يا شباب عندي مشكلة بالمقص (شهرياً اغيره) راتبي يروح عليه ؟؟!! تعبت و الله تعبت

السلام عليكم ورحمة الله وبركاته

كيفكم ان شاء الله بخير

يا شباب انا معي اكورد 2002 جتني ضربة في الوجه قبل حوالي سنة (ضربت عندي الشاص والكمر والبدي راح فيها)

طبعاً سمكرته المرة الأولى عند ابو يمن و طلع ما ضبط وزن الشاص كويس
وسمكرته ثانية عند ورشة الجنوب و ضبط الشاص وضبطت الوجهية

المهم يا شباب من بعد الحادث وحتى بعد تعديل الشاص والمقص الأمامي الأيسر "يقرقع" و اغيره بجديد وكالة (يقعد حوالي اسبوع و ترجع القرقعة ثانية) و كل ما اغيره اقول للميكانيكي وش المشكلة يقول رمان المقص يخرب و يبدأ يلعب مع المطبات و الحفر و الله يا شباب لي سنة وانا على هالحال !! رحت العضيب والمجد وكلهم ما يدرون وش السبب اللي يخرب الرمان :dunno:
و قيمة المقص كانت 350 وارتفعت الى 400 ريال :eek:

ورحت مرة لورشة صغيرة بالصناعية القديمة قالي عندك قاعدة المقص مايلة لازم تعدلها (روح لميزان الدرع هو افضل شي للسوالف هذي)

رحت للدرع والله اخذ مني 1200 شغل يد غير المقصات قال اشتر المقصين الامامية بـ 800 ريال كلها 2000 ريال

و عدله على كلامه وبعد اسبوع رجع الصوت :confused:
رجعت له قال ما ادري انا عدلت القاعدة, انا ما اقتنعت و رجعت للورشة الصغيرة و قال ما تعدلت كويس :(
ورجعت للدرع وقلت عدله زين كم ورشة يقولون ما تعدل مضبوط ( وعدله و لكن رجع الصوت :047:)

والله كرهت ابو وأم و خال و عم هالسيارة (راتبي راح عليها :mad:)

يا شباب انا بسألكم اذا احد قد صارله مثل كذا قبل؟؟
و وش افضل شي لوزن وتعديل قاعدة المقص ؟؟

وساعدوني في حل هالمشكلة :(
و الله يجزاكم خير ويرحم والدينا و والديكم و يوفقكم ويحفظكم من شر الحوادث

اخوكم عبدالرحمن

حبيبي عبدالرحمن

انا بصراحه مااقدر افيدك بالكثير
بس دامك كل اسبوع على هاالحاله
وتشتري اصلي ويخرب المفروض تتأكد انه الشي هذا مو من المقص
فيه شي ثاني معدوم ويعدم المقفص معاه
والسياره لو صارلها حادث وانعدم الشاص او اي شي ثاني فيها
مستحيل ترجع زي اول

الله يبعدنا ويبعد كل المسلمين عن شر الحوادث

وبيني وبينك انا صارت عندي قناعه تامه اذا بدت تكثر مشاكل السياره
بيعها واشتري احسن منها منت خسران شي حتى لو مثلا فلوسك على قدك مو مشكله تاخذ موديل 2000
ونظيفه ولا الخساير هاذي كل شويه ياغالي
واذا مره متعلق في السياره وديها الوكاله خلهم يكشفون عليها ويطلعون لك الشي الخربان على طول
وانت تعرف وكالة ويبغون من وراك فلوس فارح يطلعونم كل شي معدوم في السياره

وان شاء الله الاخوان مايقصرون معاك
ويفيدونك احسن مني
تحياتي

الله يجزاك خير اخوي تيتو على الرد

ولكن الاقرب هو اني ابيعهاا وبس (بس مدري كم تجيب >> الله يعين بس

و الف شكر اخوي تيتو

حبيب قلبي اذا ما جابت سعر مناسب في الحراج
حاول تعرضها على التشاليح ممكن تجيب لك سعر افضل


وتكفى وانا اخوك اذا بتبيع السيارة على اي احد لا تنسى تبين له عيوب السيارة عشان لا يدعي عليك *

عبدالرحمن حبيبي
كلنا اخوان هنا ونساعد بعضنا
حبيبي اذا انك منت مستعجل في البيعه
وتقدر تعرضها في الجرايد هاذي الي تجي كل اسبوع اظن
الاعلان فيها بي 20 وحط السعر اللي انت تبغها صدقني راح يجي واحد ويشتريها
بالسعر اللي انت كاتبه
وربي يوفقك ويرزقك بااللي احسن منها ان شاء الله

أنا سيارتي 2004 وجاني الصوت مثل اللي تقول و وديتها للوكالة وقالي الكمر يبغاله تعديل لأنه مايل بسبب ضربة قوية


رحت لمحل العمال فيه فلبينين و شغلته لها وزن و تغير مقصات و أذرعه وريته السيارة قالي الكمر مايل ميلان بسيط و يبغاله تعديل ووزن أذرعه بس ،، قلت له طيب لوتركته ما عدلته ، قال لي مع الوقت راح يعدم عليك المقصات و أشياء كثيرة ،،


فعلا عدل الكمر و سوى وزن من جديد للأذرعه و المقصات وراح الوصت الحمد لله ،، و الحين لها أكثر من شهر ولا رجع

أتوقع أنه مشكلتك عويصه و آخذه وقت و هذا السبب اللي يخليه ماينفع تغيير المقص ،، تأكد مرة ثانية من الكمر و الشاصي ،، حتى لو تضطر تغير الكمر لأنه بعض المرات يكون مايتعدل

هذا اللي أقدر أفيدك فيه ،، تحياتي :rolleyes:

دى مشكلة الهواندا تنصدم من قدااام خلالاص انسى ترجع بلد

لو توديها وكالة راح يقولوك لازم تروح السمكرة عشان تتسمكر وراااح تدفع مزبووووووووط وتخسر عليها كتييييير

يعني نصيحتي بيعهها

ان شاء الله تحصل وحده انظف منهها

مشكووورين على الرد

بالنسبة للأخ accord790 حطمتني يوم قلت تشليح :(
سيارتي الكل يتنظر فيها ما شاء الله تبارك الله البدي ما سمكرته ابد علطول غيرت الكبوت والرفارف
وما فيها الا مشكلة المقص بس لا مكينة ولا قير ومواظب على الصيانة المستمرة لها وشكلها الخارجي ممتاز مسيومة مني بـ 15000 بس حسيته قليل :confused:

وجزاك الله خير على الرد والتوضيح :)

اخوي تيتو جزاك الله خير على المتابعة وانا والله مو مستعجل مرة يعني بحاول اصبر عليها من 6 شهور الى 10 شهور :)
وخلاص المقص بخليه يقرقع الين يذن ما راح اغيره بلاش خساير
ومن ناحية ثانية عشان اجمع مبلغ كويس واشتري سيارة موديلها جديد يعني يكون 2008 وطالع (وبيني وبينك ما ابي هوندا وانا صراحة عاجبني قراند ماركيز :o)

وجزاك الله خير على الرد والمتابعة :)

اخوي كلاسيك ديسيجن انا غيرت الكمر وشريت كمر تشليح نظيييف جدا بس المشكلة عويصه :(
( واتوقع بنسبة 90% ان المشكلة هي قاعدة المقص لان الميكانيكي يقول لو مايله "ملم واحد" يخرب المقص عليك :mad:)
بس المشكلة ميزان الدرع باكستانيين و ما اتوقع عندهم الدقة مثل الفلبينيين
ولو حصلت ميزان كويس يضبط وزن القاعدة تكون المشكلة انتهت ان شاء الله (بس وين الميزان ؟؟ )

وجزاك الله خير على التوضيح والله يسلم سيارتك من الحوادث يارب :)

مشكوووور اخوي عاشق سيفيك على الرد

و البيع هو القريب بس الله يسهل ان شاء الله

في شغلة احس انك ما انتبهت لها ..!

ضمان على الشغل ..!

الميزان اقل شي يعطيك ضمان شهر كامل ..

خلال هالشهر يا يصلحها ، ولا يصلحها ولا يصلحها بعد .. ولا بكل بساطة تقدر تاخذ فلوسك لأنة ما سوا شي اذا المشكلة ترجع لك .. وكذا باقي المحلات //

لا لا لا كذا ماينفع
ايش اللي تبيعها بي 15
هذولي الشريطيه ماخلو احد فيه حاله
صدقني بتجيب اكثر
واذا على الاصوات سوي زيي
فلوسك اللي بتصلح فيها السياره خلها عندك وجمع فوقها

واشتري احسن منها ياغالي

وترى كلام B Useful
صحيح ميه في الميه وان شاء الله احد الاعضاء يفيدك في محل كويـس
لاني ماني من الرياض ولا اعرف شي فيها لو في جده على عيني والله

تحياتي

حبيبي عندي لك حل بسيط
وش إنت خسران لو توديها يوم الوكالة , وتشوف وش يقولون؟

طيب والاخوان صادقين ... طول هالوقت معذب عمرك وتدفع دم قلبك في هالموتر ولا جا على بالك تروح للوكاله ..!!

روح للوكاله اول وشوف وش يقولون لك

وان شاء الله آخر الاحزان :(

الله يعطيكم العافية على المتابعة و الظاهر نتحمل الين يفرجها الله

اخوي المشكله عندك من الكمر لازم يوزن على الشعره ولا راح يعدم العكس وبعد فتره يعدم الركبه