كم علبة زيت تحتاج أكورد 2008 + هل الزيت على المساعدات الأمامية عادي؟
السلام عليكم يا إخوان ..
أنا بصراحة غيرت زيت ثلاث مرات ، مره في الوكاله ومرتين بمحطات بنزين ، اللي غيرت عندهم بره أحس كل واحد يتفلسف من راسه بالنسبه لعدد الليترات ، وأنا جاي أستفسر منكم وانا كلي ثقه ان اللي راح تقولونه هو الصواب بإذن الله..
توني مغير زيت الآن عند رد كاب طبعا مع الفلتر ، سألني كم تاخذ هي قلت له اللي قبلك عبالي مع السيفون 4 لتر وربع تقريباً ، قام هو وعبى 4 لتر وربع قال لي لسى ناقص ما بعد يوصل العلامه الفوقيه ، قام وزاده للنص وقال هم ناقص إلين ما وصل إلى 5 لتر إلا ربع قال كذا أوكي ، وأنا مادري ليش أحس انه أكثر من اللي المفروض تاخذه خاصة ان المعيار أحس الزيت أعلى من النقطه العلويه بشوي.
أتمنى منكم رد سريع حتى إذا طلع الزيت زايد كثير أرجع لهم ينزلوا منه حتى ما تنعدم عندي الصوف وفلتر الهواء ..
وبشكل عام كم هي المفروض تاخذ بدون الفلتر .. وبالفلتر..
سؤالي الثاني بخصوص المساعدات ، لما رفعوا لي السيارة بالورشه الفلبيني اللي يغير الزيت عملي تشييك سريع على السيارة ، وقال لي ان المساعدات الأمامية تهرب زيت ، والسيارة ما أكلت مطبات عندي ولا شي والمساعدات الأماميه لساتها قويه جداً وطبيعيه في الممشى ، قال الفلبيني احتمال كبير يصير عيب بالتصنيع فهل هذا صحيح.
وفي شغله جننتني بس مو عارف سببها ، لما ألف الدركسون تطلع عندي طقه من عند الدركسون .. يا ترى شسببها .. في شي فالت .. هل هي خطره ولا عاديه وتروح من حالها بعد فتره؟!
أنا ان شاء الله بدخلها الصيانه بعد العيد باسبوع أو اسبوعين كذا .. فهل المشاكل اللي عندي تتحمل هالتأخير ولا لازم أعجل عليها قد ما أقدر ..
ممم .. هذا وسلامتكم .. وأتمنى اني القى الجواب الشافي الوافي والسريع بنفس الوقت منكم..
تحياتي ..
