بالنسبه لزيوت المكينه ايقاف الزيت المكرر وش البديل

بسم الله الرحمن الرحيم
السلام عليكم ورحمة الله وبركاته

ياشباب قلت قبل امس خلني اروح اسوي صيانه كامله لزيوت سيارتي بصفتها من وكالتها مادري عنها لاني توني شاريها وقلت خلني ابدا فيها بدايه جديده علشان اكون على علم بكل الزيوت ووش القديم والجديد فجيت بغير زيت المكينه وقلت ابغير زيت ماجناتيك الي بين الشباب ولا زيت هوندا المهم سألت عن زيت هوندا قالي خلاص الزيوت المكرره وقفت معد فيه الى الزيوت الصافيه الي تمشيك من العشره الى الخمست عشر الف قلت والوكاله وش يحطون قال الزيت هذا المشكله اني على جهاز غير جهازي ولا عندي وصله ولا بلوتوث ولا لو معي الابتوب كان نزلت صورته المهم طبعادرجت اللزوجه فيه20/50 ويقولو انه الماني وقعد يحلف انه من افضل انواع الزيوت وقيمت العلبه 55ريال وهذ اسمه
( PERFORMANCE )وعليه صورة سيارة سباق لون العلبه يميل الى السماوي والغطا لونه احمر وركبته والله ان ضغط المكينه الان على واحد الى ربع ومادري يحسسك بسلاسه في السياره المهم واخلص من زيت المكينه ويجيك قالي يبغا لك تغير فلتر الهوى قلت بكم قال 115ريال قلت معصي المهم اخر شي صار بـ110ريال المهم خلصت من فلتر الهوى واروح لم زيت القير وياعطيني زيت قير نفس اسم زيت المكينه بس لون العلبه ذهبي ومرسوم عليها زيت قير العلبه بـ95ريال ويقول انك تمشي عليه الى 90000ك م يتحمل واطقلي اربع علب المهم يوم خلصت من زيت القير ويبقالي حول نص علبه ويشفط زيت الدركسون ويعبيه من جديد المهم واحول على موية الرديتر قال انها ريحتها ماهيب زينه باى السياره كانت موقفه واخليه يكبها ويحط غسيل الرديتر ثما جاني ابو يمن ويوريني مويه قال العلبه بـ65ريال قلت كم يحتاج من علبه قالي علبتين قلت اوكيه عبي طبعا معليش نسيت المكينه حطلي شي اسمه حق الترسبات العلبه بـ50ريال مع 3علب زيت موبيل يغسل فيها المكينه الزبده ماطلعت من عنده الى بـ880ريال وضيق صدري الله يضيق صدره كنت متوقع الى 300ريال بس وش رايكم في نوع الزيت الي حطيته للقير والمكينه طبعا زيت المكينه يمشيك عشره الاف بدون كلام والله يوفقنا وياكم والف اسف على الاطاله ياكباب عفوا شباب واحد جايع هههههههه
يالله اخليكم ولكم التعليق .

وعليكم السلام ورحمة الله وبركاته

انا اتوقع ان زيت القير احسن شي تغيره بالوكاله
اما المكينه مايحتاج كل مره تغير من الزيت اللي حطيته <<يعني بس علشان اول مره
لان صراحه سعره غالي
واذا تبي زيت يمشيك من 15 الف الى 20 الف عندك (ماجنتيك)<<اذا تبي منه كلم التحلية;)

ومبروك عليك الموتر ربي يعطيك خيره ويبعد عنك شره

تحياتي

حياك الله الملكه اكورد والف شكر على المرور وبالنسبه لزيت ماجنتك ماقصر التحليه خذيت منه نص كرتون وركبته في سيارت اخوي مع العلم انه في محلات الزيت بقيمه وقدرها 35ريال يوم قلتله انا شاري العلبه بـ20 قال اتحداك وماني عارف ايش هذا تقليد قلت طيب ابجيبلك العلبه الي معي وطلع الفرق بينها وبين العلب الي عندك يوم الخم وحط في فمه شحم للأسف نصابين ابويمن بشكل مانتصوره يعني شف الفرق بينهم وبين التحليه 15ريال بازبط في كل علبه سلمني على اخشيمك بس يالتحليه دمت لمنتدانا.

انا ماني مصدق انك سويت هالشي ..

انت من جدك ولا تستهبل ؟؟؟

الكلام هذا وين صار وش المحل ؟؟

معليش اسف اسف ...

لعبو عليك ..

انا ماني مصدق ..

اقتباس:

---

القير ويبقالي حول نص علبه ويشفط زيت الدركسون ويعبيه من جديد

---

زيت الدركسون حق الاكورد خااااص وما ينباع الا بالوكالة ... بالله ذا المتخلف حط لك زيت قير !!! مكان زيت الدركسون ...

في السيارات الامريكية عاادي .. زيت لونة احمر ..

الزيت الاحمر هذا لو تحطة في الاكورد يشقق لك ليات الدركسون مع الزمن واسئل مجرب .. اسئل accord2002 ... زيت الدركسون حق الاكورد علبتة بيضا .. لون الزيت اصفر ... قيمة العلبة بـ34 ريال ..

مع الاسف ياصديقي ..

ليتك استشرت قبل ما تدفع هالمبلغ ... اللي كان يمديك تسوي فية صيانة كااااملة للسيارة من الصدام للصدام ...

ياحبايب للأسف اناحاس انه العب علي ومو اي لعب لعب محترم بس على قولتهم لن يزيدنا هذا الى علما الوعد الجايات زيت القير بذن الله من الوكاله اشتريه وبروح هالايام ان شالله واشتري زيت الدركسون من الوكاله على كلام اخوي كوكو اكورد

اخوي ..

بالله عطنا اسم المحطة ذي اللي رحت لها .. واوصف لي شكل الشخص اللي سوا ذا الشي ..

خلني بروح بشوف الاسعار كلها عندة ..

على فكرة .. شفت حق الترسبات ذا اللي يقولة ..

سويتة عبث ذاك اليوم لما غيرت من زيوت هوندا لماجناتيك ... الجالون ( توفير عن العلب ) الجالون كاامل بـ 30 ريال ... وانت ماخذ حق الترسبات بـ 50 ريال !! و 3 علب !!!!!!

الله يعوض عليك اخوي .. والله انك غبنتني ..
اللي اشوفة اروح لذا المحطة .. واشوف اسعارة ..
ثم اجية انا وياك ... (( يارب انك ماخذ فواتير !! ))
ونستقعد لكفيلة وترجع فلوسك ,.,

شوف هالرابط :

http://www.hondaarabia.com/club/post90112-3.html

زيت القير من الوكالة ...
تحتاج 3 علب ..
العلبة الوحدة بـ33 ريال .. يعني المجموع 99 ريال ..

شف ياطويل العمر بالنسبه للمحطه هي في حي المصيف على طريق الملك عبدالعزيز مخرج (5) كانك تعرفه وانت جاي مع طريق الملك عبدالعزيز ووجهك شمال وصار حي المصيف على يدك اليمين بالزبط هي اول محطه تجيك كنك طالع من الاتصالات المرسلات ورايح شمال اول ماتتعدى الاشاره ابد هي الي قبل بندة المصيف مافيه الى هي فيها يماني اسمه محمد شفها حتى شكلها فخم وبكر ان كانك بتجي ياكوكوكورد لم التجمع ابتفاهم انا وياك بالتفصيل ان شالله

880

عشان زيووووووووت :eek:

واااااااااااااااوك

كيف طاوعك قلبك تدفع ذا المبلغ على زيوت :eek:

بعدين مرة ثانيه اذا شفت يمني انحححش

رح لمحطه فيها هنود ولا بنقاليه افضل

حرااااااام عليك ترى السعر مره غالي على زيوت ياريتك اتكلمت قبل ماتسوي شي انا صيانه ال 40000 الف كلفتني 600 ريال وانت بس زيوت 880 ريال بس مو خساره في الاكورد وعاددي لا تشيل هم اهم حاجه غير زيت الدركسون وخذو من الشركه لان ماينفع تحط زيت قير للدركسون اما على الزيوت الباقيه عادي اهم حاجه انك اطمنت على السياره ومره ثانيه اكتب موضوع لو متحير في شي نخدمك

اصلا زيت القير كل 40 الف يتغير وابو يمن يقول 90 الف :eek:

ابو يمن ما اثق فيه ابد ابد ابد

مره رحت له قلت له وش رايك بزيت المكينه زين ولا اغيره لاني ماشي واجد عليه .. قال لازم تغيره الحين محروووووق مررررررررره

قلت اوكي سكر الكبوت والله انك نصاب لاني ما مشيت فيه الا 2000 كيلو بس

تبون اسولف عن المحطات هع هع

والا اسكت

حبيبي انت وياه

الي يبي زيت ماجناتيك يطلبني على الخاص او يكلمني ع الجوال او الايميل
اضبط وضعك واجيبه لك وقت التجمع اليوم ان شاء الله

بس ياخوي وليد 880 ريال

ماعليش والله ...لو كلمتني او كلمت كوكو كورد ......كان نفيدك

ونوفر عليك مبلغ وقدره
وحتى لو نوفر عليك بتعشينا في الفخار وبرضو بتوفر مبلغ وقدره
وتعبي بنزين فل وتوفر مبلغ وقدره
وتغسل السياره ويطلع عندك مبلغ وقدره
ويمكن بعد تضلل

اما 880 ريال ماقصرت والله مابقى الا 120ريال وتوصل للـ1000ريال

حبيبي قبل اي شي لازم تستشير ومن استشار ماخاب

اقولكم تجربتي...
التجربه الاولى ... الزيت ماشي 10.000 كيلو
كاسترول جي تي اكس الثقيل
قبل ماروح للتلميع قلت ابغير الزيت وابروح المع السياره

رحت للمحطه ويمني>>شوف ياوليد يمني:d

وقلت له شيك على الزيت
اول سؤال يسألك

كم ماشي عليه.؟؟؟:confused:
قلت مادري انا وقفت السياره وسافرت ورجعت

شاف الزيت وقال ممتاز يمشيك 2000 زياده

شفت شلون اليمني كيف

ولما قلت له ماشي عليه 10.000 ريال
ماصدق واحسن مافيه انه يذكر الله على السياره :cool:

مو من النوع الي يصكك بالعين انت وموترك وصدامك

والتجربه الثانيه
رحت ليمني قلت ابشيك على الزيت
وكان في بالي شغله من عنده >>بعض الاسئله ***>لي وقفه

قلت له وش رايك بالزيت
قال لازم تغيره

وانا توني مغير الزيت وحاط ماجناتيك وتوني ماشي عليه 2000 كيلو

ويقول غيره

ياحبيبي من وين لك اغيره وانا ماشي عليه 2000 كيلو وتبيني اغيره

حبيبي مش خشمك واذا تبي منديل محطه اجيبه لك

وكل شوي طالعين لنا بشغله والا بكلام مادري من وين

****هنا وقفه

سعر الزيت بالمحطات (كاسترول ماجناتيك)
بـ30 الى 45 ريال للعلبه
والسيفون بـ25 ريال

طيب انا اجيب لك زيت كاسترول ماجناتيك
العلبه بـ20 ريال
والسيفون بـ16 ريال <حسب ارتفاع الاسهم ونزلها
وممكن يكون بـ14 ريال
للتاكد روح اشتر من الوكاله
تحصله بـ 14 ريال

مابي اكثر كلام
نتقابل بالتجمع ويحلى الكلام

اسف على الاطاله

الف شكر على الردود والله لايهينكم لن يزيدنا كلامكم هذا الى وصل وقوة تعارف لأنكم فعلا شباب مخلص وتحسسون الشخص بالهتمام بمواضيعه والف شكر

الله يعوض عليك أخوي :rolleyes:

الف شكر لك اخوي انسان على الرد