أهلا أخوي civic si 99 ...
السيارة ما شاء الله تبارك الله , و صدق و الله ... العين حق :( .
ما أعتقد مشكلتك تبويش أو سيور , يمكن تكون البكرة مصلبة , شيّك عليها .
إذا على ورشة متخصصة بالهوندات في جدة في عندك الورش التالية :
1- حمزة و الملقب بـ " حمزة تيربو " و اسم الورشة ميكانيكا " مكتوبة بالإنجليزي " .
الوصف : و انت عند شبك المطار خليّه على يمينك و أول ما توصل إشارة الصناعية خذ منها يسار و أمسك خدمات , ثاني لفة يمين أدخلها و تلاقي ورشته على اليمين و كلها هوندات . و معروف حمزة بين الشباب في جدة إنه يشتغل على الهوندات و خاصة السيفيكات و هو مغمض ما شاء الله عليه :cool: .
2- ورشة السنوسي .
و تخصصهم ليس هوندات لكن يشتغلون على سيارات كثير و في ناس أعرفهم عندهم هوندا و هي أكورد كوبيه 99 مكينتها F22 و أكورد كوبيه 2004 و مكينتها K24 أشتغل على سياراتهم و الشباب مبسوطين لكن عيبه يطول في الشغل بس تاخذ منه شي نظيف ;) .
الوصف : من نفس إشارة الصناعية إللي عند شبك المطار , خذ يسار و أمسك خدمات لين تجيك إشارة , خذ مها يمين و خذ أول لفة يمين و طول لين يجيك المسلخ على اليسار , تعداه لين توصل عند دوار صغير كدا من التراب , تكون ورشة المراد على يمينك و ورشة السنوسي على اليسار .
3- ورشة الجنوب :
و أنا ما جربتها بصراحة لكن أعرف ناس كثيرين يمدحونها و تخصصهم هوندات بحت .
الوصف : شفت يوم توصل المسلخ و يكون على يسارك ؟ لف قبله يسار راح تلاقي ورشة الجنوب على اليسار .
4- ورشة الجزيرة :
و العمال إللي شغالين فيها هنود و كانوا يشتغلون في وكالة هوندا و أنا مجربها و الصراحة شغلهم نظيف و أسعارهم حلوة .
الوصف : المحكمة الكبرى بشارع الستين بجدة , يكون كوبري التحلية خلفك و المحكمة على يسارك , من الإشارة إللي عندها خذ يمين و أمشي في هذا الشارع " شارع البلدية " و طول لين تجيك محطة على يمينك و فيها صراف للبنك الأهلي , الورشة داخل المحطة .
أسأل هناك عن واحد إسمه شكيل هو المعلم حقهم .
5- ورشة خاصة بالهوندات بس و الله ما أعرف إسمها و موقعها عند شيخ الورش " محل ما يسوون تقديرات الحوادث " بجنب ورشة شيخ الورش و هي كدا محل صغير لكن تخصصهم هوندات .
و في ورشة واحد من الشباب يتعامل معاهم , و على ما أشوفه تقريبا كل يوم , يمدحلي فيها و أسعارهم حلوة و رخيصين و بنفس الوقت شغلهم مرة مزبوط , بأخليه يدخل و يرد عليك هنا .
أتمنى تكون مشكلتك هينة يا أخوي و إنشاء الله تقوم سيارتك بالسلامة و تشرفنا في تجمعات جدة :rolleyes: .
تحياتي لك
أخوك : خـــالـــد .
