حبٍ يشيّب صاحبه ما بَعَـدْ شـاب
وحبٍ يشيب وصاحبه فـي شبابـه
وحبٍ يغيب وصاحبه ما بَعَدْ غـاب
وحبٍ يدوم وصاحبـه فـي غيابـه
وحب يذوّب خافـقٍ مـا بعـد ذاب
وحبٍ يداوي صاحبه مـن عذابـه
وحبٍ يتوّب خافقٍ مـا بَعَـدْ تـاب
وحبٍ يزيدك رغبـةٍ فـي الكتابـه
وحبٍ حياته كلّهـا لـوم وِعْتـاب
وحبٍ حقيقي مـا يضـرّك عتابـه
وحبٍ بلا معنى وحبٍ بـلا اسبـاب
يبدا غريب وينتهـي فـي غرابـه
وحبٍ ضعيفٍ مثل حبرٍ على كْتـاب
تمحيه دمعـه فـي ثوانـي كآبـه
وحبٍ قويٍ مثل قصرٍ لـه ابـواب
لو هبّ عاتيْ الريح ما اهتز بابـه
وحبٍ بداية رحلته نظـرة اعجـاب
واخر مطافه مثـل يـومٍ بـدابـه
وحبٍ يعيش بداخل قْلوب الاحبـاب
وحبٍ يشيع وكـل حَـيٍ درابـه
وحبٍ مقامه في ضلوع الصَدِر طاب
وحبٍ يعدّي مثـل مـرّ السحابـه
وحبٍ على قبره نعق بوم وغْـراب
وحبٍ تغنّـى بـه لحـون الربابـه
وحبٍ بمقدارٍ وحـبٍ بـلا حْسـاب
وحـبٍ بمعـروفٍ وحـبٍ نهابـه
وحبٍ يعيش أهله وسط داره اغراب
ويموت قهر ويندفـن فـي ترابـه
وحبٍ غدا سرّه سوالف للاجنـاب
وحبٍ يموت وصاحبه ما حكى بـه
وحبٍ يشيب وصاحبه ما بَعَدْ شاب
وحبٍ يشيب صاحبه فـي شبابـه
ها وش رأيكم يجي :d
