تكفون المساعده ((مشكله وخلل في القير بعد الحادث))
السلام عليكم ورحمة الله وبركاته
كيف حالكم ان شاء الله بخير
الموضوع يوم قربت أخلص منه انمسح بس قلت كاتبه كاتبه:mad:
انا قدّر الله علي وصار علي حادث من الخلف تعفجت الشنطه(ماتقدر تسكرها) والاصطبه الخلفيه يسار والصدام الخلفي انعدم والقزازه الخلفيه تكسرت :(
صدمن واحد وانا ابآخذ يو تيرن وداقن اشاره :mad: ((وانا امشي مادريت الا اسمع فرامل قويه ويصدمن:eek: وتلف (افترت) السياره من قوة الصدمه حسبي الله عليه ((بزر عليمي دبشه طاير بين السماء والأرض )) وموب سيارته اللي معه سيارة أخوه أو ابوه المهم جوّ اخوانه وجوّ أخواني وتفاهمنا مع المرور وشرحنا له السالفه وانا ماحركت السياره سانتي واحد اول ماصدمن وبعد ماوقفت السياره سحبت الجلنط وطفيت وانزل ,,نقطه مهمه (لاتحرك سيارك اذا صدمك أحد ولا سانتي اول ماتوقف السياره اسحب الجلنط وطف وانزل عليه ووقفه واتصل على المرور ((يعطون تقرير عن الحادث)) علشان التأمين أو التفاهم طبعا تكون مولع فليشر
ويوضحون نسبة الخطأ )) انا ماعلي ولا 1% واللي صادمن 100% وكتبوا قيمة التلفيات انا أكثر من 10 الآف ((عاد عوضون التأمين الحمد لله بعد طلعت الروح )) مايعطون الا بعد شهر
* حصلت عندي مشاكل بالسياره بعد الحادث:
أول مشكله :
اذا عشقت بريوس R ماتدحدر السياره حتى لو انا مطلق الجلنط ومخلي الفرامل وانا باتل راص الكلتش المهم ماترجع حتى لو مؤخرتها للدحديره يعني المفروض ترجع ريوس بدون دوس بنزين قبل كانت تدحدر على طول وبقوه اذا اطلقت الفرامل الحين لا:(
الله يستر :(
هل تتوقعون القير تضرر بعد الحادث والكلتش(صاير قاسي:eek:) قبل بالراحه تقدر تقول تضغطه ومريح الحين لا ,,يعني تتوقعون محتاج القير والكلتش تمرين وتليين ام الحادث سبب أضرارا بالقير والكلتش أو الفرامل (بما انه ماتدحدر ) أتوقع التروس الله يستر تضررت
((ملاحظه صادمن العليمي وانا ابديور وزحت (افترت) السياره هل لها أضرار ؟ ))
((ملاحظه السياره له شهر أو أزود ماسقته بسبب انه خليته بحوش وهي مصدومه لم تصلح ثم يوم دبرت دراهم دخلت السياره على حسابي بورشه وقعدت اسبوعين او ثلاثه الورشه زحمه وجبت لهم قطع غيار دام التأمين يطلع بعد شهر)) ابطت مامشت صح يعني تتوقعون محتاجه تليين او تمرين بس وش دخل التمرين والتليين بأنه ماتدحدر اذا رجعت ريوس وانا مطلق الجلنط والفرامل
المشكله الثانيه :
الورشه اللي صلحت عندهم (الشنطه والصدام والخ...) سارقين غطاء علبة زيت الدركسون (انكروا يقولون حنا ويش يجيبنا للمكينه حنى علينا من الشنطه والصدام وزيناهن) المهم شغلت السياره البطاريه فاضيه عيت تشتغل يوم اشتغلت طلعت أصوات :eek: من طرمبة البور(الدركسون) واناظر الغطاء موب موجود (فاكينه حسبي الله عليهم وداخله غبار وتراب (لأن عندي تهريب منحينه بالدوده وصار قاضي الزيت وداخل غبار وتراب المهم عبيت زيت واعبي واعبي خف الصوت وارجع السياره وابلف الدركسون ثقيل مره :eek: وصبيت برضوا ولكن مافاد واطلعه من الورشه ويالله يالله الف الدركسون ولمنك مشيت على حفره خفيفه تحس ايدك ابتنكسر من قوة النفضه :eek: المهم رحت للبيت وقفته (خليتها) ما اقدر امشي عليه الدركسون ثقيل :eek: واخاف يقفل علي وانا امشي :eek: (وقفتها امس عند بيتنا) والى الآن مامشيت عليه فحبيت اشاوركم واللي يعرف حل المشكله أو أسعار قطع الاصلاح ...
يعني هل فيه طريقه انظف الطرمبه والخ... من الغبار والتراب ,, واحد قالي داخله هوى علشان مابه زيت وش دخل الهواء
قبل الحادث والورشه ((كانت الطاره من احسن مايكون مع انها تهرب بس اني أزوده وطبعا الغطاء:mad: دايم مصكوك موب مخلينه مفتوح (الورشه) وسارقينه بعد
والمشكله الورشه يتجاهلون وانهم مايدرون
والله شكلي بعد ماصلحها اببيعها موب علشان شي بالعكس بس (مصكوكه عين) تالي بس ,,قهر والله ماتهنيت به تصدقون مامشيت بالسياره 15 الف يوم اشتريها وهي ماشيه حول ال 140 ألف والحين 152 الف تقريبا (مشاويري قليله ولأني محافظ عليه) ماتمت معي سنه وانا متهني قبل كنت مرتاح ومحافظ على سيارتي جدا ودايم اغسلها والمعها وكانت نظيفه
وبما اني راعي سرعه وصراحه عزمه وتسارعه وعزمه قوي (يمكن علشانه قير عادي) أو اني علشاني قبل دايم أسرع بس اني محافظ عليها
وصراحه كثير اللي انتبهوا لسيارتي لأن لونه فضي معدني وضابط ولون حلو ومن داخل أسود مع تخشيبه
والله العظيم موب وسواس بس الكم شهر اللي راحوا انواع المصايب بالسياره كل شوي جايتن مصيبه ضرب علي كفر جديد طلعت عن الخط شوي (شمعه من الواطي محترقه وشمعه مقربه تحترق والنور تقدر تقول ضعيف وماقدر أكبس السيارت يعمونن بالزينون والخ... وكنت تعبان ومسرع بطريق أظلم مافيه نور ومزارع والخ... وضرب علي الكفر يوم زحت السياره يسار لم الماصوره وجدار به سيارات جايات ومسرعات بس فكن الله مسكت السياره وركبت استبنه وشريت كفر ثاني جديد وركبته والحمد لله السياره ماجاه شي اللهم كفر جديد هانكوك
وبعد فتره صار علي حادث كما ذكر بالموضوع
وبعد ماصلحت السياره وجيت ابطلعها خرب الدركسون (بسبب الغبار والتراب ) وينقص زيت كثير من عند الدوده
ملاحظه اذا عبيت زيت خف ترى الغبار موب العلبه فايضه كله غبار لابس بقاعته بس شكله داخل للطرمبه :mad:
الشكوى لله انا لله وانا اليه راجعون
وانتبهوا من كثرة التلميع وتخلي السياره تلق من داخل ومن الخارج وتخلي السياره نصبه والخ...
علشان ماتصك عين وتغربلون بالخرابات والمصايب طبعا قضاء الله وقدره لكن الانسان يفعل الأسباب
وترى والله العظيم ماودي تمرون باللي مريت به شهر بلا سياره وحاله خله على ربك الله يعين :(
تكفون ساعدون الله يرحم والديكم ويرزقم الزوجات الصالحات الجميلات العفيفات :d
صراحه منغث وضايق صدري :(
ومضه :o :: ((رجاءً لا أحد يمسك بزرانه سياره وهو مايعرف يسوق زين او يحسب انه داخل رالي داكار طبعا كلامي للعليمين )) علمه بشارع فاضي ومافيه أحد علشان مايجيب العيد بالناس ))
وانصحو اللي تعرفون انهم مايمسكون سياراتهم مبزره . وانتبهوا تعطون سياراتكم مبزره
كلامي من الواقع يجيك متهور ومايدري وش السالفه وآخرته يصدم أحد أو يدخل بماصوره أو يسبب وفاته أو وفاة أشخاص آخرين واذا ساق البزر اعرف انه ابينطل سيارك وانت نايم (لأنه تعلّق بالسواقه) ويقعد يدور ويتعرف على ناس موب زينين (رفقاء السوء ويضيعونه) أو يجيب العيد في سيارك
من رأيي أول ثانوي أو ثاني ثانوي ((طبعا اذا كان طايش الصبر عليه الى ان ينضج حتى ولو قليلا
لأن الحوادث كثرت وخاصة الصغارين توه صغير ويموت بحادث (طبعا قضاء الله وقدره) لاكن الانسان يفعل الأسباب
وسيارتي قبل لا أشتريها كان ناس واجد ودهم به بس الحمد لله اشتريته يمكن نفسهم به شكلي اببيعه خايف تبدأ بي لي مره يصير علي حادث واصير معاق الله لا يقوله
هذي نصيحه لوجه الله :rolleyes:
نسيت أقولكم
السياره أكورد موديل 2006 سياحي قير عادي
طولت عليكم لاكن تحملوني ..
وشكرا جزيلا
