تــــــقــــــريـــــر قـــــــــــــوة الأحـــــــــــــــــــــلام
السلام عليكم كيف حال الشباب بصراحة رحت محل قوة الأحلام بالرياض وهو تقريباً قريب جدا من وكالة هوندا اللي على طريق خريص أنا توقعت المحل كبير وعلى شارعين وفخم أو دورين لكن لقيته صغير لكنه مرتب وكل إكسسواراته لهوندا أكورد بصراحة المحل أعجبني مرة لدرجة أني أفكر أي شيء راح أحطه في سيارتي الأكورد راح اتجه له فوراً وبدون أي تردد بصراحة دار بيني وبين راعي المحل حوار حول المحل وعن الزينات اللي يقدمه للزبائن فقال لي أن بعض الزينات نجيبها من الخارج والبعض الآخر نشتريها من الوكالة أو بالتعبير الصحيح نتعامل مع الوكالة ويوفرنها لنا بصراحة عندهم أشياء أفضل من الوكالة:mad: أنواع التخشيب والزينات اللي ما تحصلها في الوكالة ولا في أمل يجيبها لنا :mad: عبدالله هاشم إليكم بعض الإكسسوارات اللي أعجبتني وممكن أحطها لا تستغربون لانها تستاهل وبصراحة الواحد معه أكورد كن معه ;) بنت وده يدلعها ولا ينقص عليها شيء ولا يستكثر عليها أي شيء صح ولا لا ياأصحاب الأكورد كل شيء لعيونك يالأكورد يرخص لك الإكسسوارات الي شفتها واعجبتني من الحلو إلى الأحلى تصاعدي :
1- الزينون يقول لي لا يهمونك اصحاب المحلات اللي يركبون الزينون يسون له ترهيم أي عفسه في السيارة ويقول ممكن تتأثر الشمعة لدرجة أنك ما تقدر تضع اللمبة اللي جايه وكالة في الشمعة لأنهم يكونون خربوها عليك فتضطر أنك تشتري شمعات جديدة وتركب الوكالة فيها من جديد عند إرادة بيعها وعلى فكرة الزينون عليه ضمان مدة سنة وسعره 1000ريال ألماني .
2- التنجيد بصراحة لفت نظري في المحل:eek: مرتبتين منفصلتين عن بعضهما البعض قلت لها وش قاعدين يسوون المرتبتين عندك لا وبعد وكالة قال لي لا هذا تنجيدنا نعرضه للزبون بس ماشاء أحرك المرتبة وأشوف يمين ويسار وتحت وعلى الجنبين ما شاء الله وكالة نصيحة للي يبي ينجد يروح عندهم لا وبعد ينجدون اللي على البيبان نفس الوكالة .
3- الدركسون بإمكانك تشتري دركسون للسيارة ويعدلون فيه التعديل اللي تبغاه يعني مثل اللون أو الشكل من 2005 إلى 2006 بس يقول يأخذ شغل معنا لمدة ثلاث أيام يقول الشغله مهي هينة أبدا لكن الشغل مضمون مية في المئة .
4- التخشيبات المنوعة والكثيرة حاطه كل نوع من أنواع التخشيبات على قطعة حلوة من الرخام صغيرة وشكلها يعطي منظر مغري التخشيبات بنفسها تهول بإمكانك تشيل التخشيبات اللي عندك في السيارة وتحط تخشيبة غير وتتميز أو اللي معهم أكورد سياحي حط 2006 أو غير راح تلاقي أفضل وعلى رغبتك تخشيب للسيارة بالكامل .
5- مسجل السيارة اللي عندهم مثل اللي عند عبدالله هاشم لكن فيه حركة حلوة وهو التخشيب على حواف المسجل وفي الوسط ليعطيك منظر لافت وحلو في نفس الوقت وسعرهاأتوقع مثل عبدالله هاشم لكن بزيادة التخشيبة .
6- عندهم مراية المانعة للتوهج أو اللي تخفف من نور السيارات اللي وراك وأيضا فيها الإتجاهات اللي تسير فيها نصيحة للي معهم سياحي يحطونها أما أنا مستحيل أنا جاية وكالة .
7- جهاز قياس الحرارة الخارجية وبصراحة هو أكثر شيء ابهرني لأنه من الأشياء اللي أدور عليها لكن مالقيتها لكن هذي المرة لقيتها ونفس اللي في الـــ6 سلندر تجي في مكان شاشة الكيلو متر يعني نفس الوكالة بالضبط وسعرها 1400ريال وهذا الشيء ألاحظه إبداع بصراحة لأن الغالبية اللي يملكون هوندا أكورد يتمنون هذا الشيء التافه اللي بصراحة منعها عنا عبدالله هاشم .
وفيه أشياء سألته عنها مثل جهاز الطي للمرايات قال المشكلة لايوجد الفني اللي يشتغل هذي الشغلة :( ويقوم بفك المرايات ومن ثم إضافة الجهاز أما الجهاز فلا مشكلة نستطيع أننا نجيبه من برا لكن المهم الفني لأنه مشكلة لو خرب عليك تقعد بها .
الشيء الثاني سألته عن التحكم بالمسجل عن طريق الدركسون قال هذا كثير شباب يسألون عنه لكن المشكلة لو ركبناه راح الضمان ثاني شيء أصلاً هو ليس موجود عندنا لكن ذكر لي قصة واحد يريد أن يركبه راح للوكالة وقال لهم أبي أركبه بالي هيبه قالوا له ترا راح يروح الضمان:eek: قال بسلامته المهم يركب قالوا له ترا مالنا شغل لو صار أي شيء من عدم ضبطه قال توكلنا على الله لأن المسألة ياشباب هو تفكيك الدركسون ومن ثم المسجل ومن ثم توصيل الجهاز إلى السماعات بصراحة شغله متعبة وممكن يترتب عليها أضرار علىالسيارة مستقبلا سواء من السماعات أو المسجل أو الجهاز نفسه فالحذر الحذر .
وطبعاً بإمكانك انك تقلب سيارتك لرياضية عندهم بصراحة أشياء خاصة للذين يبغون يقلبون السيارة إلى سبوت مثل هواية الكبوت و الزينة على الرفاف والجناح والنسافات وقلب لون السيارة إلى الأحمر يعني راح تكون السيارة رياضية من جوا ومن برا بمعنى الكلمة:) .
أيضا عندهم زينات حلوة واللي أعجبني يقول درجة الباب نحط لك درجة ثم تضاء مع فتحت الباب بصراحة فله وحلوة ولا يحتاج لها تخريم ومن ثم المحافظة على درجة السيارة الأصلية حيث تركب عليها لزق .
ومن ثم انتهت زيارتي للمحل وشكرته على معلوماته الحلوة لكن ماشريت منه شيء لأني رحت أشوف فقط لكن يوم جيت البيت حطيت في باله ألف شغله وشغله :o ابي اشتريهامنه واعجبتني .
تكملة لمشواري يوم السبت الموافق 22/4/1427هــ وقت المغرب من الساعة 6والنصف من ذو خروجي من البيت إلى 8 عند اذان العشاء .
قبل لا أروح للبيت رحت للوكالة وسألتهم عن أدوات السلامة تصدقون ثلاث شهور لي شاري السيارة ولا عطوني الأدوات :eek: إلا يوم رحت لهم هذا وانا حاط لهم رقم التليفون واسمي بالكامل واكتشفت انها عندهم لكن ما ودهم يتصلون المهم سلمت لهم الورقة اللي جايبها من المعرض عشان استلم الأدوات السلامة بموجبها ووقعت واخذت اغرضي لكن قبل لا أتوكل قلت لهم ممكن اشوف الكشافات اللي تجي من الوكالة قالوا ابشر راح جابه لي سعودي الله يعطيه العافية كان متعاون معي ووراني إياها وبصراحة تقول بنت مكحلة عينها شكلها حلو مرة واهي في راسي إن شاء الله شكلها دائري وحوافها لونها اسود تعطيك منظر خلاب وياتي معها فاصل جديد للأنوا العالية والواطي وللكبوس ( الكاشفات) وسعرها فوق الـــ1000ريال المهم انتهت رحلتي وآسف على الإطالة . يالله سلملم . ( إذا كان الموضوع يستاهل أرجو من الإدارة التثبيت وشكرا لتعاونكم ) .
