:: موضوع للنقاش حول مشاكل هوندا أكورد وحلولها ::

السلام عليكم ورحمة الله وبركاته ..
أحبتي الكرام ..
أحببت في هذا الموضوع أن أثير النقاش حول مشاكل أو عيوب هوندا أكورد .. سواء كانت داخلية أو خارجية ......

أولاً : أتسائل لماذا صوت الهواء يطلع حين تصل إلى سرعة معينة وأظنها 100 أو حواليها , وما الحل لذلك لمن جرب ؟ ( يقال إن فيه جلدة تركبها بـ 40 أو 30 ريال ويروح بعدها صوت الهواء أو يخف ... طيب وإن كانت لها منفعة أليس لها مضرة ؟ )

ثانياً : بالنسبة لكفرات دانلوب .. !! كيف جودتها ؟! أنا بالنسبة لي سيارتي أكورد 2006 .. ولها معي سنة ... أحس إن كفراتها بدأت تطلع صوت .. ورحت لأكثر من بنشري واحد يقول الكفرات تعبانة .. وواحد يقول طيبة نوعا ما .. والغريب أن أخوي جلست معه سنتين .. !!

ثالثاً : عندي في سيارتي أول ما أمشي ( يعني قومة السيارة ) فيه هزة على خفيف يمين ويسار << على قول واحد من الشباب ترقص :)
فلا أدري هل عند أحدكم مثل ذي المشكلة ؟ وهل سببها الكفرات ولا شيء ثاني .. !

رابعاً : عندما أشغل الإشارة إلى اليمين أو اليسار وألف الطارة يطلع صوت طقطه في الطارة شوي مزعج .. رحت بها للوكالة .. قالوا لي طبيعي ... لكني حاس إن ماعندهم سالفة .. لأني أول ما اشتريتها ما كان هذا الصوت يطلع إلا مع كل لفة وهذا الطبيعي ... لكن عندي الطقطقة زايدة عن اللزوم ... وأنتم طرحتم عدة مواضيع تقولون إن فيه مشكلة صناعية نروح للوكالة نغيرها .. عاد أفيدونا الله يجزاكم خير ..

أرجو أن تتفاعلوا معي في الموضوع ..
وللمعلومية هذا الموضوع ليس لطرح مشكلاتي أنا فقط .. بل للجميع ... لنتبادل المنافع ..

وفق الله الجميع ..

عـــزيــزي :

في البـدايـه : صــوت الهــواء ( التنسـيم ) في جميـع سيـارات هـونـدا سوا اكـورد او ام ار في او اوديسي او جاز او سيفــك أو ...... الخ يعـني لا تشيـل هـم الصوت وانا اخـوك عنـدك وعنـد غيـرك العيب هــذا .

اما بخصـوص : كفـرات دانلـوب بصـراحـه انـا ماجربتها يعني ما اقـدر افيِـدك يالغـالي بس انا عنـدي اكـورد الفين وخمسـه ومن يـوم ماطلعت السياره من الوكاله ماغيرت كفـراتها والحين ماشيه 56000 كم والكفـرات يطلع منهـا صـوت قـوي ومـريت الوكاله عشـان اتأكد من الصـوت وقـالو لي نفس الكلام الكفرات لازم تغيرها عشان يروح الصـوت نهائيا .

اما بخصـوص : الهـزه عند قـومة السيـاره والله ماعندي اي خلفيه بخصوص الموضوع هـذا لان سيارتي الحمد لله مافيها الهـزه هــذي .

اما المشكله الاخيـره : فأنصحك تروح الوكاله وتأخذ مـوعـد عشان تغير الليات الخاصه بالدركسون طبعـا إذا كنت في الرياض فاقرب موعد بعد ثلاث اشهـر لاني انا ماخذ موعد من صيانة الجبيل وموعدي في 9 / 4 / 2007 يعني بعد شهرين واعتقد بعد ماتغير الليات الخاصه بالدركسون راح تروح المشكله هـذا والعلم عنــد الله ..

في النهـايه : تقبـل فائق احتـرامي وتقـديري .

اخـوك : اكــورد الجبيـــــــــــــــــــل ..

أشكرك أخي الكريم أكورد الجبيل على ردك ..
وبالنسبة لكفرات دانلوب ... فهي اللي تجي مع السيارة من الوكالة يعني نفس اللي عندك حالياً ..

وفق الله الجميع ..

عـزيزي : سيارتي هـوندا اكورد الفين وخمسه وكفراتها من الوكاله ميشــــــــــــــلان .

حتى انك شككتني في الموضوع وطلعت وشيكت عليها حصلتها ميشـــــــــــــــــلان .