قررت ابيع الكوبيه .. كم تتوقعون اتييب لي سعر؟

السلام عليكم ورحمة الله وبركاته

شو اخباركم؟


الموضوع امبين من عنوانه ..

اعتقد وايدين منكم يعرفون الاكورد مالتي؟؟ صح ولا انا غلطان؟
واكيد وايدين ما يعرفونها لانهم يداد على المنتدى؟؟

شكله يبا ينضرب لوول :p


المهم

هوندا اكورد كوبيه 2009
15000 كم
6 سلندر
بدي كت HFP اصلي من الوكاله
مع رنقات 19" HFP اصلية من امريكا (تواير يوكوهاما)
شاشة رود روفر
ستسم اكزوز MAGNAFLOW CATBACK
اضاءه زرقاء (من الوكاله)
زينون فيليبس 4300
مخفي(او تضليل) لومار مع ضمان 5 سنين



الصراحه انا خسرت على السياره وايد .. وانا بغيت اعرف اذا بغيت ابيعها كم بتييب لي سعر؟
اذا يابت سعر اوكيه ومناسب ببيعها .. واذا ما يابت .. ترى السياره عندي ... :rolleyes:

ليه تبيعها ؟

وش رايـك تعطيني السيـــاره
هـدية :o
وتصير اكوس واحد بالدنيـا هذي :d


بالنسبــه للسعـر والله مالي خبره بالكوبيـه
بس اعتقـد تجيب لك 80 الف وعليها او اقل بشويش
عشـان الموتر تو جديد وماهو ماشي

عسـا الله يوفقك بالبيعه ~

تحيتي

سته سلندر ومزود ومتعوب عليه ونظيف
بيعه لواحد يقدرها وابشر بالسعر الزين :cool:

أولا ما شاء الله على سيارتك

ثانيا اذا ممكن سبب البيع ؟؟

ثالثا بالنسبة للسعر فـ أنت خسران على السيارة واجد وأتوقع وصلت التكاليف فوق الـ20,000 درهم
يعني لو تشوف لك واحد مقدر السيارة والقطع اللي عليها يمكن تجيب لك حوووول الـ105,000

والله يوفقك يا رب

و عليكم السلام ورحمة الله وبركاته

والله بصراحة مثل ما قالوا الشباب هـي على تقديرالمشتري فقط لا غير

للأن معظم الشريطيه كلامهم معروف راح يقلك شيل كل الأغراض منها و راح اشتريها بـ المبلغ الفلاني

و ما راح يكون التعديل شي مبرر بالنسبة له

-وجهة نظري-

اذا انت في امس الحاجة لـ بيعها
خـلها معك فترة وجيزة من الزمن و بيع الأغراض الإضافيه حبه حبه و بعدين بيعها مثل ما كانت على حالة الوكالة
على شأن تكون أقل خساره

اما اذا كنت تبي تبيعها بدون سبب رئيسي
فـ أنصحك انك لا تبيعها

:rolleyes:

وبالتوفيق ان شاء الله

والله ياخوي الجوكر انا اشوف حرام انك تبيعها عشان مشكلة الأصوات

ترى الأصوات لها حل ومريح بعد

صوت الديكور الخلفي بس يبيلك تفك السكرو اللي في الشنطه وتحط سيليكون وبتروح المشكله نهائيا

وغير كدا ما اتوقع عندك مشاكل ثانيه

:)

والله يا جماعة ساعات اقول حرام اللي دفعته على هالسياره ..


السياره الصراحه مافيها شيء ابدا ..

الا شيء واحد هو اللي كرهني في السياره ..

الاصوات اللي تطلع من داخل السياره .. اصوات الديكور ..

الصراحه انا وايد انقهر منها .. وما احبها ..

بس في ناس ما تهتم فيها ..

وصدقوني ان السياره مافيها شيء ابدا ..

ومثل ما قال اخوي ( محجوب ) انا خسرت على السياره قريب ال 25 الف ..

أبو الريش .. كلامك صحيح 100% ...

شكلي بسوي مثل ما انت قلت لي .. وبريح راسي

memories

الا عندي وايد اصوات ..
من البابين والفتحه .. والصوت اللي في الخلف .. هذا يروح ويرجع بعد 2000 او 3000 كيلو

ومليت من كثر ما اتضارب ويا الوكاله الخايسة .. شغلهم زبالة

وكلمت شخصين عندهم اكورد 6 سلندر واكدوا لي ان ما عندهم هالاصوات ..

والله السيارهـ روعه وغيرك يتمناها وحرآم تبيعها عشان أصوات :(

السياره بـ 120 ألف مو بـ 500 ألف < لو سعرها 500 ألف نقول بيعها عشان الأصوات

لا تنسى تستخير قبل البيع

والله مدري وش اقول بس فكر قبل كل شي ولا تستعجل عشان ما تندم لا سمح الله

بالتوفيق لك

@اكورد وبس@

الصراحه الهوندا الحين بس اسم .. بدون جوده .. كرهتها هالسياره وما افكر اشتري من شركه هوندا مره ثانية


A-C-C-O-R-D

الله يوفق الجميع ان شاء الله

اقتباس:

---

المشاركة الأصلية كتبت بواسطة mr-aljoker

@اكورد وبس@

الصراحه الهوندا الحين بس اسم .. بدون جوده .. كرهتها هالسياره وما افكر اشتري من شركه هوندا مره ثانية

---

ما راح تلاقي جوده بسيارهـ رخيصه ويابانيه < إذا تبي جوده خذ ألماني :)

وين تبي تدور الجوده بالالتيما مثلا ؟

ولا الكامري (( الأوريون )) ؟

ولا الكابريس ؟

ولا الومينا ؟

لو تلاحظ كل سياره ذكرتها فوق بنفس فئه الاكورد فيه شئ يعيبها ولا فيه شئ كامل

الالتيما تفكك + داخليه مو حلوه لكن مواصفات ومكينه حلوه < مهي كامله :)

الكامري (( الأوريون )) أصوات بالديكور + داخليه مو حلوه لكن مواصفات ومكينه حلوه < مهي كامله :)

الكابريس والومينا معروفات بكثرت الخرابات والمشاكل لكن مكينه قويه حيل < مهي كامله :)

وإذا ناوي على ألماني الله يعينك على قطع الغيار < ولا تنسى حتى الألماني فيه خرابات

وإذا ناوي على كوري الله يوفقك

تحياتي

@اكورد وبس@.

ياسيدي ربي يوفقك يارب ويرزقك بلبيعه الي تسرك

السلام عليكم ...
انا مب وياك في موضوع البيع ماشاء الله موترك حليو..و بالنسبة لاصوات الديكور و الفتحة هاتلي سيارة ياباني من نفس الفئة ما فيها صوت هوا ولا اصوات خفيفة..خلها عندك اتكد سنتين على الاقل و عقب يوم بتبيعها بتكون طلعت جيمتها و بنفس الوقت استفد من بيزاتها ..
اخوي لو تكرمت انا بي حبيت اتخبرك عن سيستم الماجنا فلو لو حبيت تبيعه..بصراحة انا ادور واحد مستعمل والسموحة

@اكورد وبس@


لووول .. لا تحاول تقنعني اخوي ... الهوندا خلاص .. قامت تلحق خواتها ( تويوتا ونيسان ) والازمة اثرت فيها وايد .. وكل شيء قام يركب فيها من الرخيص ..
واصلا انا كنت احب الاكورد من زمان .. مب اول اكورد اشتريها ..
بس اليديده الصراحه ما تتقارن مع القديمة ..
وبعدين كل السيارات اللي قلت عنها ... صح كلامك فيها .. وانا ما اقتنع بأي سيارة قلت عنها .. ولا حتى افكر اشتريها ..
والألماني اذا خذته لازم تاخذ معاه Service Contract ولا انساه .. لانك بتتعب وياه ..
والكوري لو شو ما يستوي ما اخذه ..



A N M A R

الله يخليك يا رب .. وتسلم


zaman

صح كلامك .. كل السيارات فيها صوت .. بس مثل سيارتي ... لالالالالالالا واتحداك بعد :d ..
انا السياره كملت سنة عندي وتعبت ويا الوكاله ..
ورديت عليك عالخاص

معروف كثر التعديل والفك والتركيب هو الي يسبب الأصوات الي عندك مع إنه كل إكسسورات تعديلك أصلي ماشاء الله لكن يظل هذا السبب الأكيد

فكر ولا تستعجل والله يوفقك

أهلللللللللللللللللللللللللا بالجوكر ..!
أنا صراحة من المتابعين من زمان على تعديلاتك على السيارة ومشالله تبارك الله كله شغل تمام وأصلي ..!

ووالله إني زعلت يوم شفت هالموضوع ,,, واللي يقهر زيادة عدم تعاون الوكالة معاك ..

عموما أخوي نصيحة مني السيارة لسه جديدة يعني أنا استغربت لمى شفت 15000 بس (مشالله ) .. فنصيحتي أخوي روح دور لها على حل دائم حتى لو بتغير قطع صغير المهم تروح الأصوات ((( هذا طبعا إذا ما نفعت معاك طرق أخونا كاكا ..!

على العموم الله يوفقك ويكتب لك اللي فيه الخير..
سلااام ..!

التعديل ما له تأثير على أصوات الشنطة

أنا كان عندي أصوات الشنطة و البيبان الي وره + صوت في كرسي السائق

صوت الشنطة 6 مرات أقول لهم و يحطون سيليكون و مثل ما قال 3000 كيلو ويرجع توي أمس متهاوش معاهم سوو لي ربورت و قال لو لي إذا رجع مره ثانية بصير كلام غير

صوت الابواب مرتين يصلحونه بس الحين مافيه صوت من 15000كيلو

صوت كرسي السائق صلحوه من أول مره

أنا نفسك كرهت السيارة بس أرجع أحبها

شنو قالوا لك الوكالة ؟

عندك المكتب الاقليمي لهوندا في دبي و غصبا عن الوكالة يصلحوها لك


الي بياخذ سيارتك بيستانس سيارة جاهزة معدلة وبسعر المستعملة بس وكالة

انا من رايي انك تتعود على صوت الديكور وطنششششششش ولا كنك سامع احد ، وخليك ريلاكس وتعوذ من الشيطان (ان المبذرين اخوان الشياطين) والجوده بشكل عام كل سنه داون عن السنه اللي قبلها بالنسبه للسيارات اليابانيه بشكل عام

تبقى الهوندا الافضل بالنسبه للسعر، والاسوا بالنسبه للوكيل

ما أدري وش اقول لك و الله يعينك

انا عضو جديد و لا أعرف شئ عنك و لا عن سيارتك بس حسب الشباب شكل قضيتك قديمه

الأصوات هذي ظاهره منتشره في أغلب السيارات بس فيه ناس يتحسسون من الأصوات و فيه ناس عادي جداً ما يتضايقون و أعتقد أنك متضايق

لا تتسرع و استخير الله

بخصوص الاكسسوارات عندنا في السعودية أي تعديل أو إضافه على السياره ينقص من سعره و لا يزيدها إلا في حالة أنك تبيع السياره لشخص يبغى هذه المواصفات و هذه حالة نادره

إذا عزمت تبيع الله يوفقك بالبيعه

اقتباس:

---

المشاركة الأصلية كتبت بواسطة MaLiK1987

معروف كثر التعديل والفك والتركيب هو الي يسبب الأصوات الي عندك مع إنه كل إكسسورات تعديلك أصلي ماشاء الله لكن يظل هذا السبب الأكيد

فكر ولا تستعجل والله يوفقك

---

لا يا اخوي .. غلطان ... كل الاصوات اللي تطلع .. ما يخصها في التعديلات اللي سويتها

عيل انا ركبت شاشة ... شو دخلها في السقف؟؟؟ يالله خبرني ؟؟؟؟

والاصوات قبل لا اسوي اي تعديل .. والسياره يديده وحتى قبل لا اركب رنقات او بدي كت ..

ابا تفسير منطقي؟؟؟؟؟؟؟؟؟؟؟؟؟؟؟؟؟

اقتباس:

---

المشاركة الأصلية كتبت بواسطة almaster

أهلللللللللللللللللللللللللا بالجوكر ..!
أنا صراحة من المتابعين من زمان على تعديلاتك على السيارة ومشالله تبارك الله كله شغل تمام وأصلي ..!

ووالله إني زعلت يوم شفت هالموضوع ,,, واللي يقهر زيادة عدم تعاون الوكالة معاك ..

عموما أخوي نصيحة مني السيارة لسه جديدة يعني أنا استغربت لمى شفت 15000 بس (مشالله ) .. فنصيحتي أخوي روح دور لها على حل دائم حتى لو بتغير قطع صغير المهم تروح الأصوات ((( هذا طبعا إذا ما نفعت معاك طرق أخونا كاكا ..!

على العموم الله يوفقك ويكتب لك اللي فيه الخير..
سلااام ..!

---

الله يخليك اخوي .. ومن ذوقك ..

بالعكس .. الوكاله متعاونين لدرجة كبيره .. واهتمام بسيارتي بشكل غير طبيعي ..
وادخلها الوكاله بدون مواعيد .. وسيارتي لها الاوليه ..
وهم يعترفون بأني انا مدلع سيارتي ومهتم فيها .. ومحد مر عليهم يهتم بسيارته مثلي (قولوا ماشاء الله)

بس دايما ترجع المشاكل .. وحتى مدير الورشة مستغرب .. يقول سيارتك الوحيده اللي جذي .. يعني صوت من الفتحة يعدلونه .. بعد اقل من اسبوع .. يرجع الصوت ومعاه صوت ثاني ..

واكيد بتستغرب .. لاني انا ما اسوق السياره .. اروح الشغل وارجع .. يعني ما اسوقها وايد .. واكثر الوقت السياره واقفة

وطرق KAKA خليت الوكاله يسوونها .. وقلت لها عن الطرق .. بس للاسف .. بدون فايدة

اقتباس:

---

المشاركة الأصلية كتبت بواسطة vtec_m79

التعديل ما له تأثير على أصوات الشنطة

أنا كان عندي أصوات الشنطة و البيبان الي وره + صوت في كرسي السائق

صوت الشنطة 6 مرات أقول لهم و يحطون سيليكون و مثل ما قال 3000 كيلو ويرجع توي أمس متهاوش معاهم سوو لي ربورت و قال لو لي إذا رجع مره ثانية بصير كلام غير

صوت الابواب مرتين يصلحونه بس الحين مافيه صوت من 15000كيلو

صوت كرسي السائق صلحوه من أول مره

أنا نفسك كرهت السيارة بس أرجع أحبها

شنو قالوا لك الوكالة ؟

عندك المكتب الاقليمي لهوندا في دبي و غصبا عن الوكالة يصلحوها لك


الي بياخذ سيارتك بيستانس سيارة جاهزة معدلة وبسعر المستعملة بس وكالة

---

كرسي السايق غيروا الفريم كامل .. كانت فيه مشكله ..
وصوت اللي ورى .. انسى انا اقولك بيرجع .. واخر مره تهديد مع الوكاله هههههه
والمكتب الاقليمي كلمتهم مرتين وبدون فايدة .. شكلي بحول على اليابان لووول
وصون الابواب هو اللي ذبحني .. مع صوت الفتحة


لووول .. ما عليه خله يستانس .. انا خلاص مليت منها وكرهتها ..




f_15ss


صدقك .... طنش تعش لووول

واعوذ بالله من ابليس



shagra24

حتى عندنا .. يعني انت مرب اكسسوارات ولا لا .. نفس الشيء .. ومثل ما قلت .. لازم تدور على اللي يقدر قيمتها ..




والله يوفق الجميع ان شاء الله

اقتباس:

---

لا يا اخوي .. غلطان ... كل الاصوات اللي تطلع .. ما يخصها في التعديلات اللي سويتها

عيل انا ركبت شاشة ... شو دخلها في السقف؟؟؟ يالله خبرني ؟؟؟؟

والاصوات قبل لا اسوي اي تعديل .. والسياره يديده وحتى قبل لا اركب رنقات او بدي كت ..

ابا تفسير منطقي؟؟؟؟؟؟؟؟؟؟؟؟؟؟؟؟؟

---

أرجع أقولك الفك والتركيب هو السبب الوحيد في الأصوات حتى لو كانت الوكاله تفك وتركب مستحيل يكونو احسن من المصنع
عشان كذا لو كان عندك صوتك ( من الداخل ) لا تحاول تروح الوكاله وتقول ابغى أحلل الفلوس الي دفعتها وحاول انك تتأقلم مع الصوت لأنه بيعقدو السالفه زياده وفك وركب وركب وفك لين ما يزيد الصوت اكثر ويستحال تضبيطه

انا اقول 85الف

اقتباس:

---

المشاركة الأصلية كتبت بواسطة MaLiK1987

أرجع أقولك الفك والتركيب هو السبب الوحيد في الأصوات حتى لو كانت الوكاله تفك وتركب مستحيل يكونو احسن من المصنع

عشان كذا لو كان عندك صوتك ( من الداخل ) لا تحاول تروح الوكاله وتقول ابغى أحلل الفلوس الي دفعتها وحاول انك تتأقلم مع الصوت لأنه بيعقدو السالفه زياده وفك وركب وركب وفك لين ما يزيد الصوت اكثر ويستحال تضبيطه

---

انا ما قلت شيء .. كلامك صح 100% ... بس هالاصوات لما كانت يديدة وتوها 1500 كيلو او اقل بعد ..

اقتباس:

---

المشاركة الأصلية كتبت بواسطة عاشق الاكورد فديتها

انا اقول 85الف

---

مثل ما يقولون .. ( استرييح يا الطيب وبتييك الدلة )

بخليها حق الدريول ولا ابيعها بهالسعر .. :confused: