{ الأكورد راحت :( .. صور الحادث ~

بسم الله الرحمن الرحيم

السلام عليكم

الحمدلله على كل حال .. لن يصيبنا الا ماكتب الله لنا

.. بس قمة القهر .. تشوف ( سطحة ) في ( نص ) مسارك ولا يمديك تسوي شي :mad:

بأقول لكم القصة كاملة :

الشارع ضيق مسارين بس ..أمشي قريب من الـ120 تزود أو تنقص شوي .. وكانت قدامي كامري .. شفته لف فجأة راح يمين !! .. اول مالف الكامري ولا ذيل السطحة في وجهي . .تخيلوا هو وسطحته مآخذ حوالي 95% من المسار اللي انا فيه وبالليل ولاهو مولع السفتي ويميني سياره لفيت يمين قد ما اقدر وميلت جسمي جهة الراكب :( والحمدلله ماتحركت من مكاني ابد و فكني الله وجتني السلامه .. الصدمة من عندي لكن الحمدلله والشكر جتني سلامه من الله :)


السيارة باوريكم صورها الايرباقات طلعت .. والبوري علق .. وفصلت البطاريه وشلتها بسطحه ثانية :d ..
بس بعد الحادث مشيت كم متر .. اتوقع السيارة تمشي واتوقع الشاصي سليم ،،



هذي الصور :


http://up4.m5zn.com/9bjndthcm6y53q1w.../meqhczlpz.jpg

::

http://up4.m5zn.com/9bjndthcm6y53q1w.../6ozjmefdx.jpg

::

http://up4.m5zn.com/9bjndthcm6y53q1w.../ot7balcs4.jpg

- الغلط على راعي السطحة 100% .. ولاني متنازل

- الايرباق اللي في الدركسون ماطلع :confused: !! .. طلع بس اللي عند الراكب والجانبيه اللي عندي واضحه في الصوره

- تتوقعون بيبان جديدة ورفرف جديد وتعديلات في الوكالة .. ترجع مثل أول ؟

- انا اليوم رايح اسعرها .. كم تتوقعون تكلف ؟


ان شاء الله دفع بلاء .. وتطفى عيون الشهبان :mad:
الحمدلله على كل حال .. لن يصيبنا الا ماكتب الله لنا

:::
::
:

بتكلف كثير

بصراحة لاترضى انه تتسمكر قول لهم يغيرون البيبان

يا ساتر انت اخبارك عسا ماجاك شي
والله مدري وش اقولك بس والله اني زعلت عليك كثيررر وكانها سيارتي والله انه موقف مدري وش اقول
اهم شي سلامتك الحديد يتعوض

تبي راي والله لو انا مكانك الي بسويه اني حلين عندك

انك تصلحها وينتهي الوضع
او انك تبيعها وتشتري جديد وتزود عليها

الله يعنيك يالغالي

يا لطيف الحمد لله انك طلعت منها سالم
وياخوي السياره تتعوض لكن الروح ما تتعوض انا اقول يمكن تكلف 40 الف شغل وكاله شغل ورشه ميه ميه يمكن 10 الف

وحمد لله على سلامتك يا الغالي

اقتباس:

---

المشاركة الأصلية كتبت بواسطة اكارداوي

يا ساتر انت اخبارك عسا ماجاك شي
والله مدري وش اقولك بس والله اني زعلت عليك كثيررر وكانها سيارتي والله انه موقف مدري وش اقول
اهم شي سلامتك الحديد يتعوض

تبي راي والله لو انا مكانك الي بسويه اني حلين عندك

انك تصلحها وينتهي الوضع
او انك تبيعها وتشتري جديد وتزود عليها

الله يعنيك يالغالي

---

الله يسلمك يالغالي :o .. المشكلة صعبه ابيعها وانا الوكاله معطيهم كاش .. بس اقسط لـ معرض مبلغ ( دداسن ) 3 آلاف وشوي شهرياً وتوه باقي كثييير من الاقساط .. صعبه

اقتباس:

---

المشاركة الأصلية كتبت بواسطة راعي الكامري saad

يا لطيف الحمد لله انك طلعت منها سالم
وياخوي السياره تتعوض لكن الروح ما تتعوض انا اقول يمكن تكلف 40 الف شغل وكاله شغل ورشه ميه ميه يمكن 10 الف

وحمد لله على سلامتك يا الغالي

---

الله يسلمك حبيبي :o .. اح اح معقوله توصل 40 ألف !!

السلام عليكم ورحمة الله وبركاته
في البداية اقولك الحمدلله على سلامتك
بتكلم فوق الـ10000 أكيد لان فيها بيبان 2 وأرفرف 1 وشمعه وقزاز2 وقزازهـ اماميه ومرايه + الديكورات الداخليه +سعر تدخيل الإرباجات +مكاين القزاز غير الليكلبسات وغير وغير هذا الخارجي فقط اللي باين لنا
الله يساعد ويوفقك والله يهون عليك إن شاء الله
والحمدلله على سلامتك مرهـ آخرى
تقبلوااا خاااالص تحيااااتي
ومرررووووووررررري

وعليكم السلام ورحمةُ الله وبركاته ،

الحمد لله على ســَلامتكْ ،

والحديد يتعوّض والحمد لله أنها جات على كِذا ،

انت راح تحتاج حالياً إلى ( على حسب الصورة )

- شمعة امامية ( 630 ريال )
- رفرف أمامي ( تقريباً 500 واشوي أو أقل ما أذكر )

يبي لك باب سائق وباب خلفي كامل مع الديكور < ما أعرف سعرهم ، شوف سعر قطع الغيار وشوف سعر التشليحْ يمكن تلاقي نفس لونك ..

يبي لك تسمّكر الرفرف الخلفيْ < ما يتعدى السعر 700 ريال شامل الرش ، !

اتوقع انهم راح يغيرون لك الداخلية ( السقف ) ويرجعون لك الايرباق مثل أول ،

سيارتِك إن شاء الله راح ترجع وكالة ولا تشيل هم دام الغلط مب عليكْ ..

حاول قد ما تقدر تشوف لك الورش الممتازةْ ، لان شغل الوكالة بياخذون عليك مبلغ وقدره ، !!

اذا انت تعرف ورشة ممتازة توكّل على الله سواء كانت في حائل ولا الرياض < مدري قريبه منكم ولا لاْ ،

بصراحة منظر السيارةْ يعوّر القلبْ وقسمْ ، لكن الحمد لله أنك طلعت منها سـَالمْ ..

واي خدمة إن شاء الله ما نقصّر وياك يا ثامرْ ،

وإن شاء الله آخر المصايب ، ولا تنسى تقرأ على السيارة بعد ما تطلعها ،

بالتوفيق ،

ي ب ح .. الله يسلمك يالغالي ماقصرت ،،

اقتباس:

---

المشاركة الأصلية كتبت بواسطة kakashi-san

وعليكم السلام ورحمةُ الله وبركاته ،

الحمد لله على ســَلامتكْ ،

والحديد يتعوّض والحمد لله أنها جات على كِذا ،

انت راح تحتاج حالياً إلى ( على حسب الصورة )

- شمعة امامية ( 630 ريال )
- رفرف أمامي ( تقريباً 500 واشوي أو أقل ما أذكر )

يبي لك باب سائق وباب خلفي كامل مع الديكور < ما أعرف سعرهم ، شوف سعر قطع الغيار وشوف سعر التشليحْ يمكن تلاقي نفس لونك ..

يبي لك تسمّكر الرفرف الخلفيْ < ما يتعدى السعر 700 ريال شامل الرش ، !

اتوقع انهم راح يغيرون لك الداخلية ( السقف ) ويرجعون لك الايرباق مثل أول ،

سيارتِك إن شاء الله راح ترجع وكالة ولا تشيل هم دام الغلط مب عليكْ ..

حاول قد ما تقدر تشوف لك الورش الممتازةْ ، لان شغل الوكالة بياخذون عليك مبلغ وقدره ، !!

اذا انت تعرف ورشة ممتازة توكّل على الله سواء كانت في حائل ولا الرياض < مدري قريبه منكم ولا لاْ ،

بصراحة منظر السيارةْ يعوّر القلبْ وقسمْ ، لكن الحمد لله أنك طلعت منها سـَالمْ ..

واي خدمة إن شاء الله ما نقصّر وياك يا ثامرْ ،

وإن شاء الله آخر المصايب ، ولا تنسى تقرأ على السيارة بعد ما تطلعها ،

بالتوفيق ،

---

الله يسلمك يابعدي كفيت و وفقيت :o .. بالنسبة للورش والله ما اثق في احد خصوصاً في حايل ،،
والمبلغ اللي باحطه في الورشـة .. ازوّد عليه المبلغ اللي بـيدفعه راعي السطحه واظبطها وكاله .. الا اذا الوكالة احتمال يكون شغلها مش ولابد .. ويمكن تكون بعض الورش أفضل من الوكالة .. حتى لو في الرياض ؟ مدري أتمنى تفيدني :o ،،

الحمد لله على السلامه

اهم شي انك طلعت منها سالم

وفي الحديد ولا فيك

وان شاء الله تتصلح

والشباب يفيدونك

أخوي خل عندك فكرة كويسةْ ،

ان اللي يشتغلون في الوكالة ترى ما يفرقون عن اللي في الورش ، !!

في ورش يمكن تصير أفضل من الوكالة ، !!

فيه ورشة ممتازة في الرياض بس نسيت اسمها والله ، ترجّع سيارتك مثل الوكالة وأفضل ، !!

احنا عندنا بالأحساء ورشة قريب سعرها من الوكالة ، وشغلها أحسن من الوكالة ، !

يعني انت لا تستعجل وشوف كم الأسعارْ ،

اللحين كل اللي عليك تشوف الورش الممتازة كم راح تضبطها لك ، واتوقع سيارتك تقدر تمشي فيها ،

انقلها من حاايل للرياض بسطحة اذا كانت بعيدة ، وعقب انت ادخل الصناعية وادخل الورش الممتازة وشوف كم تسعّرها لك وقبلها انت مار الوكالة شوف كم يقولون لكْ ،

حرام تدفع مبلغ وقدرهْ وانت اصلاً ما عليك غلط في الحادثْ ، شوف كم بيعطونك من صاحب السطحةْ ،

وسيارتك راح ترجع وكالة وأفضلْ ،

بالنسبة للورش ، في الرياض والله ما أدري لكن لو قلت لي الشرقية بفيدكْ ، ان شاء الله الأعضاء ما يقصرون وياكْ بإذن الله ،

وأي استفسار حاضرينْ ،

الله يعينك والحمدلله على السلامة والحديد ينعوض

اقتباس:

---

المشاركة الأصلية كتبت بواسطة kakashi-san

أخوي خل عندك فكرة كويسةْ ،

ان اللي يشتغلون في الوكالة ترى ما يفرقون عن اللي في الورش ، !!

في ورش يمكن تصير أفضل من الوكالة ، !!

فيه ورشة ممتازة في الرياض بس نسيت اسمها والله ، ترجّع سيارتك مثل الوكالة وأفضل ، !!

احنا عندنا بالأحساء ورشة قريب سعرها من الوكالة ، وشغلها أحسن من الوكالة ، !

يعني انت لا تستعجل وشوف كم الأسعارْ ،

اللحين كل اللي عليك تشوف الورش الممتازة كم راح تضبطها لك ، واتوقع سيارتك تقدر تمشي فيها ،

انقلها من حاايل للرياض بسطحة اذا كانت بعيدة ، وعقب انت ادخل الصناعية وادخل الورش الممتازة وشوف كم تسعّرها لك وقبلها انت مار الوكالة شوف كم يقولون لكْ ،

حرام تدفع مبلغ وقدرهْ وانت اصلاً ما عليك غلط في الحادثْ ، شوف كم بيعطونك من صاحب السطحةْ ،

وسيارتك راح ترجع وكالة وأفضلْ ،

بالنسبة للورش ، في الرياض والله ما أدري لكن لو قلت لي الشرقية بفيدكْ ، ان شاء الله الأعضاء ما يقصرون وياكْ بإذن الله ،

وأي استفسار حاضرينْ ،

---

والله يا كاكاشي مالها الا سطحة لان المسافة بين الرياض وحايل حدود800 كيلو
جبها يا ثامر وصلحها في الرياض لان ورش حايل ما حولك احد ومر التشاليح وشف يمكن تلقى شي نفس لون سيارتك لكن اول مر الوكالة عشان تعرف الاسعار وتقدر تكاسر الي تبي وبالتوفيق لك

ماتشوف شر يا ثامر

ان شاء الله بسيطه

فيه ورشه بالرياض ترجع لك السياره وكاله ان شاء الله
اشتر الابواب (كامل مع الداخلي عشان الديكور سليم والمكينه حقت الزجاج)
+ الرفرف من التشليح
والديكورات الداخليه من التشليح .. الارباقات تصلح الديكور بس

اتوقع السعر للابواب والرفرف والشمعه تقريبا 10 الاف ريال

شغل يد ياخذ عليك 4000 ريال +سمكره الرفرف الخلفي

مع الحوسه اللي تطلع لك بعدين ممكن 3000 ريال قطع داخليه ماتغير الا بعد ماتفكها تشوف خرابها

يعني ممكن توصل 15 الف الى 18 الف ريال

الحمد لله على السلامة

الحمد لله على السلامه

انا كمان واحد دخل عليا فى الخط السريع وعدملى الواجهه

قالولى تكلف 10200 فى الوكاله

والله يعيننى عليها

قهر لسه ما مشيه 3000

الله لا يهينكم أحرجتوني والله بـ وقفتكم معي ،، :)

المسافة بين الرياض وحايل 600 كم .. لازم سطحة ،،

يا شباب اذا على السعر عادي اصلحها وكالة .. بس ترجع مظبوطة .. ماراح اصلحها بـ ورشة الا إذا كان شغلهم ( أفضل ) من شغل الوكالة .. واتمنى حقين الرياض يفيدوني

الحمدلله .. الحمدلله..الحمدلله على كل حال..

ثامر..الحمدلله على السلامه..اول شي..

ثاني شي.. راعي السطحه الي تسبب عليك..

لاتتنازل عنه أبداً أبداً... يدفع ولا يسجن..وحده من الثنتين..

ثاني شي بالنسبة للسيارة.. قسم انها أليمه الضربه .. لكن الحمدلله

الايرباجات..أكثر شي راح يكلفك..! فوق الـ 10000 وانت مغمض..

والباقي حديد..واكسسوارات..نور امامي..+ رفرف.. ومرايه جانبيه.. وقزاز امامي.. وبيبان بدرايشها مع الدينمو حقها مع الديكور

ورفرف خلفي..واشياء حتى يمكن ما تدري عنها..للحين

يعني تكلفة كل هالاغراض..حدود..همم 36 ألف ويمكن أكثر..

بالوكاله اي عفط خفيف لازم يغيرون الشي بالكاااااااااامل..!

يعني احتمال انهم يقولون لك اشياء وسط السياره..ما تدري عنها الا بعد ما يشوفونها..

لكن معليه تفاول بالخير اخوي ثامر..

-من شاف مصيبة غيره هانت مصيبته- << اذا حسيت انك ضايق تذكر هالمقوله..

واحمد ربك على طول واشكره..

الله يعين يا رجال..

============

ثامر وافنا بآخر الاخبار .. شف كم بيقولون وكم بيصلحون..

واحنا بانتظارك..:(

حسبنا الله ونعم الوكيل ..

الحمد لله على سلامتك اول شي ، والحديد يتعوض ..

سعر الابواب كاملة بالتشليح الواحد من ٤٥٠٠ الى ٥٠٠٠ كاااملة بالديكوات الداخلية <<< عشانها ٢٠٠٨ ، الموديلات اللي قبل حول ٢٨٠٠

واحد من اخوياي شرا باب من الوكالة فاضي وتقريباً مع كل عدتة ، النياكل على الابواب والقزاز ومكينة القزاز <<<< اكبر غبنة مكينة القزاز للباب الخلفي بحدود ١٠٠٠ ريال ، ،،، ، المهم انة طلع اغلى من اللي بالتشليح ! ( بيبانك ما تتسمكر طبعاً )

الايرباقين الامامية شي طبيعي انها ما تطلع .. لأن الضربة مو في الوجة ولا تأثرت الحساسات حقتها ..

بالتأكيد لو غيرت البابين والرفرف بترجع لك كما كانت بدون اي قلق .. خويي توة صاير لك مثلك وغير رفرف وباب خلفي وقزازة امامية ...

راعي السطحة عندة تأمين ؟

اقتباس:

---

المشاركة الأصلية كتبت بواسطة Solo

الحمدلله .. الحمدلله..الحمدلله على كل حال..

ثامر..الحمدلله على السلامه..اول شي..

ثاني شي.. راعي السطحه الي تسبب عليك..

لاتتنازل عنه أبداً أبداً... يدفع ولا يسجن..وحده من الثنتين..

ثاني شي بالنسبة للسيارة.. قسم انها أليمه الضربه .. لكن الحمدلله

الايرباجات..أكثر شي راح يكلفك..! فوق الـ 10000 وانت مغمض..

والباقي حديد..واكسسوارات..نور امامي..+ رفرف.. ومرايه جانبيه.. وقزاز امامي.. وبيبان بدرايشها مع الدينمو حقها مع الديكور

ورفرف خلفي..واشياء حتى يمكن ما تدري عنها..للحين

يعني تكلفة كل هالاغراض..حدود..همم 36 ألف ويمكن أكثر..

بالوكاله اي عفط خفيف لازم يغيرون الشي بالكاااااااااامل..!

يعني احتمال انهم يقولون لك اشياء وسط السياره..ما تدري عنها الا بعد ما يشوفونها..

لكن معليه تفاول بالخير اخوي ثامر..

-من شاف مصيبة غيره هانت مصيبته- << اذا حسيت انك ضايق تذكر هالمقوله..

واحمد ربك على طول واشكره..

الله يعين يا رجال..

============

ثامر وافنا بآخر الاخبار .. شف كم بيقولون وكم بيصلحون..

واحنا بانتظارك..:(

---

يابعدي والله :004: ماقصرت

ماراح اتنازل .. ان شاء الله باقول لكم اللي يصير :004: ،،

اقتباس:

---

المشاركة الأصلية كتبت بواسطة كوكو كورد

حسبنا الله ونعم الوكيل ..

الحمد لله على سلامتك اول شي ، والحديد يتعوض ..

سعر الابواب كاملة بالتشليح الواحد من ٤٥٠٠ الى ٥٠٠٠ كاااملة بالديكوات الداخلية <<< عشانها ٢٠٠٨ ، الموديلات اللي قبل حول ٢٨٠٠

واحد من اخوياي شرا باب من الوكالة فاضي وتقريباً مع كل عدتة ، النياكل على الابواب والقزاز ومكينة القزاز <<<< اكبر غبنة مكينة القزاز للباب الخلفي بحدود ١٠٠٠ ريال ، ،،، ، المهم انة طلع اغلى من اللي بالتشليح ! ( بيبانك ما تتسمكر طبعاً )

الايرباقين الامامية شي طبيعي انها ما تطلع .. لأن الضربة مو في الوجة ولا تأثرت الحساسات حقتها ..

بالتأكيد لو غيرت البابين والرفرف بترجع لك كما كانت بدون اي قلق .. خويي توة صاير لك مثلك وغير رفرف وباب خلفي وقزازة امامية ...

راعي السطحة عندة تأمين ؟

---

اهاا .. بس بالنسبة للايرباقات .. اللي أمام الراكب طلع ! .. بس اللي في الدركسون ماطلع !

راعي السطحة لما رحنا للمرور .. قال مادري يمكن عندي تأمين :confused: .. ما اتوقع عنده تأمين يبي له يدبر المبلغ ،،

ماقصرتوا يابعدي ،،

سلامات ... سلامات ... سلامات
الف حمد لله على السلامه

السياره اكيد راح تكلفك كثير , لكن ياليت تنتبه على كذا شغله عند التصليح :
اولا حاول تشوف ورشه شغلها نظيف ( شوف السيارات اللي عندها كيف شغلهم فيها )
ثانيا : انتبه على الايرباقات وحاول قدر الامكان انك تصلحها لانها حمايه بعد الله
ثالثا : لا تسمكر الابواب ابدا (حتى لو كانت قابله للسمكره ) لان الابواب مهما سمكرت فيها ما راح تمنع اصوات الهواء زي ابواب الوكاله
رابعا : دعوة صادقه من قلب ( ان شاء الله ترجع سيارتك مثل اول )

ســـلامااات اخوي معوض خير ان شاء الله

والله نفسي افيدك بشي بس انا مالي في هذي الامور الاخواان ماقصرو ومره ثانيه ألف ســلامه عليك والله يعوضك خير

الحمد لله على السلامة اخوي ثامر

واخر الاحزان ان شاء الله

الحمد لله على سلامتك ......
لواني مكانك بعد هالحادث أصير مطوع والله يعوض عليك ولاتتضايق راح ترجع زي أول وأحسن ان شاء الله خلك متفائل وفكر باللي بعده وياليت بعد ما تزبط أمورك تفرحنا بالصور قبل وبعد

الحمد لله على سلامتك اولا واخرا

وفي الحديد واهم شي سلامتك يالغلا

ماتشوف شر

الف الف مليون سلامات الله يعوضك خير
اهم شئ سلامتك
وان شالله ترجع زي اول واحسن يارب

اول شي :


الحمدلله على السلامه يا بعدي .. ~

وفي الحديد ولا فيك يابن الحلال .. ~ فدوهـ .. ~

وبالنسبه لشغل الوكاله تراه غالي بالمره .. ~ بيكلفك اتوقع فوق الـ 40 ... ~

اظن اني شفتهآ .. !! عند الوكاله اللي على طريق القصيم :rolleyes:

الله يستر عليك .. ~

وآقر عليها .. ترا الشهبان كثير الله يكفينا شرهم :d

عندي لك رفرف يسار كوبس كانك تبي او تبي تشة ردلي خبر
وحمدالله على سلامة

اخوي ثامر اول شي الحمد للة على السلامة وفداك الحديد نصيحة اذا كنت ناوي بعد التصليح تستخدم نصيحة جبها الوكالة بالرياض يصلحونها ما فية مثل تصليح الوكالة بس ترى الوكالة غالية مرة اما اذا كتن ناوي تبيع صلحة بورشة زينة واذا كانت ضروفك المادية ممتازة بعها واشتر جديد ومعوض خير مشكور اخوي

الحمد لله على السلآمه ..

وبالحديد ولا بالعبيد ..

كويس السياره صدمت بعد مدة :d أنا عقب ما طلعت الاكسبلورر قبل رمضان من ثاني يوم صدمت :( ..

الله يعوضك يارب ..

تحياتيـ)~

@اكورد وبس@.

مساء الخير اخوي ثامر والحمدللة على السلامة وفداك الحديد نصيحة اذا كنت ناوي بعد التصليح تستعمل جبها الرياض وصلحها وكالة شغل الوكالة ممتاز مرة بس تراهم غالين وبتكلفك واجد اما اذا كنت بعد التصليح تبيع صلحها عند ورشة زينة اذا كانت ضروفك المادية ممتازة بعها وطلع جديدة معوض خير مشكور

الحمد لله على سلامتك والله اخوي انا قبل 6 شهور صارلي حادث سيارتي 2008 من الواجه مافي ارباقات رحت الوكاله قالوا 39 الف ريال وبعتها وهي مصدومه وقبل يومين شفتها في جده ولا كانها انصدمت صلحا الرجال برع (اره 6555)(ا ق د 6555)

الحمد لله على السلامة ماتشوف شر
تبي تعرف افضل طريقة وافضل حل ولو انا مكانك بسويها صلح السيارة في ورشة ممتازة عشان اذا حبيت تبيعها تجبلك سعر بعد البيع
ولاتصلح الايرباقات اذا بتبيعها .....وشكرا

الحمدلله على السلامه

معوض خير باذن لله

سلامات يا الشيخ والله منظر السيارة عور قلبي

أهم شي سلامتك عزيزي

بس مو المفروض السيارة تتصلح على حساب شركة التأمين سواء كنت غلطان أو مغلوط عليك بالحادث !؟

مافي عندكم تأمين شامل بالسعودية ؟

لاحول ولا قوة الا بالله
وش الاخبااار السيئه الي دلينا نسمع بهاا
اهم شي الحمدلله على سلامتكـ
وان شاء الله الامر تتصلح

الله يخليكم ويعافيكم ويسلمكم ويجزاكم خير واحد واحد .. والله ماقصرتوا معي ولا ادري وش اقول لكم :o ،،

السيارة ماراح من اقساطها الا الشي القلـييييييل ! .. ولا اقدر ابيعها واشتري غيرهـا !!

فـ أنا راح ان شاء الله اصلحها واستخدمها .. على كلامكم مافيه أفضل من الوكالة ،،

د.نايف .. اذا كان اليوم وعند وكالة هوندا .. فـ هي السيارة ،،

أخوي بو نواف .. عندنا تأمين شامل بالسعودية .. بس أنا مأمن ضد الغير فقط .. واللي صدمته مو مأمن الل يعينه ،،

مره ثانية أٌول الله يسلمكم ويجزاكم كل خير .. :004::004::004:

أتمنى اللي مجرب ورشة أفضل من الوكالة يدلني عليها ،،

واذا في فرع من فروع الوكالة يتميـز بـ شغله بعد ياليت تـدلوني لو بس على اسم الفرع ،،

الحديد يتعوض يا بطل والحمد لله على سلامتك

بسم الله الرحمن الرحيم

الحمد لله على السلامه في الحيدي ولا في العبيد

انا لوني منك ما تنازل الله يعديك هذي سيارة بقيمه 1005000 ريال ســعــودي وثاني شي حرام

تسمكرها غير كل شي جديد وفي الوكالة لانه شغلهم اظمن 100% بس بتكلف عليك واجد حوال

45000 ريال سعودي وقطع هوندا غالية

ومرة اخر الحمد لله على السلامة

اهم شي حمدالله على السلامة

و الشباب ما قصرو

الحمد لله على السلامة اخوي ثامر :cry:

الحمد الله على سلامتك يا بعدي

و زين جت في الحديد وما جت فيك الحديد يروح ويجي وانا اخوك

اما بخصوص التصلـيح شـف يا الغالي أكـيد راعي الصطحة مأمن على سيارته

فا مالك تفاهم الا مع التأمين هـم يعوضونك ولا أعتقد سياراتك يدخلونها ورشة

لأنها جديدهـ تعتبر من الموديلات الحديثه فا اتوقع التصليح وكـالة
ياخذون قيمة قطع الغيـار على قيمة التصليح من الوكالة

هـذا الي اقـدر افـيدك فيه

و الف الحمد الله على سلامـتك

اما عاااااد سواقة حقين حايل حدث بـلا حـرج

لين جـاك راعـي شاص ولا ربـع مع دوار الساعه ولا دوار السـنـبلـه

تـحـس من سـواقته أن البـقــــــــــاء للأقـــــــــــوى