مشكلة صارت بمكيف سيارتي السيفيك 2007 عطوني الحل

السلام عليكم شباب
انا البارح كنت ماسك خط من الحسا الى الجبيل وفجأه ضعف دفع الهواء للمكيف اول مره الصراحه تصير معي زي كذا مع انه سيارتي من اخذتها بس غيرت فلتر المكيف اللي ورا الدرج اما برودته كانت مية ميه
لكن البارح فجأه صارت معي كذا مع العلم انا اقول يمكن من رطوبة الجو لانه البارح الرطوبة زايدة والدليل كان المكيف يطلع بخار وهذا معروف بوقت الرطوبه
مالكم بالطويله
انا بحثة بمواضيع المنتدى والحلول متنوعه كثير لكن اكيد انا مشكلتي بسيطه

بعض الحلول اللي يقول نظف الثلاجة لانه من الغبار مع الرطوبه صار طين ...... انا اقول يمكن خصوصا كنت فاتح الهواية البارح ومو اول مره اخليها مفتوحه اكثر اوقاتي افتحها
وناس تقول من الكويل .......... هذا الكويل وين موجود بالسياره ابقي اعرف مكانه ... بحثة بالمنتدى ماحصلت عنه اي معلومه بمكانه
وناس تقول الفريون زيده ......... مااعتقد
وناس تقول الفلتر غيره او نظفه ...... وعلى فكره انا فكيت الفلتر وسكرة الفتحه اللي بمكان الفلتر بنفس قاعدة الفلتر ونفس دفع الهواء ضعيف سواء فتحات التكيف الاماميه او اللي على الطبلون او السفليه ضعييييييييييييييف الدفع

مع العلم المروحه اشوفها بعد ماافك الفلتر قوي الدفع
بالله عليكم شوفوا لي حل

ترا ببكي :(
الشمس ماترحم :mad:

انا حصل حصلت معي مشلكة في المكيف وصلحته . .

المشاكل النادرة والغير متوقعه ولاكن تحصل لانها قطع استهلاكية في المكيف هي /

مروحة الفريون اللي على اليسار الدينمو حق المروحة اذا اخترب المكيف يصير حار والمروحة طبعا ماتدور والفريون يسرب اذا شغلت المكيف وماغيرت الدينمو لذا شيك دينمو المروحة يدور مع تشغيل او لا

المشكلة الثانية شيك الفريون ونظف الرديتر بماء من بره عشان يجي ماء على كمبرسر الفريون ممكن تكون الاوصاخ تراكمت عليه هاذي مشكلة نادر جدا جدا وقوعها ولاكنها حصلت معي

تأكد ان الكمبرسر يدور مع التشغيل لان اذا مايشتغل معناتها ما يبرد . . المشكلة افيوز المروحة حق الكمبرسر ممكن يحترق ويحتاج تغير عشان تدور ويشتغل الكمبرسر لتبريد هاذي حصلت معي مع انها نادرة جدا . .

وشكرا

اجل اسمع القصه جد شي ماتتوقعه
انا البارح بعد ماشفت هواء المكيف ضعف كأنه احد كاتم عليه وشي طبيعي بيصير اقل بروده والكومريسور شغال ميه ميه مافيه اي مشاكل
خليته ومشيت على السياره وبعد ماوصلت الجبيل وقفت وفتحت الفلتر ولا تغير شي سكرت القاعده حقت الفلتر بدون مااركب الفلتر من شان اتأكد هل الفلتر توسخ زياده خاصتاً انه مغبر ورطوبة من برا تجيه يعني بيصير طين لكن مافي فايده بعده ضعيف الدفع
غسلت الفلتر بالماي وخليته يجف من البارح
جيت اليوم وركبت الفلتر الصباح وشغلت المكيف نفس الشي لاحول لله والله شي يقهر وخاصتاً القطع نااااار والمكيف بصراحه يخاف الواحد يحافص فيه
المهم
جيت الدوام ونزلت الموضوع قلت عسى الاقي حل
بعد مانزلت الموضوع قلبي مو متطمن قلت خل اروح اشوف العلة اللي صايره
شغلت السياره وشغلت المكيف بعده ضعيف فتحت الكبوت في فيوزات وكتاوتات اللي تقابل السواق اكيد تعرفها فتحت الغطى من داخله البيانات اللي تحدد لك كل فيوز حق ايش المهم شفت كتاوتات اثنين عليهم علامة المكيف او بالاحرى شكل النجمة الثلجيه او البلوره
يفصلون ويشتغلون مع مروحة التبريد اللي برديتر بمجرد تحط صبعك عليهم بتحس فيهم وهذا شي طبيعي مع كل الكتاوتاات
قلت خلني احركهم حركتهم وهم يفصلون ويشتغلون
بعد كذا رحت اشيك دفع الهواء اشوفه بعده ضعيف فكيت الدرج طلعت مره ثانيه الفلتر وفجأه الهواء رجع طبيعي يالبى قلبك سفوكتي والله فرحت الحمدلله

طبعاً الزبده اتوقع انه المشكله البارح صارت من قوة دفع الهواء والهواية مفتوحه بالطريق مع انه انا ماكنت اسرع 120 امشي
اقول يمكن هذا السبب انه الهواء رطب وثقيل من الرطوبه حلوه هواء ثقيل ههه
المهم يمكن انه سبب لي تعليق في مقسمات تغيير الهواء اللي داخل الطبلون وسبب بكتمت الهواء وضعف الدفع ... حط في بالك السياره عندي لها سنتين وانا امشي عليها خطوط وهذه سرعتي 120 كيلو بالساعه بالمثبت ودائماً اخلي الهواية مفتوحه لاني مدخن واول مره تصير هذي المشكلة
والتوقع الثاني اقول يمكن من الكتاوتات اللي حركتها هي السبب

انا اليوم بغيير الفلتر واذا رجعت المشكله بغيير الكتاوتات وان ارجعت المشكله وان شاء لله ماترجع بحرقها السياره ههه امزح
ان شاء الله تجربتي تنفع الاعضاء اللي تصيبهم نفس المشكله



شي ماااتتوقعه


تشكراتي

شكرا على الشرح . . لاكن انا الومك الهواية مايصلح تفتحها والمكيف شغال اول شي تدخل هواء غير نقي ونظيف وثاني شي تسبب لك مشاكل في حركة مرور الهواء لداخل السيارة . . اذا بتفتح الهواية لازم الاجواء تكون جميلة وصافية ويفضل الكيف مغلق الا اذا انت تبي تطلع رائحة كريهة منها تفتحها ... شكرا مره اخرى