أكورد 2008 - فلتر الهواء - العزم

بداية أحب أعطيكم فكره عن قيادتي <<< أحلى يا قيادتي :d

أنا من رواعي الخطوط بسبب بعد العمل عن البيت
أمشي السيارة يومياً قرابة 190 كم <<< يا مفتري حرام عليك :confused:
السرعة ما بين 110 و 150 كم/ساعة بس عالأغلب ما تزيد عن 120 إلى للتجاوز السريع

مشكلتي الله يسلمكم اني بعد أزمة الغبار اللي مرت علينا بالشرقيه أحس ان السيارة كاتمه شوي <<< إلا كثير مو شوي
العزم طبعاً ضعيف بشكل واضح حتى ان القير يبدل بشكل أسرع من قبل بسبب الكتمه

أنا طبعا مبسوط كثير من السيارة ومرتاح منها إلى فترة ما قبل الغبار
لكن الحين شوي بديت أتضايق من هالعله اللي طلعت لي
لكن أتصور في لها تفسير منطقي وهو فلتر الهواء
خاصة انه بالسيارات الجديدة صاير عند فتحت الشبك أو مقدمة الكبوت ويستقبل الغبار بشكل قوي

فهل تأيدوني ان السبب هو ان الفلتر صار مليان غبار وما يعطي المكينه هوى كافي حتى تعطي العزم المعتاد؟!

في أحد مر بهالتجربه حتى لو ما كان نفس الموديل؟ أيش سوى حتى يحلها؟


سؤالي الأهم .. لواحد مثلي راعي خطوط والسيارة في الأغلب تمر بغبار وعج على فترات متقاربه ..

كل كم المفروض أنظف فلتر الهواء؟ وكل كم المفترض أغيره؟

وإذا أحد يفيدنا إذا كان للسيارة أكثر من فلتر وكيف فكهم وتركيبهم بطريقه صحيحه ..

مع أرق وأعطر تحياتي ..

راعي الأكورد المكتومه .. aL_aSeeR :p

اقتباس:

---

المشاركة الأصلية كتبت بواسطة aL_aSeeR

فهل تأيدوني ان السبب هو ان الفلتر صار مليان غبار وما يعطي المكينه هوى كافي حتى تعطي العزم المعتاد؟!

---

احتمالك وارد اخوي .. افتح الفلتر وشيكه .. :)

مشكور أخوي على ردك المتواضع .. وبانتظار بقية الردود ..

حاول كل ما مشيت 5000 كلم انك تفك الفلتر وتنظفه

ما راح تاخذ معاك حتى 10 دقايق :)

والله يفكنا ويفككم من الغبار :d

السيارة للحين ما وصلت 5000 كم أخوي .. هي ماشيه حدود 2300 كم تقريباً .. ومن أخذتها لي الحين شهر وشوي ..

تتوقع يعني عندي مشكله جذريه .. ولا ممكن يكون الفلتر وبس ..!!

موترك مافيه شي
المشكله ان الغبار زايد هالايام .... ولو حصلك نظف الفلتر كل اسبوع
اليييييين ماينتهي الغبار ( بعد 3 اسبايع بأذن الله :) )

أنا اليوم وعلى عجالة فتحة كبوت السيارة وشيكت على الفلتر
طبعا ما فكيته كامل بس فتحت الغطى وناظرت عليه من فوق فقط لا غير
العجيب اني أشوفه نظيف!
يبيلي الليله بعد ما أرجع من الدوام أفكه كامل وأشوف أوضاعه من تحت يمكن يكون تجمع الغبار من الوجه الثاني

وربي يسمع منك .. ويكون الموتر ما عليه إلا العافيه .. قولوا آمين

^^^

تأكد من تحت الفلتر

لان الغبار بموديلات 2003 - 2007 يتجمع تحت الفلتر

اقتباس:

---

المشاركة الأصلية كتبت بواسطة aL_aSeeR

أنا اليوم وعلى عجالة فتحة كبوت السيارة وشيكت على الفلتر

طبعا ما فكيته كامل بس فتحت الغطى وناظرت عليه من فوق فقط لا غير
العجيب اني أشوفه نظيف!
يبيلي الليله بعد ما أرجع من الدوام أفكه كامل وأشوف أوضاعه من تحت يمكن يكون تجمع الغبار من الوجه الثاني

وربي يسمع منك .. ويكون الموتر ما عليه إلا العافيه .. قولوا آمين

---

اخوي الغبار يتجمع من الجهة الثانية


اما الجهة الاولى مافيها شي اكيد ..... لانو الفلتر يسحب هواء من تحت ... يعني الوجه الثاني هو الي راح يضرب فيه الغبار .....

اتمنى اني سهلت عليك الوضع :p


وعادي ايش وراك روح اقرب محطة وخله يفتح لك الفلتر وانت نظفه وماتاخذ منك 3 دقايق ...

والله ياما لقينا حفلات تحت الفلتر...
مره فلين ومره تراااااب ومره قراطيس .. والله يستر من الجاي..
اهم شي شوف الي تحت .. واذا تبي النصيحه لما تشيك على شي شيك علي الموتر كله ...
يعني تم حسنتك مره وحده >>زي مايقولون
هذي وهي يالملكه اجل وشلون اذا كانت عزيزه >>عزيزه الكوكو الله يرحمها

انا اشوف انك تغير الفلتر مع تغيير الزيت بس مو كل مرة ... مرة ايه ومرة لا
واذا بغيت تنظف الفلتر وفكيت الغطا لاتنفخ الفلتر والغطا مفتوح لأن الغبار بيطير ويدخل بالمكينه وبكذا تزيد الطين بلّة

أنا رحت لمحطة البنزين وفكيت الفلتر ، واللي لاحظته انه دسم مرره كأنه مغطس بزيت! الزبده نفخته بالهوى وطلع غبار لكن الصراحة أحسه مو كثير يعني المفروض ما يأثر ، نفخت نفخت نفخت لين شفت انه مافي أمل يطلع شي زياده وركبته ثانيه وأحس ان الوضع تحسن شوي ، لكني للحين مو متأكد من هالدسومه هل معناتها ان الفلتر يبيله تغيير ولا الهوندا أكورد فلترها طبيعته كذا والوضع طبيعي وما يحتاج أغيره ولا شي.

بشكل عام الوضع الآن إذا مو أوكي أوكي .. فشبه أوكي والعزم مرضي .. وهذا أهم شي والحمد لله ..

888888

الله يحفظك ان شاء الله ويبارك في موترك يا الغالي الحالة الي عندك بعد مانفخت الفلتر اسمها وسوسة ليييش ؟؟ لأنك بدقق اكثر من قبل وبتلاحظ اشياء ماكنت ملاحظها من قبل ...

نصيحتي لك توكل على الله ومغط ابوها لكن باخلاق :d..
والصيانة بتجي ان شاء الله ويشيكون عليها ...
وبلع العافية يا الي تقول مرة تغيرة ومره لا >>>بيتصفق

اقتباس:

---

أنا رحت لمحطة البنزين وفكيت الفلتر ، واللي لاحظته انه دسم مرره كأنه مغطس بزيت! الزبده نفخته بالهوى وطلع غبار لكن الصراحة أحسه مو كثير يعني المفروض ما يأثر ، نفخت نفخت نفخت لين شفت انه مافي أمل يطلع شي زياده وركبته ثانيه وأحس ان الوضع تحسن شوي ، لكني للحين مو متأكد من هالدسومه هل معناتها ان الفلتر يبيله تغيير ولا الهوندا أكورد فلترها طبيعته كذا والوضع طبيعي وما يحتاج أغيره ولا شي.

بشكل عام الوضع الآن إذا مو أوكي أوكي .. فشبه أوكي والعزم مرضي .. وهذا أهم شي والحمد لله ..

---

الحمد لله ع سـلامة الموتــر << خخخخخخ



وانا عندي نفس المشكلـه ,


بشيك اليوم ع الفلتر ,

شباب أبشركم العزم رجع أوكي بعد نفخ الفلتر .. جربته على خط الأحساء وكلللووو تمام التمام
نفخ الفلتر جاب فايده والدسومه تدل على ان السيارة ماكله خير خخخخ .. وعلى قولة بعض الشبيبه هنا .. ادعس بس باحترام وتعطيك ما تقول لك لا أبداً..!!

في حاجة جديدة اكتشفتها عالخط .. التكاية اللي بين كرسي السواق والكرسي حق الراكب الأمامي تتحرك ورى وقدام .. وبصراحة مريحة مره وتقدر تضبطها على وضعية تريح يدك على الخط ..
وللأمانه مو أنا اكتشفت هالشي .. زوجتي اكتشفتها .. خخخخ ..
مادري شبتجيب من ورى وانا كنت متكي على البتاعه هذي اللي بالنص ما أشوفها الا تحركت .. قلت لا بالله المره كسرت التكايه ..
قلت خل أتأكد حركته والا أشوفها تروح ورى وقدام بشكل طبيعي مو مكسوره ولا شي .. كان أكتشف انها مصممه كذا .. شفتوا شلون عاد ..

للأمانه يا شباب .. الموتر موتر ما عليه كلام بصراحة .. راحة .. فخامه .. أناقه .. تميز .. عزم .. تقنيات .. حتى مع النواقص التكميليه اللي فيه (بلوتوث .. تشغيل الأنوار بشكل أوتوماتيكي .. علاقة أكياس جنب القير عشان كيس الوسخ .. نظام ملاحة .. ستارة أوتوماتيكية خلفيه .. خبابات (الجلد اللي قدام الكفرات الللي تحمي البدي من بلاوي الشارع) .. الحساسات وهذي شكلي بركبها لأنها تبدولي مهمه .. بس زي ما قلت كلها كماليات والأصل كله عسل يا عسل ..

أنا أتفق مع الأخ اللي قال بلا وسواس زايد .. السيارة مافيها شي .. وأنا أتوقع ان المشكلة حتى وان كان للفلتر علاقه بسيطه بها .. إلا ان أصل المشكله هو اني ما كنت أعرف كيف أسوقها صح .. وعلى قولتهم اللي ما يعرف الصقر يشويه ..

تحياتي ..

الله يخليك لزوجيتك

وش لون سيارتك ؟ سؤال ماله دخل صح ههههههه