تجربتي هوندا أكورد 2013 _ 30000 كيلو أو 3000 كيلو ( ما لها وما عليها )
السلام عليكم ورحمة الله وبركاته
حياكم الله يا شباب كلن باسمه :)
هذا أول موضوع لي بالمنتدى الجميل عساه يرجع مثل أول و أفضل ويصير نشيط علشان نستفيد جميعا ان شاء الله
عندي اليوم تجربة سيارتي الجديدة هوندا أكورد 2013 راح أذكرلكم ميزاتها وعيوبها بكل أريحية وبعيدا عن التعصب لاي شركة وراح أقارنها بسيارتي القديمة أو السيارات المنافسة للأكورد .
بسم الله الرحمن الرحيم
*الموضوع بيكون على شكل سوالف فأنصح انك تجيب كاست شاي أو قهوة :) .
في البداية أخوكم من سكان الرياض طالب جامعي كان عندي سوناتا 2007 فيها قصة شاص فوق وعشت معها 3 سنوات ع الحلوة و المرة الحمد لله وتعلمت عليها مثل ما يقولو وحكحكتها وصدمني من الخلف تاكسي وجاب الشاص الخلفي ولكني استمريت ع السيارة والحمد لله من صبر نال . سيارتي الجديد هي هوندا أكورد 2013 ستاندرد ذهبي أخذتها مستعملة من رجال استخدامه نظيف ممشى 27000 والحمد لله فحصت السيارة وكنت راضي عن المشاكل البسيطة الي كانت بالسيارة مثل حذفة يمين وتغير فلتر الهواء وأشياء ثانية بسيطة :) وبحمد الله تقاطيت مع الوالد الله يحفظه لي ويحفظلنا أباءنا جميعا واشترينا السيارة بعد محاولات شد وسحب مع الوالد الين اقتنع :) .
الحين كان أول هدف لي اني امشي السيارة الى 30 الف علشان اخذها الوكيل لاكثر من سبب وهم اني اطمئن على السيارة هل فيها مشكلة أو لا و السبب الثاني وهو الأهم اني أشوف هل فعلا يستاهل الواحد يزور الوكيل كل 5 الاف كيلو للصيانة أو أخليها كل 10 أو ألغي الفكرة من الأساس .
طيب الان السيارة مشيتها 30 الف ورحت للوكيل ( بغض النظر عن الفلم الي سويته للوكالة ) لكن الحمد لله السيارة طلعت سليمة والان أبدأ بالايجابيات والسلبيات للسيارة وعلى فكرة يمكن تقولو أخوكم موسوس ولكن هذي مجرد وجهة نظري الشخصية أو الأشياء الي كنت أتمناها تكون بالسيارة ونبدأ بسم الله :
* الرجال قبلي كان حاط حماية وجهية من درايف 7 بمبلغ 1750 ريال وراجعتهم لقيت عندهم خصم خاص لي للتظليل من 2050 الى 1770 وظللت نانوسيراميك وأنصح كل واحد يستخدم التظليل الحراري الأصلي لانه لك وللزمن ان شاء الله .
خليني أكون إيجابي أولا ( ممكن لا تستعجل على الحكم علي اني متعصب وتنتظر الى أن تقرأ السلبيات ) /
1- عزل السيارة الأرضي جبار لأبعد الحدود وأنا أستغرب من الناس الي اشتكو من العزل الأرضي بصراحة :( وبأقولكم شي أنا رحت للغرابي ألبس السيارة مثل الوكالة ولقيتلي تلبسية مفصلة للأكورد ومكتوب عليها Accord بمبلغ 400 ريال إماراتية والخطة الي بعدها كانت عبارة عن وضع لبادات على الأرض علشان العزل الأرضي يزيد :) ، الرجال بدأ يفك بالمقاعد الخلفية وبعد فك الإسفنج شفت كمية كبيييرة من مادة العزل على بودي السيارة ( ما أدري ايش اسمها لكنها مثل الشوكولاته المايعة هع ) وإضافة على ذلك الأرضية كانت معزولة بلبادات بسمك تقريبا سانتي الا شوي وبالتالي ألغيت فكرت العزل الأرضي من راسي .
________________________
2- أرفع القبعة للشركة على المساعدات الأمامية مراكة ماكفرسون والخلفية الوصلات المتقطعة لانها تعطي ثبات خيالي للسيارة من الأمام لدرجة اني ادخل لفات واسعة على سرعة 90 بدون ما يسحبني القصور الذاتي ولكن بدي السيارة يميل للاستجابة عوضا عني << داخل مخرج 11 وأنا باتجاه الشمال ودخلت التحويلة الجديد وأنا على الكبري ماشي 100 ع اللفة ماشاء الله ولا كأنه فيه شي :) .
________________________
3- استهلاكية الوقود للسيارة ماشاء الله ممتازة جدا واليكم 4 توانكي عبيتهم ورا بعض سعر التعبئة 27-28 ريال مع استخدام المكيف بنسبة 70% واستخدام نظام اقتصادي للوقود (Eco) والمشي تحت 120 سرعة مع التفلت يمكن 4 أو 5 مرات اجيب 160-180 بعد هذا نور التانكي بعد قطع ممسافة 665 كيلو ولكن ! المدى المكتوب في شاشة المعلومات يقولي باقيلك 80 كيلو يعني في أسوأ الأحوال 700 كيلو ع التانكي داخل الرياض وزحماتها يعني اتوقع لو امسك خط بسرعة 120 اجيب 800 كيلو والله أعلم أو أكثر ماعندي خلفية عن خطوط السفر أبدا .
* نظام Eco ما يوفر من استهلاك الوقود لكن يخليك تدعس لنص الدعسة ويعطيلك تسارع ضعيف يعني علشان ما تتهيض بسرعة ههههه .
* رحت اعبي بنزين فل و أول ما طق التانكي فل كان السعر 27.15 ريال وصار الرجال يعبي نقطة ويرجع يقطع آليا الين وصل 27.65 وقلتله بس وقف الله يخليك ادفعلك ريالك بس وقف لاني خفت بصراحة وهو شكله كل ما يضغط يوقف على طول :( ، بعد ما رجعت لكتيب المستخدم قال مجرد انه يطق لا تحط شي زيادة لان التانكي لازم يكون فيه هواء لان حجم البنزين يزيد مع الحرارة ويصير يضغط ع التانكي . ومن هنا عرفت سبب اني كنا أشم ريحت البنزين بعد ما أعبي السوسو حقتي في 27 ريال أو 28 :( .
________________________
4- النظام الصوتي في السيارة لو احطه 19 من أصل 40 ما أسمع السيارة الي جنبي عوضا اني ما أسمع صوت مكينتي وهذا خطير طبعا لان صارلي حادث بالسوسو حقتي وانا معلي المسجل أعلى شي ودخلت لفة وأنا مسرع مب منتبه وقدر الله علي وصدمت ، ولو أعلي الصوت على 40 وأنا ماشي بالصعوبة أسمع صوت البوري حقي :( .
________________________
5- غيارات السيارة ماشاء الله سلسة الا بعض الاحيان باستخدام نظام Eco مع السرعات البسيطة 10-30 وانا المس دعاسة البنزين تصير السيارة ما تدري تعطي غيار ولا لا هههه وبعض الاحيان يغير للثاني واحس بالغيار ولكن هذا الكلام نفسه واجهته في السوناتا وليس عيب من السيارة ولكن عيب من السائق << طبعا انا طالع منها هع .
________________________
6- يمكنني التحكم بالمرايا الجانبية بالكهرباء في اتجاهين في الوقت نفسه يعني أقدر ارفع المراية وألفها يمين بنفس الوقت :) .
________________________
7- بعض الأحيان يكون الأمان ممتاز وبعض الأحيان يكون الأمان مزعج بصراحة وهنا راح أذكر الأمان الممتاز وهو لما انسى الأنوار الأمامية مفتوحة وأسكر الباب تتسكر مب أصحى ألاقي البطارية مخلصة مثل ماصارلي مع السوسو ، ثانيا في خيار في شاشة المعلومات اسمه (خصائص السيارة) ما يشتغل الا لما تحط القير على P .
________________________
8- طارة السيارة تتحرك لفوق ولتحت وكمان تقدر تحركها بشكل تلسكوبي لبرا و جوا :) .
________________________
9- فيه نظام جميل بالسيارة وهو SVC وهو أن صوت المسجل بالسيارة يتكيف مع زيادة السرعة يعني تزيد سرعتك يزيد صوت المسجل و العكس << شكرا لكتيب السيارة للشرح .
________________________
10- في مسئلة طويلة شوي خليتها آخر نقطة علشان اتفلت فيها وهي مسئلة التسويق في السيارات وباخذها من نقطتين فقط وهم الاكسسوارات و الميكانيكا :
بعض المنافسين يقدملك سيارة من الفضاء ماشاء الله من كثر الإلكترونيات المتوفرة في السيارة و إضاءة LED و أنوار زينون و حساسات خلفية و فتحة سقف وكراسي جلد وكل هذا الكلام ولسة السيارة في النص فل ما وصلنا الفل ولــــــــــكــــــــن ! تجي للسيارة تشوف هل فيها أقل نظام أمان للسيارة وهو نظام منع انغلاق الفرامل ABS تلاقي السيارة فقط في الفئة الفل منها يجي فيها ABS و VSA (تراكشن بالعامية) وفي المقابل تلاقي السيارة بـ 76.5 ألف وكالة ، وبعض المنافسين تلاقيه لا يعطيك عنب اليمن ولا بلح الشام (في الستاندرد) يعني تلاقي باب السيارة للسائق من أوله الين آخره هو عبارة عن قطعة بلاستيكية واحدة (وااااحدة) و السيارة موديل 2013 وممكن نلتمس العذر للوكيل لان السيارة تستخدم للتكاسي ومع ذلك السيارة تلاقيها غالية لانه ضامن شركات التكاسي بتشتري غصب ، وبعض المنافسين لو تشوف سيارته بالشارع تستغرب تقول سبحان الله متى وصلت هالسيارة للسعودية من قلة ما تشوفها علما انها يابانية و السبب سمعتها بالورش لك عليها ، وبالنسبة للهوندا تاخذلك اسبيشل فيها كل مواصفات الفل في الميكانيكا الا انه ينقصها نظام ثالث للفرامل وهو أظنه توزيع الفرامل على الكفرات والباقي تسميه اكسسوارات يعني تقدر تشتريه سواء من الوكيل (أبدا لا يحبذ) أو من خارج الوكيل .
* بالنسبة للنقطة الي فوق فأنا تكلمت على السيارات مكاين 2.4 وهم أربعة مشهورة بالسعودية << ما ودي أكمل علشان ما أجرح أحد .
الســــــــــــــــــــــلبيات للسيارة :
1- أكثر مشكلة قريت عنها بصراحة وهي مشكلة تهريب الهواء من الأبواب الأمامية بعد 100-120 كيلو وبصراحة المشكلة واضحة جدا جدا ما يبيلها لف ودوران وراح اخذ موعد مع الوكالة يشوفولي حل فيها ان شاء الله لاني لما رحت الوكالة قابلت بالصدفة واحد جاي يسوي صيانة 10الاف وقالهم شيكولي على جلد الباب الأمامي تهرب هوا << بما انه جاي يسوي صيانة قبل 3 أو 4 أيام والصيانة للعشرة آلاف فغالبا السيارة 2014 :( ، ننتظر الوكيل ايش يقول أو شركة هوندا تستدعينا لان المشكلة ما منها هرب :( .
________________________
2- كرسي السواق غير مريح بالنسبة لي بصراحة علما انه واسع وتتحرك فيه بأريحية وفيه الوضعية الي تحبها ولكن في أسفل الظهر فيه منطقة منتفخة ولا تقدر تتحكم في شدة الانتفاخ ( قد يكون هذا هو الأفضل لصحة السواق ) لكني غير مرتاح فيه :( واقول ان شاء الله اتعود عليه .
________________________
3- النياكل في السيارة الداخلية مثل النيكل حول القير و نيكل علامة هوندا في الطارة تعكس الشمس بشكل مزعج علما اني مركب تظليل يعكس الوهج للشمس بنسبة 72% ! أجل لو اني مب مركب تظليل وش بيصير :( ( نيكل القير يعكس بعيني و نيكل الطارة يعكس بالسقف فوق عيوني ويحولني ههه ) .
________________________
4- الأمان الزائد بعض الأحيان مزعج مثلا لازم احط القير على P علشان يطلع المفتاح وهذا ما كنت اعترف فيه في السوسو هههه N ,اربط الجلنط واطلع من السيارة ، والنقطة الثانية لازم جميع أبواب السيارة تكون مغلقة قبل ما يبدأ ريموت السيارة بالاستجابة لإغلاق الأبواب :( ، والنقطة الثالثة لازم اضغط على زر OK في شاشة المعلومات علشان أوافق على التنبيه الي يطلعلي كل مرة لما ادق سلف وعجزت اشيله ( خلاصة التحذير : لا تستخدم الشاشة الا وانت مركز و الطريق فاضي ) .
________________________
5- قرأت ان الفحمات تطلع صوت لما تضغط فرامل وهذا كلام غير صحيح لاني استلمت السيارة وفحماتها نص عمر ولو تفرمل من 120 الى 0 بأقوى شي ماراح تسمع شي !
طيب تقولولي ليش يا حبيبي تحط هذي في السلبيات ؟!
أقولكم لانك لو فرملت من سرعة 180 يطلع الصوت وهذا شيء طبيعي في السيارة ولكن بصراحة يطلع الصوت بدري يعني انا كنت افرمل بالسوسو من 180 الى 100 وبعدين يطلع الصوت لكن هنا بالفحمات القديمة يطلع الصوت قبل ( سبب الصوت ان الفحمات تصير نار و الاستجابة تقل بشكل كبير طبعا ) ، بعد تغير الفحمات الى الجديدة اختفى الصوت تماما حتى لو ماشي 180 وهذا شي طبيعي طبعا ,
________________________
6- المكان حق الكاسات بالسيارة واسع لكنه عميق يعني يلزملك تجيب معك مق علشان تقدر تطلعه من المكان وهذا شي مزعجني خصوصا اني من النوع الي يشرب شاي الخ الخ وانا أسوق .
* عندي بالزززززبط مثل هالمق ولكن يدخل بالكامل في مكان الكاسة وبالصعوبة اطلعه :
____________________________
7- القير كنت اتمناه يكون ماهو بشكل مستقيم يعني يكون مثل قير السوسو حقتي لاني صاير موسوس خصوصا بالتغير من N الى D لاني مرة وانا موقف حطيته D3 ومشيت وملاحظ ان RPM المكينة عالي والانارة صايرة أبيض وبعدين انتبهت اني معشق غلط :( ، ان شاء الله انها تكون مسئلة تعود فقط .
____________________________
8- في مشكلة في الاكورد الشكل السابق وهي ان الكهرباء و انارة تحسها تضعف مع تشغيل شي كهربائي مثلا لما تشتغل المراوح الأمامية وهذي المشكلة مازالت موجودة ولكن بشكل أخف بكثير الا انها مازالت ملاحظة وبما ان الطارة كهرباء لما أحركها وانا واقف احس بالوميض بالكهرباء ( نصيحة كتيب السيارة لا ألف الطارة وانا واقف لانه غلط ) .
_____________________________
9- قرأت عن ان عزم السيارة ضعيف !!!!!
صراحة ما ادري ايش أقول لكن راح انبه على نقطتين أولا انك مب ماخذ سيارة سباق وثانيا لا تنسى انك 2.4 ومكينة 4 سلندر يعني تجيب سرعة 100 كيلو في أقل من 10 ثواني وش تبي بعد ؟!!؟ وشخصيا ما أشوف أبدا ان العزم فيه مشكلة وجربت أزر عليها من الصفر وفرررركت الكفرات وراحت السيارة يمين شوي (مالها شهرين مركبة الكفرات) .
____________________________
10- يمكن مالي دخل بهالنقطة لاني ستاندرد ولكن شكل الحساسات في الفئة الفل قبيح للأسف وبازر من الصدام ويذكرني بالحساسات الي يركبوهم في الغرابي صيني وبصراحة أشك ان عبدالله هاشم هو الي مركبهم لانها واضحة انها مب تقفيلة صناعة مصنع :( وشكلها يذكرني باللي بالكامري ( ومعروف أبوجميل بهالحركات ) .
* أرفع القبعة لحساسات السوسو .
هممممممم هنا المفروض أكون خلصت كلامي الكثير وأعتذر عن الإطالة لكن حبيت أثريكم بالتجربة و أكون قدر الأمكان منصف في الكلام رجاااااااااااااااااااااااااااء الموضوع ماهو علشان يجيني واحد يقول انت ترفع بالسيارة أو علشان يجيني ثاني يتكلم بكلام ماهو منطقي ومن غير تجربة للسيارة أو لمنافسينها من السيارات ، الموضوع للفائدة العامة وللشباب الي حابين يشترو السيارة أو ياخذو عنها خلفية .
نقطة أخيرة وهي كانت واجس بالنسبة لي وهي اني قبل ما اشتري السيارة لو أسال و استشير أي أحد أقوله نفسي أشتري أكورد كان أوووووووول جملة ينطقها قبل ما يقول السيارة مثلا فيها العيب الفلاني أو فيها الميزة الفلانية كانو يقولولي قطع السيارة غالية :(
طبعا كان تفجير الجباه متوفر وكنت أقول : تراني بأشتري السيارة قطعة وحدة مب شاري السيارة قطع و بأركبها في البيت :@ .
علاوة على ذلك و أزيدكم من الشعر بيت بما ان السيارة صارت تصنع بأمريكا بسبب ان العمالة أرخص من اليابان و السبب الثاني أن الين الياباني غير مرتبط مع الدولار الأمريكي مثل الريال و الدولار وبالتالي بيصير تذبذب بأسعار البيع وكلها رايحة بجيب شركة هوندا والنتيجة هي انخفاض أسعار قطع غيار السيارة وإليكم بعض القطع الي سألت عنها شخصيا في الوكالة وبعضها في أم الحمام وكلها قطع وكالة طبعا وأكثر ما يهم المستخدم العادي هي القطع الاستهلاكية وأبدأ بسم الله :-
1- فحمات أمامية 230 ريال << السوسو بنفس السعر << في نوع ثاني للسوسو يركب ع الانترا برضو بسعر 140
2- فحمات خلفية 190 ريال << السوسو بـ 210 ريال
3- فلتر هواء 85 ريال << بالسوسو 60 ريال تجاري
4- مساعد أمامي 350 ريال << بالسوسو 165 ريال درجة أولى
5- مساعد خلفي 400 ريال << بالسوسو ما قد غيرته لكنه بحدود 170 ريال درجة أولى
6- كراسي المكينة الخمسة ( 2 للقير و 3 للمكينة) مجموعهم بـ 1500 ريال << غيرتهم بعضهم بالسوسو وهم أربعة ( 3 للمكينة وواحد للقير ) بـ 1300 وشوي
7- صرة كرتير الزيت سألت عنها لاني كنت شاك انها تهرب لكن طلع من أثر آخر تغير للزيت وسعرها 15 ريال هع
8- سير مكينة بـ 125 ريال << بالسوسو مب متأكد لكن اظنه قريب جدا من هالسعر
______________
هذي القطع الاستهلاكية تقريبا بالسيارة والان ننتقل لأسعار القطع التجميلية أو الكسسوارات وطبعا أسعارها استهبالية في الوكالة :)
سألت عن الاشياء الي نفسي أركبها بالسيارة مثل نسافات و أنوار ضباب و جناح خلفي و إليكم الأسعار
* الأسعار بدون تركيب .
1- النسافات الأربعة بـ 450 ريال << يمدحون الغرابي كلها جلدة وبس وترتاح ( لو ادعس على تفلة - أعزكم الله - يتوصخ جنب السيارة ) << لفيت التشاليح ولا حبة واحدة لقيت
2- أنوار ضباب الاثنين بـ 2700 ريال وشوي << والتشيلح لقيت واحد يسار بـ 400 ريال
3- الجناح فيه أنواع والي أبيه بـ 1200 ريال وشوي
4- جنوط 17 مثل السبيشل و الفل للجنط الواحد 950-1000 ريال نسيت كم بالزبط << التشاليح بـ 4500 ريال بالكفرات للأربعة
* غيرت جنوطي الصينية (الي قبلي مركبهم) بجنوط السبشل 2012 لاني أشوفها أحلى بكثير من جنوط السبيشل 2013
5- الشمعة الأمامية بـ 900 ريال << تشاليح بـ 800 ريال يستهبلة قسم بالله
6- الصدام الأمامي 900 ريال
7- الحساسات الخلفية 1600 ريال وشوي << يمدحون الغرابي
8- شاشة النفقيشن للفل بقيمة 26 ألف ريال << أخواننا بالأردن يقولون "بلا قافية" يعني لا تخليني أقول كلمة 18+
9- مساحات أمامية 56 ريال << في الوكالة لكن برا تلاقيها أرخص
إلى هنا يكون انتهيت من الموضوع الحمد لله وما أصبت فمن الله وما أخطأت فمن نفسي ومن الشيطان وأي سؤال أنا حاضر ان شاء الله أفيدكم باللي أقدر عليه .
أتمنى من جميع ملاك السيارات قراءة كتيب السيارة لانه يحتوي على معلومات جوهرية وتغنيك عن فلسلة الجهال سواء من الناس أو من الصناعية الي ما يعرف كوعه من بوعه :( .
* لتأكيد الكلام فقط تجربة سريعة :
رحت لميزان العضيب مخرج 5 وفحصت السيارة بأشوف ايش تحتاج للحذفة يمين وقالوي تحتاج ميزان خلفي و أمامي ( كان الجواب متوقع ) ولكن قالي تحتاج كبس كمر خلفي للسيارة !!! لان الكفرات الخلفية فيها ميلان بقيمة واحد سنتي متر وقلتله خل عنك ولا تسوي شي ، بالصدفة قبلها بيوم قابلت شريطي وأول ماشاف السيارة باركلي وقالي ترا فيها عيب مصنعي ونكد علي وسألته ايش هو ؟ قالي الكفرات الخلفية تميل بعد فترة يعني على 80 ألف وفوق وقهرني بصراحة :( ، إلى هنا انا مؤمن ان السيارة يبيلها كبس كمر خلفي ولكن بعد ما رحت للوكالة ( الوكالة ما شيكولي لا على حذفة لان يحتاجلها موعد مع مهندس فقط صيانة 30 ألف ومن ضمن ال 28 خدمة الي سوهم قالي مرينا على كل مسامير السيارة السفلية وربطناهم لك ) وبعدها راحت حذفت السيارة لليمين !!!
ومن هنا اقتنعت ان ميلان الكفرات الخلفية من الوكالة لسببين أولا ان الحذفة انتهت بتربيط السيارة ( يعني الفلبيني بالعضيب أعطاني من كيسه ) و ثاني أن الكامري 2009 أو 2010 أظن المهم فيها ميلان بالكفرات لزيادة الرساوة ولو تعدلها وتسوي كبس كمر بتخرب السيارة .
مم هنا أنا راح أتكلم بالمنطق الي يتكلم فيه بعض الناس وهو غير مثبت و أقولكم أن السيارة هي وكالة تجي مايلة الكفرات الخلفية لزيادة الرساوة في السيارة :) .
والسلام عليكم ورحمة الله وبركاته
