لعبوا لي في البدي،، ومانيب عارف ايش اسوي
السلام عليكم
موتري لونه لؤلؤي وماكمل بالحارة اسبوع الا وحصلت القزاز اللي ورى منهدّ ،، وكمان الابواب مخموشه بمفتاح او حديدة ،، ماشيين على البدي من الصدام للصدام خموش بس اكثر شي باب السايق <<< عشان كل ماركبها انقهر
اخذت تقرير من الشرطة ورحت التأمين وركبولي قزاز وكالة وتحملت 50% من قيمته لان الدعوى ضد مجهول
المهم اني نسيت الموضوع وصار للموتر معي سنه ونص تقريباً ومحافظ على كل شي فيه الحمدلله وكل ماشفت البدي محكوك انقهر :mad:
تجيني البتسيّه << على قولتي
يعني عشان عندهم دداسن وكوامري يلعنون والدين سيارتي
مالكم بالطويلة انا اول ماطلعت الموتر رحت ظللته عازل عند Solar Control عشان خصم الوكالة وخليتهم يضربون لي البدي حماية مدري وشو ،، حسب كلامهم انها تحمي البدي من الحكات وتحمي اللمعه وضمانهم 5 سنوات عليه
الحكات اللي بالابواب واضحه صريحه لما توقف جمب الموتر،،، بمعنى اخر ان اللون الابيض ماراح كله يعني ظهر المعدن،، ولكن واضح انو في حكات واحد حاقد كذا مسوي لي نجوم ومثلثات جعله مايفرح بعروسته يوم عرسه خخخخخخ
زبدة الموضوع اني نزلت المعارض قبل يومين نزلت واحد من الشباب وجاني واحد سوداني يبغى يسوم الموتر وقلت له مو للبيع،، وشاف الحكات هذي وعزّاني وقال لازم تسوي لها صنفره وبتروح بنسبة 80 الى 90% ان شاء الله
قلت ايش هي الصنفره ،،، قال انت روح لأي ورشة وقولهم سوولي صنفره 1100 او 1200 وان شاء الله بتروح او عالاقل تختفي اكثر من كذا
اللي قاهرني الان تعرفوا جونا تراب وغبار ،، لو اغسل الموتر بعد 10 دقايق ينشب بالحكات هذي غبار وتصير واضحه
انا عارف انو طاح من قيمة الموتر لايقل عن 10 الى 15 الف ريال بسبب هالحكات لكن الشكوى لغير الله مذله
الوكاد ايش سالفة الصنفره؟ وهل هم يشيلون البوية او تأثر على البدي عالمدى الطويل؟ وهل تروح اللمعه ؟
لاحد يقولي تلميع وتروح لان كل محلات التلميع رفضوا يسوونها لي ويقولون مستحيل التلميع يشيلها
اذا تبون صور ممكن اصورها بس مادري بتكون واضحه مع الفلاش والا لا
شوركم وهداية الله :)
