تنظيف نظام الحقن (البخاخات) من الترسبات والمحرك من الكربون
بسم الله الرحمن الرحيم
اخواني السلام عليكم
تحية طيبة لكم جميعاً
الكل منكم يعرف نظام حقن الوقود او ما يسمى بالبخاخات، راح اشرحه بالختصار
كل سيارها فيها بخاخات عددها بعدد السلندرات وهي اللي تحقن او تبخ الوقود إلى غرفة الاحتراق، مع الوقت تتسدد مجاري نظام الحقن بسبب الترسبات في خزان الوقود، الحل جدا بسيط، بدال ما تروحون للورشه ويقول لكم تنظيف بخاخات وتاخذ وقت وتكلفك مبلغ وقدره، فيه منتجات متعدده خاصه لتنظيف نظام الحقن وهي سوائل توضع في خزان الوقود، بس المنتج اللي بقول لكم عنه اليوم هو منتج جدا رائع وفوق الرائع جربته على سيارة الوالد مرسيدس 8 سلندر كانت متسدده مجاري البخاخات ومكربنه لدرجه اذا دست على البنزين وهي واقفه وربي ما عاد اشوف اللي وراي، اشتريت المنتج هذا وكان فيها بنزين اقل من النص، صبيت فيها العلبه ومشيت فيها خط مسافة تقريبا 50 كيلو رايح و50 جاي في الروحه علبه وفي الرجعه علبه (لانه كانت جدا مكربنه) لكن اللي مثل حالاتكم تكفي علبه وحده للروحه والرجعه. المنتج هذا يتميز عن باقي المنتجات مو بس ينظف مجاري البخاخات وبس، زياده على كذا ينظف المكينه من الكربون وينظف البلوف (الصمامات) والبساتم (الاسطوانات) من الكربون، جداً آمن علي محركات السيارات ومن شركة لها باع طويل في المنتجات هذي.
المنتج ما شفته الا عند محلات الوهيبي في ش/ العروبه
هذي صورة المنتج
[IMG]http://www5.0zz0.com/2010/12/02/01/922721592.jpg[/IMG]
في الختام اتمنى يعجبكم الموضوع ودعواتكم لي يا اخوان
خالص الود وصادق الدعوات للجميع
