يا راعين الخبره عندي مشكلة في محبوبتي الأكورد v6 2010
السلام عليكم
داخل على الله ثم عليكم أن تشوفون لي حل <<< قفلت معه :(
أنا يا طويلين العمر عندي أكورد 2010 V6 شاريها قبل أربع شهور تقريبًا وكانت ماشيه 13 ألف
وكانت مثل الورده ما شاء الله والحين ماشيه حدود 20 ألف مثلكم عارفين شوارع الرياض وسفرات
المهم صارت لي مشكلة اللي هي إذا طفيت السيارة بالليل مثلاً وجيت الصبح أبي أشغلها
يعني حق أبو ( 8 ساعات ) تقريبًا .. مره تعيي تشتغل زي اللي تنتع ومره مافيها كهرباء أبد !! ومع العلم بأن لمبات الطبلون
مره تكون مولعه بنسبة 100 % ومره بنسبة 10 % يعني بس كم لمبة مولعه وبضوء خافت !
طبعًا أول إحتمال توقعته أنه من البطارية ! وشريت بطارية جديدة وركبتها واشتغلت السيارة
واليوم الثاني نفس المشكلة ما كأني سويت شي !!!
ورحت لورشة الهوندا للي بأم الحمام ( الدخله الثانيه ) الزبده حاولوا يمين ويسار
وتوقعوا المشكلة من الدينمو وبعد ما فحصوه عندهم وفحصوه في الصناعية القديمة
قالوا الدينمو شغال وزي العسل !!! :confused:
ونظفوا أصابع البطارية ونفس الحكاية وقالوا الظاهر مشكلتك من الكهرباء واحنا ما نعرف لها
ونخاف نلعب فيها ويخرب علينا الكمبيوتر ونبلش عشان كذا دز أمها للوكالة !
ورحت للوكالة ودخلتها صيانة الـ 20 ألف ووصيتهم يشيكون على الكهرباء قالوا ما عليك
واجيهم اليوم الثاني واستلم المفتاح وقالوا أدفع 665 ريال قيمة الصيانة مع قيمة تشييك الكهرباء
قلت موب مشكلة واجي ابي افتح البيبان من الريموت ولا تفتح ولا تشتغل السيارة
وهي عندهم !!! وقبل ما يسلم لي المفتاح موريني ورقة التشييك عشرطعش سلك ولمبة
مشيكين عليها وحاطين عليها أوكي والسيارة توب وآخرتها السيارة ما تشتغل قعدت أضحك عليهم :d
الزبده قالوا إحتمال من نفس البطارية فيها خلل فني من نفس المصنع الزبده واروح واغيرها على الضمان
من أسيديلكو !! ونفس المشكلة تتكرر اليوم اللي بعده !!
وبالأخير الوكالة يوم طفشوا مني قالوا المشكلة من الدينمو يالله أدفع 5000 عشان نصلحها لك
قلت وليه موب على الضمان قالوا لي المالك الأول للسيارة صادم فيها ومصلحها عندنا على التأمين
وكانت الصدمه تشمل الرفرف الأمامي مع الأصطب مع طرمبة المساحات وتم دفعها عن طريق التأمين
قلت طيب الرجال مصلحها عندكم ليه ما تصلحون الدينمو على الضمان قالوا لا دام السيارة
جاتها صدمة الضمان يطلع منها :(
الزبده قلت معصي أدفع لكم 5000 والسيارة جديدة وأنقز للتشليح وأدور دينمو ويالله يالله حصلته بـ 1300 عشانه حق 6 سلندر !
وعطاني ضمان يومين إذا خربان أقدر أرجعه واليوم اللي بعده والسيارة ما تشتغل يعني نفس المشكلة
يعني المشكلة الأساسية ماهي من الدينمو والدينمو حقي سليم والوكالة نصابين !!! :mad:
رحت ورجعت الدينمو حق التشليح وركبت الدينمو حقي وحتى كتابة هذا الموضوع
المشكلة معي ولا أدري وش أسوي وياليت تفيدوني يا راعين الخبره
واللي وده يفيدني ياليت يعلمني هل السيارة إذا جاتها صدمة تطلع من الضمان ولا المهندس يلعب علي :confused:
والشي الثاني ياليت أحد يفيدني بخصوص هالمشكلة اللي صايره معي ولكم مني كل الشكر والدعاء
ومضه .. أعتذر على الإطالة لكن حبيت أوضح المشكلة بالتفصيل الممل :o
:(
