طلبتكم الشور يا أهل الخبرة...

السلام عليكم ورحمة الله وبركاته

بأختصر عليكم مشكلتي ..انا يالحبايب صار عندي تندية بسيطة في طرمبة الدركسون (الباور) ويوم رحت للوكالة قالي المشرف جرب الإصلاح يمكن يضبط لأنه باقي مبتدئ وطبعا نسبة نجاحه 50% وكمان قالي ان المهندس تبع هالشغلة مسافر ..رحت كم ورشة في الصناعية كلهم قالوا نسبة نجاح الإصلاح ضعيفة ومافي أحد بيعطيني ضمان مع العلم ان الدركسون باقي ماصار ثقيل ولا حتى الصوت طالع .. توهـ في البداية
صار لي قبل كذا وغيرت (اللي) بالوكالة قبل سنة تقريبا ..وكمان في شهر رمضان سويت إصلاح للمجموعة وضبط معايه الحمدلله ..اللحين انا أمام أمرين الأول أسوي إصلاح ممكن ينجح وممكن لا واذا مانجح أشتري من الوكالة قطعه جديده .. أو أمشي حالي فيها حتى تخرب ونجيب بدلها قطعه جديده والله المستعان قيمتها تشيل مصاريف شهر .. علماً بأن القطعه بالوكالة 2431 ريال ..والإصلاح مع شغل اليد بيكلف حول 450 او 500 ريال .. أحترت وطلبتكم الشور ..

تغير طقم الاصلاح بس وراح يمشي معاك انا مغيره قبل سنتين تقريبا وللحين ماشي معاي الحمد لله ونا طالع لي صوت وثقل بالطاره مو نفس وضعك

واحد من أخوياي نفس وضعي قبل سنة تقريبا راح مغير الإصلاح ضبط معه ووقف التهريب بس صار معه ثقل بالدركسون .. والله محتار
مشكور يالغالي على النصيحة
وأتمنى أشوف نصائح اهل الخبرة كمان..

توكل ع الله وسوي اصلاح

لان ما تضمن يمكن لو تشتري قطعه جديدة تجلس كم شهر وتهرب


اصلاح ع الاقل ما تخسر مثل يوم تشتري طرمبه جديده

القطعه الجديده معقوله تهرب بعد كم شهر ..!!
تبع الوكالة استمرت معي 6 سنوات والحين توها بدأت تندي ..
بس اذا في احد ركب جديد وخربت بعد كم شهر الشكوى لله ..ونجرب الإصلاح يمكن لنا نصيب من النجاح فيه ..
انا كنت باشتري جديد عشان ارتاح نفسيا واسافر على سيارتي بدون قلق .. بصراحه حيرتنا هالطرمبة مالها حل أبد لا جديد ولا تصليح

الأشياء اللي تخرب طرمبه أو دوده الدركسون :

1) استخدام زيت غير مناسب ( الهوندا لها زيت خاص بالدركسون موجود بالوكاله .. الزيت الأحمر الموجود عند البناشر يسبب مشاكل كبيره لأنه غير مناسب )

والورشات للاسف يستخدمونه لأن أرخص ( أنا شايف الورشات يستخدمون أردى زيت أبو 5 ريال سيء جدا ) + عشان تخرب عندك طرمبه الدركسون والدوده وترجع تصلح عندهم مره ثانيه بعد فتره

2) زياده الزيت عن الحد المناسب = تفقع صوف الدوده ,, نقص الزيت عن الحد المناسب = تآكل الطرمبه والدوده

3) لف الدركسون لللاخير الين يطق الدركسون وتستمر ماسكه لمده طويله وانت لافه لآخر شيء

كلامي من تجارب طويله , واعرف ناس معهم أكوردات ولا يشتكون أبد من زيت الدركسون
لأنهم ما عمرهم استخدمو الزيت الأحمر ,, ولا يزيدون الزيت عند الحد المناسب

انا أعرف واحد معه لاندكروزر زيت الدركسون يهرب ,, لازم كل فتره وفتره يزوده

وهذا ينطبق على كل السيارات


واللي يبي يصلح الطرمبه أو الدوده :

ياخذ إصلاح أصلي من الوكاله + زيت دركسون هوندا .. ويركبه عند ورشه ممتازه ويتأكد من الشغل بنفسه ويتأكد من لون الزيت

ولا تنسى تنظيف علبة زيت الدركسون .. من الزيت القديم الأحمر

وتنظيف علبة الزيت من الخارج عشان تشوف مستوى الزيت بسهوله .. ولا تزيده عن الحد المناسب


والمستوى الصحيح لزيت الدركسون .. والسياره بارده يكون الزيت بين الحد الأعلى والأدنى