ايش الفرق بين الاكورد الأمريكي والخليجي

السلام عليكم ورحمة الله وبركاته

اولا الحمد لله اشتريت هوندا اكورد 2007 V6 EXL ماشية تقريبا 46000 من امريكا بعد تردد شديد وبعد ما شجعني احد الاخوان في شرائها واعجابي بنظافتها.:cool:
علما باني من معجبين هوندا من عام 94
ثانيا واللي كان مخوفني كثير هو هل تدخل السيارة السعودية ام لا :confused: فعلا باقي شهرين وتوصل انشاء الله, وهل راح اواجه عقبات في تدخيلها بحكم اني قرات في احد مواضيع المنتدى انها لاتدخل لانها لا تطابق المواصفات والمقاييس السعودية وفي شباب يقولون تدخل واحترت في الاخير :confused:

بصراحة اللي شجعني بشرائها يقول انها تختلف قليلا عن المواصفات السعودية مثلا سخانات مقاعد ومرايا شاشة ملاحة, ولكن واحد قال ان المواصفات الداخلية تختلف ايضا!! هل هذه المعلومة صحيحة :confused::confused:

اترك لكم التعليق لهذا الموضوع

اولا الله يعطيك خيره ويكفيك شرها

ثانيا السياره تدخل السعوديه بس تطول اجراءاتها بالمينا الا بالواسطه تمشي بسرعه

ثالثا المواصفات تختلف بالخارج جنوط اكبر 17 انش + انوار السكن برتقالي + الخلفيه كلها احمر يعني الاشاره حمراء

من الداخل تجي الجلد نوعيه افضل + شاشه ملاحه + اوامر صوتيه + تسخين المراتب والمرايات الجانبيه <<بالرياض ماتحتاج تسخين طبع:d+ريموت مع زر الانذار الاحمر

بالتوفيق للك

المسافر,,, يعطيك ألف عافية على هذه المعلومات, بس مافهمت ايش تقصد بالأوامر الصوتية,
وهل قطع الغيار الداخلية متواجدة عند الوكيل ؟؟ يعني نفس قطع غيار الهوندا اللي في السعودية؟

ميدو112,,, الله يوفقك انشاء الله

اخوي من اي موقع شفت السيارة وشريتها ممكن تشرح لي بالضبط

والسيارة من متى شريتها وهل واجهت فيها مشاكل صعبة

وهل تشجعني على الشرا ءمن امريكا

لاني سمعت من الناس ان السيارات الي في امريكا كلها مصدومات ولكن يعدلوها ومن ثم يعرضوها للبيع


فما رايك في هذا الكلام لاني سمعت بعض الناس يقولون جميع السيارات المعروضة للبيع في امريكا كلها مصدومات

وتقبل تحياتي

حياك أخ يوفاوي , أخذت السيارة من موقع eBay قبل اسبوعين تقريبا, والحمد لله اكملت إجرائات البيع وباقي اجرائات الشحن لكي توصل ميناء الدمام والحمد لله الأمور ماشية تمام إلى الآن, راح ياخذ موضوع الشحن من امريكا اسبوع تقريبا وفترة الشحن البحري تقريبا خمسة واربعين يوم يعني شهرين تقريبا.
واللي يقول لك ان جميع السيارات مصدومة ومعدلة هذا الكلام غير صحيح لأن فيه شيء اسمه في امريكا CARFAX يعطيك تقرير كامل بحالة السيارة منذ خروجها من الوكالة بحيث انك تعرف ان السيارة كانت مصدومة من قبل ام لا او تعرضت لاي شيء من التلف.
وبالنسبة لشارائك سيارة من امريكا, فيعتمد على صبرك والتحمل لتأخيرها ومعاملاتها.
واشكر مرورك

اول الله يباركلك فيها

وثانيا اعتقد انك بتواجه مشاكل ف قطع الغيار لاني الي اعرفه ان القطع تختلف من دولة الى دولة
ما عدا المرسيدس ^_^

اقتباس:

---

بس مافهمت ايش تقصد بالأوامر الصوتية,
وهل قطع الغيار الداخلية متواجدة عند الوكيل ؟؟ يعني نفس قطع غيار الهوندا اللي في السعودية؟

---

الاوامر الصوتيه يعني فيه زرار ع الدركسون تفتحه وتعطيه امر بصوتك عشان يفتح لك المكيف مثلا ويفتح بنفسه من خلال التعرف على الامر من صوتك << كشخه :d

قطع الغيار نفس اللي عندنا بس فرق شي بسيط اذا الشي مو موجود بالمواصفات الي عندنا

الضبياني, الله يبارك فيك :cool:
المسافر, يعطيك العافية, امس مريت للوكيل اللي في شارع خريص وسالته عن الصيانة وقطع الغيار للسيارة وفعلا قال ان القطع متوفرة شبه بالكامل واذا صار في نقص في القطع راح يطلبوها عن طريق دبي واقدر ادخلها الصيانة بشكل طبيعي واللي بشرني فيه زيادة ان السيارة لو عليها ضمان من امريكا راح يستمر الضمان في السعودية عن طريق الوكيل بشرط اطلب خطاب من وكيل امريكا ان السيارة لازالت على الضمان.

اسطاباتها غير وشكامينها غير

طيب يااخي بكم اشتريت السيارة وماهي لون سيارتك ؟

وممكن الموقع الي اشتريت منه السيارة حتى اشوف السيارات المعروضة للبيع؟

وتقبل تحياتي.

يوفاوي, بحدود17000$ واللون فيراني من الخارج, المواقع اللي تبيع كثيرة ومن اشهرها ebay motors.

وبالنسبة للراديو في الهوندا الامريكية يقولون فيها راديو على الاقمار الصناعية XM لكن مع الاسف ماراح استفيد منها لانها تعمل في نطاق امريكا فقط.
ويوجد ايضا تحكم من السيارة بفتح باب الكراج الأوتوماتيكي وانذارات السرقة للبيوت.

يعطيك خيرها ويكفيك شرها

دامك شريتها لآتندم عليها

خصوصآ انك ماراح تلقاها بهالسعر هنا نهائيآ

وعليكم السلام ورحمة الله وبركاته


مبروك ما شريت اخوي سمير
الله يعطيك خيرها ويكفيك شرها وان شاء الله توصلك سليمة ونظيفة مثل ما شفتها بالصور

اذا كانت السيارة مزودة بنظام ملاحة فإسمح لي اقول لك انك شريت الاكورد اللي فعلاً تستاهل انها تتسمى (فل اوبشن)

:cool:

الفرق بين سيارتك والاكورد الخليجية اللي يسمونها عندنا فل اوبشن :

1. نظام هوندا للملاحة : نظام خطير جداً بس ما بتستفيد منه لانه ما يدعم الا امريكا وكندا . ومن اللحين اقول لك لا تتعب نفسك معه لان مالك اي امل تستخدمه حتى تبدا شركة هوندا تعترف بقوة سوقنا وتنزل سياراتها بنظام ملاحة يدعم منطقة الشرق الاوسط .

شاشة النظام تعمل باللمس وعن طريقها تقدر تتحكم بنظام الملاحة والمكيف والمسجل والردايو . من ملحقات النظام كمبيوتر رحلات يحسب لك صرفية البنزين وكم يمشيك ، وفيه كم شغلة حلوة بس ما بتشتغل معك الا اذا كان نظام الملاحة تحت التغطية (وهذا شي شبه مستحيل) . اولها الآلة الحاسبة وفيها ادوات لتحويل الوحدات مثل الوزن والمسافة والحجم وغيرها ، تقويم تقدر تحط فيه تنبيهاتك ومواعيدك وملاحظاتك .

2. نظام التحكم بالاوامر الصوتية : النظام هذا ما قد شفته عندنا حتى في اطلق السيارات اليابانية . عن طريقه تقدر تتحكم بنظام الملاحة والمكيف والمسجل والردايو . بس تضغط زر موجود في الدركسون وتعطي سيارتك الامر اللي تبيه بعدها بترد عليك بصوت انثوي جميل وتنفذ الامر :d

3. ردايو الاقمار الصناعية من شركة XM : غير محطات الراديو له مزايا كثيرة مربوطه بنظام الملاحة مثل توفير معلومات عن الطقس وحالة الطريق واماكن الازدحام بس نفس سالفة نظام الملاحة ما بيشتغل معك لان الشرق الاوسط خارج التغطية .

4. المقاعد الامامية مجهزة بنظام تدفئة وتحكم كهربائي (للسائق 6 وضعيات والراكب 4 وضعيات)

5. المرايا الجانبية عادية مثل مرايا الاكورد 2003 - 2004 حتى قزازها عادي مو محدب بس زايد عليها التدفئة

6. ست وسائد هوائية (واحد للسائق وواحد للراكب واربعة جانبية)

7. ازرار التحكم بالكراج جنب درج النظارات فوق

8. جنوط المنيوم مقاس 17 والكفرات ميشلان مقاس 215/50/17

9. جلد المقاعد طبيعي ومريح اكثر من الخليجي

10. الانوار الخلفية حمراء بالكامل مع الاشارة وفيها انوار ضباب بالاطراف

11. النظام السمعي ممتاز وصوته عالي ونقي حتى على اعلى درجة (جربه على سي دي اصلي تسجليه نظيف)

12. شاشة الطبلون بالميل والفهرنهايت وزايد عليها عمر الزيت بالنسبة المئوية (100% تعادل 10 آلاف كيلو تقريباً) . بداية من 15% تبدا تستقبل انذارات بقرب موعد تغيير الزيت والصيانة الدورية .

13. اذا ما قفل عامل المحطة غطاء البنزين زين بعد ما تمشي بشوي بيجيك تنبيه في شاشة الطبلون Check Fuel Cap

14. الانوار الامامية مالها ميزان وازرار وزنية ، ما فيها انوار صغيرة للسكن مثل الخليجية ، السكن فيها لمبات الاشارة البرتقالية

15. انوار القيادة في النهار : طول منت مطفي النور الواطي بيشتغل عندك النور العالي مع لمبة العالي في الطبلون بس بيكون خافت والغرض منه تنبيه السواقين المفهين في السيارات اللي قدامك . النظام هذا اجباري وموجود في كل السيارات الامريكية . اذا حصل عندك مشكلة في الانوار هذي بتولع عندك لمبة DRL في الطبلون اختصار لـ Daytime Running Light .

16. مالها اشارات جانبية

17. ما فيها طفاية للسجاير

18. ما فيها درج صغير على يسار الدركسون مثل الخليجية

19. الدرج اللي تحت التكاية زايد فيه اماكن للنقود المعدنية واماكن لحفظ البطاقات وفتحة لسلك الشاحن

20. المراية الخلفية عادية مثل مرايات الاكورد من 2003 الى 2005

21. اذا حبيت تركب كشافات لازم تشتري الطقم كامل بعكس الخليجية اللي تجي تمديداتها جاهزة ومو ناقصها الا الكشافات والفاصل

22. الريموت زايد فيه زر الانذار Panic تقدر تروع به البزارين والحراميه ويساعدك تلقى سيارتك اذا كنت مضيعها وهي قريبه منك

23. وقت ما تقفل السيارة يشتغل الفليشر + البوري مثل سيارات GM

24. ترددات الراديو فردية فقط : يعني على سبيل المثال الترددات تنتقل من 100.1 الى 100.3 ما تقدر تثبت التردد على 100.2

25. وفيه شغلة اخيرة ما ادري اذا كنت تشوفها ميزة او عيب : طبلون السيارة في لحسة غريبة بس عاجبتني . على السرعة القصوى 210 سرعتك في الحقيقة هي 240 .. لا تعلم احد ;) :d

معلومات تهمك :

القطع هي نفسها قطع الاكورد الخليجية ما فيها اي اختلاف ما عدا قطع الاكسسوارات والانظمة اللي ماهي من المواصفات الخليجية + طرمبة البنزين اللي تجي قطعة كاملة مع الفلتر بعكس الاكورد الخليجية . عبدالله هاشم ما يستقبل سيارات هوندا الامريكية ابداً واللي قال لك عكس الكلام هذا ما عنده اي سالفة !!


هذا اللي اذكره من المواصفات حالياً .. وسلامتك
بالتوفيق ان شاء الله ونتمنى لك انتظاراً سعيداً :)

اخي ممكن الموقع بالضبط الي اشتريت منه السيارة

حياك الله خويي B Unique بصراحة حمستني كثير لدرجة اني قريت ردك ثلاث مرات :dمشكور على مجهودك وتفاعلك معي والله ما قصرت يعطيك ألف عاافيه.
ودي اسألك سؤال بس تجاوبني بصراحه :confused: من وين جبت المعلومات هذي كلها ماشاء الله عليك؟؟؟؟:eek: حسيت انك كنت شغال في وكالة هوندا في امريكا :rolleyes:
شكلك بتصير خويي من الحين ;)
أنا اللي لفت انتباهي في الهوندا شاشة الملاحة وبعدين بدأت استكشف شوي شوي ,بس الحين انت كفييت و وفييت :cool: بس حمستني بصراحة في البداية وبعدين تحطمت شوي في بعض المواصفات.
وصحيح كلامك اني ماراح استفيد من شاشة الملاحة والراديوم XM بس كان عندي امل أن سي دي الملاحة حق جيب هوندا بايلوت الجديد يركب عليه لاني شفت فيها شاشة ملاحة اللي نزلت جديدة. لكن الراديوXM فانا فاقد الأمل من زمان.
بس في معلومة يمكن اخطأت فيها اللي هي اقصى سرعة لقيتها 240 وبعدها شخطة صغيرة يعني 250 ;)
وشكرا على المرور

يوفاوي, www.ebay.com وبعدين تختار Motors.

الله يحييك يا صديقي

تطمن المعلومات كلها مضمونة 100% وجواباً لسؤالك بأعطيك كلمة وان شاء الله تفهمها
(قبل فترة كنت الوحيد واللحين صرنا اثنين)

:rolleyes:

بالنسبة للبايلوت الجديدة اعتقد الشاشة اللي فيها مثل شاشة الاكورد 2008 (شاشة معلومات فقط)

سالفة السرعة شكلك ما فهمتها ..

اقصد وقت ما يوقف المؤشر عندك على 210 سرعتك الحقيقية هي 240 كم/ساعة
واذا وصل موترك بالسلامة ان شاء الله بتلاحظ ان ما فيه ولا سيارة تلحقك الا السيارات اللي تمشي فوق الـ 240

عالعموم لا تستعجل ولا تتحمس واجد (كل شي بوقته حلو) :)



** فيه كم شغلة توي تذكرتها واضفتها للقائمة اللي فوق

الحمد لله
وبعد انتظار طويل وصلت السيارة بسلام وتحت عملية الجمركة والتخليص
وانشاء الله اوافيكم بآخر الأخبار

الحمد لله على سلامت الملكه وبالتوفيق
تحيااتي..

الحمد لله على السلامة

الله يبارك لك فيها يالغالي

الحمد لله على سلامتها والله يعطيك من خيرها ويكفيك شرها