راس الماكينة ...فزعتكم يا شباب الله يخليكم

السلام عليكم ورحمة الله وبركاته . . . .



والله فشلة أول مشاركة في المنتدى وتكون طلب :o

بس الله يجزاكم خير أخوكم في مشكلة دوختني مرررررة . . .



هذا ياطويلين العمر عندي هوندا أكورد 2002 4 سلندر :rolleyes:


كنت طالع من الشرقية ماسك خط الرياض في الليل... ليلة الأحد (بعد الاجازة على طوووول) . . .



المهم يوم باقي 195 كيلو على الرياض (يعني في نص الخط)
الا وأنتبه الى مؤشر الحرارة وهو طاااق H :aa_9adma:. . . انا يوم شفت هالمنظر طاح قلبي عند دوسة البريك . . . وقفت على جنب وقبل لا أطفي السيارة الا وتقوم ترج كأنها خروف العيد و راح ينذبح ألحين :se7:. . . المهم طفيت السيارة فتحت الكبوت أشيك على الدنيا ويش صار فيها . . .



المهم كان فيلم هندي وأنا على الخط . . . وعلى ما جبت سطحة وشلتها وثاني يوم وديتها للورشة ... صارت سوالف وانقلبت السالفة و وصارت مسلسل مكسيكي . . .



المهم ثاني يوم وديتها الى الميكانيكي الي أتعامل معاه في الصناعية القديمة . . . ورشة (الدوسري) إذا تعرفونها . . .

هي مرررة قريبة من ميزان العضيب . .. حولها . . .

المهم يوم شافها الميكانيكي ... اسمه غضنفر . . . ومعاك كهربائي اسمه محمد آصف . . .المهم غضنفر شاف ان راس الراديتر انكسر وقام يتسرب البخار والماي والذي منووو من هالكسر . .

المهم جيت بأغير الراديتر ... قالي الميكانيكي : جيب راديتر اماراتي . . . يقول انه مركبه لناس واجد و ما أحد اشتكى منه . . .



رحت أسأل على هالراديتر الاماراتي ماحد عنده . . . ودوخوني المحلات كلها . . . واحد يقولك التايواني أفضل حاجة . . .واحد يقولك الصيني أفضل حاجة . . . ويرجع واحد يقولك انه التايواني ما تقدر تفرق بينه وبين راديتر الوكالة . . .

و واحد يقولك وكله ثقة :A6rb.Com_57: : ترى أي راديتر تشوف مكتوب عليه Made In Taiwan ما عليك منه ترى كلام فاضي وكل الراديترات الي في السوق كلها صيني ؟؟!!!

المهم وأنا ما بغيت أجيب وكالة والي سعره تقريبا 1600 ريال :se7:. . . لأني مو متأكد انها المشكلة الوحيدة الي في السيارة

(شكلها قدّامي صرفياااات جااامدة) :cray: . . . المهم ما ليكم بطولت السيرة . . .



خلصنا مشكلة الراديتر قال الميكانيكي : بغير راس الراديتر وباسوي له تصييخ وما أدري وشو وراح يصير مضبوط . . . المهم أنا بصراحة ما همني الراديتر ألحين . . . ممكن أشوف له حل أفضل بعدين حتى لو غيرته . . . بس المشكلة الآن وهي الي راح تشيب راسي :se7:. . .



بعد ما ركب الراديتر وشيك على الحرارة والذي منو . . .اكتشف إن راس الماكينة تعبان . . . فقال :

أنا راح أفكه وأشوف اذا (البستن) مو تعبان راح أخرط الراس وأنظفه ويمشي معاك تمام.. .والا إذا كان (البستن) تعبان مالك حل غير انك تغير الماكينة . . .

قلته طيب شوف واعطيني خبر . . .
بعدين رد عليي وقال : انا شفت (البستن) وهو ترى تعبان شوي . . . يقول فيه فضاوة . .. فإذا باركب لك الراس . . . انت وحظك . . .

ممكن يمشي معاك شهر . .. ممكن ست شهور . .. ممكن سنة:cray:

انت وحظك . . . والا غير هذا مالك غير إنك تغير الماكينة . . . .



فالآن المشكلة يا إخوان اني محتار . . . المشكلة السيارة خلالالالاص تعبت من الصرف عليها . . . وانا باقي عليّ شهر وشوي وأخلص من الدراسة في الرياض وراح أشتري لي سيارة ثانية .. . ما أدري ويش الحل . . .

أركب عليها مكينة مستعملة؟؟؟

ولا امشي براس المكينة و (البستن) الي فيه شوي فضاوة على قولته؟؟ لين ما أخلص هالترم وأبيعها بعدين تشليح؟؟

ولا إيش الحل بالضبط مش عارف . . .:(

فأرجو فزعتكم يا شباب (محبي الهوندا):(

مالي خبرة في هالاشياء ،، لكن ،، يمكن عندي شيئين تفيدك :

* الورشة اللي انت موديها لكم ،، متخصصين ولا قاعدين يهرجون على راسك ؟ <<< المفروض مايطلب الرديتر الا وهو عارف كل الشغلة حقت راس المكينة ، مو يطلب الرديتر ثم يركبة ثم يقول لك الراس خربان ضبظة ، ثم يقول الشكمان خربان ضبطة ثم يقول المعدة خربانة >>> قاعد يسولف مع نفسة وش معدتة يبو !!

* بما انة ترمك الاخير ، مشي حالك بالسيارة ، بأنك صايم وراح تفطر على سيارة جديدة ، الا اذا كنك بتبيع هالاكورد وسعرها بيروح في مبلغ للسيارة الجديدة << هذا الوقت ،، صلحها مضبوط عشان تجيب لك قيمة ،،

هذا اللي عندي واعذرني ماقدرت افيدك في المشكلة نفسها .

كلام اخوي كوكو كورد صحيح

ولو تحاول تشوف كذا ورشه متخصصه يكون افضل لك :cool:

هلا فيك أخي كوكو كورد . . . لا ترى هو قالي من الأول . . . احتمال عندك راس الماكينة ضرب . . . بس انت على الحالتين لازم تغير الراديتر . . . فخلني أغير الراديتر ونشوف كيف يشتغل المحرك... هل السالفة بس سخونة المحرك ولا بالفعل الراس تعبان؟؟

وطلع كلامة صحيح . . . يعني أنا أولا مغير الراديتر مغيره . . . فبعد ما غيره تأكيد انه الراس تعبان . . . وعلى كلا مشكور كوكو كورد ويكفي انك شرفت الموضوع بردّك . . . عاد العشم في بقية الأعضاء بعد :o

طيبعي , ترتفع الحرارة هذي من الراديتر , أما إن السيارة ترجف بقوة يوم تنطفي فهذي تكون يا كراسي مكينة أو من الهيد أو راس المكينة كما ذكرت أخوي .
لا يروح بالك لبلف الحارة , لأنه يرفع الحرارة بس و ما يسبب هالرجفة .
فكر فيها , إنت الحين بتسوق السيارة و بتمسك خطوط , ففي أي لحظة ممكن توقف عليك السيارة و تقولك أرحمني ودني التشليح .
طيب ممكن تعطينا نبذة أو ملخص على الأشياء إللي غيرتها للسيارة في السنة الأخيرة ؟ لأني وقتها بأقدر أفيدك :) ...

حاليا أنا يوم قريت موضوعك كنت أكلم واحد من الشباب في مشروع تغيير مكينة لسيارته , و على طول دخلت و قريت موضوعك .
أنا بأعطيك رأي , هو في هذه الحالة إنت راح تغير المكينة راح تغيرها لا محالة إذا تبي تبيع السيارة بسعر حلو .

أنا بأشوف إنك تركب مكينة الأكورد موديلات 2003 - 2005 لأن فيها أشياء متميزة أكثر من الموديلات الجديدة . مثلا :
1- توصيل البنزين عندهم عبارة عن ليات أما في الـ 2006 و إنت طالع بيكون إليكتروني .
2- مكينتهم K24a4 و هي شي رائع جدا في التعديل .

غير كدا إنت القير حقك حق موديل 2002 هو أقوى قير نزل على الأكورد في السعودية هنا . بس ما أدري إذا بيشبك على الـمكينة أو لا ؟ و بعدين سعر المكينة في التشاليح بجدة بـ 3000 إلى الـ 4000 ريال للشي النظيف جدا . و طبعا مع الظفيرة و الكومبيوتر .

الأفضل و من وجهة نظري تغير المكينة . أفضل لك و صدقني لو غيرتها و شفت عزم السيارة راح تشيل فكرة بيعها من راسك و تشتري سيارة ثانية جنبها .

كلام سلييييييييييييم 100 % ^^^^^ :cool:
....
انا رايي من راي اخوي ACCORD 764
....
انت بتغير المكينة يعني بتغيرها سواء الحين واللا بعدين .... اذا انت تحب السرعة والدوس ركب مكينة H22 وشوف كيف بتصير أكوردك ;)... والله يعينك تدور لك مكينة
....
تحياتي

:p^^ كلام فاضي انت وياة ^^:p
قير 2006 ما يركب على 2004 << بنفسى سألت خبير هوندا في ورشتي العزيزة ..وتبيه يركب على 2002 !

تغير المكينة اللي ما خش مخي من 2002 الى 2003 يبيلة تغييرات اخرى بنصف قيمة اكوردك 2002 بحالتها الراهنة ،،
تغير المكينة
تغير الكمر <<< خلاص انسى الموضوع
تغير كراسي المكينة
تغير العكوس <<< ومن العكوس للهوبات << ومعها الفنجات <<< ومعها العدة اللي حول الكفر كاااملة ،،
مرة وحدة بعد الدودة وعدة الدركسون كاملة ،،
^^ وفجأة حسيت ان معك جيب نيسان مركب مكينة SS ^^

في النهاية والاخير ،، هاليومين كل شي جايز ،، انت ارخي فلوسك ومالك الا مكينة مكوك فضائي ببنزين 91 تركب سلام سلام ،،، لكن ،،، اين الجدوى من ذلك ؟؟

عزيزي:d

الراديتر وش صار فيه .. اذا انكسر الي فوق يعني بجمب الغطا وحواليه .. تغير الي فوق .. وتشتريه لحاله
يعني يسمى غطى راديتر>>مب الغطاء الدائري..
>>عندي فيديو بس خلني انزله وارفقه لكـ

كلفني 100 ريال مع التسييخ وشغل اليد والقطعه..

والشي الثاني
قبل ماتغامر وتغير المكينه .. اسأل كم فني . .. وروح اكثر من ورشه ..
خويك .. ممكن يتعلم عليك.. وممكن يكون صادق ..
..
الراديتر .. يتغير الغطا الي فوق (الفيبر)
والماكينه لاتغامر فيها....

:d

تعال .. وش البستن..
ابي اعرف شغله بسيطه يتم تغيير الماكينه بسببها ..
الي اعرفه ايام ماكنا صغار ايام الدداسن .. راس المكينه يتغير .. والمكينه تبقى..
..
:d

اقتباس:

---

قير 2006 ما يركب على 2004 << بنفسى سألت خبير هوندا في ورشتي العزيزة ..وتبيه يركب على 2002 !

---

مع احترامي الشديد لرائيك اخوي..

لكني مركب قير الانتيجر2002 اال DC5 اللي جاي 6 نمر على مكينه اكوورد 2005 ..
والحين بركب قير ثاني على مكينه k20a2
...................................
اما بالنسبه لمكشكلتك اخوي..
يا انك تشوفلك راس مكينه مستعمل وتركبه وتتوكل على الله..
او شفلك مكينه زي اللي على سيارتك ..نص عمر..

^^ كويس كويس ،، شي طيب ^^

اجل ورشتي يوم قالو كذا قصدهم انهم ماودهم يشتغلون كثير ولا يبون يخسروني واجد ،،
وكويس اني كتبت هالكلام :)

اقتباس:

---

في النهاية والاخير ،، هاليومين كل شي جايز ،، انت ارخي فلوسك ومالك الا مكينة مكوك فضائي ببنزين 91 تركب سلام سلام ،،، لكن ،،، اين الجدوى من ذلك ؟؟

---

أخي meshoo

شاكر لك مرورك الكريم . . .

أخي Accord 764 :

والله ياطويل العمر أحس -ولأني مو راعي سيارات- أحس إني ما راح أكون في الفترة الجاية فاضي للسيارات وعالمها ... ما أقولك ... مع إني أحب إني أسوق سيارة معدّلة ولا مغير مكيتنها وزايد من عزمها واللزي منو . . . لكن أحس إني موفاضي للسيارة هالفترة أبد . . . فيادوب إني أصلحها وأمشّي بها أموري . .

أما بالنسبة للإصلاحات الي سويتها في السيارة ... مع الأسف إنه السنة الماضية ضرب القير عندي . . .:(
وسويت له توضيب وكلفتني الشغلة مع قطع الغيار أصلية من الوكالة مع (الجرن) وشغل اليد وشغالات هني وهناك حوالي 6000 ريال . . . :g::cray::a033:

وماشاء الله والحمدلله و لا إله إلا الله والله أكبر <<<< بتصلّي؟؟ :cool:

إنه لحد الآن ما شي تمام :). . . والله يستر لا يضرب مرة ثانية بعد . . . :o

أخي i-vtec 2005 :

شاكر لك مرورك . . . والله يا أخي وبصراحة ما فيه أحد ما يحب الدوس :cool:. . . يعني حتى أنا إلي ما لي في السيارات وعالمها أحب الدعس . . . والله ودي تكون السيارة فيها عزم جبار . . . بس علشان أثبت لك إني ما لي في السيارات . . . تصدق إني ما أعرف وشو مكينة H22 :o

أخي محمد :

تصدق هذا الي صار في الأخير :). . . بدلت الغطا إلي فوق والله أشوفه ماشي زي الحلاوة . . .
وعندي سؤال . . . الله يعينكم بس أخوك علّيمي في السيارات :o. . .

الحين إذا المشكلة صايرة بس في "البستن"
هل فيه امكانية إنا نبدله بواحد جديد؟؟:o لو السالفة تحتاج إنا نجيب ماكينة ثانية ونفكها ؟؟ :o ما يمكن إنا نحصل بستن لوحده؟؟ :o

أخي dr.vtec :


شاكر لك مشاركتك

غير مكينة من نفس الموديل احسن


بالنسبة لانك تركب مكينة اكورد 2003 وفوق على 2002 هذه شوي صعبة


لانك بتخلي القير واذا خليت القير مستحيل يركب وحتى اذا ركب بتلقى مشاكل في الكمر اللي المفروض تغيره لاجل تركب المحرك الثقيل الجديد وغير كذا لابد تغير الكمبيوتر والظفيرة بالكامل


وغير هذا كله نظام الدواسات بيختلف لان القديم باسلاك لكن الجديد الكتروني بحت يعني تدوس انت في الدواسة والكمبيوتر يفتح منظم البخاخ على حسب وزنية دعستك يعني غير مباشر وغير كذا اماكن كراسي المكينة تختلف في الموديل القديم بالجديد لان القديم فيه 4 كراسي مكينة او 5 لكن الجديد 7 كراسي للمكينة والقير

حاليا ركّبت نفس راس المكينة الموجود . . . ودّاه الميكانيكي للمخرطة وضبّطه. . . وغير كم قطعة . . . وحاليا السيارة تمشي الحال . . . بس الله يستر كم راح تدوم معي . . . وخصوصا ألحين على كلامه إنه (البستم) في فضاوة . . . فما أدري يا إخوان . . . ألحين هذا (البستم) ما يتغير الا بتغير المكينة ولا كيف؟؟ . . . ومشكورين وماقصرتوا ... :)

امسح الراس وبس لاتغير ماكينة وراح تمشيك انشاءالله اكر من شهر

تعرف ليه لان الميكانيكية كلهم هذي حركاتهم اول شي يقولك لو مسحت لك الراس يمشيك بس مدري كم تعرف ليه قالك هذي الكلمة هو خايف يصير اي شي لاسمح الله وانت تكون قلق كل شوي ترجعله يقول هذي الكلمة علشان يحمي نفسه من الضمان

ثاني شي هو يبغا يكسب منك اكثر بس مايبغا يغشك ويوجع ضميره فيقولك البستن تعبان علشان تغير ماكينة ويكسب اكثر بطريقة ماتوجعه في ضميره يعني يبيك انت تختار اصلاح الماكينة مو هو يفرضه عليك

ثالث شي في ميكانيكي مايعرف انه الماكينة بتمشي ولا مابتمشي بعد مسح الراس مع انه اسهل موضوع بالنسبة للميكانيكيا

رابع شي انصحك انك تمسح الراس مسح ممتااااااااااااز عند مخرطة تكون 100% وركبه وتوكل على الله وسيارتك بتعطيك خدمة اقل شي سنة :cool:

اقتباس:

---

المشاركة الأصلية كتبت بواسطة mdar_86

حاليا ركّبت نفس راس المكينة الموجود . . . ودّاه الميكانيكي للمخرطة وضبّطه. . . وغير كم قطعة . . . وحاليا السيارة تمشي الحال . . . بس الله يستر كم راح تدوم معي . . . وخصوصا ألحين على كلامه إنه (البستم) في فضاوة . . . فما أدري يا إخوان . . . ألحين هذا (البستم) ما يتغير الا بتغير المكينة ولا كيف؟؟ . . . ومشكورين وماقصرتوا ... :)

---

انا اشتغلت ميكانيكا لفترة وفعلا اذا فيه فضاوة في البساتم هذه معناها مشكلة فعلية وراح تلاحظ بعد ستة شهور او بالكثير سنة بانه يضرب الشنبر عندك

الفجر البعيد : شاكر لك مشاركتك وتسلم :)

بلال العلمي : والله ياريت تفيدني أكثر أخوي بلال . . . وتقول لي : ألحين البستم ما يمكن يتغير بدون تغيير المكينة كاملة؟؟

واذا بغيت أغيرها... كم تكلف عمليت التغيير هذه؟؟ . . . وشاكر لك مشاركتك . . . وانشالله نستفيد أكثر من مشاركاتك الطيبة:)

اقتباس:

---

المشاركة الأصلية كتبت بواسطة mdar_86

الفجر البعيد : شاكر لك مشاركتك وتسلم :)

بلال العلمي : والله ياريت تفيدني أكثر أخوي بلال . . . وتقول لي : ألحين البستم ما يمكن يتغير بدون تغيير المكينة كاملة؟؟

واذا بغيت أغيرها... كم تكلف عمليت التغيير هذه؟؟ . . . وشاكر لك مشاركتك . . . وانشالله نستفيد أكثر من مشاركاتك الطيبة:)

---

تقدر تغير البساتم بس اول لابد تتاكد اذا كان جدار البستم متاكل او لا لانه اذا متاكل راح تضطر انك تخرط المكينة وتجيب حجم بستم اكبر بشوي اظن مقاس 10 وبعده بتجيب طقم سبائك متحركة وبساتم فقط وهي تكلفتها ما تتعدى 1500 ريال فقط والمخرطة اذا بيخرطون لك بياخذون 250 اذا ما يعرفونك واذا يعرفونك ياخذون 180 تقريبا او اقل بشوي




انت امشي عليها ستة شهور وشوف اذا سمعت صوت قرقعة عالي في هذه الحالة تبدا العملية هذه