عندي كم استفسار بخصوص حادث حصل لي بالرياض .!

بسم الله الرحمن الرحيم

الحمدلله على قضائه وقدره وكم يعلم الشخص فينا أنه بخير إذا أراد الله له حادث بسيط وأراد لغيره حوادث تذهب فيها أرواح .
طبعا لست من أهل الرياض ولكن لوجود أشغال ومناسبات ذهبت للرياض ..!

الحادث تداركت بفضل الله أقل الأضرار وإلا بغيت أنا وسيارتي نروح في خبر كان ــ طبعا بفضل الله وإرادته ــ !

الحادث حصل على طريق الوشم بالكوبري المؤدي لطريق الجامعة , لحقني مصري معاه كرسيدا يقول إن الفرامل تعطلت معاه طبعا أنا شفته بالمرايا وعرفت إنه موطبيعي وحطيت رجلي وأخذت يمين وجاب لي الصدام مع الجنب والاصطب والرفرف الخلفي وكمل طريقه وصقع اثنين قدامي وكانت صقعاتهم أقوى مني !!

الخطأ طبعا كان عليه 100% والمصري الآن بتوقيف المرور .

الآن مواعديني بمرور الناصرية يوم السبت عشان تقدير الأضرار وراح أقدرها من الوكالة وراح يدفعها أبو مصير !!

هل الإجراءات راح تطول بمرور الناصرية ؟
وين مكان الشركة القريب من مرور الناصرية ؟
كم سعر الصدام الخلفي والاصطب ؟

نصائح أخرى بحكم إننا نجهل الرياض عشان نخلص ونمشي بسرعة ؟

رجائي من أهل الرياض إنهم يفيدوني بالموضوع .
رجاااااااااء خاص جدا .

الحمد لله على السلامة و جعلها خيرة ان شاء الله و في الحديد ولا فيك

كم موديل سيارتك؟؟

الله يسلمك ياخوي وماتشوف شر إن شاء الله
السيارة أكورد فل كامل 4 سلندر موديل 2011 م

بالنسبة للأسعار :

صدام خلفي 720 ريال تقريبا
اصطب خلفي 350 ريال تقريبا

أما البقية يفيدونك بها أهل الرياض

و الله يعوضك خير ,,

الحمدلله على سلامتك

الوكاله موقعها في خريص مخرج 13 (شرق)

وبالنسبه للاجراءات انا بروح بكره واعلمك وش المطلوب

مشكلة الوكاله لا تتوقع الاصلاح خلال اسبوع اقل ما بتاخذ اسبوعين

والله يكفي الجميع شر الحوادث

اذا كان المصري مسوي تأمين ماراح تاخذ فلوسك الا بعد شهر من شركة التأمين وشيك بعد

الحمد لله على سلامتك يالغالي

المصري الآن بالتوقيف يعني ما معاه تأمين شوف بعطيك الخطوات العملية الي راح تسويها

سعر الصدام الخلفي ( من دون رش ) 1200- 1300 مع الخصم هذا لـ 2012 طبعا بدون حساسات خلفية لو مع الحساسات سعره غالي مره ( انا تنازلت عن سعر الحساسات لانها تشتغل لكن انت اذا الحساسات خربت لا تتنازل عنها )

لان في واحد صدمني قبل فترة رحت قدرت الصدام الخلفي + حساسات ( لكن الزول حق قطع غيار هوندا ما حصل لي حساسات 2012 قام حطلي حساسات اكورد 2011 وتحت ووصل سعر الصدام بدون رش مع الحساسات بدون تركيب بـ 6000 ريال تقريبا

رش الصدام الخلفي عند صناعية العروبة بـ 1200 - 1300 ريال تقريبا

انا مقهور من المرور انه يرسل المصدوم للورش ليه ما يرسله للوكالة ؟؟؟ ما لقيت رد منهم ويقولوا احمد ربك اذا دفع الي صدمك



الأجراءات هي تروح للمرور الي باشر الحادث حقك ( مرور الناصرية حسب كلامك )

بعدين تروح الاستقبال حق المرور وتسأله على حادثك ورقم لوحتك ولوح الي صادمكم وتاريخ اللوح وراح يعطيك رقم الحادث بتاريخ الحادث هذا سجله عندك بورقة واحفظه

بعدين اذا الاستقبال ما حصل رقم الحادث راح يرسلك العسكري للكمبيوتر الرئيسي الي في المرور عشان تطلع منه رقم الحادث + تاريخ الحادث + رقم المكتب الي في المرور عشان تراجعهم

اذا علومك الرقم والتاريخ ورقم المكتب رح للمكتب وبتحصل عسكري هناك بيسجل اسمك وتصف سرا ( اذا نادى عليك برقم حادثك تجيبه وتقول له رقم حادثي كذا بتاريخ كذا يوم كذا وتعطيه اسمك وبطاقة الاحوال + الاستمارة والرخصة للمعاينة وانت اسئل عن المصري في التوقيف هل لازال موجود وهل معاه تأمين ولا لا اذا ما معاه تأمين راح يوقف لين يطلعه كفيل وتصير علاقتك انت بكفيل المصري هو خصمك الآن

المرور لما ينادي عليك ويتأكد من بيناتك راح يطلع ورقة ويكتب فيها نوع السيارة وموديلها ورقم الحادث وتاريخه

لما العكسري يبعبي البيانات انت علمه الاضرار الي في السيارة كلها من صدام ، اصطب ـ رفارف علمه كل شيء مررره

بعدين بيقول لك رح لصناعية كذا او شيخ معارض انت قله بروح صناعية العروبة اقرب لي وكذا

( شيخ المعارض راح يخسف بسعر السيارة خسف مو طبيعي )

انت خذ ورقة الاصلاح بعدين روح لصناعية العروبة ( صناعية العروبة بطريق العروبة جنب صناعية ام الحمام ) صناعية العروبة فيها مكتب تقديرات هناك

اول ما تدخل الصناعية اسئل اي واحد وين مكتب التقديرات هو تحصله جنب المسجد تقريبا

اول ما تدخل راح تشوف فنيين يمنى وسوادنه عطهم 30 ريال حق 3 تقديرات وخلهم يكتبون في الورقة الي معاهم كل شيء معطوب من صدام خلفي واصطب ورفارف وانتبه وشد عليهم ( ترا بعضهم ينقص اشياء من مزاجه مثلا يقول هذي ما تحتاج سمكره وبس قل لا ابي جديد وخلك نشبه + انهم بيكتوب في الطرف الثاني من الورقة قيمة الرش وتركيب القطع

لما يعطونك الاوراق الثلاث اطلع على شارع العروبة تحصل اخر محل على شارع العروبة قبل الاشارة محل قطع غيار هوندا عبدالله هاشم تحصل سوداني او سعودي

المهم قل له ابي اسعر القطع هذي عندي حادث وسياراتي 2011 وخلهم يعطيك كل القطع ويختم على الورقة الي بيطبعها لك الزول

اذا اخذت الـ 3 اوراق حقت التقدير + الورقة الي فيها اسعار القطع ادخل على المكتب حق المرور الي في الصناعية العروبة وعطهم الاوراق الـ 3 حقت التقديرات + اسعار قطع الغيار + الورقة الي عطاك المرور

راح يعطيك مكتب التقديرات ورقة جديدة يكتب فيها كل القطع ويدبسها مع الـ 3 الاوراق الصغيرة حقت التقدير + ورقة اسعار القطع وتروح للمرور لنفس العكسري الي في مرور الناصرية

وتقول له حادثي برقم كذا وبتاريخ كذا وهذاني سعرت القطع والتصليح العكسري بيقعد يحسب لك كامل القيمة

سعر القطع + سعر الاصلاح مثلا = 8500 ريال انت قل للعكسري يتصلون على المصري عشان يجي يسدد المبلغ الي عليه او على كفيله ويحددون موعد انت وياه تجون تتقابلون عند المرور يعطيك فلوسك + توقع له على ورقة التنازل وتعبي بيناتك عند ( العكسري حق المرور هو ياخذ نسخه والمرور نسخه )

وكذا انتهت السالفة اذا لك علاقات بالمرور كلمهم قل ابي اصلاح وكالة وقطع وكاله اذا ما عندك سو الطريقة الي قلت لك عليها فوووق ( لا تروح لشيخ معارض ولا زفت نصيحه مني )

ملحوظة هامة جدا


سيارتك اذا فيها حساسات خلفية وخربت ( قل لحقين التقدير يكتبون حساسات خلفية + ربلة صدام خلفي وشد عليهم تراهم وصخييين ما يكتبونها ويبلشونك


قل لهم يكتبون بالضبط ( 4 حساسات خلفية مو يكتبون حساس خلفي او حساسات خلفية قل لهم لا اكتبوا 4 حساسات خلفية + ربلة صدام خلفي وخلك على روسهم وهم يكتبون ولروح لشركة هوندا في خريص نفسها وانت معاك الـ 3 الاوراق حقت التقدير ( قل لهم ابي تقدير لكل هالقطع من قطع الغيار عندهم بفرع خريص مخرج 13) لان فرع قطع غيار هوندا عند الصناعية يوم جيته انا ما لقى حساسات حقت 2012 واتوقع انه ما يلقىها لانه زول وعجاز قعد نص ساعه ولا لقاها



لا تتنازل عن ولا ريال ولا انا اخوك كافي حقك مهدور ومصدوم رايح وجاي بالشموس و 30 ريال حقت التقدير وروحه ورجعه للورش مره ثانية

لا تتنازل عن ولا رياااااااااااااااال تكفى تكفى لا تتنازل عن ولا رياااااااااااااااااااااااااال لا يقعد يستعطفك المصري او كفيله انتبه منهم


اي سؤال انا حاضررررررررررررررررررررررررررررررررررررررررررر


لا تتنازل عن ولا ريال ( كافي التعب والروحه والمشي في الشمس والبنزين والروحه والجيه )

تأكد اذا السيارة ما تضررات الكفرات او الجنوط او الهوبات او العكوس تأكد وافحصهم زين ترا زي هذي ما تدري عنها الا بعد الحادث بفترة تأكد منها

اذا سيارتك شلتها بسطحه حط فاتورة السطحة مع الاوراق الـ 3 السابقة عشان يدفعها لك

أشكر جميع من رد وبيض الله وجيهكم ..

أخي هوندانا أشكرك على التوضيح ولاعدمناك وبالنسبة للموديل 2011 م مايكون التسعيرة من الوكالة بحكم إنه جديد ؟
والله يالتنازل ماني متنازل لو يصير اللي يصير ولو ما آخذ حقي إلا بعد سنة ... فلا تشيل هم من الناحية ذي
الحساسات والله ما انتبهت لها إلا يوم ذكرتني فيها الله يذكرك الشهادة ويرزقك الجنة ..

شكرا من الأعماق للجميع ..!

اقتباس:

---

المشاركة الأصلية كتبت بواسطة أنيس

أشكر جميع من رد وبيض الله وجيهكم ..

أخي هوندانا أشكرك على التوضيح ولاعدمناك وبالنسبة للموديل 2011 م مايكون التسعيرة من الوكالة بحكم إنه جديد ؟
والله يالتنازل ماني متنازل لو يصير اللي يصير ولو ما آخذ حقي إلا بعد سنة ... فلا تشيل هم من الناحية ذي
الحساسات والله ما انتبهت لها إلا يوم ذكرتني فيها الله يذكرك الشهادة ويرزقك الجنة ..

شكرا من الأعماق للجميع ..!

---

قطع الغيار مثل الصدام والرفارف وكل الاجزاء المتضررة تكون تسيعيرة من الوكالة والقطع من الوكالة + شغل اليد ( يسوونه حقين الورش الي في الصناعيات ) لكن لو انت عندك علاقات يخلي موترك كل شغله وكالة

الحساسات افحصها كويس تأكد منها وجربها واذا متضررة حطها مع تسعيرة الصدام الخلفي ( الصدام الخلفي يسمونه ربلة صدام خلفي )

اذا الحساسات متأثرة خل حقين التقدير يكتبون

4 حساسات خلفية

انتبه يكتوب حساس خلفي او حساسات خلفية بس خلهم يكتبون ( 4 )

انت حاول تقول ( للعسكري حق المرور الي في المكتب) اني ابي قطع وشغل يدك وكالة لان السيارة جديدة مره وحرام يلعبون فيها هالورش

__________________________________

في حالة ان سيارتك عليها تأمين شامل ( شامل واصلاح وكالة )


اذا انت عندك تأمين شامل شف كم سعر التحمل

( سعر التحمل هو المبلغ المتفق عليه اثناء التأمين الشامل في حالة تعرض السيارة لاي حادث انها تتصلح في مهما كانت الضربة في الورش او الوكالة ( الوكالة لابد تكون انت ضايفها في بنود عقد التامين من قبل )

واذا عندك شرط في التحمل مثلا اصلاح وكالة

خل المصري يعطيك حق التحمل + اجور السطحة وبنزين فل ( لانها مشورة رايح جاي ) ولا خل المصري يدفع قيمة الصدام والحساسات والرفارف والاصطبات جديدة مع الرش :d اذا قعد يتنعفق عليك

الامانة امانة

تأكد ان الاذرعة ما جاها شيء وجرب السيارة شوي فيها حذفة ولا اصوات تأكد تكفى

اذا ما فهمت امانة امانة تقولي لاني صرت خبرة في المرور والتأمين


اهم شيء لا تتنازل حتى لو جاء كفيله وقال تكفى وطالبك واناخك ....الخ قل له انا ما اعرفك وما تأكلني عيش موتري وانصدم وابي حقي ومابي شيء منك غير حقي + اني بتمرمط من ورشه للوكالة وتعب وبقعد كذا يوم بدون سيارة عرفت عشان تسكته صح


لا لا لا تتنازل ابدا

حقك خذه على داير مليم

أخوي هوندانا الله يسعدك ويجعل دربك خضر وين مارحت والله إنك ماقصرت أفدت وأجدت ..!
أبشرك خلصت كل شيء ولكن حولوني على شيخ المعارض التكلفة تجاوزت5000 ريال
الاصلاح بــ 2500 ريال تقريبا
قطع الغيار بــ 5172 ريال وسبب زيادتها الرفرف بس بــ 3300 ريال
عموما أثناء مراجعتنا للعسكري قابلنا ولد شباب يقول والله شيخ المعارض يعيطيكم فوق حقها بزيادة !! ما أدري يمكن يكون صادق ؟
العسكري أعطانا رقم المصري والشركة يقول كلموه لأنه طلع على كفالتهم ويقول علموه إن وافق بالمبلغ خلوه يراجعنا باكر وتسوون التنازل ..!
طبعا أفضل لا بالموضوع إن المصري طلع بكفالة والشركة مافيه حل أمامها إلا التعويض وإلا يتوقف نشاطها في حال إذا قدمنا شكوى عليهم حتى التسديد ...!
ايش رايك بالموضوع الآن ؟؟؟

شكري وتقديري ياخوي هوندانا على التوضيح والله يجعلها بموازين حسناتك ...