تجربتي مع الفحص السنوي المجاني لشركة هوندا
بسم الله الرحمن الرحيم
الهدف من كتابة الموضوع هو الافادة للشباب بخصوص الية الفحص المجاني الذي تقدمه شركة عبد الله هاشم بشكل سنوي :)
قمت من فترة اسبوع بزيارة شركة هوندالعمل الفحص المجاني السنوي في الدمام
السيارة اكورد 2010 4 سلندر
المهم وصلت الساعة 7 ونصف تقريبا وكان يوم خميس وماشالله عدد السيارات مو قليل لكن التنظيم موجود والحمدلله
بعد مرور اقل من ساعه وصلت الدور واستلمو مني السيارة ووقفت بعيد شوي لاني ما احب ازعج الفني واشوش عليه :p
طبعا الفحص يتم بشكل يدوي ولا يوجد اي اجهزة للفحص باستثناء اللوكس "المصباح" اللي مع الفاحص :eek:
قام الفاحص ناداني من بعيد ويسأل وانا اجيب:
الفاحص: عملت صيانة في شركة هوندا من قبل
انا: لأ
الفاحص: ابدا ولا مرة
انا: لا ولا مرة
طبعا الفاحص بدأ يكتب علتقرير قبل ما يشوف السيارة اصلا
الفاحص: تحس مشكلة بالسيارة
انا: اي نعم احيانا لما ادوس بريك اسمع طقه بس مو دائما
الفاحص يكتب " على بالي فاحص مو طبيب" :confused:
الفاحص: امتا اخر مره بدلت زيت وسيفون
انا: من يومين. في هذه اللحظه ما كتب شيء علتقرير :mad:
وللامانه بنفس الوقت كان موجود فني اخر ركب السياره وفحص الاضوية والمساحات وصوت السيارة مع التشغيل وشفته حط مويه على اصابع البطارية يمكن عليها تكلس وقتها
هذا كله وانا اراقب وحابب افهم الالية اللي يستخدمونها :rolleyes:
بعدها تم رفع السيارة واستخدم جهاز الفحص المستخدم "اللوكس" واتوقع صار يشيك لو في اي تهريب زيوت من المساعدات لكن بفضل الله السيارة خذلته وما لقى شيء:cool:
بالاخر قالي روح اتفضل الاستقبال حتى الموظف يناديك...طبعا انا استغليت الفرصه ورحت ناحية الفطاير والبيبسي :d
بالنهاية فهمت من موظف الاستقبال التالي:
- اصلاح طرمبة دركسيون "اتوقع اضافها الفني للتقرير لما قلتله عمري ما سويت صيانة بالوكاله"
- تبديل فلتر بنزين "هذي نفس اللي قبلها وللعلم انا من شهرين مبدل فلتر بنزين"
- قماشات خلفي "اوك هذي مزبوطه 100%
- تبديل مساحات 100% لانه ادائها سيء
- كلبسات مادري لشنو
- تبديل زيت جير "ما جا موعد التبديل القادم"
قام الموظف يقولي نسويلك موعد حتى تصلح قلتله لا حبيبي بس عطني الاسعار
قمت شريت قماشات خلفي 320 ريال وتم التبديل خارج الوكالة بقيمة 60 ريال - سعر تبديل القماشات داخل الوكاله 167. مادري ليش ما قالو 170 :d
السلام عليكم
