( الأكورد 2008 أو الأوريون 2008 )

بسم الله الرحمن الرحيم



كيف حالكم شباب وكيف البرد معكم :rolleyes:

المهم ما أبغى أطول عليكم أخوي معه مبلغ 86000 ألف ريال

وناوي يطلع الأكورد 2008 وصار له شهر وهو يفرفر في الوكالات

ويشوف السيارات و المهم جاء يوم الأربعاء اللي فات توني طالع

من الدوام وما أفكر ألا فالغداء :d وهو قاعد ماخذ أجازه من

دوامه ومبسط :( المهم و حنا نتغداء قالي تروح معي بكره قلت

وش عندك قال لا جا بكره قلتلك طبعا مروووق اخر رواقه :confused: قلت

خلاص أوكيه المهم جاء من بكره الخميس العصر وقالي شفتلك

سياره وأنا أدور في الوكالات ومن عقبها فرت مخي عن الأكورد:eek:

قلت وشي ذي قال خلنا نروح الوكاله وتشوفها المهم ونا في

الطريق قالي روح لوكالة تويوتا طبعا الفرع الرئيسي في خريص

ودخلنا ألا وهي الأوريون بصراحه وبيني وبينكم السياره روعه

بمعنى الكلمة جامعه الطابع الشبابي والرياضي والفخامه والقوه

في نفس الوقت ومواصفاتها تجذبك من أول نظره فوق كذا سعرها

يعني تستاهل سعرها وما ألومه يوم فرت مخه عن الأكورد من

جد :eek:

ومواصفاتها الأساسيه محركها 6 سلندر 268 حصان , 6 سيديات , 6 سماعات,الجير 6 سرعات تغيير تتابعي, تشغيل بزر , كشفات ضباب , أزرار التحكم بالمسجل بالمقود , مثب سرعه , شكمانين , أضاءة الأسطبات LED , حساسات أماميه وخلفيه, جنوط 16 و17 , جلد , جناح , فتحة سقف , مكيف الكتروني , ستاره خلفية ,تخشيبة , زينون , 6 أرباقات مو متأكد , مقاعد كهربائيه وغيرها كثيييير وسعرها مناسب جدا جدا وبقوه :cool:

وبصراحه عقب ماشفتها ماعرفت وش أقول لخوي ياخذها ولا

ياخذ الأكورد قلت خلنا نشوف راي الشباب بالمنتدى وهم بيعطونا

رايهم بين الأكورد والأوريون مع العلم أن سعرها يبدأ من 82500 ريال ألى 96500 ريال اللي بدون شاشة ملاحه:cool:

وابي تعطونا رايكم من ناحية جودتها ووكيلها ورساوتها وقطع غيارها الأستهلاكيه ومواصفاتها وقوتها وسعرها عند البيع وأعذروني لاني بصراحه ما أعرف شي عنها غير اللي ذكرته
بس دون تعصب وتحيز...

وشاكر لكم و ننتظر ردودكم....

اللي ذكرته يكفي بأنك تاخذ الاوريون
بس انتظر الستة سلندر اكورد يمكن يكون فيه تغيير جذري ولو اني ما اتوقع

تبي رايي الاوريون سياره جبااااااااااره من جد

خصوصا الحين ان هشووومي رافع سعر الاكورد 4 سرندل وصلت 93 الف

الاكورد قهر سعرها عالي مرررررره ونص المميزات مو موجوده بها

واذا تبي مزيد من المعلومات عنها اضغط على الرابط




من الإدارة : ممنوع وضع الروابط الدعائية ..

والله ما ادري بس من مواصفات الأوريون ما اقول الا اوريون

وما شاء الله كثير من الشباب مدحوحها وما اشتكو منها

صراحه انا اقول خذ الاوريون

الهوندا مغلين سعرها على الفاضي

للعلم ان الهوندا ماخذا اجمل سياره للسنه

والله أنك صادق المسافر لابعد ازودت من الشعر بيت وصل سعر الاكورد الفل 94500 ريال على أيش مدري يعني تخيل يحط الواحد
أكثر من 90000 ريال على اربعه سلندر :confused: لاتعليق

بس ماقلتولي شباب عن السياره من حيث الرساوه و اسعار القطع الاستهلاكية وسعرها عند البيع والصيانه عند الوكيل

بانتظار الردود>>>

بصراحه الأوريون روعه و أنا شفتها بالوكاله بصراحه حلوه

بس في نقطه ما عجبتني فيها و هي إن طبلونها خفيف و بالذات فوق الدرج لمسته بإيدي و تحرك طبعا هذا السبب يعود للصناعه الإستراليه =====> خذ حذرك

ولا الأشياء الثانيه بالعكس روعه بمعنى الكلمه

اخووي ابووليد من وجهة نظري الاريون موتر ماعليه كلام ولا سمعنا احد يشتكي منه وسعر فيه لاكن الاكورد والله ماتسوي سعرها بالله سياره توصل 94000على ايش ويكفي ان الكورد4 سلندر ولاريون 6سلندر ؟؟؟وبعدين من ناحيه المميزات الاريون احسن...

والله ماقصرتوا يا أخوان ودوم منورينا بالردود

وبأنتظار البقيه >>>

والله انا اشوف ان الاوريون ماتقرنها بالاربعه سلندر بالاكورد
لانك لو تبي تقارنها لازم تقارن الاوريون بمثيلتها
وحبيت قلك ان الاوريون هي عبارة عن كامري 6 سلندر
تقلي الاوريون رخيصه ؟؟ انا اشوف ان سعرها نفس سعر الاكورد
ولاتقلي ان الاكورد غاليه والله العظيم تستاهل
يليت تاخذ لفه على جميع الوكلات اللي في السعوديه وشوف سعر السيارات
الآن كل السيارات غاليه هذاك ول زمن جدي وجدك كانت السيارات رخيصه
والاويون اول مانزلت كانت غاليه لانه شكل جديد لاكن الذي جعلها توصل ادنى اسعارها لان الشكل ماتغير وهو نفسه في موديل 2007
انا ماابيك تقول هذا متعصب انا اصوت للاكورد والله تستاهل بالذات
اذا تبي تاخذ اكورد ماللك الا السته سلندر وهي اللي تقدر تقارينها بفئتها الاوريون من الناحية المكيانيكة وحجم المكينه 3.5
الاوريون ماتصف عند الاكورد السته سلندر وانا ماني شايف نقطه وحده تفضل الاوريون على الاكورد والله لو في كنت قلت لاكن ماني شايف فرق بينهم

أخوي في مواصفات كثيره بالاكورد ماهي في الاوريون
انت نظرت للمواصفات الظاهريه
والله لو الاوريون ماحتفظه بشكل الخاص لها ممكن لاكن هي كامري 6 سلندر

ماابي احد يجي ويتفلسف بعدي او يعقب على كلامي الرجال طلب رأي وانا هذا رايي

اذا تبي رايي الاخير انا اقلك اكورد 6 سلندر وبس وترى مااحد يعرف الاكورد اللي جربها وتجريه عن تجربه تفرق
ولو في الوااافي ولا م م و 5 5 7
ياكدللك كلامي والله مايعرف الاكورد اللي جربها
والله ماصرت اثق في سواقتي الا لما اخذت الاكورد صراحه سياره تستاهل التقدير
م م و ايش رايك باللفه اللي اخذنها على 60 تتوقع بالاوريون تقدر
للاسف لا ممكن تلقى السياره على اذنها:confused:

الاوريون حلوه وفخمه ورياضيه
بس فيها عيب واحد بس
انها تشبه الكامري:d

أخوي أكورد 2007 أول شي هذي وجهة نظرك ونحترمها وثاني شي انا ماكتبت الموضوع علشان أقارن بين السيارتين علشان مايجي أحد ويقول هذي ماتقارن بهذي أنا حددت على أساس المبلغ المذكور أعلاه والصيانه والقطع ومن هذا القبيل وثالث شي
أنا حاليا معي اكورد 2008 نص فل أو سبيشل وأخذتها 81000 ريال
وأنا مادفعت هذا المبلغ ألا وأنا مقتنع فيها من جميع النواحي لاكن أني أدفع أكثر من 90000 على 4 سلندر وبمواصفات محدوده اقول وبقوه معليييييش مع احترامي للجميع الواحد عنده
عقل ويفكر به مو يدفع علشان شكل حلو وخلصنا بغض النظر عن
صناعتها وللمعلوميه جميع السيارات الحاليه صناعتها فشل ياباني أو غيره الا ماندر من الالماني بمعنى اخر شف الأكورد والكامري 2002 قوتها وتحملها مو زي الموديلات الحاليه وغيرها الكثير
ورابعا الأكورد السته سلندر شي طبيعي بيكون سعرها فوق 100000 بكثير واكرر واقول معليش ادفع بها القيمة في أكورد بغض النظر على المكينة مع احترامي للجميع

وهذا اللي بغيت أوضحه وارجو قراءة الموضوع جيدا
وتقبلو مروري وننتظر البقية

مععقوله وين الشباب والردود لهذه الدرجه المنتدى نايم الظاهر مثل ماقلت البرد مأثر على الشباب هاليومين :(

أنا أكثر مايهمني الصناعة إذا الأوريون يابانية خذها و أنت مغمض و إذا كانت استرالية لا توهق

انا عن نفسي اقول اوريون احلى من الاكورد
وحتى في قطع الغيار ارخص

ايييييييييييش



كلام مو معقووول




الصراحه الاورين<<<<<وانت كنت ما اعرف اسمها لاكن مووووتر بن ام

مثل ما قال لك Accord 2007 اذا تبي المقارنة هنا تكون عادلة قارن الاوريون بالاكورد V6 . واذا منت مقتنع تدفع فيها 100 الف ريال بأقول لك من اللحين ريح عمرك من المقارنة واسأل عن الاوريون في منتديات تويوتا لانهم اهلها وهم ابخص بها . والمواصفات اللي ذكرتها على السعر ما شاء الله مغرية !!

اذا تبي تحكم على السيارة صح جربها او اسأل الناس اللي استخدموها . الاعضاء هنا ما بيفيدونك بشي .. ماهو تقليل فيهم .. لكن اتوقع بيقولون لك خذ الاكورد لانهم جربوها او بيقولون لك خذ الاوريون لان شكلها ومواصفاتها اعجبتهم . خلك على المثل اللي يقول : (اسأل مجرب ولا تسأل طبيب) ولا تنسى ان السيارة مازالت جديدة في السوق ومحد يعرف كيف استخدامها وعمرها وقدرة تحملها على المدى الطويل . واذا ما تعرف احد جربها مالك الا تستأجرها وتجربها بنفسك

هذا اللي عندي وسلامتك

:)

شووفوا التناقض ..

هنا منتدى هوندا يقولون الاغلبية الاوريون احسن ..

وهناك منتدى تويوتا يقولون الاكورد احسن ..

وش السالفة عباطة يعني ..


لا ونفس العنوان تقريبا


هذا الرابط ..



محتار بين الأكورد والأوريون.. شوركم ياشباب - منتديات تويوتا العربية

أخو الذوق الملكي 066 أنت الوحيد اللي فهمني وهذا اللي حيرني في منتدى أوريون يقولون لي الأكورد وبس وهنا يقولون الأوريون وبس يعني ماتاخذ العلم الأكيد والمقنع يعني ما أدري
وش فايدة المنتدى أذا ما تلقى تفاعل من غير تناقض وتحيز

وشاكر للجميع المرور وبأنتظار البقيه

بصراحه الاوريون حلووووو ولو ياخذ اخوك بشاشة ملاحه يعني احلى كلام بس ينتبه ياخذ سياحي خذ فل كامل بشاشه والله يوفقك اخوك
ونصيحتي قل لاخوك يستخير
وفيه لون جديد فيراني روووعه

اقتباس:

---

المشاركة الأصلية كتبت بواسطة أبووليد

أخو الذوق الملكي 066 أنت الوحيد اللي فهمني وهذا اللي حيرني في منتدى أوريون يقولون لي الأكورد وبس وهنا يقولون الأوريون وبس يعني ماتاخذ العلم الأكيد والمقنع يعني ما أدري
وش فايدة المنتدى أذا ما تلقى تفاعل من غير تناقض وتحيز

وشاكر للجميع المرور وبأنتظار البقيه

---

اذا ما كانت الاكورد 4 سلندر تقارن بالاوريون ولا تبي تدفع 100 الف ريال في الاكورد 6 سلندر .. علمني وش تبينا نقارن ؟!


:confused:

شوف اخوي
اذا كنت تبي قومة بين
اوريون و لومينا اس اس 2006 انا عندي المقطع وحاظرين للطيبين

أخوي Bunique أول شي أنا ماأبيك تزعل مني وكلنا عارفين ان أختلاف الراي لايفسد في الود قضيه وهذا هو الاساس في الموضوع وأفهمك اكثر نبي سياره بمواصفات روعه لكن بسعر مناسب مو مبالغ فيه والمبلغ مذكور أعلاه بمعنى فيه ناس لو يوصل سعر الأكورد 150000ريال يروح يشتريها وهو في النهايه حر
ولكن بما أني لقيت بديل وبسعر أقل وبمواصفات خيال وبحدود المبلغ من وجهة نظرك أنت هل تأيد السياره بغض النظر عن صناعتها لأن في النهايه نبي نستخدم السياره كم سنه وتنباع بشرط مو صناعه رديئه جدا مو المسأله أني أسوي فيها مهندس سيارات أو من أكبر الموردين ولا أقهر الوكيل الفلاني علشان أقارن بين سياره وسياره وأحرق نفسي والموضوع يطول شرحه لكن أتمنى المعلومه وصلت وأشكرك على أهتمامك ومثل ماقلت لك المساله أراء ووجهة نظر وأتمنى أني ماثقلت عليك بالكلام
وتكون المساله روح رياضيه,,,,,

اخوي O.k.r يلوموني فيك ياليت والله منها يكون الموضوع فيه شي من الفرفشه ونتعرف على السياره >>>>

الكوورد بدون تفكير
وكنه على السعر الكورلا 76
يعني الكوورد 92 تستاهل