زينون السيفيك 2009 التجاري

السلام عليكم ورحمه الله وبركاته

تحيه طيبه للجميع اخواني ..

اتشرف بأنظمامي الى منتداكم الجميل جداً والذي يحمل في جعبته ما هو اهم (الهوندا) :d

لا اريد الاطاله

لدي سؤال مهم ومحيرني جداً ..

انا عندي سيفيك 2009 توني مطلعها من يومين الحمد لله ..

وهي متوسط الاوبشن وحبيت اركب فيها زينون طبعاً الاصلي غالي على الفاضي ..

انا شريت واحد تجاري بـ 200 ريال اي 20 دينار لاني من البحرين ..

لكن يوم اطلع السياره سألت الموظف عن اني اركب زنون خارج الوكاله قال اي خلل في الكهرباء يروح عليك ضمان الكهرباء وممكن يسبب لك خلل الزنون .. خوفني والسياره حرام جديده ويروح الضمان و ما ادري شنو تخبي الايام لي فهل اولاً كلامه صحيح مع اني اشوف ناس كثيره مركبه زنون لسيارات جديد وهو مو اصلي ؟

وهل فعلاً يأثر على خلل الكهرباء ؟

وسؤال مهم جداً .. هل في الهوندا سيفيك مشكله بالكهرباء بشكل عام ؟ لأنه قال لو يصير اي خلل كهربائي حتى لو مو من الزنون يخلون الزنون اهو السبب يعني كعذر اذا فهمتو قصدي ..

وانا ملاحظ ايضاءً انه لما اكون واقف ومشغل المكيف او اشغل المكيف نوع يظعفون ليتات الداشبورد ويرجعون مادري هل شيء طبيعي او يعتبر خلل

اعتذر للإطاله واتمنى منكم النصيحه والمساعده من خبراتكم ..

تحياتي للجميع

وعليكم السلام ورحمةُ الله وبركاتهْ ،

حي الله أهل البحرينْ ،

منوّرنا وقسمْ ،

وشسمه هذا ؛ ركّب الزينون وريّح بالك وخل عنك الوسوسهْ ،

الوكالة تقول لك عن الكهرباء عشان تبي الضمان تلغيه عليك غصبْ ،

فإذا أنت حصلت لك مشكلة في الكهرباء ، روح لأقرب محل وشيل الزينون وبسْ ،

والكهرباء في الهوندا كـ عام ، تتحمل الزينونْ ،

وحالة انك لما تشغل المكيّف يضعف النور اشوي ويرجع نفس اول ، تراها حالة طبيعيةْ ،

ومبروك عليك السيارة ، والله يعطيك من خيرها ويكفيك من شرهاْ ،

مبروك السيارة عليك ..


الله يعطيك خيرها وكفيك شرها,


انا اقول مثل كلام


كاكاشي

حي الله ولد البلد
منور اخوي

ومبروك عليك السيفيك
يعطيك خيرها ويكفيك شرهاا
:)

كان طلعتها فل اوبشن اريح لك
:d

ولا استنى لين ماينتهي الضمان وركب اللي تبيه

اخوي
انا مثلك اعرف وكالاتنا
و زي ما قال اخوي كاكاشي
يبون يلاقون اي خلل بالكهربا ويلغون الضمان

بس اذا انت تعرف احد فالوكاله
ولا سمح الله صارت عندك مشكله بالكهربا اهو ابخص وخل يحلها لك


او تقدر اخوي تركب زينون
بس وقت اللي بتاخذها للصيانه
شيلهم وبعد ما تطلع ركبهم
--<< بتسوي لك شغله خخخخ :d

بس لا حد يدري بهالحركه وقت السيرفس بالوكاله :cool:

معليش تحمل
:)

وانا زيك
بس سيارتي الفل اوبشن
وزنون اصليه من الاصل فيها

بس مفكره اركب لي على الكشافات
بس زيك خايفه يروحو الضمان


وووو اكيد طبعا الزنون الاصلي يختلف عن التجاري تماماً

وماعليك من اللي يركبو الزنون التجاري على سياراتهم اليديده
يمكن بعضهم راح من ايديهم الضمان


بس انه عطيتك كم حل --<< احلفي عاد :d
وبيدك الاختيار


خذ بالك
وبالتوفيق انشالله
:)

الشباب الي قالو ركب زنون واذا اخترب شي فكه وروح الوكاله ولا كأنك مركب شي

يعني هذا مو حرام وغش ؟

على كم ريال اقعد اغش وبعدها ربي يبتليني انا وسيارتي

( تعليق على ما قاله اخوي ميشوو )


يعني الوكاله لمن تلغي ضمان سياره يديده مو حرام ؟
بإمكانهم يصلحوو على حساب الشخص من غير مايطيروو الضمان حقه :)


على فكره ميشوو
انا وحده واعرف وكالاتنا فالبحرين
الوكالات اكبر حراميه من ناحية الصيانه والتصليح :)


الحين يات على زنون تركيب وفك ؟
مافيها شي الشخص يبي يضمن الضمان حقه


واحنا حبينـا نساعده
:)


القرار راجع له بالنهايه
;)

واسفه عالمداخله

بس الوكاله فهموك شروط الضمان من اول ماخذيتي السياره

ومامنعو هالاشياء التجاريه الا لمصلحتك لان ممكن لاسمح الله تعدم عليك الكهرباء

ومن رآيي ماشاء الله السيفيك الفل كامله والكامل وجهه سبحانه

حلاتها يجي الواطي زنون والكشافات صفراء منظر روعه

:)

ميشوو
ياحبيب قلب امك انت :d
الوكاله اول حاجه بالنسبه لي انا مافهموني بهذا الشي
لأنو معروف اساسا اي حاجه تجاريه وتخص الكهرباء وتركبها على طووول يلغوو الضمان

مادري ليش ؟
طيب انا مستعده اصلح على حسابي اناا
بسى الضمان يبقى

حتى لو إنهم بيتكلمو لمصلحتي بس انا مابسوي شي إلا وبتحمل مسؤليته

وبالعكس
زي ماقلت انت
الواطي زنون حلوو وايد عليها
والكشافات صفراء هم بعد حلوو عليها

بس انا عندي زنون ابيض
زي اللي فوق واقوى بشوي
خذيته ونفسي بصراحه اركبه لو ليوم واحد اشوف وش الوضع يكون :d

نشوف رايكم بعدين بالصور بعد مااركبه
اذا ماعجبكم نفكه :d

سلملم

أنا من أول يوم شريت السيارة وانا راجع من الوكاله وقفت عند محل صاحبي وكنت
حاجز عنده زينون اليي ألماني و أول ماوصلت مارحت بها البيت .. على طول الى محل صاحبي وركبت عليها الزينون ..
ولا دقيت خبر لا الى كلام الوكاله ولا بطيخ ..
وبعدها بثلاثه أسابيع يوم كملت ألف كيلو وديتها الوكاله تشييك مجاني وماشفتهم اتكلمو لا على زينون ولا شي ..
وطلعتها من الوكاله على طول الى الورشه ونزلتها ورى وقدام ..
ههههههههههههههه
ماعليك من كلام الوكاله .. أي شي لا سمح الله ايصير في السيارة رجعها زي ماهي وركب أنوار الوكاله الصفران ووديها قول ليهم خربانه ..
وبسسسسسسسسسسسسس بكل بساطه ..
تحياتي

انصحك ماتركب انا لعب لي بالكهرباء والمثل يقول اسئل مجرب ولا تسال طبييييب

الموضوع قديم

الرجاء عدم رفع المواضيع القديمه

يغلق

:)