* معاً في تعديل و تزويد الأكورد , المرحلة الثانية *
بسم الله الرحمن الرحيم
السلام عليكم و رحمة الله وبركاته , و بعد ....
أخواني , عساكم طيبين و بخير إنشالله , و عسى دنياكم و اختباراتكم تمام :) .
أكيد كثيرين مكنم دخلوا على موضوعي السابق و هو ...
و إنشالله تكونوا أستفدتوا منه و أخذتوا معلومات كافية بخصوص المرحلة الأولى و إنشالله بدأتوا التطبيق و ننتظركم كمزودين و معدلين كبار .
في البداية أحب أوجه اعتذار لأصحاب الجيل الجديد من الأكورد لأني مانزلت لهم موضوع لتعديل سياراتهم و السبب إني بحثت و فحطت في النت و مالقيت أي شي نزل لهم إلا إنتيك للـ V6 فقط :p .
العذر و السموحة منهم و إنشالله لانزلت لهم قطع يبشروا بموضوع لهم ;) .
اليوم و في المرحلة الثانية بتكون القطع المستخدمة فيها أقل من المرحلة الأولى , لأن المرحلة الأولى كانت كأساس للتعديل للوصول لهذه المرحلة الثانية , و أكيد تتذكروا هالعبارة إللي قلتها في المرحلة الأولى :
التعديل في هالمرحلة يعتمد بشكل اساسي على تعديلات السيارة في المرحلة الأولى و على القطع المضافة و المستخدمة بها و يمكن فقط نستغني على الإنتيك و الهيدرز في هالمرحلة و يمكن بس عن الهيدرز .
و أكيد أنا كان قصدي في هالمرحلة الثانية هو الـ TURBO .
و هالموضوع خاص بالتيربو لهوندا أكورد من موديلات 2003 - 2007 .
أكيد كلكم سمعتوا في التيربو و كل القصص إللي سمعتوها خلتكم تفكروا تركبوه , خصوصا لمحبي السرعة و المقاومات و أنا أول واحد , نفسي أركبه :).
نجي لتعريف التيربو :
التيربو هو جهاز يدفع و يدخل كميات هواء جنونية للمحرك لتسريع الاحتراق و لزيادة القوة الدافعة من خلال مروحتين , واحدة تسحب الهواء و الثانية تخرج الهواء طبعا عن طريق العادم أو الإكزوست . و طبعا هالحركة تعطيك قوة جبارة و اندفاع قوي و عزم عالي للسيارة عند RPM محدد وقت برمجة و توزين التيربو :rolleyes: .
دورة التيربو :
نقدر نختصرها في هالرسمة .
و بالنسبة للأكورد فتركيب التيربو عليها يحتاج منك أشياء عديدة هي :
1 - تحتاج إن يكون قطر مواصير الإكزوست عندك 2.5 إنش .
2 - تحتاج إلى هيدرز للتيربو و شكله و تفصيلته مختلفه عن الهيدرز العادي , و هذي صورته .
3 - تحتاج إلى بساتم بضغط واطي لأن بساتم محرك الأكورد لن تتحمل PSI عالي جدا .
4 - تحتاج التيربو و ملحقاته و بالنسبة للأكورد 4 سلندر راح نكتفي بتيربو T3 أو T4 عشان المحرك .
و هذي صورة للتيربو كت كامل بملحقاته :cool: .
طبعا يتكون من الإنتلركولر و هو فتحة تنفس التيربو و البلوفالف و هو يستخدم لخروج الهواء الزائد من مواصير التيربو و هو صوته معروف , مثل العطسة و هذا هو أجمل صوت في التيربو :d. و طبعا القازكيت و المواصير .
هذا الإنتركولر
هذا البلوفالف
التركيب و التوزين :
طبعا تركيب و توزين التيربو يحتاج إلى خبير و متخصص :) , ما أقدر أقول إن التركيب صعب بقدر ما التوزين أصعب منه , خصوصا في محركات الـ K24 . و هنا صادفتنا مشكلة خاصة بنا هنا بالسعودية . و هي القير :confused: .
مشكلة القير عندنا إنو أصلا محد يشتري قير عادي , الشعب كلهم قير أوتوماتيك و هو ضعيف و إذا ركبنا تيربو و جلسنا ندعس و نشد بالسيارة القير راح يفلت و راح يخبط لا محالة , فالأحسن إن السيارة تكون مجهزة بقير عادي . بحذاف و كلتشات رياضية :cool: .
صور للتيربو :
هذي صور للتيربو مقاس T3 و هو أصغر مقاس و يعطيك من الـ 100 إلى الـ 325 حصان :cool: و ذلك حسب الـ PSI إللي تختاره .
هذي صورة بعد للـ T4 و هو مقاس كبير و يعطي قدرات حصانية هائلة و عزم جبار على سرعات دوران منخفضة , و يوصل بقوته إلى الـ 550 حصان :eek: . و ايضا بيكون حسب الـ PSI إللي تحدده .
ملاحظة :
التيربو وصل بقوته إلى 2000 حصان و شركته المصنعه ركبوه على سوبرا و ماشية السيارة و لا فيها أي عيب أو أي شي , لأنها مجهزة بشكل مدروس و مكثف لاستقبال التيربو :d .
نجي للقوة الحصانية المستخرجة من المحرك :
تقدر تخلى السيارة ببساتم بلدها بدون ما تغير بساتم ضغط واطي , لكنك هنا راح تكون مقيد بمستوى PSI محدد و هو 5 PSI فقط ( ترى مرة حلوة ) . و إذا رفعته فإن المحرك سيتضرر بشكل كبير بسبب الضغط الهائل عليه و راح تبدأ البساتم تتآكل و تتشطب و بعدها توضيب كامل و الله يستر لا يروح عليك البلوك و وقتها مكينة جديدة و التيربو راح يضرب :( , فإذا كنت تبي تركب تيربو على بساتم بلدها فلا ترفعه أكثر من 5 PSI و لا تشد بالسيارة مطارحات إلى مرتين أو ثلاثة بالكثير في الأسبوع .
و عند الـ 1PSI يعطيك تقريبا من 22 إلى 24 حصان فلك أن تتخيل أن 5 PSI يرفعوا السيارة من 133 حصان على الكفر غير تعديلات المرحلة الأولى الباقية لتصل السيارة إلى 200 حصان , غير التيربو فراح توصل سيارتك للـ 301 حصان :cool: .
و هذا داينوجراف مستخرج لأكورد 4 سلندر عليها تيربو فقط و على ضغط 4 PSI .
و بالنسبة لفكة التيربو نقدر ناخذ مقاس وسط من 62 الى 73 , فهي مقاسات معقوله بالنسبه للـ Single فما راح يتاخر وراح يعطيك قوة في القومة و الخط :cool: , و في التيربو مو مهمة القوة في القومة لأنها راح تكون تحفير بقدر القوة في الخط فراح يساعدك هالمقاس , و تقدر تحل مشكلة فصلة التيربو بتركيب Boost Cut عشان لا يفصل أو تصغّر بايبات الإنتركولر إذا كان التيربو T3 ;) .
مشكلة أخرى غير القير :
وقت التركيب واجهتنا مشكلة أخرى أكبر من مشكلة القير و هي توزيع البنزين :confused: , التيربو يركب تمام على موديلات 2003 - 2005 , لكن المشكلة في 2006 - 2007 .
و السبب إن نظام حقن الوقود في 2006 - 2007 إليكتروني و يبغاله شغلة و مبلغ لا يقل عن 3000 ريال لتحويل نظام الضخ إلى مباشر نحو المحرك مثل 2003 -2005 . التحويل أنا أقدر أسويه في البيت , و عارف طريقته . لكن تركيب التحويلة و تغيير مجرى البنزين يحتاج لها واحد فاهم و خبير بمثل هالأمور . فالمحرك الخاص بالموديل 2003 - 2005 يحمل الرموز K24A4 لكن الـ 2006 - 2007 رمزه K24A8 . فالتعديل على الـ 2003 - 2005 أسهل و أقل كلفة من الموديل 2006 - 2007 .
أحب أنوه إن الـ Safe في التيربو T3 على بساتم السيارة نفسها هو 5 PSI كحد أقصى لكن إذا تحب ترفع Boost ببساتم بضغط واطي تقدر توصله إلى 12 PSI و السيارة بتكون مرتاحة , لكن الأفضل للاستخدام اليومي هو 8 PSI شد فيها على كيفك و أكتم يوميا إذا كنت مركب بساتم ضغط واطي . أما للـ T4 و ببساتم ضغط واطي تقدر ترفع الـ Boost إلى 15 PSI و تلعن خير السيارات كلها :d .
طبعا تحتاج برمجة من أول وجديد للسيارة لتنظيم دخول الهواء مع البنزين و تحديد فكة التيربو و فصلته ;) , و أفضل جهاز و إللي راح يفيدك بقوة في هالمرحلة و راح تحتاجه بشدة للمرحلة القادمة هو الـ F-con من HKS :cool: .
لكن المشكلة الكبيرة إن سعره 7000 ريال , لكنه أفضل جهاز برمجة للسيارات اليابانية إلى الآن , لأنك مو بس تبرمج إلا إنك تقدر تضيف بروجرامات و تحديثات و قطع ثاينة عليه و يركب بدل كومبيوتر السيارة , لأنه هو عبارة عن كومبيوتر جاهز للبرمجة و التعديل في أي وقت .
أو الحل الأوفر و هو Hondata .
الأسعار :
كان التيربو للأكورد موجود في جدة و كان سعره مع التوزين و التركيب و الداينو 17.000 ريال مع ضمان لمدة سنة على التركيب و القطع إذا كانت من عند الورشة نفسها :) .
موجود تيربو ماركة HKS اليابانية المعروفة و سعره واصل إلى جدة 14.000 ريال و في واحد موجود بجدة و معروض للبيع و جديد لم يستخدم بنفس السعر .
نقدر نطلب تيربو Custom من ماليزيا بسعر 6000 ريال فقط شامل الشحن و التوصيل و التركيب و التوزين و الداينو هنا بـ 3000 ريال :cool: و هذا أفضل و أوفر حل :d .
إلى هنا أتمنى إنكم تكونوا أستفدتوا من الموضوع و إنشالله نشوف مشاريعكم و تطبيقكم على هذا المستوى , أعتقد إنه بيكون كافي إنك تشمط سيارات كثير 8 سلندر , و راح تلعب مع الكبار و كل العالم راح تستغرب من مستوى الـ 4 سلندر ;) .
فعلا , نعمة إن سياراتنا هوندا , و أحلى ما فيها قابليتها للتعديل .
أخيرا و ليس آخرا :
صورة لمحرك أكورد V6 معدل عليه تيربو T4 و صاحبه رافع Boost 16 PSI , و تخيل القوة الموجودة في هالمحرك إذا ركب على سيارة .
تحياتي لكم
أخوكم : خـــالـــد .
