قصتي مع الهوندا

بسم الله الرحمن الرحيم
شدني واعجبني منتداكم الرهيييب
اقبلوني كمشارك معكم في هذا الصرح وتقبلوا اول مشاركة
قصتي مع سيارتي قصة عرفت من خلالها اغلب خربات الهوندا

توظفت الحمدلله بوظيفة حكومية كان نصب عيني اخذ فورد جمرك لان مكان الوظيفة يبعد عن المدينة 260كم تقريبا دورت يمين يسار بالصالات بس كانت غالية ومو ذيك السيارات اللي تعجبك كان المبلغ 30000 ومرة كان عندي اجازة off يومين جيت عند الاهل ونوم يامعلم والله صحاني اخوي يوم الخميس العصر وقال فيه سيارة لقطة لك ايش هي ياولد قال تعال عند المحطة الفلانية والبس ودق سلف واجي والله سيارة ماشاءالله من وقفتها تحس انها سيارة صح وهي اكورد 2003 ( هذا الكلام عام 1428شهر 12 ا) المهم جربتها طيبة نوع ما ولكن صوت الكفرات مره مزعج قال صاحبها كل الكفرات محبله غيرها وكلو تمام تفاوضنا على السعر وتمت البيعة
للأمانة السيارة ما فيها اي صدمه قوية او سمكرة او رشة اللهم باب السواق معدل تعديل كأنه جاتله دقه بسيطة
المهم واروح عليها للعمل يوم السبت السيارة ميه ميه قلت يا ولد دخلها الوكالة وانفض امها
وبعد 3 اشهر من الاستخدام دخلتها الوكاله وغير الاتي
كرسي جربكس 2 كرسي مكينة مساعدات امامية سلف خرط هوبات وتغيرر اقمشه ( فحمات ) للاربع كفرات وصك لهم 4000 كنت غبي ذيك اللحظة بس كل دقه بتعليمه
وبعدها السيارة تتغير اي بعد 6 اشهر من الوكالة
اول شي كنت كالعادة رايح الدوام والله وقفت عند اشارة واحطها على N وانا انتظر الاشارة تفتح والله لمبة المكينة تولع والله السيارة تتفتف ياولد وش الحل لاتطفي علي بالزحمة واطفي المكيف والله التفتفه راحت واللمبة لسه مولعة رحت اقرب محطة وافك الكتاب حق هوندا ابغى اعرف تبع ايش هذي اللمبة وادق على واحد من الشباب معاه هوندا وقالي طف السيارة وافصل البطارية ابو 5 دقايق وشغل السيارة وفعلا نجحت الخطوة وبعد اسبوع ترجع نفس الحالة وسوي نفس الخطوة ونجحت برضوه وبعد 6 او 5 اشهر وانا جاي الظهرية في الصيف من العمل والله السيارة تتفتف وماشي 120 واذا رفعت عن البنزين ورجعت ابغى ادعس ما تجاوب معايه كانها مكتومه ولما اوقف تطفي السيارة على طول اشغلها مرة ثانية تشتغل واوديها الوكالة قال طرمبة البنزين لازم تغيرها كم طيب قال 2000 على ما اعتقد قلت مجنون انت قال خلاص ننظفها لك ونزبها بس مو مضمونه قلت مشي حالك على بركة الله ز السيارة مشت معاية سنة ولكن في هذا الصيف رجعت نفس الحالة واكشف كمبيوتر كله تمام وانا عرفت انها الطرمبة مرة ثانية حطيتها عند كهربائي دلني عله واحد من الشباب وقالي نفس السبب قال الطرمبة اللي بالتانكي
قلت الحل قال تشليح نادر تحصل وغاليه قال الحل جيب طرمبة كامري من وكالة تويوتا وطقها ب 750ريال وركبها والحمد لله ماشيه
قالي السبب انه مع الحرارة يسخن الدنمو حق الطرمبة ويفصل وما يوصل البنزين للمكينة وقال عندك الفلتر مره معدوم حق الطرمبة وغيرة بحق كامري والحمدلله
وعذرا على الاطالة

بالبركه والله يعينك ممكن نستفيد من وش موديل الكامري لو بغيت اغير :d

والله فيلم هندي ههههه :d .. الله يعينك وييسر امرك الهوندا معروفة بقطعها غالية والافضل تاخذ من التشليح نظيف وبعدين انا معغي 2004 ولمبة المكينة والعة لهذه اللحظة :d وطنش يامعلم والسيارة اطلع بها مكة وارجع ولا فيها شي ..

أولاً: أهلاً بك معنا عضو في المنتدى وكل عام وأنت والجميع بخير ، جعله الله شهر خير وبركة .
ثانياً: مشكور على مشاركتك لنا بقصتك وإن شاء الله يستفيد منها الأعضاء.

حياكـ وبياكـ بيننا

قطع الكامري تركب على الاكورد :confused:

شي غريب وتوي ادري

تحياتي لكـ

ابو غيوض شكرا على مرورك الكامري موديل 2002 او 2003 والله ما ادري ركبها او لا هو وضميره بس هو قال يركب والسيارة تمام
وشكرا على مرورك mmm800 تبغى الصراحة والله انا ندمان اني اخذت هوندا
وشكرا على مرورك ala77
وشكرا على مرورك d7ooo2009 بالنسبة لقطع الكامري ركبت قبل شهر دنمو مروحة التبريد حقت كامري لانه بالوكالة ب 900 ريال واخذتها من تويوتا 150 ريال حقت تويوتا بس تجاري تيواني وماشيه الحمدلله
قبل ما تغير اي قطعة شوف التشليح او اسأل المهندس اذا قطع الكامري تركب لانه مو كل قطعه تركب صح