زيت الجير بوكس

يا شباب انا قريت موضوع في المنتدى عن تغير زيت الجير بوكس و انا معاي اكورد 2006 وماشي 175000 (راعي سفر) و عمري ما جى على بالي اني اغير الزيت او الفلتر ورحت لواحد و قالي لا تغير ولا شي وانا الان في حيرة اغير ولا لا؟
اسعفوني بالرد الشافي
و سلامتكم

مر علا الوكاله الصيانه السريعه وغير الزيت والفلتر هو فلتر خارجي بس ماادري يتغير بالصيانه السريعه

او لا

بعض الناس ما عمرها غيرت زيت القير الاوتوماتيك وبكل بساطة لما تروح محطة ويغيرون له الزيت يخرب معه القير

ليش ؟؟؟ في الواقع ما ادري لكن اللي ينصح فيه في الحالة هذه هي انك بس تزيده اذا نقص ولا تغيره

او غيره في الوكالة وخلهم يتحملون القير اذا خرب قول لهم انا جايبها سليمة

صارت لواحد من الشباب شرى سيارته من الكويت ماشيه 125 الف
سأل صاحبه الأول قال مدري عن شي اسمه زيت قير المهم

سأل مكانيكي خويه قاله اشتر علبه زيت وحده بس ورح لبنشر اشفط بس علبه
وحط مكانها جديده بعد شهر شهرين كررها لين تشوف الزيت صار احسن
وبعدين غيره كله وهذا الي صار الحين غيره كله وماصار شي له


طولتها بس بس اقول السالفة كاملة احسن

صارت زمان لما كنت في ورشة لما كنت اشتغل في ايام دراستي جتنا سيارة محولة لنا من محطة والسالفة ان المحطة بتصلحها على حسابها الخاص

نفس الشي فورد جا عندهم ماشي كثير وغير عندهم الزيت ويوم جا يمشي رفضت السيارة تمشي وبكل بساطة الكلتشات رفضت تمسك ببعضها والاخ الا يرفع عليهم شكوى في شرطة المعذر وجابوها عندنا الورشة لرخص اجرنا :)


ووضبنا له القير كامل وكلف المحطة 3000 ريال

والاخ اللي فوقي قال طريقة حلوة للناس اللي مثل الحالة هذه يغير الزيت على اجزاء مختلفة او تواقيت مختلفة

اخوي خذها نصيحه مني
وانا سمعتها من واحد صاحبي

لاتغير زيت الجربوكس نهائياً

والله واحد معاه فورد تقريبا
غير الزيت اليوم الثاني شيب راسه القير
بس عليك تشوف الزيت اذا كان ناقص زيده علبه اذا كان يحتاج وبس

بس لاتغيره نهائياً

مشكورين يا شباب والله ما قصرتوا

والله انا ماعندي خبره بهالموضوع لكن انا مره جيت اغير زيت المكينه عند محطه جنب بيتنا المهم وقال لي ابويمن زسيت القير عندك محروق ومتغير لونه ومدري ايش ووراني اللون الا هو فعلا اسود ووسوس فيني مع العلم ان السياره 2009 وكانت لسه مامشت اكثر من 10 الاف المهم اني قلت غيره وفعلا غيره لي والحمد لله ماصار شئ والقير زي ماهو لكن والله وسوست بعد هالموضوع مع العلم اني بسياراتي الاوله ماعمري غيرت زيت قير نهائيا الا مره وحده غيرت زيت قير لجيب لاندكروزر كان القير يفوت بالتغير وفيه طقه بالقير ونصحني واحد اغير الزيت غيرته لكن للاسف خبط القير اول ماطلعت من الورشه...
وانا الحين مدري اكمل واغير الزيت بعد مده ولا اخليه علي فاله...

^^ زيت المكينة عادي .. واحد من الشباب يمشية لين ١٨ الف حق الوكالة ويغيرة عادي ، وللحين عايش ومكينتة عايشة ،، بالنسبة لي زيت الوكالة ١٠ الاف كيلو زيت ماجناتيك ٢٠ الف كيلو .. ^^

زيت القير عندك بدري مش الحين .. اذا مشت السيارة ٦٠ الف غيرة ، ثم احسب كل ٤٠ الف وغيرة وهكذا ..

حرام عليكـ على الممشى الي انت ماشيه كان المفروض انكـ غيرته 3 مرات

اول مره على الــ 60000 المره الثانيه 100000 المره الثالثه 140000

175000 يعني باقي 5000 وتصير المفروض تكون التغييره الرابعه !!!

ذكرتني بسالفه واحد من اخوياي كان معه كورلا 2005 فل كامل اوتو وكانت ماشيه اكثر من 200000 حاصل العلم كان يقولي انه عند بعض المشاكل بالقير المهم قلت له متى اخر مره غيرت زيت القير قالي ليه القير له زيت !!! قلت ايه قالي مادري ومن ذا الكلام وبعد فتره بسيطه خبط عنده القير .

انتبه ياخوي ورح غير زيت القير لنه مايقل اهميه عن زيت المكينه وباقي السوائل و182 ريال ماهي بشي كل 40000
دمت بود

والله ماعرفنالكم !!! ...

واحد يقول غير والثاني يقول زيد والثالث يقول ماعمري غيرته !!

طيب والعلم الاكيد ؟؟

علما باني غيرت الزيت حق الجير على الـ40 وكان محروق وحاليا اغيره كل 20 الف ...

مو ناقصين اصلا قير الهوندا عله ومشاكله لليل ويا كثر الي موضبينه ...

أهم شي ياشباب لاتغير الا زيت هوندا للجير ..

وابعد عن اي سي ديلكو ..

.
.
.

^^ انت ماعندك مشاكل والموضوع هذا مايهمك لأنك مغير زيت القير على الجدول الصحيح ^^

يعني على قولة شعب ما ، حط في بطنك بطيخ صيفي وريح مخكـ :d
اللي مثلكـ ،، يغيرون اول تغيير على ٦٠ الف والثاني ١٠٠ الف والثالث ١٤٠ الف وهكذا كل ٤٠ الف

اما كاتب الموضوع ماشي على سيارتة ١٧٥،٠٠٠ كيلو ولا غير الزيت ، القير اعتاد على الزيت الموجود فية حالياً حتى لو انة صاير موية منذ ٣ سنوات ! فإذا غيرة الان القير ماراح يستوعب الشي الجديد اللي انصب فية << وهو زيت القير فتلاقي التروس كانت تشبك بكل سلاسة وبعد التغيير بتلاقي صعوبة في الشبك .. فأفضل حل لة اللي انا راح اسوية لو اني في مكانة اشتري ٦ علب قير ، وكل فترة معينة (اسبوع او ٢٠٠ كيلو ) اشفط نص علبة واحط نص علبة لين ما اشوف اني اذا شفطت يطلع زيت احمر ..

تجربة صايرة لي تحت اشراف شخص خبير ..

كان معاي فورد ١٩٩٨ ، وفية شي اسمة زيت الدفرنس ، يقال لي ابهتم في السيارة ورحت عند الخبير الاول صديقي قال غير الزيوت ( المكينة + القير ) لأني عرفت من صاحب السيارة السيارة السابق متى غيرهم آخر مرة اما زيت الدفرنس ولا عمرة غيرة .. قال لي صديقي اذا غيرتة خذها مني انة بيخرب عليك لأن الزيت اللي فية قدة خلاص اعتاد على الوضع ..

رحت الوكالة ابي اسوي صيانة للفورد .. وقلت لهم غيرو زيت الدفرنس .. قال كم موديل السيارة قلت ١٩٩٨ ، قال متى غيرت زيت الدفرنس آخر مرة ؟ قلت مدري ولا عمرة تغير .. قال دامة زيت وكالتة ولا حتى تفكر تغيرة ، اذا غيرتة بيخرب عليكـ ..

ا.هـ

انا اشتغلت ميكانيكا في وكالة فورد قبل كذا توكيلات الجزيرة


بالنسبة للدفرنس عادي اذا غيرته وعادي اذا ما غيرته بس اهم شي ما ينقص عن الحد

يعني لو مشت مليون كيلو وما غيرت الزيت عادي لو جيت وغيرت الزيت وما راح يصير شي لانه مجرد تروس وهي اصلا شابكة ببعضها


بس المشكلة في القير مختلفة

يعني لو لك فترة ما غيرت الزيت وتجي تغيره فجأة يخرب عليك

التروس في القير الاوتوماتيك دائما موصولين ببعضهم واللي يشغلهم شي اسمه كلتشات وهي اكثر من كلتشات تمسك في الوحدة الاولى ويدخل الثاني وكذا


المشكلة الى الان ما فيه احد وضح لي ليش القير الاوتو يخرب بعد ما تغير الزيت لا المهندس الامريكي ولا الميكانيكية في الصناعية لما كنت اشتغل هناك


بس هذا اللي صار قدام عيني محطة جابت فورد خرب القير عنده بسبب تغييره للزيت بعد مدة طويلة


يعني تشغل السيارة وتعشق d وتدعس بنزين وما تمشي معك السيارة ابدا

و الله خوفتوني شكلي اما اني اغير الزيت تدريجيا مثل ما قال اخوي(ااح2024 بيج) او اني اتركه و اغير فلتر خارجي

عموما الله يعطيكم الف عافية

انا ملاحظ اكثر استعمالك للسياره سفريات

ياشباب السفر او المسافات الطويله مريح للسياره بصفه عامة اذا كان بحدود السرعه المعقوله يكفيك نظام تبريد المكينة والجير وطرمبة الدركسون يعمل باعلى كفاءة بسبب سرعة الهوا العاليه على عكس المشاوير القصيره اللي تعتبرها الشركات قيادة شاقة.

اقولك نصيحة عشان ماينشغل بالك...غير فلتر القير وبعد اسبوعين انت بتعرف بنفسك اذا الزيت كان منتهي مره او لا بتفرق معك في التغييرات بشكل واضح في حالة الفلتر القديم كان مسدود اصلا...اذا لاحظت فرق كبير غير الزيت بالتدريج مثل ماقالوا الشباب واذا مالاحظت فرق معناه غير الزيت مره وحده وتوكل على الله

المعذره على الاطاله ...تحياتي

مشكور اخوي(متصفح) على المرور و الافادة
والله يعطيك العافيه