كيف تتصرف اذا انصلخ عليك الكفر

[ame]http://www.youtube.com/watch?v=DCKriK6-vWo&feature=related[/ame]

1- أهم شي تصرف السائق بعد ضربة الكفر (مهم انه يكون ماسك الطارة باليدين بأقوى ماعنده + مايلمس الفرامل + مايشل رجله عن البنزين فجأة)

2- حالة ووسع الطريق (يعني هل الطريق مبلول أو ناعم أكثر من اللازم...وهل الطريق عرضه يكفي للتحكم في السيارة عند فقد السيطرة...لأن اذا دخل على التراب صعب يتحكم)

3- مقاس الجنط يفرق كثير (يعني السيارات اللي يكون جنطها صغير وكفراتها عالية مثل الجيوب والسيارات العادية تكون الخطورة كبيرة لأن السيارة يختل توازنها وتنزل من جهه الكفر اللي ضرب مسافة كبيرة...ولكن السيارات الرياضية تكون جنوطها أكبر وأعرض وارتفاع الكفر أقل يعني لما يضرب الكفر تنزل السيارة شوي وما يتأثر توازنها بشكل كبير)

4- هل الكفر ضرب وبقى في مكانه أو انه انسلخ وطار عن الجنط. (لأن الكفر لما يبقى في مكانه ممكن يعطي شوي تحكم للسيارة...ولكن اذا انسلخ وطار فالجنط راح يكون قاعد يتزلج على الإسفلت بدون تحكم)

5- سرعة السيارة تعتبر من أهم العوامل (إلى 120 ممكن تسيطر على السيارة بسهولة , إلى 160 ممكن تفقد السيطرة شوي واذا حالفك الحظ ترجع تمسكها, أكثر من 180 يكون مصيرك على الله)

6- في القومات غالباً السرعة توصل 220 أو 240 مثلاً...ولكن لثواني قليلة...ماتسبب حرارة عالية للكفر بحيث انه ينسلخ...ولكن برضو الخطر موجود لأن فيه شباب الله يهديهم آخر همه الكفرات...!!
وغالباً ان المتسابق يكون في كامل تركيزة والأدرينالين عنده واصل مليون...يعني ممكن يتذكر انه مايدعس فرامل وانه يمسك الطاره صح.

الوضع يختلف للي يمسك خط ويمشي على سرعة عالية لفترة طويلة...لأن الكفر يسخن ويصير عليه اجهاد كبير...وهنا يزيد خطر انسلاخ الكفر أو انفجارة بسبب الحرارة...
ولكن النقطه الأهم انه السائق مع الوقت يبدأ يسترخي ويفقد التركيز...
وممكن تلقاه ماشي 220 وقاعد يسولف بالجوال أو يغني أو يمزح مع اللي جنبه...
هنا لو ضرب الكفر راح تلقى الشخص هذا يحتاج وقت لغاية مايستوعب انه ضرب عليه الكفر...ولما يستوعب يكون فات الأوان لأنه أكيد حط رجله على الفرامل وبدت الدنيا تلف فيه...!!
إلا اللي ربنا يستر عليه...

وأخيرا ابعدو عن السرعه أفضل...
يعني 140 لاتتعداها في أي مكان...

والكفرات ترى مهمة ياشباب...
يعني لاتبخل بـ 3000 ريال كل سنة ونصف أو سنتين مقابل حياتك...
أو (اذا كنت محظوظ) مقابل سيارتك اللي قيمتها أكثر من 50 أو 80 أو 100 ألف ريال...!!

لو حسبتها بتطلع أقل من 180 ريال في الشهر....!!!

تحياتل لكم,

منقول للفايدة الله يكفينا وياكم شر الحوادث قول آمــيــن

الف شكر لك على طرح مثل هالموضوع

ولكن منذ أن تعلمنا القيادة كانت القواعد الهامة عند حدوث بنشر

1 - مباشرة ترفع رجلك عن داواسة البنزين

2 - ممنوع لمس الفرامل خاصة إذا كانت السيارة دفع أمامي وعلى

سرعات عالية والكفر المتعطل أمامي

3 - حاول أن تملك السيارة بضبط المقود بكامل قوتك

تقريبآ هذي أهم القواعد إن أخطأ صححوا لي

كلامك صحيح وما فيه أي غلط

اقتباس:

---

المشاركة الأصلية كتبت بواسطة mak123

كلامك صحيح وما فيه أي غلط

---

يوم كتبت الرد ماكان فيه كلام مجرد مقطع فيديو فقط و كتبت تعليقي وبعد مارجعت تغير الموضوع هل

سويت تعديل أو المشكلة عندي إستغربت :confused:

ومشكووووووور مره أخرى

الله يجزاك خير على هالمعلومات وانشالله الكل يستفيد

والله يكفينا شر البنشر

العفو .....نسيت ما حطيت الكلام وبعدين تذكرت وحطية

كل الكلام صحيح ومانختلف عليـه

بس وقت مايبنشـر الكفـر

وتجيك ام الركـب :cool:

وتتصافق ركبـك من الخوف

وماتشوف إلا شعار هوندا على الدركسون ما تدري وين بدايته من نهايتـه

بقول لكم سالفـه يا اخوان على الفجريـه ..


وانا اقولهـا والله مو من باب المبالغـه
هذا إلي صار قبل سنتيـن

وإلى يومك ما ادري كيف نجينـا انا و ولد عمـي واكيد إن ربي حفظنـا وبدعاوي ام ولد عمـي كانت هي السبب وربي استجاب دعوتهـا

ماشين بعد الرياض بـ 300 كيلوا متر متجهين للطائـف

الوقـت
الساعـه 3:15 صباحـا

وقت صلاة الليـل ...

ولد عمـي يسولف وانا عيني على المرايـه وراي افالون يبي يطردني ومن حركات المسافرين وتغير الجو

السرعـه

180

بدا راعي الأفالون يكبس لي ودعست شوي ليـن وصلت 185 وابتعد عنه وصرت بالنص

عشان يمر بس باقي على دعستـي ابيـه يشد معـي :mad:

ولد عمي مو ملاحظ السالفـه

فجأه ضرب الكفـر إلي ورا من جهة ولد عمـي

إلي حسيت فيـه إن الدركسون صار مو دركسـون :cool:

صار زي الريشـه او اخـف انا مسكـت على الطاره بكل قوتـي
وبدات الأكورد ترج وتبي تحذف

طبعن وخرت رجلي عن البنزين وراعي الأفالون تجاوزنـي وانا اشوفـه

وانا في نفس اللحظـه تجاوزت تريلـه يمكن فيهـا 60 كفره من طولهـا

ولد عمـي يتشهـد :)
انـا اطالع في السرعـه متى بتنزل وصلت يمكن 120

وحسيت بعدهـا إن السياره ماراح تحذف
ولا ربط بريك إلا بعد 40 يمكن او اقـل

اول ماوقفنـا طالعت في ولد عمي

قلت له ارتحت الحيـن :d

قايل لك الكفرات تعبانـه بس إلا تقول نساافـر :mad:

قال يارجال الحمدلله على السلامـه بس

وسبحان الله دقت ام الولد

وتقول وينكم قال ولدهـا بالبـر

فيصل حشران و وقفنا في الخط :mad:

ما يعرف يصرف ولد عمي :mad:

قالت قاعده اصلي الليـل ودعيت إن الله يحفظكم وقل لفيصـل لا يسـرع


المهم ركبنـا الكفـر الإستبنـه وبعدهـا ما عاد اسرعـت


مسوي إني متأثر وساعتيـن و ارجع للعادة الشنيعـه :d

الزبده إن كل شي بحفظ ربي مافي شي اسمه طاره

إنت تسوي إلي عليك والباقي على اللـه

صح إن السرعـه هي سبب بالحوادث ..

بس وش نقول الله يهدينـا بس ويهدي الجميـع

طيب لو مثلآ لاسمح الله ضرب علي الكفر الأمامي ومعروف ان الجلنط يمسك الكفرات الخلفية فقط

لو سحبته على خفيف لين تهدي السياره هل فيه مشكله ولا ممكن أروح في خبر كان :confused: