بعض المشاكل اللي أحب أتأكد منها

السلام عليكم ..
عيدكم مبارك يا شباب ..

المهم أدخل في الموضوع على طول .. عندي بعض الأسئلة عن سيارتي (أكورد 6 سلندر 2007 ماشية 10000 كيلو تقريباً) ما أدري إذا هي مشاكل او أشياء طبيعية ..

1- أحياناً لين أصك السيارة أسمع صوت طقة في القير .. أحياناً مو كل مرة ..

2- أحياناً لين أنزل على المطب أسمع صوت من ورة كذا (تك تك) .. ما ادري من شنو .. نفس الشي أحياناً مو كل مرة ..

3- لين أمشي بسرعة عالية و أضرب على البريك (فرامل) يطلع صوت من تحت بسرعة و تهتز السيارة .. >>> أعتقد السبب على حسب ما أقرة في المنتدى من الديسكات (الهوبات) .. بس شنو الحل .. يعني تبديل أو تتصلح .. و سمعت ان خرط الهوبات مو زين .. يعني هل تبديلها يكون احسن ؟؟

4- و المشكلة العودة و الأكبر .. ماء الراديتر صار يقصر .. أول من أسبوع تقريباً أو أكثر بشوي كان تحت خط max بقليل .. الحين أشوفه فوق خط الـlow بقليل .. هل معقولة ان الماء يتبخر ؟؟؟ و إن كانت هناك مشكلة .. فشنو الحل .. لأني بصراحة ما اعرف واحد صادته مشكلة الحرارة و تخلص منها .. و أنا بروحي متعقد منها -- كانت عندي كريسيدا موديل 96 قبل الاكورد .. قلت أخيراً افتكينا ما يحتاج نشووف مستوى الماء كل أسبوع .. لكن شكلها وراي وراي :confused: .. و هل تعرفون احد صادته هالمشكلة من قبل ..

5- خاص لأصحاب الـستة سلندر .. عمي يقول ان صديقه عنده موديل 2007 صادته مشكلة في القير .. وقال لي حاسب من القير .. بس إذا صادك أي شي روح للوكالة و انشب لهم (لأنه هو اللي نصحني بالأكورد و حطها براسي:d).. و صديقي بعد قال لي من قبل إن أصحاب المقاومات ما ياخذون أكورد 6 سلندر بكثرة لأنها فيها مشاكل في القير يعني من 1 إلى 2 إلى D3 يطب القير (طبعاً إذا تبدل بدون ما تهد دعسة البنزين) .. بس قال لي انت تحطها في D و خلاص يعني عادي ان شاء الله ما في مشاكل ..
فأنا أبي أتأكد إذا كانت هذي أخطاء فردية أو فعلاً فيها مشاكل ..:confused:


و عندي بعد يومين موعدي في الوكالة .. بس أبي أتأكد انهم ما يصرفوني ..

و سامحوني على الإطالة لأني بصراحة بيتنا كل عندهم تويوتا 4 سيارات تويوتا من قبل و آنه كسرت القاعدة و خذيت هوندا .. و والوالد كان يقول لي اخذ كامري .. و لكني كنت مصر على الأكورد .. فحق كذا آنه قمت وايد أقلق على السيارة :(.. ساعدوني يا شباب خصوصاً في مشكلة 4 و 5 ..

و جزاكم الله خير

اقتباس:

---

4- و المشكلة العودة و الأكبر .. ماء الراديتر صار يقصر .. أول من أسبوع تقريباً أو أكثر بشوي كان تحت خط max بقليل .. الحين أشوفه فوق خط الـlow بقليل .. هل معقولة ان الماء يتبخر ؟؟؟ و إن كانت هناك مشكلة .. فشنو الحل .. لأني بصراحة ما اعرف واحد صادته مشكلة الحرارة و تخلص منها .. و أنا بروحي متعقد منها -- كانت عندي كريسيدا موديل 96 قبل الاكورد .. قلت أخيراً افتكينا ما يحتاج نشووف مستوى الماء كل أسبوع .. لكن شكلها وراي وراي :confused: .. و هل تعرفون احد صادته هالمشكلة من قبل ..

---

فيه أسبـاب كثيرة والحلول تختلف أكيد أنت تأكد من السبب من وراء النقص
وابسألك عن نوع الماء ؟
وكم النقص يكون يومي أو اسبوعي ؟
هل فيه رائحة للرديتر ؟
وكيف حرارة السيارة هل هي مرتفعة ؟

مشكور أخوي على المشاركة ..

1- نوع الماء هذا هو نفسه من أول ما أخذت السيارة من (5 شهور تقريباً) ما أضفت عليه شي ..

2- تقريباً أسبوعي .. لكن في الفترة الأخيرة حسيته زاد..

3- ما فيه رائحة .. بس متى أشم الرائحة .. يعني و السيارة مشغلة أو توني صاكها أو في أي وقت؟؟؟..

4- الحرارة الحمدلله ما ارتفعت .. لكن إذا استمريت أمشي فيها بيقل الماء و بترتفع ..

وعليكم السلام ورحمة الله وبركاته
وكل عام وانت بخير

اقتباس:

---

المشاركة الأصلية كتبت بواسطة هوندا اكورد 2007

1- أحياناً لين أصك السيارة أسمع صوت طقة في القير .. أحياناً مو كل مرة ..

---

طبيعي .. لا تشيل هم !!

اقتباس:

---

3- لين أمشي بسرعة عالية و أضرب على البريك (فرامل) يطلع صوت من تحت بسرعة و تهتز السيارة .. >>> أعتقد السبب على حسب ما أقرة في المنتدى من الديسكات (الهوبات) .. بس شنو الحل .. يعني تبديل أو تتصلح .. و سمعت ان خرط الهوبات مو زين .. يعني هل تبديلها يكون احسن ؟؟

---

اعتقد المشكلة هذي ماهي من الهوبات اتوقع انها عيب الفحمات الاصلية لاني قد خرطت الهوبات ثلاث مرات وغيرتها ورجعت خرطتها مرة رابعة واللحين احس الرجة بدت ترجع

شكلي بأجرب الفحمات اليابانية واشوف وش نهايتها مع ذا الفرامل

اقتباس:

---

4- و المشكلة العودة و الأكبر .. ماء الراديتر صار يقصر .. أول من أسبوع تقريباً أو أكثر بشوي كان تحت خط max بقليل .. الحين أشوفه فوق خط الـlow بقليل .. هل معقولة ان الماء يتبخر ؟؟؟ و إن كانت هناك مشكلة .. فشنو الحل .. لأني بصراحة ما اعرف واحد صادته مشكلة الحرارة و تخلص منها .. و أنا بروحي متعقد منها -- كانت عندي كريسيدا موديل 96 قبل الاكورد .. قلت أخيراً افتكينا ما يحتاج نشووف مستوى الماء كل أسبوع .. لكن شكلها وراي وراي :confused: .. و هل تعرفون احد صادته هالمشكلة من قبل ..

---

في اجازة الصيف الماضية صارت لي المشكلة هذي وكان السبب من غطاء قربة موية الردايتر . كانت المويه تطلع معها وترتفع علي الحرارة لكن بعد ما غيرت الغطاء الحمدلله كل شي تمام

اقتباس:

---

5- خاص لأصحاب الـستة سلندر .. عمي يقول ان صديقه عنده موديل 2007 صادته مشكلة في القير .. وقال لي حاسب من القير .. بس إذا صادك أي شي روح للوكالة و انشب لهم (لأنه هو اللي نصحني بالأكورد و حطها براسي:d).. و صديقي بعد قال لي من قبل إن أصحاب المقاومات ما ياخذون أكورد 6 سلندر بكثرة لأنها فيها مشاكل في القير يعني من 1 إلى 2 إلى D3 يطب القير (طبعاً إذا تبدل بدون ما تهد دعسة البنزين) .. بس قال لي انت تحطها في D و خلاص يعني عادي ان شاء الله ما في مشاكل ..


فأنا أبي أتأكد إذا كانت هذي أخطاء فردية أو فعلاً فيها مشاكل ..:confused:

---

معي اكورد V6 موديل 2004 ولها معي اربع سنين ومشيت عليها حول 200 الف

الحمدلله ما فيه اي شي من الكلام اللي تقول عليه والقير حقها من افضل ما يكون . مع اني اتقاوم بها اذا احد تحرش . يعني تطمن بس لا تكثر في المقاوم لان سيارتك ماهي قير عادي

:rolleyes:

أخـوي هـوندا أكورد 2007 ..
إذا مافيه رائحة للرديتر وغالباً تحس فيها إذا نزلت من السيارة وهي لها فترة تشتغل
أو وصلت المكان وطفيت السيارة راح تلاحظها وهذا يـدل إن فيه تنسيم ويمكن تحتاج
لشغلات ثانية وحلها في التسييخ وتغيير الطبلة ..

لكن أتوقع إن الحـل عندك أخوي B Unique وهو إنـك تـغير غـطاء الرديتر المعدني وتنحل المشكلة
لكن دّور لك غطاء أصلي من الوكـالة أو التشليح

اخواني JUST 4 U &B Unique

مشكورين و ما قصرتوا و آنه ان شاء الله سيارتي بكرة الصبح في الوكالة صيانة 10آلاف و مرة وحدة باقول لهم عن مشكلة الراديتر ..

و حزاكم الله خير :rolleyes: