مشورتكم يالربع ... أغير الباب والا أصلحه ... وكالة والا ورشة ؟؟

السلام عليكم

قدر الله وصدمتني سيارة تتبع لشركة بن شيهون
سيارتي أكورد سبشل 2012
الصدمة جات على البابين اليمين ( الأمامي انعدم والخلفي تأثر بشكل بسيط )

بعد المفاوضات عوضتني الشركة بمبلغ 6 آلاف ريال لأنه ماعندهم تأمين والإستمارة منتهية والخطأ عليهم 100%

المهم مالكم بالطويله رحت وكالة هوندا في الرياض فرع الخالدية
قالوا الباب الأمامي يتغير والخلفي ممكن نسمكره وممكن نغيره لو بغيت ثم نرش البابين

قيمة الباب الأمامي 1257 ريال والإطار النيكل قالوا لازم تشتريه لأنه مايضبط تنقله وسعره 294 ريال
قيمة الباب الخلفي 1500 ريال والإطار النيكل 294 ريال

شغل يد بعد التخفيض 3000 ريال

يعني لو صلحت الباب الثاني بدون تغييره بيكلفني تقريبا 4550
ولو غيرت الباب الخلفي بيكلفني تقريبا 6350 تقريبا

هناك من نصحني بتصليح الباب الخلفي لأن ضربته بسيطة وهناك من حذرني من السمكرة وقالي غير باب لأن السيارة جديدة حرام تسمكرها

هناك من نصحني أن أشتري القطع وكالة وأصلحها خارج الوكالة بس أخاف يكون جودة البوية ماتتحمل مثل بوية الوكالة ؟؟؟؟

وش تنصحوني ؟؟؟؟



صور الحادث

http://img04.arabsh.com/uploads/imag...404c62f601.jpg



http://img04.arabsh.com/uploads/imag...404c62f600.jpg

شف اذا الباب الامامي يتصلح ضبطه بورشه محترمه وارتاح وخذ الفوسه وخلها عندك لانو حرام تغير البابين هاذى وهت نظري وانت صل واستخر والله يكتبك الى فيه الصالح

حمدلله على سلامتك اخوي والله يعوضك كل خير
بالنسبه لصدمه انا اشوف انا الحمدلله خفيفه وما سوت اضرار ومن وجهة نضري انك تغير الباب الامامي بس لان حرام والله يتغير الباب الخلفي الدقه جت بسيطه مره وبتعدل وان شاء الله ما يبان شي لكن انت غير الباب الامامي ورش البويه في الوكاله لان لون الاكورد 2012 صعب شويه مو ابيض ولا لولي لان بفرق معاك لو رشيت برا وانت شوف الي يناسبك والله يستر عليك
تحياتي لك .,,,

وعليكم السلام

انا اشوف انك تسمكر البابين في ورشة محترمه

سلام عليكم و رحمة الله

اول شي الحمدلله على سلامتك

ثاني شي اسمع نصيحتي افضل لك

انا اشوف ان الحادث مو قوي مرآ و مايستحمل تغير البابين اثنينهم

لو ان الحادث قوي و تأثرو البابين اثنينهم و انطعجو كان قلت اي غيرهم اثنينهم

غير باب واحد وركب لك جديد فقط بأعتبار انها جديده و حرام تسوي لها سمكره للبابين

لكن الحادث بسيط .. و من وجهة نظري سو كل شي في الوكالة علشان اضمن لك وفي نفس الوقت ماتتوهق.. شغل الوكالة يريح البال

غير الباب الأمامي فقط عن الحسوفه و الخلفي سمكره و رش .. و الباقي حطه في جيبك او شف وش تحتاج سيارتك من زوايد و إضافات و استفيد
من الباقي


في ناس بتقولك حرام تضيع فلوسك على تغيير بابين و سمكرهم اثنينهم

و في ناس بتقولك حرام تسوي لها سمكره السياره جديده و تستاهل انك تغير البابين

انا اقولك غير باب واحد فقط و الثاني سمكره و رشه .. خير الأمور اوسطها

اسمع نصيحتي
خذ فلوسك الـ 6000
وسمكر البالبين في ورشة محترمه ورشة في الوكاله .
ولا تغير شيئ حرام الصدمه جدا خفيفه

الصدمة ولله الحمد والشكر بسيطة و خفيفة .


باختصار لو تروح لتشليح ( الحائر ) جنوب الرياض بعد حي الدار البيضاء على اليمين

راح تلقى من غير شر اكوردات 2012 نفس لون سيارتك أبوابها سليمة .. خذها وعطهم الرجيع ( إذا وافقوا على الرجيع )

اللي هي بابين سيارتك ... ( بس أهم شيء تأكد إن ما جاهم سمكره أو رش ) ... وخلهم يفكون ديكور البابين ويركبونها

على الأبواب الجديدة ... وبكذا راح توفر الجهد والمال وإن السيارة تعتبر ما جاها شيء .

ملاحظة / لا تروح أبداً لتشليح النظيم اللي الآن نقلوه على طريق الدمام السريع برا الرياض تقريباً 30 كيلو لأن ما فيه شيء أبداً .

و الحمد لله على سلامتك ... وآسف على الإطــــــــــــالــــــــــــــــــــة .


( ردي على الموضوع مجرد رأي يحتمل الصواب أو الخطأ )

والله نصيحتي من نصيحة الاخوان الباب الخلفي خله مكانه
في ورش محترفه تصبغلك صبغ موضعي يعني الباب كلة مانصبغ تتعدل الضربه لجهاز سحب وتنصبغ وانا مجربها ماتبين ولوتجيب دربيل ماتلاحظ الفرق
وفي حل ثاني تروح التشليح وتدورلك بابين مثل لون سيارتك وبعضهم تحصله قراطيسه عليه ونزيف وراكب على السياره وتبدلهم معى اللي عندك توفر لك مبلغ طيب
والله يوفقك

أخوي سلطان عندي نصيحة مختلفة عن الإخوان كلهم !!

إذا السيارة ما يجيها تنسيم مع البيبان أو ماء

اتركها وخلها زي ما هي ! الصدمة خفيفة جدا ولا تحتاج سمكرة ولا شيء !!!

رأي شخصي بحت ولو مكانك والله لأتركها على ماهي عليه لأن الغشمان واجد وراح يجي لا قدر الله مرة ثانية من يصدمها
فلا تستعجل عليها , خل دراهمك معاك واستفيد منها في شيء آخر ..............!

الله يعوض عليك وعسى الله يحفظك من كل مكروه
محبتي وتقديري @@

أشكركم أحبتي على مشاركاتكم وعلى إقتراحاتكم لي
رحت تشليح الحائر مثل مانصحوني الأخوة لكن المشكلة إن أغلب التشاليح تبيع الباب كامل بما فيه بمبلغ ثلاثة أو أربع آلاف
مالقيت الا محل واحد يبيع الأبواب حديد لقيت عنده باب يدعي إنه باب 2012 مع إني ماني مصدقه لأنه لون البوية تغير بفعل الزمن ويقول يبي فيه 1300 ريال مع أن باب الوكالة ب 1257 ريال

بعدها طلعت من التشاليح ولقيت أنسب حل لي أشتريه وكالة
لكن بالنسبة للباب الثاني لازلت محتار أغيره والا أصلحه
لأنه راح يتسمكر يعني بيكون فيه معجون

فما أدري وش أختار

اخوي نصيحتي مثل ماقلت لك

الباب الأمامي غيره من الوكالة اضمن لك و ارخص لك و الخلفي سمكره

و الأمور كلها بخير و انت براحتك .. سلام