افزعو لي يا جماعه .. والله تعبت بشكل فظييييع
احبابي اعضاء هذا المنتدى الحبيب
السلام عليكم ورحمة الله وبركاته
في البداية احب اقول لكم ان الموضوع طويييييل .. اللي فاضي ويقدر يساعدني الله يحييه واللي ما يقدر معذور وما نبي غير دعاه ,,
انا بقول لكم قصتي والاشياء اللي عانيت منها بالاكورد واتمنى تنصحوني وتفيدوني .. واللي ما عنده افادة على الاقل يدعي لي ..
في تاريخ 24/7/1430 شريت سيارتي واللي هي اكورد 2005 سياحي
والله اول ما شريتها قلت انا راكب بي ام مو اكورد (ما شاء الله تبارك الله )
من ناحية ان صوت المكينه مختفي ومعزول
المهم قدر الله علي بعد ما شريت السيارة باسبوع واصدم صدمة بسيطه ولله الحمد
المهم بعدها فترة بدأت المعاناة مع لي الدركسون واللي ما حسبت حسابه ان اللي اثر على الطرمبة ورحت للوكالة بعد تقريبا 4 شهور من شراء السيارة .. وغيرو لي الدركسون لانه عيب مصنعي اما الطرمبة قالو لي ادفع 2800 على ما اعتقد قلت لهم الخلا بس
طلعت منهم ويوم حسيت ان الدعوى فيها 2800 سالت واحد وقال لي سو لها اصلاح
سويت اصلاح في ورشة وحسبي الله عليه من ذاك اليوم سوا شي مدري وشو وصرت لا دعست بنزين يطلع صوت تنسيم هوا او شي زي كذا مع الدعسة
رجعت للورشة وقال لي طبيعي ومدري ايش المهم تحسبت عليه ومشيت من القهر
المهم ان كراسي المكينه والقير عندي وقتها كانت رايحة فيها وكان الصوت واضح مع الدعسة اللي هو صوت التنسيم
بعدها بـ 6 اشهر تقريبا اضطررت لتغيير الجلب والمقصات والمساعدات
طبعا انا غيرت الجلب وغيرها في ورشة نصحني فيها واحد يشتغل في احد محلات النعماني قلت ان شاء الله ثقة بس طلع خرطي وحسبي الله ونعم الوكيل
تسألوني ليش اقول لكم بعد شوي
قبل 3 اشهر سويت حادث وكانت الاضرار بالنسبة لي هي الصدام يبي له تعديل بسيط نتيجة لبعض الشقوق + تغيير الكلبسات وعلامة هوندا اللي بالشبك ..
طبعا صلحنا السيارة والحمد لله
ملاحظة : كراسي المكينه والقير الى وقت تصليح السيارة لم تتغير
نجي للمهم :
قبل اسبوع تقريبا قررت اغير كراسي القير والمكينه ووديت السيارة لنفس الورشة اللي غير لي المساعدات
غيرت كراسي المكينه والقير + غيرت خرطوش قيمته + سويت تربيط للسيارة
انا يوم خذت السيارة قلت اول شي ابشوف الرجة راحت ولا لا
ما امداني احط بالـ d الا والموتر يرج يا ولد يمين يسار . . الرجه فيك فيك
المهم حاسبت الباكستاني وقلت له بجيك بعد اسبوع اذا ما راحت الرجه قال خلاص تعال
واخذ علي تقريبا 1900 ريال
طبعا سيارتي فيها صوت صرصرة مدري وش سببه
ملاحظة : انا لاحظت ان صوت التنسيم خف بكثيييييييييير يوم غيرت كراسي القير والمكينه لكن ما راح
المهم رحت امس لورشة 20 اللي كل اصحاب الهوندا تمدحها
وقلت له ان فيه مشكله انه مع دعسة البنزين اسمع صوت تنسيم
وعندي صوت صرصرة
والاهم ان فيه رجه وانا توي مغير كراسي المكينه والقير
طبعا انا قابلت الاخ تحسين وتفهم الوضع قال لي بكره الساعه 2 الظهر سيارتك جاهزة
قلت ما عندي اي مشكله كم حسابك قال 500 ريال
قلت طيب بس الرجه لازم تروح + الصرصرة ما ابي اسمعها ثانية + صوت التنسيم ما ابغى احس فيه
قال ابشر ولا يهمك وطق الصدر
..
جاء اليوم الموعود اللي هو اليوم الساعه 2 الظهر اتصلت بتحسين قال تعال بعد العشاء
قلت طيب
اتصلت الساعه 9 ونص قال تعال الساعه 10
قلت ما في مشكله
اتصلت الساعه 10 قال لا تجي الا اذا دقيت عليك الرجه ما راحت
يوم جت الساعه 12 و 42 دقيقة ويتصل تحسين وقال لي تعال
انا طرت من الفرحة قلت خلاص ابحس الان ان معي اكورد
رحت عند تحسين وقلت هات المفتاح ابجرب
دقيت سلف واحط بالــ d الا والرجه هي هي
والله جتني الصيحه من القهر بغيت انزل عليه واسطره
قلت له ان الرجه ما راحت قال ايوه لازم تغيير كمر
وش الكمر يابو الشباب .. المهم وراني الكمر وقلت والحل
قال لازم كمر جديد بــ 3300 ريال + 600 ريال شغل يد
بصراحه كان ودي اطلع الكمر واصفقه بجبهته >> لحد يسألني ليش بس من القهر
لانه يوم ياخذ السيارة قام يسب اللي غير كراسي المكينه يقول انه ما ركبها صح وانا معلوم وما ادري ايش
المهم قلت اباخذ فرة اشوف فيه تنسيم ولا لا
وخذت فرة الا والتنسيم هو هو
قال ايوه لازم انتظار كم يوم علشان روح
بصراحه مدري هو صادق ولا يفقش علي
لانه قال لي انه غير شي مدري وشو ( جلبة او زي كذا )
عطاني اقتراح جهنمي قال لي اشتر كمر من تشليح
قلت واذا ما راحت الرجه والشي الثاني افرض ان اللي من التشليح مندمر ورايح فيها
طبعا الكمر صار يرج او صارت له هالمشكله عقب الحادث الاخير
عموما عطيت الاخ تحسين 400 وتخب عليه
لا الرجه راحت ولا التنسيم راح وما زادني الا غبن
والاخ تحسين يقول غير السيور يمكن هي المشكله في التنسيم >> تلوموني اذا قلت ودي اصكه بالكمر
بصراحه يا جماعه ادري اني طولت عليكم بس منقهر وودي افضفض
الشي الثاني هل هو صحيح لازم اغير الكمر ؟؟
وهل لو ما غيرته تندمر الكراسي ؟؟
والتنسيم وش الحل معه ؟؟
الله يعطيكم العافية على صبركم وقراءتكم
هبلتني هالاكورد في خلال سنتين دفعت ما يقارب الــ 15000 ريال
والله يعوض علي وعليكم ,,
اتمنى من اللي عنده حل يعطيني ,, وشكرا
