استفسار عن الاكورد من موديل 2008 لحد 2012
السلام عليكم ورحمة الله وبركاتة
شخباركم اعضاء نادي الاكورد ان شاءالله بخير وعافية ,,
اعزائي انا بصراحه سجلت في هذا المنتدى عشان اخذ معلومات كافيه ووافيه بخصوص الاكورد لاني بصراحه متردد في الاكورد وخايف من قطع الغيار الاستهلاكيه من موديلات 2008 لحد 2012 فى كثير ناس قالو لي قطعها غاليه ونار والخ والكل يعرف او سمع بشي هذا وانا صراحه متعود على الامريكي من اول سياره لحد الان وانا على الامريكي كان 6 او 8 فى قررت اني اشتري سياره اقتصاديه وحق مدينه وعمليه بشكل كبير وماتدوخني في الصناعيه كل شوي مصلح شي فى فكرت بين كل السيارات اللي 4 سلندر لاقيت ان افضلهم الاكورد فى بصراحه لو تكرمتم ابي اعرف مشاكل الاكورد وعيوبها وكل شي ابي معلومات من اصحاب سيارات موديل 2008 لحد 2012 ياليت لو تكرمتم تعطوني تجاربكم في سيارتكم مابي يجي احد ينزل رد وهو ماعنده الموديل هذا ويفتي من راسه لا انا ابي اللي مستخدم للاكورد من الموديلات اللي ذكرتها وحاب عن الامور هذي ,,
1- الزيت وش افضل نوع لازيت المكينة ؟ وكم سعر تغير الزيت مع السيفون طبعآ ؟
2- الفحمات كم تجلس لو شخص مستخدم وسواقته هاديه ومايشد على الفحمات لو كانت فحمات اصليه وكاله ؟
3- افضل موديل في الاكورد من ناحيه قطع الغيار ومن جميع النواحي بغض النظر عن الشكل والخ من موديل 2008 لحد 2012 ابي موديلين افضلهم ؟
4- هل صوت المكينه مزعج او خفيف مثله مثل الكامري والسوناتا الموديلات 2008 وطالع ؟
5- اكثر قطع تتغير في الاكورد ؟
6- ابي اعرف تقيمكم لاسعر اكورد موديل 2010 كم اقيمها النظيف اللي يكون ممشاه في 100 لحد 140 الف ولون ابيض وكان طيس او جنوط يوضح الفئات ؟
7- كل كم اصحاب الاكوردات يسون صيانه لها تقريبآ ؟
تقريبآ هذي الاسئله اللي كانت تدور في بالي وللاسف ماعندي احد معاه اكورد لان كل الشباب امريكي وخاصه للاسف ان محلات التاجير تمنع التاجير لا الشباب والمصيبه انك ماتحصل اكوردات تاجير فى حاولت استاجر للاسف عشان اجرب لكن ماقدرت فى عشان كذا نزلت الموضوع هذا هنا وياليت الاقي اجوبه من اخواني وبكل صراحه مابي احد يجامل ويمدح شغله لا ابي يكون صريح معاي ويوضح كل شي لاني والله متردد بينها وبين كابريس اس اس 2011 فى انا عارف الامريكي للاسف يحتاج صيانات ولاخرب يلحقه خراب ثاني لو تاخرت فيه وفاهم كل شي فيه عشان كذا ابي اعرف الاكورد وش مشاكله
واعتذر لكم على اطاله الموضوع بنتظار ارائكم ,,
الميزانية تحدد لك الموديل
اخوي على حسب ميزانيتك هي الي تحدد لك الموديل
فلوسك تحدد سيارتك و موديلها و اي درجة بعد
يعني إذا كانت ميزانيتك من 50 الى 55 الف فقط : مالك الا اكورد2008 ستاندر سياحي ( 4) سرندل
إذا كانت ميزانيتك بين 60 الى 70 الف تقدر : تاخذ لك 2010ستاندر و 2009 فل كامل ( 4) سرندل او 2008 (6) سرندل فل كامل
إذا ميزانيتك بين 70 الى 77 تقدر : تاخذ لك اكورد2010 فل كامل او اكورد2011 فل كامل (4) سرندل
إذا ميزانيتك بين 80 الى 90 تقدر : تاخذ لك اكورد2012 فل كامل او اكورد 2013 ستاندر سياحي او 2010 (6) سرندل فل كامل
إذا ميزانيتك بين 100 الى 115 تقدر : تاخذ لك اكورد2013 نص فل (4) سرندل او اكورد 2012 (6) سرندل
و مثل مايقول المثل .. مد رجلينك على قد لحافك
الأكورد من 2008 الى 2012 ماتغيرت فيها الا اشياء بسيطه
يعني الموديل مو مهم كثير.. المهم دراهمك يكفون او لا
و على فكره إذا شفت 2008 او 2009 ممشاه بسيط ماتعدا 100الف اعرف انه سعره فوق 60 الف
هذا شي طبيعي مامشى كثير و كأنه جاي من الوكالة و مخزن عندهم