انسرقت سيارتي لاول مرة وعندي كم سؤال لو تكرمتوا

السلام عليكم ورحمة الله
حياكم الله يا اخوان
ثاني يوم العيد اتصلو علي الشرطة وقالو لقينا سيارتك شغالة في شارع بعيد عن بيتي تعال استلمها
السيارة انسرقت بنص الليل ولقوها بالفجر من دون ابلغ لاني كنت نايم..
سرقو المسجل وبعض الاغراض الشخصية مع العلم ان السيارة مافيها اي اثر كبير انها فتحت بشكل عنيف لا على الباب ولا غيره اللهم ان دقمة السلف في البداية كانت داخلة واي مفتاح يفتها... وما فوتو يعبثون ويكسرون الديكور ما حتى القير ما سلم منهم ادري ليش؟
مع ان السيارة موديلها قديم ومافيها اللي يقهر سيارة اقل من عادية.
اسئلتي:
1- هل لازم اتابع الشرطة في موضوع لان اللي استلمها اخوي مو انا؟
2- هل السيارة اذا انسرقت مرة تنسرق ثاني وثالث مثل ما سمعت خصوصا ان سيارتي موديل 97 بس قير اوتوماتيك؟
3- وهذا مرتبط باللي قبله هل فيه نوع معين من الكوالين خاص بالهوندا او غيره يصعب على السارق فتح الباب او تشغيل السيارة او اركب جهاز انذار؟
4- تنصحوني اغير سيارتي ام لا مع العلم اني لو غيرت سيارتي راح اخذ سيارة بالاقساط وظروفي حاليا اخطو هالخطوة الا اذا كنت مجبر.
5- سويت صيانة للسيارة قبل اسبوع واحس برجة في السيارة بعد 100 هل تتوقعون ترصيص ام اذرعة مع اني غيرت الذراعين قبل اسبوع .؟
ارجو اني ما اكون كلفت عليكم
واشكركم على المرور والرد مقدما
والله يرعاكم

وعليكم السلام ورحمة الله وبركاته

حيالك اخوي

حلوة انسرقت سيارتي اول مرة يعني توك مبتدئ
انا انسرقت ثلاث مرة يعني انا نشيط ههههه امزح :d :d الله لا يقولها


والله يعوض عليك بالمسجل وبالاغراض اللي انسرقت والاضرار اللي صارت للسيارة

واحمد ربك يا رجال انها جت على كذا ورجت السيارة

اعرف ناس قعدوا شهور وسياراتهم مارجعت لهم

وعشان موضوع انك تراجع الشرطة اتوقع لو في بلاغ على السيارة لازم تراجعهم على شان تشيله
اما اذا البلاغ انشال وهم اللي سلموها لك ولا لاخوك عادي ما يحتاج

واذا خايف تنسرف مرة ثانية لاااا ما اتوقع حلا كل يوم :d هي مرة والحمد لله انها جت على كذا وكون حريص
والله السرقات كثرت




وعشان موضوع الرجة واللي ماعندي خلفية بيني وبينك سيارتك قديمة شوي وفي اكثر من مكان احتمال يكون سبب الرجة
لازم توديها اخصائي


تحياتي لك

السلام عليكم ورحمة الله
أولاً الحمدلله على سلامتك وسلامة السيارة ، وسأجيبك على ما أقدر عليه:
بالنسبة للشرطة ما أعتقد لازم تراجعهم ، لأنك أساساً ما بلّغت وبالتالي لست بحاجة لعمل ( كف طلب ) - من باب خبرة سابقة.
بالنسبة للسرقة ، فأي سيارة معرضة للسرقة بغض النظر عن موديلها ونوعها.
غالباً سيارتك تفحط فيها لما شبعت وبالتالي من الطبيعي أن تكون قد تأثرت بالكامل بما أن التفحيط يحمل السيارة فوق طاقتها بكثير، والأفضل تعرضها على ورشة متخصصة بهوندا ، وإذا إنك بالرياض أنصحك بورشات هوندا في صناعية أم الحمام.
رأيي الشخصي إنه من المستحيل أن تعود السيارة إلى حالتها قبل السرقة - وعذراً على الإحباط - ولو على المستوى النفسي لصاحب السيارة.
تجربتي : كان عندي من 5 سنوات ماكسيما 97 نظيفة جداً جداً ومركب عليها جهاز انذار وزر فصل المكينة - تحت الجلنط- وانسرقت واتفحط فيها بالسلي ولقتها الشرطة بعد أسبوع ونفس الشيء مكسرين الطبلون والمسجل وسارقين كل شيء منها ، وكنت مأمنها شامل عالتعاونية ، ودفعت نصف قيمة الاصلاح 7500 ريال ، ومع ذلك لم تعد كما كانت.
نصيحتي : إذا تقدر تبيعها أو تبدلها من المعارض بموديل أجدد - إذا إنك مرتاح للهوندا -مع دفع فرق بسيط ، ربما يكون أحسنلك من الأقساط.
عذراً على الإطالة

من موديلات 2000 وفوق الهوندا حاطة نظام المفتاح الممغنط ومانع السرقة ولو تجرب تنسخ المفتاح بدون ما تبرمجه وتفتح السويتش ما تشتغل معك السيارة وحتى لو فكيت الاسلاك تحت الدركسون ما تشتغل معك السيارة


الموديلات القديمة الله يعينكم فيها لكن اكيد تم التفحيط فيها واهم شي انك بلغت وهذا يكفي

يا مال العافية على التفاعل والاجابات الطيبة مثل طيبتكم.
اخوي الكريم ابو جواد
الله يعوضك خير يا بعدي
ويجعلني دوم مبتدئ بهالشغلات بيني وبينك لعبهم خشن :)
الله يبعد عننا وعن الجميع شر عيال الحرام
اشكرك على تواصلك الطيب
لا عدمناك

الفاضل ala77
حاليا افكر اخليها معي 6 اشهر لما اجمع مبلغ طيب وبعدين اشتري بدالها سيارة ثانية موديلها جديد
واوافقك الرأي مهما كان مستحيل ترجع لسابقتها
اشكرك على تفاعلك ورأيك السديد وراح اعمل بها في اقرب وقت بإذن الله
بارك الله فيك

صدقت اخوي بلال
وافضل حل هو الصبر حتى نشتري سيارة اخرى كما قال اخونا ala
اشكر لك مرورك وتعليقك
لا عدمناك

انا انصحك وانا اخوكـ انكـ تسويلها فــآصل كهرباء
وتحطه في مكان بعيد عن الانظار .. يعني في مكان سهل لك وصعب على غيرك
وهذي افضل طريقه اشوفها

لا هنت اخوي الغالي المايسترو 77
فكرة الفاصل حلوة جدا
شكرا على مرورك
لا عدمناك