الوكالة بنفسها ماقدرت تطلع المشكلة!!!

مرحبا

طبعاً ياشباب لي فترة زمنية طويلة جداً ماشركت فتحية طيبة للقائمين على الموقع ولأعضاء النادي الرائع .

ياشباب عندي مشكلة بسيطة في السيارة وياليت احد مر بمثل هذا الظرف يساعدني في العثور على حل لأن الوكالة بنفسها تقول مافيها مشكلة لكن أنا عارف ان هناك مشكلة في دواسة البنزين بحيث لما امشي بالسيارة احياناً وليس دائماً على سرعة 40 راقي فوق مطب او لاف يمين او يسار الاحظ ان ادعس على الدواسة كلها والسيارة ماتمشي اضطر اني اوقف واحياناً انزل القير على d3 مشان هالتعليقه وتضبط معاي وتمشي السيارة، مثل ماقلت لكم الوكالة كشفوا عليها بالكمبيوتر وقالوا مافيها شيء فما الحل برأيكم أخاف الموضوع يتطور ويأثر على قطع او اشياء ماكانت في البال ومشكلة V6 قطعها ناااااار

ويعطيكم العافية .

ياليتك تشرح بطريقه اخرى
عشان نقدر نفيدكـ
لآني
للاسف مافهمت عليك

وعليكم السلام

هلا اخووي انا اشوف انك توديها لمهندس مختص بقير السيارات وهو بيفيدك ان شاء الله

وانا بسالك وبردلك ان شاء الله

لما امشي بالسيارة على السيارة وارفع رجلي عن دواسة البنزين مثلاً نزولاً من مطب او للإلتفاف ارجع ادوس ماتمشي السيارة اسمع صوت حنة المكينة من غير اي اندفع فأضطر اني اوقف واحط d3 مشان تمشي السيارة إن شاء الله واضحه .

واضح ياغالي


شوف مالك الا توديها إلى ورشه متخصصة في القير الأوتوماتيك

إن كان إنك من سكان الرياض فيه عدة ورش ممتازه

عندك شلنجر متخصصه في القير الأوتوماتيك في الصناعية القديمة

وفيه ورشه إذا ماخاب ظني فإن إسمها ( ورشة الجنوب ) هذي الورشه متخصصه في هوندا فقط

في الصناعية القديمة أيضاً


وأنا أتوقع والله أعلم أن عندك مشكله في ترس القير أنه يفلت


والله يجعلها آخر المشاكل

حياك الله اخوي عليك ان ترسل الى الشركه الام وتشكي الوكيل بس بعد ما تحصل شئ يثبت صحه كلامك

احتمال كبير ان مشكلتك تكون من القير اتوقع تروس متى اخر مره غيرت زيت القير

الحق شيك على القيير لا يخبط

انا قير مووتري خبط وقيمته بالوكاالة 26820

عاد قير الv6 2006.2007 حساااس

تحيااتي..

ياليت تذكر لنا كم ماشية سيارتك ومتى غيرت زيت القير

وش اخر صيانة سويتها للسياره سواء بالوكالة او برى الوكالة

وان شاء الله نفيدك اكثر

اتوقع الحساااس فيه مشكله (حساااس القير ) شيك على الحسااس عن واحد متخصص لقير هوندا لان قير الهوندا من القيورر الحساااسه جدااااا
تقبل تحيااتي ...

ياشباب انا سويت صيانة 100000كم عند الوكالة هل معقولة يسوونها ومايغيرون زيت القير!!! ، أنا مااقول إلا الله يستر إذا كان الوكالة شغلهم مشي حالك هذي مصيبة :eek:، لكن اليوم راح اشوف وضع زيت القير في اي محطة وإذا ثبت انه ماتغير راح ارفع شكوى .

طبعاً انا سيارتي الآن ماشية 111000 يعني إذا كان فعلاً غيروه اكيد لازال مفعوله موجود لكن شكله العكس ، اللي يعرف ورشة متخصصه بقيور هوندا في الشفا ولا السويدي لا يبخل علينا ولكم جزيل الشكر طبعا انا من الرياض .

عندي بس سؤال ؟؟؟ انتا لما رحت الوكالة ما طلع معاك مهندس وجرب السيارة بنفس الطريقة وشاف المشكله مباشرة ؟؟
ولا كل عاده لما تكون في مشكله وتروح الوكالة ويجربها المهندس ما تبان المشكله الين تستلم السيارة ومعا اول مطب تطلع مره ثانيه :mad:

اخوي دحوم زي ماقلت لك روح

على ورشه شلنجر

أو ورشة الجنوب


بالنسبة لورشة الجنوب متخصصة في هوندا بس

وين ورشة شلنجر وورشة الجنوب يافتى زهران تكفى دلني عليها او عطني رقم كل واحده منهم ، اساسيان شكلهم ماشيكوا على السيارة وفعلاً او ماطلبت مطب وعلى طول طلعتي المشكلة .

ياشباب والله خوفتوني كل شيء يهون إلا اني اشتري قير بحول 30 الف ، إن شاء الله يكون الموضوع اصغر من كذا بكثير .

يا اخوي انا اتوقع ان سيارتك اذا احتر القير ما يرجع الى النمرة الاولى لانها صارت مع واحد من الشباب و راح الكويت و بدل القير تقريباً بـ 3500- 4000 و تعطيهم القير القديم و انت روح الى واحد مختص و شوف

قبل ماتسوي شي غير الزيت والفلتر الخارجي للقير وشيك على كراسي القير

احتمال ثاني يكون من حساسات القير لكن من كلامك فحص الوكالة مابين شي

ياشباب رحت لورشة الجنوب الله يعطيه العافية فتى زهران في الصناعية القديمة ، واتضح لي ان هذي مشكلة في بدأت في هوندا اكورد ستة سلندر من 2003-2007 ولا يوجد لها اي حل إلا بتغيير القير وإبقاءه على هذي الحال ليس فيه اي ضرر .

طبعاً هذا عيب مصنعي من اليابان وليس له حل إلا بتغيير القير من التشليح اكيد يفضل .

ياجماعة والله عيب كبير بصراحة بديت أكره الاكورد من كثر عيوبها وآخر حاجة اللي ماجاء على بالي عيب في القير والله عن جد شيء يضيق الصدر، والقهر الاكثر ان العيب هذا في غالبية الستة سلندر من 2007 وتحت ، طبعاً اكيد ماراح اغير القير ولاهم يحزنون وإذا "قفلت الاخلاق" ببيع السيارة .

وشكرا لجميع اللي شاركوا .

تغيير قيير ؟؟ كيف كذا ؟؟
طيب اذا طلعت المشكله في القير الثاني كيف السوات بعد الخسارة ...:confused:

هنا تكمن المشكلة يا اساسيان لما تغير القير ويطلع القير الثاني تالف ايضاً .