عجيب والله!

**بو حسن** · 30-10-2007, 09:29 PM

السلام عليكم ورحمة الله تعالى وبركاته

شحالكم شباب وشخباركم

شباب في نقطة لفتت إنتباهي وهي إن الكل متعلق ومتمسك بشاشة الأكورد ويتمنى نزولها.. :d

ولـــكـــن ..

يا إخوان أنا أبغي أسألكم سؤال؟

هل أنتم مستعدين تدفعون 9 آلا درهم زيادة على سعر الموتر من أجل الشاشة؟

أنا اللي أشوفه إن الكل يتشكى من أسعار الأكورد 2008 فما بالكم لو تنزل بشاشة؟

كيف تبون الشاشة تنزل عنا وانتوا مو عايبتنكم الأسعار؟

أتوقع لو تنزل الشاشة محد بياخذ الموتر مع الشاشة إلا أقلية القليل .. :(

وبعدين إذا السالفة كانت جي أنا بزيد على سعر الأكورد 9 آلاف درهم وباخذ لي موتر أحسن من الأكورد ..

شباب من حقه الوكيل يوم ما بينزل الشاشة لأنه يعرف مسبقاً إنه مو وايدين بياخذون الموتر مع شاشة ..

ننتظر تعليقاتكم .. والسموحة .. وشكراً :o

**bu_da7eem** · 30-10-2007, 09:47 PM

ليش الفرق بين السيارة الي فيها شاشه والي ما فيها 9آلاف درهم مو كن السعر مبالغه فيه من الوكيل

**B Unique** · 30-10-2007, 09:51 PM

وليه ما يخليها شي اختياري ؟!

اللي معه يدفع
واللي ما معوش ما يلزموش

:p

**Black Accord 2008** · 30-10-2007, 09:56 PM

المشاركة الأصلية كتبت بواسطة B Unique

وليه ما يخليها شي اختياري ؟!

اللي معه يدفع
واللي ما معوش ما يلزموش

:p

هذا الكلام الصح ..

وأنا عني .. والله انتظر لين ينزل سعرها شوي واطقلي شاشه نفقيشن .. وااااو

بس خلاص حكمة أبو الهش ((( غصب بدون نفقيشن تبي ولا امسك باب المعرض )))

تحياتي

**F L A M E** · 30-10-2007, 10:19 PM

المشكله عملاتنا الخليجيه المربوطه بالدولار كل يوم تفقد من قيمتها مقابل العملات الاخرى.. بسبب هالدولار المريض..
واحنا نبي الاكورد والكامري .. مثل ماكانت قبل خمس سنين.. اسعارهم تبدأ اقل من 60 ألف

لازم نعرف انا القوه الشرائيه لاموالنا.. قاعده تنقص !!

عشان كذا.. الوكيل مضطر يجيب السياره بمواصفات اقل من الاسواق الاخرى.. عشان يحافظ على سعر معقول نسبيا ويضمن منافسه في السوق المحليه..

انا والله مادري عن الوكالات وكيف نظامهم.. لكن بالعقل.. الوكيل مايقدر يتخذ قرارت تضر بسمعه الشركه الام.. وفيه اتفاقيات اكيد..

>>>>>> شباب انا مو متخصص في الاقتصاد والا تسويق.. كل الكلام اللي فوق.. مجرد وجهة نظر.. يمكن صح ويمكن غلط :d

**The Godfather** · 30-10-2007, 11:56 PM

^^^^^^^^^^^^^^^^^^^^
الكويت ربطت بالدولار و فكت عنه عقب فتره
تدري شنو حصل
الناس اللي عندهم قروض تضاعفت عليهم الفوايد
و بهذا السبب يطالبون بعض المواطنين بالتعويض من الحكومه

>>>>>>>>>>>>>> متخصص محاسبه و ماخذ مادة اقتصاد هالكورس و اتفلسف شوي

و بالنسبه للاسعار.... الوكيل يقدر يقص من ارباحه في بيع اليساره
و يربحها بعدين بالصيانه
يعني يبيع بسعر اقل بس يبيع اكثر
و بالصيانه الكل راح يروح له

**F L A M E** · 31-10-2007, 06:49 AM

^
^
^
موضوع الصيانه..
أنا اعتقد مراكز الصيانه عند الوكيل.. شي مفروض عليه كوكيل للسياره وممثل للشركه الام في البلد..
ماعتقد انها ربحيه بالدرجه الاولى..

**meroholmes** · 31-10-2007, 09:48 AM

يا شباب الموضوع إنقلب إقتصادي

وإدا كان في فرق 9 الاف برضه الوكيل لابد إنه يجيبها إدا الواحد مستعد يدفع فوق 90 ألف ماجات على 9

إش حيخسر لو جابها بس والله الهوندا مو عيبها اللي وكيلها موعد الصيانة يديك بعد شهر كأنه مستشفى