ماعندي خبرة لا تبخل علي بالمساعدة

السلام عليكم ورحمة الله وبركاته ،،


في البداية كل عام وانتم بخير ،،


ومن العايدين والفايزين ،،


انا سيارتي اكورد 2005 ،،


بصراحه مهتم بالاشياء الاساسية يعني مثل الفحمات والبواجي وزيت المكينة والجير مع اني مع كل تغيير مااعرف اني لازم اغير الفلتر (( مايقولون الوكالة لي رغم اني اغير عندهم ))


عموما انا ياشباب توظفت بمنطقة الرفيعه وهي تبعد عن الدمام تقريباً 430 كيلو ومن هالــ 430 – 70 كيلو الزفلت عزكم الله مقشع يعني تمشي وتشوف نفسك طايح بحفره زي السلام عليكم طبعاً -70 امشي بالسياره مخفف عشان اتلافى قدر المستطاع الحفر ،، الوكاد مرت 8 اسابيع من دوامي ،، وبصراحه وودي اشيك السيارة كامل وش تنصحوني فيه وش اقول الوكالة ابي اهم شي اشيك على ( الاذرعه المقصات والذي منه ) رغم اني وبحمدلله ما اعاني من اي اشكالية ،، نقطه من شريتها واللحين ماشي عليها 150000 ماعمري غيرت موية الراديتر ،، توني ادري انها تتغير وش السيور اللي تتغير ،،وتتوقعون كم تكلفني الصيانة كاملة

تقبل الله منا ومنك ومن جميع المسلمين صالح الاعمال
كل عام وانت بخير وعيدك مبارك
مبروك على الوظيفه الجديده
وش رايك تروح لافضل مركز عندكم وتكشف عليها كمبيوتر
لان التشييك عند الوكاله يمكن 500ريال

اسمع حبيبـي إن شاء الله سيارتك مافيها إلا العافيـه

لكن يجب عليك وحط تحتها خطين بالأحمر

تغير سير المكينه إلي موجود جمب علبة الدركسون
هو سير وحيد بالمكينه

لازم يتغير ومن الطبيعي يتغير كإجراء روتيني كل 100 الف

الشي الثاني عشان تحب سيارتك اكثر وتشوف الفرق

تشتري مع سير المكينه +فلتر بنزين ((الصفاية))


وهذا مكان الفلتر ورا بالشنطه

ومو شرط إنك تغير فلتر الهواء كل ما تغير الزيت تقريبا كل 50 الف او إذا حسيت في نفضة او رجه في الأر بي ام غير فلتر الهواء
او احتياطا كل 50 الف

لكن الحين اول ماتفتح قطع الغيار تفز مثل الذيب

تجيب لك سير مكينه وصفاية بنزين وتغيرها عند الوكاله اريح لك

وبس وامورك تمام إن شاء الله وانتبه من الطريق وانتبه من البعارين في الخط :cool:

فقط سوي صيانة 100000 كيلو وتوكل على الله الى 100000 كيلو الجاية

بس كل 200000 كيلو كاقصى حد سوي تربيط فقط

وعليكم السلام ورحمة الله وبركاته

اقتباس:

---

بس كل 200000 كيلو كاقصى حد سوي تربيط فقط

---

طيب يااخ بلال التربيط ايش يربطون بالضبط يعني جميع السيارة ولا المكينه فقط !

ومتى اعرف ان السيارة تحتاج تربيط ..؟

والله يوفقك ياصاحب الموضوع لو اقدر افيدك كان ماترددت :) ..

انت تبي تزين في سيارتك وهي زينه

اذا فيها مشاكل وديه شيك عليها وإذا ما فيها احمد ربك ولا تستعجل

نسيت اعايدكم ،،
كل عام وانتم بخير
فعلا ما خاب من استشار ،،
الله يجزاكم خير اخوان واحبة ،،
شوركم وهداية الله بغير فلتر البنزين + والسير ،،
لكن ماقلتوا لي عن ماي الراديتر قلت لكم من طلعتها ما غيرته ،، هل في ضرر اذا غيرته ؟؟
بيض الله وجيهكم وماقصرتوا

كيف تغير موية الرديتر

شوف إذا موية الرديتر ناقصه عبها بموية عاديه ماراح يضر ترا لو تكون حلوه المويه يكون احسن

إذا كانت على الخط الـ max او تحت بشوي وهي طافيه خلاص خلهاا مايحتاج تعبي مويه

اخوي فيصل ،،
اللي فهمته من المواضيع السابقة ان موية الراديتر اذا مشيت عليها مية الف غيرها لان يكون سائل التبريد ضعف خواصه فهل صحيح هذا الكلام ولا استمر كل ما نقص عن الخط ازوده بموية حلوه

والله ماعندي خلفية اخ دبلوماسي عن مية الف اغير موية الرديتر

انا إلي اعرفه لو حسيت بنقص بالموية عبها للخط او تحته بشوي بس لا تعبي فوق المستوى وبس

وفي سوائل واجد خاصة للرديتر لكن انا اشوف إن المويه الحلوه تقوم مقامه

بالاضافة لكلام الشباب غير موية الرديتر بنوع اصلي


موية الرديتر حدها خمس سنوات او 200 الف كيلو وبعدين تفقد خواصها المقاومة للصدا وتصير مثل المويه العاديه

ويبدا الصدا يتكون في الرديتر ومجاري السائل داخل المحرك ومع الوقت تدخل في مشاكل انت في غنى عنها