موقف حصل لي عصر هذا اليوم ..!!

السلام عليكم ورحمة الله وبركـاته ..
مـرحبـا بـ أخـواننا في نادي الهوندا ..

عيدكم مبارك وكل عـامـ و أنتـم بخير
حصل لي هذا الموقف .. و أحب أذكره لـكم من باب الاخـوة و التعارف .. و كل واحد يقولنا وش يسوي لو كان الموقف حصل له ..

حصل الموقف لي أمس العصر .. وقفت سياراتي عن مغسلة السيارات " أكـور2006 "
طبعـاً تعرفون بكرى عيد و نبي نفخفخ بالمـوتر ..
المهم وقفت سيارتي بعد صلاة العصر مباشرة و قلت له متى تخلص قال بعد صلاة العشى أو قبل الصلاة .. انا ما عندي مشكلة .. طبعـاً فيه زحمه عندهم ..
بعد صلاة المغرب مباشرة اتصلت على ( المدير ) بالمغسلة طبعـاً يشتغل معهم .. قلت وش صار على السيارة .. قال ان شاء الله راح ندخلها بعد شوي .. قلت تمـام ..
تفـاجـأت :: ..

إتصل علي واحد من أخـوياي رايح يغسل سيارته في نفس المغسلة وقالي ما شاء الله هندي المغسله معـاه سيارتك و جـاي من برى المغسله بالسيارة ..!!
أنا توقعته يستهبل بعدين حلف لي و ... قالي معاه اثنين ورا و واحد قدام يعني اربعة
إتصـلت مباشرة على الهندي ..
أنا : وين سيارتي .؟
الهندي : موجود في مغسله يا مدير
أنا : ليش انت روح سيارة برى مغسله
الهندي : لا يامدير أنا ما في برى
أنا : صديق ما فيه كذاب أنا شوف أنت برى مغسله وفيه 4 نفر
الهندي : آه صديق ما عليه أنا روح فطـور
أنا : على ... يا ابن .. و ... " كلام خارج النص "
المهم سكرت السماعة و قلت لواحد من الشباب ينزلني بالمحطه ..
ع طول طلعت لـ الهندي و جلست اتهاوش وياه .. و هو يقول انت صديق انا معلوم مين انت
بالنهاية إكتشفت إنه رايح يفطر في أحد المساجد اللي تبعد عن المغسلة كيلو هو و 3 معه ..
ما بيدي شي أسوي له .. قلت له كم رقم الكفل .. و بدأ يصيح قدامي لا لا .. يا مدير و ..
المهم اللي سويته بس : إني ما عطيته فلوس التغسيل .!! طبعـاً بعد ما شيكت ع الموتر كـامل و شفت الأغراض الداخلية ولا لمسهـا ..

فـ لو أحد مكـاني وش كان راح يسوي .؟

والله بصراحة ..


باختصار ..


بخليه يلعن الساعة اللي أخذ فيها السيارة ..


ما أقول بالضرب ..

مهو بزر عشان تطقه ..


لكن بخليه يتندم عالفعلة اللي سواها بأي وسيلة ..



وأنت زين سويت بس لو انك مزود عليه شوي عشان يتعدل ..



ومشكور ..

وعليكم السلام ورحمة الله وبركاته
حياك الله
الله يبارك فيك :)
أرى أن مافعلته كاف تماماً.
ولو كنت مكانك كنت اكتفيت بالجزء الأول :)، يعني كنت عطيته حسابه لكن بعد أن أتأكد أنه ندم تماماً.
بالنهاية لكل منا رأيته،،

والله قد صار لي مثل ذا الموقف لكن في سيارة الوالد ((جيب لاندكروزر ))

موديه الورشه تغير فحمات وخرط هوبات ......الخ

قالي راعي الورشه تعال بعد صلاة العشاء قلت مافي مشكلة بعد العشاء بعد العشاء
وانا في اتجاهي للورشه بعد صلاة العشاء فيه مكتب عقارات يجيب الرسايل حقت الهنود اللي من اهلهم والقى السوري اللي اتفقت معه جاي ياخذ رسايله اللي وصلت له من اهله وقفت وهواش انا وياه واخذت السياره منه وهو في المكتب والسياره جاهزه وخليته يطقها كعابي للورشه ولا دفعت له الحساب ....,

احسن حل....................... معليش تراني مطول >>>>>

يقولي خويي اول مانزلت الاكورد 2006 اتمنى اشوفها في الشارع او في اي مكان

يقول بعد كم يوم رحت للورشه في الصناعيه عنده كم خراب في السياره يبي يصلحه وتمنياتي اشوف الاكورد في شكلها الجديد واشوف 3 سواريا من اصحاب الورش معهم اكورد 2006 وتفحيط عليها واستلام غير طبيعي ....,
انبهر يعني شاف الاكورد لا وهي تفحط بعد يقول طلع راعيها قابع عليها وموديها ورشه وما يدري عنهم وهم يستلمون عليها ...؟؟؟؟؟؟؟

((نصيحة )) اذا كنت ظامن الورشه اللي تبي تروح لها ولا مالك الا الوكاله .:)

والله لو انا محلك راح امشياه له لكن رقم الكفيل ماخذه ماخذه اقل شيء تطير راتب الشهر عليه عشان يتوب من هذي الحركات لو صار فيها شيء وقطعها نار ماراح يدفع ولا ريال وراح ينكر .

انتبه وانا اخوك انا بنفسي اشوف ذا النيجريين يدعسون على السيارات اللي تاركينها لهم العملاء شوف الامانة كيف يسوون بها لأن ماعندهم لاذمة ولاضمير .

ملاحظة: أرجو الإطلاع على سياسة النادي مرة أخرى!

أخ أخ أخ ...

الله يعين بصراحة ...

اخواني لايكون كلامي مخالف
اول شي السلام عليكم
ثاني شي بالنسبه لموضوعك
اول شي زي ماقالو اخواني لا تضربه مهو بزر
جنن جنانه طلع كل اللي في راسك وقول له امش معاي للشرطه
انا مرره وديتها المغسله ورحت وانا جاي ولاه توه مطلعها ولاه يدقدق بواري ويدعس لها
رحت خليته يندم على الساعه اللي ركب فيها السياره وهو بس دعس
ياأخواني لا تعطوهم فرصه عشان ما يتمردو
والله اول فقع كنداسة واحد قاعد يفصل فيها لحد ماراحت فيها والشايب ماقال له شي
انا لومكانك ماخليته يعيش ولا دقيقه بالسعوديه
حرام والله

الموقف اللي بأتخذه :)

راح أأدبه بالطريقه التي هي احسن :) وبالأسلوب الرائع .. اللي يعطي صوره حسنه عنا وفي نفس الوقت يندم على ما فعل .،.

شاكر ومقدر لك

انا برأيي الشخصي هو الضاهر راح يلحق على فطور و هو صايم وبمسجد يعني نيتة سليمة مية مية بس ماة حق بالاخير طبعاً يعني لو عطيتة خمسة ريال زين عشان تبري الذمة وخمسة حقت فعلتة و الباقي احتسب فية الاجر والثواب من الله لاكن لو رايح بموضوع ثاني اقل شي اكلم كفيلة وعلمة بالسالفة و اقول لة ترى الحساب منب دافعه .

ماشاء الله تبارك الله، أعجبتني آخر ردين "درر" :)، الله يعطيكم العافية..

ســـــــــــــــــــــلام


بأقنعـــــــــــــه يركــــــــب معي :d



220 الـــــــــــى كباري العماريــــــــــــه <<<وش راح تسوي :confused:


انزلــــــــــــه هنــــــــــــاك طبـــــــــعا هناك حتى TAXI CAMRY :d ما فيه

اقوله روح مشـــــــــــــــــي :p

==================================================
======================================

الســـــــــالفه اني رحت انا وخويي معاه SS كابرس 2006 نزلناه المغسله علشان يغسله اجل يكويه المهم قلنا لفتين وبنزل الهنادي

بعد اللفتين نرجع المغسله موتر خويي مو فيه ياربي و ش كثر اعاني<<قديم

اقول للعامل وين الموتر يقول يجي نفر كلام هو صديق حاسب امشي:( شيل سياره:confused:

شوي واذبحـــــــــــــه:mad:

طيب وش السوات ندق على الدوريات سوينا بلاغ


بعد ساعه من الهموم النفسية


جابها خوينا :p

العامل صار له المذكــــــــــــــور اعلاه:d



خوينا :confused: *** قريبا مقلب ;)


***العامل ليـــــــــــــــه يعطي السياره واحــــــــد ما يعرفه
***انا متأكـــــــــــد ان العامل تأدب


الحســــــــاب على حســـــــــاب نانســـــــــــــي عجرم :d


تحيتــــــــــــــــــــــــــــــي:rolleyes:

سلام عليكم.. هلا وغلا .. وعيد مبارك ..

بصراحة انا عن نفسي الماكسيما موسعه الصدر (( الهربدة هع هع )) ..

يعني لو تصير هذي المشكلة مافيه اي مشكله هع هع ..

وسعوا صدوركم انت وياه عشانه هندي ضعيف تستقوي عليه ..

واذا كنت موسوس لهذه الدرجة خلك عند موترك ..

واذا كنت ظامنة ومعامله على قولتك خلاص خله يسوي الي يبي ..

.

دام الرجال صايم وراح افطر ماعليه بس خوفك انه يروح يفر عليها ويتمشى هو واخوياه ترى بعض مغاسل السيارات يسوونها فانتبهوا

ماشاء الله تبارك الله، أعجبتني آخر ردين "درر" :)، الله يعطيكم العافية..

شيء يقهر بصرآحه..

أنصح إنه أي وآحد يبي يغسل السياره يقعد جمب سيآرته

لا يروح يمين ولا يسآر لإنه بصرآحه تحصل حتى سرقآت سيآرات من المغسله

تحيآتي ...

أعرف واحد ناسي غواايش زوجته (( غوايش = ذهب يوضع في اليد )) ..

المهم يقول طلعت السيارة من المغسلة يقولي مالقيت ولى شيي ..

قيمتها حول ال 10.000 ريال مربوطة في كيسة ..

والله قهــــــــــر هذا راتبه مدة 20 شهر .. الله لايبارك فيــــــــه ..

.

^^^^
أبوعابد والله المال السايب يعلم السرقه وإحنا دايما نحمل إهمالنا وأخطائنا على غيرنا... وصاحبك إنشاء الله تكون درس له... وتراي ماقول كلامي هذا شماته فيه لاوالله لاكن الواحد لازم يحاسب نفسه قبل مايحاسب غيره...