:: قدر الله وماشاء فعل .. رأيك يهمني .. ::

السلام عليكم ..

اخباركم ..؟؟

اليوم وانا رايح بشترك في باقة كأس العالم << الله لايعيده واضح انه مخيس لاديل بيرو ولا سامي وحادث

المهم عند الاشارة والعالم منطلقين يجي باكستاني معه ددسن قبل الميلاد ويفرمل بكل ما أوتي من قوه والاشارة خضراء ويصدمه انفيتني ثمن النترا ثمن العبدلله انا موتري اكثر واحد تأثر في الحادث الانفنتي سامح الددسن واللانترا وراحوا وبقي انا واللانترا لينه سواق المهم الغلط علي أكيد والتأمين مخلص عطيته 200 وراح ..

وبوريكم صور الصدمه .. وابي رايكم .. اصلحها في الوكاله ولا ورشة ..
وكم ضنك تكلف في الوكالة والورشة .. وعطوني ورشة شغلهم نظيف ... تكفون ترانا مقبلين على اختبارات والوضع زفت ... والدكاتره استقعاد .. يعني بالي منشغل بالموتر وضايق صدري .. ولا لي نفس اذاكر


http://file9.9q9q.net/img/91929177/P1010926.JPG


http://file9.9q9q.net/img/36654941/P1010927.JPG


http://file9.9q9q.net/img/96743843/P1010929.JPG

http://file9.9q9q.net/img/49589927/P1010932.JPG

الشمعة خربت وما تشتغل ..
وانوار الضباب تحركت من مكانها وصارت تهتز ..

http://file9.9q9q.net/img/56132824/P1010933.JPG


http://file9.9q9q.net/img/54866278/P1010925.JPG


http://file9.9q9q.net/img/24542166/P1010930.JPG



هاه وش قولتكم ..؟

اول شيء الصدام يبيله تلميع وراح يبين معاك الصدام إذا تأثر ولا لا

الصدام تصليح فيبر لأن واضح الكلبسات تكسرت او المسامير , الرفرف سمكره خفيفه وماتكلفك شيء

اما بخصوص الشمعة الحل الوحيد انك تشوف التشليح إذا ماحصلت شوف محلات القطع الغيار وسعر الشمعات .

والحمد لله على السلامة .

اول شي الحمد لله على السلامه وبعدين خيره ان شاء الله
ومافيها الا العافيه
بالنسبه للتصليح ان شاء الله سهل
الشمعه
تكسرت من الداخل مالك الاانك تغيرها وانصحك تفكر بالشمعات التجاريه عدسات وافضل مع الزينون و led يعطي شكل للسياره
والكشفات خلهم يشوفونها لك ييمكن متحركه من مكانها ويبغالها شد
شوف الوكاله بيصلخونك بسعر جنوني
ودها عند حقين الفيبر وخلهم يثبتون الصدام و يلمعونه لك لا تضرب بويه والله بتتقروش معاها
والرفرف حاول انهم يعدلونه بالورشه بس قوله يحط عليه حراره على شان البويه ماتتكشر
ووربي يسهل عليك ان شاء الله

King

الله يعطيك العافية ويسلمك ويعافيك

طيب وين تنصحني اصلحه فيه ..؟

وكم ضنك يكلف ..؟
سعودي ستايل

طيب حقين الفيبر وين افضل المحلات .. والورش وش تنصحني بأي ورشة .. لان الورشات شغلهم الله يستر ..
وشكلي بركب مثل ماقلت زينون اذا مالقيت شمعة من التشليح ..
والله يعطيك العافية ويخليك لعين ترجيك <<< دعوة شياب

الحمد لله على سلامتك

وتراها بسيطة يا رجال .. لا يضيق صدرك ولا شي

فيه ناس غيرك سياراتهم رااااااحت تشليح

لعلها تكفير ذنوب ... احتسب الأجر وقل إنا لله وإنا اليه راجعون اللهم أجرني في مصيبتي واخلف لي خيراً منها


المهم

شد حيلك بدراستك :)

والحديد بداله حديد ... بس لا تضيع تعب سنة وتجيب العيد بالاختبارات

خذ الأمور esey

الله يوفقنا ويعيننا وياك

ونصيحتي لك

لا تستعجل بالتصليح ... ولا تكلف على نفسك مبالغ مرتفعة

الصدام >> تلميع ويمكن يحتاج توديه لمحلات فايبر ويمكن يحتاج رش
الأسطب >> تشليح ( نظيف )
الكشافات >> تشييك ( وتحديد الإجراء المناسب )
الرفرف >> سمكرة

والله شوف محلات الفيبر :( للاسف ما اعرف محل شريف بعمله يقولك شغل 100% :( بعد يومين راجع زي اول
بس ان شاء الله الشباب يفيدونك بالمحلات ترجعه وكاله باذن الله

السلام عليكم

اول شي الحمدلله على السلامه

ماذبحنا في هالبلد الا هالاجانب

المهم فيه ورشه في الصناعيه الكبرى اسمها ( تيما ) شغلهم اوكيه فيه اثنين من اخوياااي مصلحين سياراتهم عندهم

الاول هوندا اكورد 2004 رايحه الوجهيه ماشاءالله شغلهم فيها نظيف

والثاني هوندا اكورد 2007 راش الصدامات كذلك حلو شغلهم



موقعها بعد زجاج السالم بيجيك منفذ يمين خش معه وامش تقريبا 500 متر

بتحصله على اليمين

اسمه ( توران) جنسيته تركي

قل له جايك من طرف فيصل المطيري

وانت اللي تشوفه يصلح لك سوهـ






والحمدلله على السلامه

ما تشوف شر ان شاء الله

خيره

ماتشوف شر والحمد للـــــــــــه على السلامه .

الله يسلمكم .. وماقصرتوا ..

والله انكم هونتوها علي ..

الحمد لله على السلامة :)
ومآتشوف شر ان شاء الله :)

الحمدلله على سلامتك

والحمدلله على كل حال

الشباب ماقصروا معاك

بالنسبه للشمعه مرررررررره غاليه في الوكاله

شمعة الكوبيه قيمتها ٢٠٠٠ ريال فما اعرف السيدان كم

بس مالك الا تشليح او زي ماقالوا الشباب طقم تجاري ليد وعدسات

:)

وعليكم السلام ..

التصليح بورشة محترمة ..

سمكرة الرفرف مع الرش 300 ريال
الصدام فيبر جلاس مع الرش 250 ريال
الاصطب كامل يمين حدود 600 ريال

وتلميع خارجي كامل بـ 200 ريال ..

الشغلة ما تاخذ منك بالكثير يومين - 3 أيام وترجع سيارتك مثل الحلاوة ..

شغلتك بسيط جداً ولا تكبرها ، واحمد ربك ، وومكن تكون دفعة بلاء إن شاء الله ..

وعليكم السلام
الحمد الله على السلامة وبسيطة إن شاء الله يمكن أنها عين وراحت أنا أقترح تخلها كذا فترة إلى ما تخلص إختباراتك أو تخلها يومين أوثلاثة حتى الكل يشوفها وتروح العين .
المهم الرفرف أقترح عليك تعدله تعديل فقط لانه بسيط وما يحتاج لا سمكرة ولا بوية لو أنك بالقصيم دليتك على ورشه أختصاصهم التعديل ويرجعها لك وكالة بدون رش وإذا كان فيه تقشر بالبوية حقت الرفرف سو لها تلقيط وبكذا أنتهيت من الرفرف والشمعة أسال عن قيمتها بالوكالة والنعماني وقارن الأسعار بعدها ومر التشاليح يمكن تحصل شيء نظيف وبنص سعر الجديد حتى توفر على نفسك والصدام لمعه كامل ومر حقين الفيبر جلاس وخلهم يلحمون زاوية الصدام إذا منكسره قواعدها البلاستيك وبعدها مر ورشه محترمه خلهم يركبون الشمعه ويوزن الكشاف ويلقط الصدام إذا المخوش بسيطة أو رش الصدام كامل وبكذا توفر على نفسك أشياء كثيرة ومختصرة ....

مشكوووورين ..

الله لايهينكم

الحمدالله على السلامه وأنشاالله ماتشوف مكروه

اقتباس:

---

لعلها تكفير ذنوب ... احتسب الأجر وقل إنا لله وإنا اليه راجعون اللهم أجرني في مصيبتي واخلف لي خيراً منها


المهم

شد حيلك بدراستك :)

---

والحمدلله على السلامة ماتشوف شر :)

يستحسن انك تخليها ليما تخلص اختباراتك

عشان اذا فيه احد معطيها صاروخ يشوفها وتطيح من عينه

والله يعطيك من خيرها ويكفيك شرها ..

الحمد لله على السلامة


وأن شاء الله أخر الأحزان

اول شي الحمد لله على السلامه خفايف ان شاء الله ولا تضيق صدرك وركز في اختباراتك...
انا اشوف انك تخليها كم يوم على حالها واول ما تخلص الاختبارات رح صلحها..
رح مر ورشة الوفاء مشهووره تلقاها في الصناعيه الي عند مخرج 18 رح هناك واسأل عنها مشكلتهم غالين شوي بس شغل وكاله او افضل من الوكاله في بعض الاحيان ميزتهم انهم يهتمون بالسياره كامله ويشوفون كل المشاكل الي فيها مو بس مكان الصدمه يسمكروون وخلاص لا يشوفون كل شي يعني اذا هي اثرت على ممشى السياره مثل الحذفه او رجه و كهرب السياره او على الشمعات وحتى الكشافات يوزنونها ويلمعون السياره كأنها جديده..
بس نصيحتي لا ترش الرفرف عدله بس والصدام الورشه نفسها يلحمونه واذا احتاج رش رشه عادي مايضر والشمعه اذا كان سعرها اقل من 1000 اشترها لان السشمعات المستعمله ما تضمنها ولا زي ماقالو الشباب ركب التجاري والكشافات الورشه يزبطونها وبس:)..
اتمنا اني افدتك..
تحياتي..:rolleyes: