المشاركة الأصلية كتبت بواسطة إنسان
لكل اللي سبوني او غلطوا علي
لهم مني السلام ومسامحين وعساكم على القوة ( المراجل باللسان سهلة )
وإذا على العقل تشوفونه ناقص عندي
فترى شيابنا قالوها زماااااااااااااان
كلن بعقله عايش
وإذا أنت وهو أعقل مني فما يحق لك تمنعني اكتب اللي أبيه بشرط ما اسبك او اشتم فيك ولو لقيتني سبيت بأحد غير وكالة الهوندا ( اللي كلكم كارهينها ) فلك مني بوسة على خشمك يمكن ترضيك
-----------------------
تعالوا سوا نشوف مواضيعكم ونشوف كلامي وردودي
وش غلطت عليكم فيه
إن معي هوندا وأذمها !!!
ولا لأني مصور ردود الشباب هنا !!!
ولا لأن اللي قلته صحيح مية بالمية !!!
المشكلة انكم طرتم بالعجة اكثر مني ، ولكل واحد منفعل اقول له ابلع ريقك واقرأ اللي بكتبه زين ترى ما يضرك مثل ما كتبت شتايم او انتقاصات تقرأ وش برد عليك فيه .
شغل المقارنات وأبان صاحب الموقع أولكم يعرف اني ما ادانيه ولا اطيقه ، لكن عمري ما دخلت عليكم هنا بالمنتدى وغلطت على واحد هنا يقارن لاني حكمت على نفسي بمذهب الشياب وكلن بعقله عايش .
إذا معي هوندا فتراني يالحبيب ذميت غباوة خراباتها ، سوء وكالتها ، رفع اصحابها لها فوق كل السيارات ، يعني تعيبون على اصحاب الكوامري انهم بازين بروحهم وسياراتهم يشوفونها فوق سيارات الناس وأنتم مثلهم ، لا بالعكس ، بعضكم اسوء منهم ، اقلها هم احترموا سياراتهم وقارنوها بفئتها مثل الاكورد والالتيما ، اما انتم رفعتوها لفئة أعلى منها ، لا وتجريتم وسبق قريت هنا ردود ان شركة هوندا تقنيتها ألمانية !!! تعال يالحبيب وقلي وش الالماني فيها ؟ فشخة الكفرات ؟ تراها بالالماني بعد الـ 120 مو على طول السيارة فاشخة .
بالجودة ؟ بلا دجل ، المكاين حتى بالكوري تعيش ، بشرط إنك تعطيها ، سيارة ما كملت ثلاث سنين وطرمبة الدريكسيون عندي تهرب زيت واصوات ورجة وهبالة ما بعدها ، لا تجيني انت وهو وتقول موسوس ، اغلبكم اشترى السيارة من فلوس بابا بعد النجاح يعني ما همه لو احترقت بعد اسبوع ، لانه ما تعب بقيمة السيارة مثلي لجل يحس إنه صدق وماهو دعاية إن الهوندا تعمر وتعيش ، وإن الوكيل يحترمه ويقدره لا ويدور رضاه بعد ، لان شغله انه يراعي اي عيب بسيارته ما دامت شركة هوندا تتحمل العيوب المصنعية .
كل ذمي عن الاكورد كانت حكاية لتجربتي انا ، ولسيارتي انا فلا تجيني وتقول ليش شريتها ، ظني ماهو شغلك لاني ما اعترضت هنا بمنتدى هوندا يوم على سالفة إن الهوندا أطلق سيارة ، فامسك ركنك وأمسك ركني ، وإن جيت بركني فلا تلومني ، المنتدى للكل ، ما هو بس للمطبلين وشلة اللي يبي الشكل الزين بالسيارة او الجنط العريض او السيستم والخراط هذا اللي ليته يركبه من سعة ، لا من فلوس المكافأة او مصروفه ، بس ارجع واقول ماهو شغلي ، وشوفوا وش ازور من اقسام بالمنتدى .
---------------------------
طيب ما اقنعك اللي فوق عن شرائي للهوندا وكرهي لخراباتها .
اجل بتصير زعلان لاني نشرت مشاركات وشكاوي الشباب هنا ؟
والله اللي ما يبي مشاركته تنشاف يخبيها بمخباته ، والمنتدى يتصفحه الضيف قبل العضو وكنت اقدر احط الرابط حق الهوندا بالمنتدى وتعال شوف الفضايح وقتها ، احنا هنا اسرة وحدة صح ، ابداعاتكم رازينها باليوتيوب ، وعيوب سياراتكم عيب وشرهة تنشاف من زباين التويوتا ؟؟!!
--------------------------
بكل المشاكل اللي عددتها ، تحاشيت اذكر اي مشكلة شخصية بسيارتي ، وصرفت الكلام عن المشاكل العامة الموجودة بكل الاكوردات ، وهنا الكل قدام خيارين : إما انه شايفني كاتب كلام صحيح وماكذبت على الهوندا بشيء ، لكن صراحتي جرحته ، او إنه مطبل كبير للهوندا ويدافع عنها كأنها أعطته السيارة ببلاش !!!
--------------------------
خاتمة أخيرة من نقاط :
1- موضوع النخبة تراني ما طلبته ، لاني عمري ما دورت على اشراف او تقدير بمنتدى ، لكن اسألوا أبان ليش أعطاني تشريف النخبة ، انا ما اجاوب ، لا وابشركم مالي حرف واحد بمنتدى النخبة ، وموضوع سحب الصفة أو بقاءها ما يهمني لاني لا سعيت وراها حتى تمنونها علي ، ولا ضايقت احد بشيء لو انرزت تحت اسمي ، تعودت اكون صادق واللي ما يعجبه صدقي مو شرط يسمعه !!
2- اليوم عرفة وبكره عيد ، ومن طبعي وسيع بال ، فكل من سبني مسموح بالذات اللي اعتبرني من فصيلة الكائنات اللي تنبح على قافلتكم ، ترانا صيام وعلى ابواب العيد .
3- رجاء خاص للإدارة بعدم حذف كلمة واحدة من ردود الشباب ، وإن عزمتم فردي أولى بالحذف من ردودهم بنظرهم ونظري .
4- ارحب بردودكم ولي عودة اكيدة لو لقيت ما أقدر أرد عليه ، واوصيكم كل واحد يبطل انفعالات وتطبيل ، ترى الشركة هوندا ولا تويوتا ماهي شركة ابوك ، ولا وهبوك السيارة بلاش ، تراك راكب حديد ، وإن سبه أحد تراك ناقص عقل لو زعلت .
5- للتنبيه ، ما مدحت التويوتا بشيء في موضوعي اللي زعلانين منه ، لان في عضو هنا ، يقول لو بكتب عيوب الكامري تمتلي صفحات .
6- إنسان حر بما يكتب وما ولد من يقرر وش أكتب ووش ما أكتب ، وتقدروا تشرفوني وتسوون لي دعاية بالبحث عن نكي بجوجل ومعرفة المنتديات اللي اشارك بها ووقتها انقلوا كلامي كله هنا .
كسر الله أنوف أعدائكم :d وجعل عيدكم مبارك
مواقع النشر (المفضلة)