لأني شفت الحبل (( الحفل )) كأنه أقوى ..

قالي الرجال بكل ثقه والى الآن مانسيت كلمته وما أتوقع اني راح انساه (( اذا انقطع هالحبل بأرميه هو وسيارتي في البحر )) ,, ثقه مالها حدود ماشاء الله تبارك الله ..

ركبت سيارة juventus لأني اخف منه ,,

والجماهير تصفق لي :p والناس تنتظر الموقف .. ولا يجيك العسكري الي راكب دورية الحرس يقول :
وين راعي الكامري ؟

juventus كان جنبي .. أحس ان في قزاز داخل جسمه تكسر من قوة التحطيم الي جاه ..

أي كامري يابو .. قال هذي.؟

قلنا هذي اسمها أكورد حبيبي .. المهم أعطى خوينا من الكلام العسل (( طبعا مشفر ))

استعدينا للحظة الحسم ..

الباترول الربع ينتظر دوره اذا ما قدر اللاند ,, وبعده دورية الحرس ويمكن 6 من الشباب مشمرين للدف ..

بسم الله ,,

حطيت القير على R ..

وينتعني راعي اللاند ذيك النتعه الي بغيت أحضر بالدريكسون وأطلع الايرباق (( ماشاء الله تبارك الله ))

يالله كيف كانت فرحتنا لما طلعت .. من جد ,,

الزبده الي فك راسنا شي واحد ..

ان القلص حق الجيب انكسر .. تخيلوا ؟

وماشاء الله حق الأكورد ماجاه ولاشي ..والحمد لله الصدام سليم ميه ميه ..

وكل الحبال تنقطع من جهة السياره الثانيه ولاتنقطع من جهة الأكورد ..

طلعت السياره وطلع فيها juventus يتأكد هي سليمه ولا فيها شي مثل ماتوقعنا ...

لكن الحمد لله طلعت سليمه وكأن شيئا لم يكن ..

وأخذنا رقم راعي الجيب عشان نعوضه على القلص الي انكسر وشكرنا الشباب الي ماقصروا معنا ..

وجاك راعي الدوريه كأنه يتشمت فينا .. لكن خلوه على الكامري حقته ما ودنا نتكلم فيه ,,

وأكيد انكم تبون الصور وهذا أهم شي عندي عشان تعرفون كيف الوهقه من جد ..



صوره ثانيه .. ولا حظوا ان juventus نظامي حاط المثلث في البحر عشان مايجيك طحلب مطفي النور ويدرعم في الأكورد ;)






هذي الحبال الثلاث من غير الحبل الأخير الي طلع السياره ..






لاحظوا وش مكتوب على الكبوت ..



وهذي اللحظات الأخيره قبل الخروج



لاحظوا سيارتي والجيب الباترول في انتظار السرا (( سيارتي آخر الأمال اذا ماقدروا )) <-- تكفى يالهمر :p



لقطه للسياره بنظافتها الحلوه بعد الخروج من المأزق





وترقبوا ...

استعراض خطييير جدا لأكورداوي وjuventus بمناسبة الخروج من النكبه ..

قريبا في قسم مراسلون النادي ,,