السلام عليكم
صباح/مساء الخير
أهلا بأهل هوندا الحبايب .. مر زمن وتستمر الحياة
رجعت لكم اليوم حابب آخذ من نهل علمكم وخبراتكم
أمس كنت مسافر وتعطلت فيني الاكورد .. وسطحتها الين الرياض
وتفاجأت بأنهم يقولون لي المكينة راحت عليك !!
هل من سبب ؟ أية خبرات أو أحداث مشابهة ؟
وما العمل الآن ؟
والحمدلله على كل حال
بخصوص الردود(للادراة او اجتهاد الاعضاء) يرحم أمكم كبروا حجم الخط .
لابس نظارات واتعب كمان من حجم الخط في الردود وشكرا
اقتباس:
المشاركة الأصلية كتبت بواسطة uo8
الحمدلله على كل حال
ياليت تذكر لنا كم ماشية السيارة
وكيف كان تشييك الزيت
وهل كنت من اللي يحبون المقاومات ..... الخ
اقتباس:
المشاركة الأصلية كتبت بواسطة uo8
الادارة نايمة في العسل
قلنا لهم كبروا الخط التلقائي واحذفوا السؤال العشوائي
لكن لاحياة لمن تنادي وانا متأكد انه ماأحد قرأ الاقتراح نهائي
وعليكم السلام
صباح النور
أهلا بك
أول شيء الله يعينك ويعوضك
وثاني شيء الأسباب كثيره :
1) يمكن ماء الراديتر عندك كان ناقص وارتفعت الحراره بدون ما تنتبه .
2) يمكن زيت المكينه اللي انت استخدمته مغشوش .
3) يمكن زيت المكينه عندك كان ناقص أو ممكن كان عندك تهريب بالسيفون أو الصرة بسبب البنشري ما ركبه زين .
4) يمكن أنت من النوع اللي ما يحمي سيارته ؛ يدق سلف ويمشي ويدعس كثير والسياره بارده .
# التحميه مهمه جدا واذا انت مستعجل ولا يمديك تحمي انتظر شوي الين ينخفض شوي الـ rpm ثم امش شوي شوي الين توصل حرارتها الطبيعيه
# كم ماشيه سيارتك ؟
# كل كم تغير ( الزيت والسيفون + فلتر الهواء + فلتر البنزين ) ؟
# وش نوع الزيت و كم لزوجته ؟
# السيفون اللي تستخدمه أصلي وكاله أو من البنشري ؟
# هل سبق انك غيرت المكينه من التشليح أو وضبت المكينه ؟
# السياره على يدك واستخدامك من مدة طويله وتعرف كل شيء فيها او توك مشتريها ؟
من خلال تجربتي للأكوردات 2006
مكاين الهوندا من أفضل المكاين :
1) تتحمل : مره غيرت ماء الراديتر ولا عبيته زين لأني كنت عليمي وارتفعت الحراره ومشيت على السياره ولا خبطت المكينه < السالفه قديمه قبل سنوات طويله والحمد لله إلى الآن ما عندي مشاكل .
وانحلت مشكلة الحرارة بتعبئة الراديتر لأني غيرت الماء ولا عبيته زين
2) ما تنقص زيت ولو فرضا نقصت نقصها قليل .. لكن الإحتياط واجب
3) عزمها وقوتها حلوه وإقتصاديه في البنزين .
أنا أحاول أحمي السياره قبل أمشي ؛ واذا اظطريت امشي بدون تحميه أحاول أني ما أشد بقوه على المكينه وهي بارده ؛ لكن اذا وصلت حرارتها الطبيعيه اخذ راحتي بالشد والسرعه والخ...
التحميه مهمه جدا للحفاظ على المكينه
وأغير زيت المكينه كل 5 آلاف والسيفون كل 10 آلاف
وأشيك على الزيت مع أنه ما ينقص لكن للإحتياط فقط كل 1500 كيلو أو 2000 كيلو
وفلتر البنزين أغيره كل 80 ألف
وفلتر الهواء أغيره اذا كرفته
والبواجي العاديه الرخيصه كل 40 ألف
يعني أشياء بسيطه وبديهيه
والحمد لله المكينه تمام
(3+3=6)حقت السؤال العشوائي, كلكم نفس السؤال؟
اهلا وسهلا بالشباب
سلطان
نو ويي .. لا مقاومات ولا خرابيط
ماشيه 200.000
الزيت مغيره قبل اطلع من الرياض قبل اسبوعين
وعند نفس الشخص ونفس البنشري من فتره طويله
الشك الوحيد انو اخر تغييره كانت مع السيفون
ماكان فيه تهريب من اول وقد حصل لي تهريب من اول
وغيرت الكارتير كامل في الوكالة
التغيير كل 5000 جي تي اكس كاسترول 10-30 الغطا الاحمر
السيفون من البنشري كل 10.000
فلتر الهوا قبل شهر تقريبا
فلتر البنزين = مااعرفه ولا يعرفني
البواجي غاليه = فلم اغيرها منذ شريتها !
والى الان ياعزيزي سلفر الحراره ماطلعت !! ولا تزال ع الثلث !
أحمي السيارة الين اتبخر بريحة الشكمان
يمكن الزيت مغشوش = يمكن
الموية مشيك عليها قبل اسافر
الان السيارة مره تشتغل ومرات ماتشتغل
يوم وقفت على الطريق وفتحت الكبوت
مافيه حرارة ولكن !
السيور كلها متوقفه ، المروحه لا تعمل !
المكينه اللي شغاله بس :|
وعليكم السلام
كيف تاكدوا ان الماكينه رايحه عايروا الزيت ؟!!
انت ذكرت ان السيفون من البنشري معناته تجاري مو اصلي
وقلت ان السياره ماكان فيها حراره وافتكرت ان المويه اختلط مع الزيت
السبب الثاني احتمال طرمبة الزيت تعطلت
وتاكد من طرمبة البنزين واستبدل فلتر البنزين ممكن اللي جعل السياره ماتشتغل طرمبة البنزين ..
ماظنيت المكينه راحت عليك
اللي اعرفه الهوندا فيها نظام حمايه لاصار سير المكينه يحتاج تغيير تطفي من نفسها
شف غير السير وان شاء الله تنحل الامور
بعد فترة انتهاء الضمان أنصح ملاك الأكورد بعمل فحص السيارة كل 40,000 كم و تغيير الزيت و الفلتر و فحص موية الرديتر عند كل 5,000 كم.
متوسط ممشى الشخص العادي في السنة 40,000 كم يعني كل سنة تودي السيارة للوكالة مرة بعد انتهاء فترة الضمان.
التشييكات ستكون عند 100,000 كم و 140,000 كم و 180,000 كم و 220,000 او 260,000 و 300,000 و بعدها لو تبيع السيارة أفضل من وجهة نظري أعتقد انها ما قصرت معك.
اللي يشتكي و يقول غالية صيانة الوكالة زين احسب كم مرة بتوديها الوكالة بعد 100,000 كم حتى 300,000 كم.
و بكذا لو وديت السيارة في السنة مرة للوكالة راح يكون متوسط التكلفة عليك تقريبا 3,000 ريـال في السنة و اذا وديتها للوكالة أيام عروض الفحص المجاني اللي صار الوكيل يعملها راح تنخفض التكلفة إلى 2,000 ريال تقريبا
بعض الناس يستخسر 2,000 ريـال في صيانة سيارته لكنه يدفع فوق 5,000 ريـال و أحيانا فوق 10,000 ريـأل اذا وقع الفاس في الراس.
hasan1982
كلامك جميل أخوي الغالي .. لكن الشخص مهب فاضي كل شوي غاث نفسه بالصناعية فحص او بالوكالة وغش الوكالة بأشياء لاتحتاج غيار !
دام السيارة تشتغل زين وتشيك عليها بالزيت ، الحمدلله ممتاز ، اما اللي بيقعد يوسوس بالسيارة بيخسر فيها كثير ، وكل السيارات للاسف كذا !
والله شي غريب بخصوص نقص الزيت يبين معاك تقدر تشوف الزيت وين واصل واذا كان لونه حليبي يعني المكينه خلطت واغلب الظن تكون من الحراره يعني ماشي والحراره فل وانت ماتدري وافتح غطاء الزيت يبين معاك
وترى خصوصا مكاين الهوندا صعب تخرب بسرعه انا سيارتي الان 380 الف ماشي ولاعمري صفيتها والزيت كل 10 الاف ابدله ومن احسن مايمكن
حياكم الله يا شباب
سعيد جدا بآراءكم .. ماشاء الله تبارك الله ’ الله يحفظ لكل واحد ماله وموتره
تم فك المكينة وطلع الخراب من طربمة الزيت هي اللي تعطلت بدون سابق انذار ، وكان من المفترض انو المكينة تعطي لمبة بس للأسف
فقالي الميكانيكي انو مع السرعة انعدم الحساس وما امداه يعطي اشارة
ووالحمدلله اني توقفت مباشرة ولو مشيت فيها زيادة كان راح القير
(هذا اللي عرفت اجمعه من كلام الميكانيكي اللي فك المكينة)
الحمدلله على كل حال .. جاري البحث عن مكينة والله يعين وييسر.
وفي إحدى الروايات أنها قد تكون عين
طبعاً هذي عند كل السعوديين يتقمصون وضع المغلوب عليهم والمصابين وهي بيد الله أولا وآخراً