السلام عليكم
اليوم يا شباب بعد ما قرأت أكثر من مشاركة، وأكثر من شكوى وأكثر من تعليق على ديسكات الهوندا أو كما يطلق عليها بالسعودية الهوبات
صراحة المشكلة عندي موجودة ، لما أدوس بريك قوي أحس برجفة بالسكان، وأحياناً وأنا أمشي بشويش أدوس بريك قوي يطلع صوت كأنه مافي سفايف أو كأنه السفايف انتهى عمرها وصارلي سنة ماشي عليها أعتقد خلاص عرفتوا هالصوت شنو يعني ، المهم كان مزعج
اليوم قررت أروح الوكالة، طبعا سيارتي اكورد 2003 - 4 سلندر ، من ثلاث أسابيع سويت سيرفس ال 60 الف، وكانت السيارة ماشية 63 ألف
اليوم السيارة وصلت 65 الف ورحت الوكالة وقلتلهم السالفة، أتفاجأ بالأخ يقولي مالنا علاقة بالسرعة فوق 120 ؟؟!! :confused:
طيب طبلون السيارة 240 ؟؟!! ليش حاطينه
قالي مالنا علاقة 120 وتحت في صوت نتحمل المسؤولية، قلتله طيب لما تكون السيارة واقفة واحط على ال D في رجفية ليش ، قالي هذي كل الهوندا جذي
قلتله أوكي بكلم واحد ثاني كنت متعامل معاه قبل هالمرة وشكله حبوب
رحت كلمته قالي نفس الكلام ، وقالي لازم تكلم المدير وانت والمدير، قلتله انزين مالها حل، طبعاً كل هالدورة علشان يشيلها الضمان، مابي أدفع فلوس :d
قالي انسويلك خراطة، قلتله سمعت انها مافي فايدة الخراطة بترجع الأصوات والرجفية ، قالي صح بترجع بعد فترة :mad:
قلتله والحل أنا من ثلاث أسابيع مسوي سيرفس كامل 60 الف وانتوا ماقلتوا انو فيها هالمشكلة ، يعني المشكلة منكم، يعني مني شوي ومنه شوي واهوا يقطها علي وانا اقطها على آخر سيرفس، وعيب مصنعي، وبالأخير قلتله صراحة سألت شباب عندهم هوندا بره الكويت بالسعودية وبره كانت الوكالة تغيرلهم على الضمان لأنه هذا عيب مصنعي، شكله اهني حس بالاحراج
بالأخير كلم واحد قاعد معاه شكله مسؤولهم ، قاله ان شاء الله خير ، قلتله تبديل قالي بدلتهم قبل هالمرة قلتله لأ ، قال انبدهلم :d
قالي بس اتشيل سعر السفايف، قلتله السفايف ماشي عليهم الفين بس قالي لازم لما انبدل الديسكات لازم يتبدلون، قلتله والرجفية على الدي قالي راح انشيك عليها وعلى الأغلب مالها حل.
المهم بالأخير جاني وقالي راح تكلفك السفايف بحدود 21 دينار كويتي ( 252 سعودي) وبعد الخصم تقريبا 20 إلى 19 دينار ، مع تبديل الدسكات الأمامية بس الخلفية سليمة، ورجفية الدي سليمة وكراسي الجير والماكينة سليمة، قلتله توكل على الله
بالأخير طلع حسابي 18 ونص دينار كويتي ( 216 سعودي ) وبدلي الدسكات وراحت الرجفية والصوت بس رجفية الدي هذي راح اتم معانا شعار هوندا الدائم :d
طبعاً بالفاتورة مكتوب سعر الديسكات الأمامية تقريبا 67 دينار كويتي ( 804 سعودي )
هذي معلومة للي صار معاي، فقط لمعرفة حالات الوكالة وكيفية التعامل معهم
وأي استفسار حاضر :)
تحياتي :)
