العيوب المصنعية للسيفيك لموديلات 2006 وفوق
السلام عليكم ورحمة الله وبركاته،،،
صراحة وقت طرح هالموضوع يعتبر متأخر جداً ولكن ان احنا نطرحه خير من ان احنا نظل مخدوعين من قبل الوكالة
صراحة ما ادري بأيش ابتدي ، كل شوي اكتشف مشكلة ، المشاكل اللي واجهتها ما غيرت انطباعي عن السيارة اللي بالنسبة لي تعتبر ممتازة جداً
انا عن نفسي ما ادري ايش هي الاعطال المصنعية ، فكرة الموضوع هذا ان احنا نطرح كل مشكلة واجهتنا ونشوف الآتي:
- كم شخص واجه هذه المشكلة؟
- هل المشكلة في نفس الموديل؟
- كم شخص راح للوكالة وقالوا له انها عيب مصنعي؟
- العيوب المصنعية المعلنة من الوكالة
انا راح ابتدي بالمشاكل اللي طلعت لي:
السيارة هوندا سيفيك 2006 قير اوتوماتيك فئة EXI
1- عزم السيارة نازل وصوت المكينة عالي كانها مكينة ديزل وكل شوي تطفي.
كنت ماشي بالسيارة شوي الا اشوف دخنة طالعة من الكبوت واتضح التالي:
السيارة انقطع وشداد السير انقطع ، رحت للوكالة وغيروه لي على الضمان ، طبعا اكتشتف الحين انه اكثر من واحد واجه هالمشكلة وهذا دليل انها عيب مصنعي ، هالكلام صار لي والسيارة كانت ماشية اكثر من 30,000 كلم ، واجهتني المشكلة مرة ثانية وهالمرة كانت ماشية اكثر من 70,000كلم بس هالمرة اضطريت ادفع قيمة القطع.
السيارة الحين ماشية اكثر من 170,000كلم وما شاء الله ما واجهت هالمشكلة واتمنى انها ما تجيني مرة ثانية.
2- في الملفات وخاصة لجاك مطب او حفرة تسمع طقة جهة اليسار والصوت اعلى جهة اليمين ، الصوت كانه قطعتين حديد يتضاربون وقت اللف.
انا شفت هالمشكلة واحد حاطها في منتدى اجنبي وبودي اشوف كم واحد منكم واجهته هالمشكلة. تحليلي هالمشكلة انه احتمال يكون المقص او المساعد فيه علة ، انا غيرت المساعد جهة اليسار بعد ما طلع الصوت عالي من جد فيه ووديته ورشة الجنوب بالرياض وقالي لازم تغير المساعد ، كلفني المساعد الجديد اكثر من 1000 ريال اذا ما كنت غلطان لاني غيرته قبل سنة تقريبا
3- غيرت كفرات السيارة مرتين ، في المرة الاولى شريت كفرات فالكون نوعية يابانية دعستها حلوة وفي الطريق حلوة واحسها ناعمة في المطبات ، عيبها انها ما ضلت سنة على سواقتي وشوارع الرياض :d ، المشكلة الي واجهتها كان رجة في الطارة ، البنشري يقولي الكفرات مرصصين روح سو لها ميزان ، وراعي الميزان يقولي السيارة موزونة روح رصص الكفرات ، انا طنشت الاثنين وضليت في خط الرياض الاحساء ماشي بهالكفرات لما حللتهم و غيرتهم الى ميشلان ولو ان سعر الكفر دبل سعر الفالكون ، الحين السيارة اوكيه بس احس برجة اسفل البدي كان السيارة بس من تحت ترتج ، الطارة رجتها خفيييييييييييييييييييييييفة مرة علشان كذا ما عرفت المشكلة من الكفرات او العكوس او المساعدات :( ، ما يصير تطلع هالمشكلة بس لاني غيرت كفرات الوكالة :(
4- مشكلة بالقير ولو اني ما اقدر اسميها مشكلة لاني احس انها بسبب سواقتي الهبلة :d، انا راعي مقاوم خلني اكون صريح ، ومسك خطوط ودعس ، وشوارع الرياض تغري الواحد انه يخلي السيارة تحفر في الأول :d
الحين السيارة لكنت في شارع ومتجه نزولا ، تقوم تنزل نمرة للقير الثالث اذا ما كنت تدعس بنزين ، الوكالة قالوا لي هذا شي زين علشان تخفيف للسرعة على قولتهم سيفتي ، المشكلة انه بعض الاحيان اشوفها تنزل للثالث وتضل مدة 5-6 ثواني ما تعشق رابع وخامس ، بودي اذا شخص عنده نفس مشكلتي يعلمني ، الحين طبعا شبه اختفت لاني توني مغير زيت القير ، فيمكن انه من سواقتي الحلوة :pاحرق زيت القير بسرعة.
5- في صيانة الـ 100,000كلم ، الوكالة غيروا لي طرمبة البنزين والعوامة ، الحين السيارة لكان البنزين باقي 5 شرطات يعني تقريب الربع وانا امشي والف يمين في منعطف وادعس............السيارة ما تسوي شي ، ينزل الريس والصوت يصير كان السيارة طفت بس بعد 3-4 ثواني ترجع تمشي السيارة . انا سألت شخص عن هالعلة وقالي يمكن الوكالة ما ركبو لك العوامة صح ، هذا احتمال وارد وراح اشيك عليها ان شاء الله في القريب >>> مشيت على هالمشكة اكثر من 70,000 كلم يعني شكلي بشيك عليها في الـ 200,000 كلم :p.
هذا اللي واجهته لغاية الآن واتمنى من الشباب اللي واجهتهم نفس المشكلة ، انهم يذكرونها هنا علشان نعرف نحجر للوكالة ونقنعهم انها غلطتهم انهم ما نبهونا على هالاخطاء هذي>> متعوب عليها :cool:
