راداراتنا بالســــــــــــــــــعوديّـــــــــــه .. تخلّـــف تخلـــــف تخلّـــف ..!!

بسم الله الرحمن الرحيم


المــشكله
((راداراتنا بالسعوديّــــه))




نبدأ بسمهِ تعالى :

يوم الثلاثاء في الاسبوع الماضي بالليل كنت جاي من الاحساء إلى الخبر
وبالخط رايق مشغّــل محمد عبده اغنيته اللي يقول فيها (( واختلفنا من يحب الثاني أكثر :d )) ... المهم ...
الطلــون طول الخط مازاد عن 110 كم/الساعه
حتّى جرس السرعه ماسمعته طول الخط ..

... * السالفه هي : إن سوناتا لؤلؤي مثلي كان مسرع شوي ..
طافني ..
وبعد دقائق وصلت الجهة اللي فيها شجر
شفت رادار بين الأشجار ..


طنّشت لأني مومسرع ..

سفّطت في أقرب محطّه عبّيت بانزين وانتبهت حق راعي السوناتا مسفّط بالمحطه ويسولف مع اصحابه والظاهر مطوّل بالقعده ..
طنّشت وحاسبت الهندي وحرّكت ..

شوي وإلا يصادفني تفتيش ..
بكل لباقه دقّيت الأربع ..
وصلت للتفتيش إلا العسكري ماسك زي الدفتر وطلب الرخصه والإستماره وقالّي سفط على جنب ..
:confused:
سفّطت نزلت أشوف شالسالفه ..
قالّي مسرع ..؟؟
قلت لأ ..
قال إلا ..
وظلّيت اتفاهم معاه بس الظاهر انّه مصمم يصكني مخالفه ..
:o
أخذت المخالفه ومشيت ..
لـــكن يـعلم الله موب أنا المســــــــرع ..
بس ويـــــــــن تروح ؟
لمــن تشتكي ؟؟
ليش راداراتنا ماتلقط رقم اللوايح عشان ماينظلم أحد ؟؟


ماقول غير حسبي الله ونعم الوكيل على التحضّر اللي احنا فيه ..

أغنى الدُّول المسلمه وكذا ..

بس فضفضت وخلّصت :d
















تحيّاتي لكم ..

:rolleyes:

الله يكون بالعون وإن شاء الله يتحسن الوضع وتتطور إداراتنا وراداراتنا الى الأحسن .

ماشاء الله عليك اخذت المخالفة ومشيت لو أنا مافي أمل لو يحجزوني وماغلطت بس ما اخذ مخالفة غيري .

مشكور على الفضفضة الحلوة .

انا قد صارتلي نفس السالفه بالرياض

لاكن وقفني انا واكورد ثانيه طبق الاصل من موتري :mad:

هو مسرع وانا منب مسرع

وقفنا كلنا بالتفتيش ونزلنا وقال من فيكم الي مسرع :confused:

طبعا انا كنت مهدي لاني عارف محل الرادار بالظبط

المهم بعد ملاعن وقلت للعسكري ترا الرادار فورد وتاكي على الكبري :rolleyes:

عرف اني عارف مكانه وان الحق معي وسك الثاني مخالفه :p

بس اخروني نص ساعه يمكن :mad:

هذا يدل ان الرادارت ماحولك احد..

يلبى دبي بس الرادار كمرا تصورك وتجيب لوحتك وسرعتك وشنبك :d

^^^^
امس جالسين نتناقش في السالفه

بالكويت .. ماله حق يخالفك الا لما يكون عنده دليل !!
علشان كذا الكامرات صارت بكل مكان
و الجديد فيها
جابو كامرات جديد .. بس بعد ما شغلوها
تكون بارتفاع لمبة الشارع ... و تصورك فيديو .. و انت جاي من بعيد لين تعديها
و تطلع سرعتك و كل شي عنك

و في كامرات جديده بعد ... تكون 3 كامرات ورا بعض
كل وحده تصور حاره
علشان ما تفلت ابد
لان قبل فتره .. كانت الكامره اذا جيتها من على حارة الامان .. ما تصورك .. تشوفها تطق فلاش .. بس لا رقمك و لا رقم شاصي السياره يطلع .. يعني ما يقدرون يقيدون المخالفه

و طبعا في عندنا الكامرات المتحركه ... اللي تكون داخل سياره .. و السياره واقفه على جنب الشارع
انت تمر منها .. تشوف فلاش ..
و بعدها بشهر لما تروح المرور .. تشوف مخالفه عليك !!

الاشارات عندنا عليها كامرات ! يعني انسى تقطعها

اذا الاشاره خضرا .. و انت مريت عليها سرعتك فوق الـ 80 .. تصورك .... مخالفه ( تجاوز تقاطع بسرعه عاليه )

طبعا اخوكم بالاسلام .... دافع اكثر من نص قيمة سيارته مخالفات .. و السبب الكامرات المتحركه
لاني اعرف مكان الكامرات الثابته ...
و الكامرات المتحركه اعرف بعضها .... بس اللحين جايبين سيارات جديده
يعني بالاول كانت سياره جيب ديهاتسو اسود .... تشوفه فاتح الكبوت .. " يعني سياره خربانه "
و الثاني سياره بيضا بكس .. فورد ...
و الثالث جيب لونه ابيض .... ما اعرف نوعه

و اللحين جايبين سيارات جديده ....
بس وصل لي خبر ان بعد فتره بتكون جيب كايين "بورش"

صرنا نمشي ... و نخاف من السيارات الواقفه على جنب الشارع

و الدوريات الجديده " الاودي - الشارجر - الفورد الجديد ابو صدامات فولاذ "
كلها صارت فيها كامرات ... زي امريكا !! علشان يكون اثبات ضدك !!

غريبه ماشالوووك وودوك الحجز ياراعي السوناتا

انا بعد صارت لي سالفه مماثله لكن كنت صحيح مسرع لكن موديك الدرجه كنت رايح البحرين وطفت ال 120بشوي ماأذكر بالظبت كم بس المهم موأكثر فتعرفون القوانين صارمه شوي في البحرين يعني أفضل مناللعندنا فوأنا داخل إلى البحرين إلا أشوف سياره واقفه على جنب
بعد ماعديتها اشوف الكيمرا قدامها

فبعد كذا رحت البحرين وخلصت شغلي ولما رجعت كان الوضع عادي

لكن بعد فتره قررت اروح البحرين استانس شوي لما وصلت خلصت الجوازات والشغلات الثانيه
اخر شي وصلت إليه قالوا لي عليك مخالفه فعطوني المخالفه ورحت لهم عشان اسددها فعطوني الصوره الي تثبت هذا الكلام فخلصت الشغله وكملت طريقي
وبس هذي السالفه

تحياتي...

هههههههههههههههههههههههههههههههههههههههههههههههههه هههههههههه


يا حبي لكم


اخووكم في الله <<<<الي هو ــبطرانـ2005ــ قاعد يجاكر كااامري


وهو يجاااكر وماسك الايسر شوووي ويشووف الرادار على اليمين واقف ويخلي الكامري عن يمينه

ويتخبى وراه لين تعدوو الرادار

<<<المهم في الاخير الكامري قمت عليه وهو الي خذ المخالفه <<<ولا شاافوووني ههههههههه

هههههههههههههههههههههههههههههههههههههههههههههههههه هههههههههههههههههه

اذا كان الموضوع على الرادار فحدث ولا حرج :d

تخيلوا انهم ماسكيني انا وراعي اكورد لونها عشبي ويقول لنا من منكم كان سرعته 145 :confused:

بالله عليكم هذي تكنلوجيا عندنا :(

بس بعد اكثر من حلف وكل واحد يبي يوهق الثاني صارت المخالفة عليه :d

وانا صادق انا كنت امشي 130 وهو يقول ما اسرعت :mad:

المشكلة هنا انهم ما ميزوا بين الالوان وش جاب الكحلي للعشبي << شكل الشرطي عنده عمى الوان :d



تحياتي

.

الله يعينك بس

لاتشكي لي ابكي لك ..

والله من تالي مااطلع بالليل متأخر كله من النقيب محماس واعوانه

عادي يوقفك بالليل ويسألك وش مطلعك هالحزة !

ابوي على غفله

وانا ديني ولا اللي ينفخ بوجهك لاجا يخالفك ..

يحسب انك لااستحقيت المخالفة .. من حقه يسفل فيك ويكلمك من طرف خشمه

مشكله اللي جايك طعس بدوي من الخيمة للومينا على طول

على قوله ربيع بالكاريكاتير .. وش انت يالفريق ركن !


<< يفضفض معك :d

والله اذ اسرعة وقفطوني اوقف اقل شي ربع ساعه

تجي بظهر غيري;)

واغير ملامح السياره:rolleyes:

عرفتو ميزة النورالاصفر

^
^

قد سويتها مسوي ذيب

واللي بجمبي كان مسرع ازود مني ومشوه .. وانا انطقيت على غير سنع

انا انصح انهم يشيلون الرادارات ويخلون الشعب يسرعون

عشان ما أحد ينظلم .. <<<--- يصلح في مجلس الأمن الدولي .. :d



عوافي أخوي ..

كلنا نعاني من التخلف الي عايشين فيه مرورنا الكريم .,,.

جاكم الفرج :cool:

مشروع رصد المخالفات المرورية آلياً يدخل مراحله النهائية

http://www.alriyadh.com/2008/05/25/img/245704.jpg

حوار - أحمد الشمالي:
اوضح العقيد عبدالرحمن بن عبدالله المقبل مدير مرور الرياض ضابط مشروع رصد المخالفات المرورية في وزارة الداخلية أن المشروع الذي اعتمدته الوزارة لرصد المخالفات المرورية وضبطها آلياً في عدد من مناطق المملكة مع شركات عالمية بنظام ال B.O.T في المملكة يدخل الآن في مراحله النهائية.
وأشار العقيد المقبل ان قرار مجلس الوزراء الموقر قد حدد أن تكون الكاميرات في عدة خطوط مختلفة الأطوال وبأعداد كاميرات مختلفة على أن يتم التقويم لهذا المشروع خلال خمس سنوات.


وقال المقبل إن حملات مكافحة السرعة والمنتشرة حاليا في عدد من الشوارع الرئيسة والطرق الدائرية وداخل المدن ستتلاشى مع بدء العمل بالمشروع.
وبين العقيد ان المشروع الذي تتجاوز قيمته الاجمالية ملياري ريال يحظى بمتابعة من قبل صاحب السمو الملكي الأمير محمد بن نايف بن عبدالعزيز مساعد وزير الداخلية للشؤون الأمنية لما يمثله من نقلة عالمية متطورة في جهاز المرور في المملكة.


http://www.alriyadh.com/2008/05/25/img/245705.jpg

وحول آلية رصد المخالفات المرورية أوضح العقيد المقبل أنها ستكون على نوعين أحدهما: "تصوير فيديو أو صورة ثابتة" باستخدام المستشعر لرصد المخالفة، وهذا النوع من الرصد سيكون باستخدام كاميرات الفيديو على الطرق السريعة بين المدن لرصد السرعة خلالها عن طريق تثبيت الكاميرات بالقرب من المخارج لرصد السيارات على الطريق مشيراً أنه ستتم برمجة النظام أن السرعة على الطرق السريعة الواقعة بين المدن ب (120) كيلومترا في الساعة.



http://www.alriyadh.com/2008/05/25/img/245194.jpg

وعن رصد التجاوزات المرورية داخل المدن بين العقيد المقبل أن هناك تقنية متطورة سيتم التعامل بها مع متجاوزي السرعة وقطع الإشارة على أساس التصوير بكاميرات داخلها مستشعر لرصد السيارة المخالفة فوراً. مؤكداً أن نجاح تجربة رصد قطع الإشارة، التي تم وضعها في بعض المواقع في الرياض وجدة من خلال فترة التجربة مؤكدا أن النتائج كانت انخفاض نسبة قطع الإشارة نتيجة الضوء "الفلاش" بنسبة 65في المائة، واتضحت ردود الفعل عند السائقين في حينه بعد أن اكتشف عدم رصد المخالفة، زاد عدد المخالفين، إلا أن النسب لم تكن عالية، لافتاً الى ان هذا يعطي مؤشراً لنجاح المشروع.



http://www.alriyadh.com/2008/05/25/img/245195.jpg

وكذلك التجارب التي قد تمت في عدد من دول العالم وعلى سبيل المثال انخفاض حوادث الوفيات بأكثر من 70% في مقاطعة ملبورن بأستراليا بعد تطبيق أنظمة مشابهة.



http://www.alriyadh.com/2008/05/25/img/245196.jpg

وتطرق العقيد المقبل ضابط مشروع رصد المخالفات المرورية في وزارة الداخلية الى دراسة شاملة لتحديد المواقع الخطرة التي تكثر بها الحوادث بسبب المخالفات المرورية يتم تثبيت النظام بها. موضحاً أن مدينة الرياض هي احدى المدن التي ستشملها المشروع قد تمت الاستعانة بالهيئة العليا لتطوير مدينة الرياض من خلال الاستراتيجية المرورية، وتم تحديد المواقع الخطيرة مروريا، وتم تزويدها لاستشاري المشروع المعني بمسح المواقع المراد تركيب الكاميرات فيها، مشيراً الى وجود استشاري عالمي متخصص مكلف من وزارة الداخلية للاشراف ومتابعة سير العمل، بتوجيه من الأمير محمد بن نايف مساعد وزير الداخلية، لافتاً النظر الى ان لدى الاستشاري مهام يعمل فيها، تشمل ثلاثة محاور، وهي مطابقة لأجهزة المواصفات والمقاييس المعتمدة في كراسة الشروط، والمحور الثاني متابعة الاجراءات التصميمية والانشائية، والمحور الثالث متابعة أعمال التشغيل والصيانة، والأهم بعد ذلك عملية التقويم، التي سترفع لوزارة الداخلية بعد خمس سنوات.



http://www.alriyadh.com/2008/05/25/img/245197.jpg
وثمن العقيد المقبل الجهود الكبيرة التي تقوم بها وزارة المالية في سبيل تذليل المعوقات لهذا المشروع الوطني العملاق الهادف الى رفع مستوى السلامة المرورية بواسطة تطبيق نظام آلي لضبط وادارة المخالفات المرورية وزيادة كفاءة شبكة الطرق المتوافرة حالياً من خلال تحسين ادارة حركة المرور وعمليات النقل والتنقل اضافة الى انشاء آليات متطورة ذات كفاءة عالية لتمويل تكلفة تنفيذ وتشغيل خطط ادارة الحركة المرورية الشاملة.

اي فرج يا حبيبي


هذا اذا افلحوا في تشغيلها

.

اذا شيب اعضاء نادي محبي هوندا بيطبق النظام هذا :rolleyes:

ما أقول الله يعين الشباب الحين بلشين با الحجز عند السرعة أنا من رأيي يخلونها 140 داخل المدينة و في الخطوط السريعة خذ راحك <<<<<<<<<< راعي سرعة وأنا من الشباب الي ما يقدر يجي يوم وما أسرع وخاصة في الطرق السريعة.

يارجال أنا ذاك اليوم كنت مسرع على خط الدمام الحسا .. أبلحق أشوف مباراة الهلال والاتحاد الموسم الماضي .. وكان معي سيارة أخوي سوناتا 2007 لؤلؤي ومركب زينون (( بيستانس راعي السوناتا :d)) المهم صادني الرادار .. وصفطت عندد المحطه .. وقلت مادامه أذن خلني أصلي الحين وصليت المغرب والعشا ومريت السوبرماركت .. أخذت يمكن ثلث ساعه ..

وبعد ماطلعت وأنا يدي على قلبي .. إلا تجي جنبي فياقرا لون لؤلؤي وزينون طبعا .. ورويدا رويدا الى النقطه .. ومن التميز عندنا ان مافيه الا عسكري واحد بين المسارين ..

وقفت عنده وعلى يساري الفياقرا وهو بالنصف بيننا .. وجاك الرجال على أساس فراسه وبيصيد المسرع فينا ..

طبعا البلاغ جاه على سياره بيضاء وزينون .. لكن أي وحده فيهم مايدري ..

قعد الرجال يطالع فينا .. ويحاول يسدد ويقارب .. ووده يقول أنت .. لا أنت .. بس خاف يظلمنا ,,

فقال : أنا جاني بلاغ على واحد فيكم لكن ماودي أظلمكم فأمشوا كلكم .. وهيييييه أنواع التصفيق والوناسه .. ويالله أقوى دعس جاء بعد التفتيش أنا وراعي الفياقرا ..

^^^^^^^^^^^^^

ناااااايس والله اكورداوي

انا مره منطلق بالاكورد على خط الدمام الجبيل ..

وفجأه . الرادار طلع قدامي ..

طبعا ما امداني اخفف ..

جلست وانا حالتي حاله وشوي وبصيح هع هع هع <<< خايف من الحجز ×_*

والحمد لله يمر عليي اكورد ذهبي صاروخ

وقلت خليه يستاهل مسكين ,,, خليه يفرح بالاكورد ههههههههههههه

وطبعا مايحتاج اقول لكم وش صار في التفتيش هههههههههههههههههههههههههههه

انا مشيت وهو توقف .. بس وش صار بعدين الله العالم :d

الله يعينك اخوي

تقبل مروري..

انا كنت متحدي معا الوالد

اني امشي بالسيفيك 200 وذا صادني الرادار ادفع المخالفة وتنسحب مني الرخصة

وصلت النقطة التغتيش ولا قالوا لي شي
وعكس لما مشيت 135 صادني؟؟؟؟

يعني شي غريب

^^^^
تسلفني ابوك يومين !!؟
و لا تبادل و تزيدني ؟
خخخخ
الله يستر علينا و على المسلمين جميعا ...

اقتباس:

---

المشاركة الأصلية كتبت بواسطة o-k-r

انا كنت متحدي معا الوالد

اني امشي بالسيفيك 200 وذا صادني الرادار ادفع المخالفة وتنسحب مني الرخصة

وصلت النقطة التغتيش ولا قالوا لي شي
وعكس لما مشيت 135 صادني؟؟؟؟

يعني شي غريب

---

بسم الله الرحمن الرحيم

لعلمك أخي العزيز .. أن الرادارات بالسعــوديه ؛ ( حسب كلام واحد شغال بالمرور ) ؛ إنها ما تقدر تحدد سرعه اللّــي يمشي فوق الـ 179 بالتمام ..
وقت ماتكون سرعتك فوق الـ 179 .. تتلخبط الأرقام بالرّادار .. لـكنّك راح تنمسك على السرعه .. وراح تتخالف انّك ماشي على سرعه أقل من سرعتك بكثير ;)..






تحياتي
:rolleyes:

اقتباس:

---

المشاركة الأصلية كتبت بواسطة BLACK_ACCORD

^^^^
امس جالسين نتناقش في السالفه

بالكويت .. ماله حق يخالفك الا لما يكون عنده دليل !!
علشان كذا الكامرات صارت بكل مكان
و الجديد فيها
جابو كامرات جديد .. بس بعد ما شغلوها
تكون بارتفاع لمبة الشارع ... و تصورك فيديو .. و انت جاي من بعيد لين تعديها
و تطلع سرعتك و كل شي عنك

و في كامرات جديده بعد ... تكون 3 كامرات ورا بعض
كل وحده تصور حاره
علشان ما تفلت ابد
لان قبل فتره .. كانت الكامره اذا جيتها من على حارة الامان .. ما تصورك .. تشوفها تطق فلاش .. بس لا رقمك و لا رقم شاصي السياره يطلع .. يعني ما يقدرون يقيدون المخالفه

و طبعا في عندنا الكامرات المتحركه ... اللي تكون داخل سياره .. و السياره واقفه على جنب الشارع
انت تمر منها .. تشوف فلاش ..
و بعدها بشهر لما تروح المرور .. تشوف مخالفه عليك !!

الاشارات عندنا عليها كامرات ! يعني انسى تقطعها

اذا الاشاره خضرا .. و انت مريت عليها سرعتك فوق الـ 80 .. تصورك .... مخالفه ( تجاوز تقاطع بسرعه عاليه )

طبعا اخوكم بالاسلام .... دافع اكثر من نص قيمة سيارته مخالفات .. و السبب الكامرات المتحركه
لاني اعرف مكان الكامرات الثابته ...
و الكامرات المتحركه اعرف بعضها .... بس اللحين جايبين سيارات جديده
يعني بالاول كانت سياره جيب ديهاتسو اسود .... تشوفه فاتح الكبوت .. " يعني سياره خربانه "
و الثاني سياره بيضا بكس .. فورد ...
و الثالث جيب لونه ابيض .... ما اعرف نوعه

و اللحين جايبين سيارات جديده ....
بس وصل لي خبر ان بعد فتره بتكون جيب كايين "بورش"

صرنا نمشي ... و نخاف من السيارات الواقفه على جنب الشارع

و الدوريات الجديده " الاودي - الشارجر - الفورد الجديد ابو صدامات فولاذ "
كلها صارت فيها كامرات ... زي امريكا !! علشان يكون اثبات ضدك !!

---

لك اه على الكاميرات يلي عندنا الشهر يلي طاف دافع اكثر من 300 دينار مخالفات وشرطك كلهم كاميرات :D
الله يستر بس

اقتباس:

---

المشاركة الأصلية كتبت بواسطة راعي السوناتا

بسم الله الرحمن الرحيم

لعلمك أخي العزيز .. أن الرادارات بالسعــوديه ؛ ( حسب كلام واحد شغال بالمرور ) ؛ إنها ما تقدر تحدد سرعه اللّــي يمشي فوق الـ 179 بالتمام ..
وقت ماتكون سرعتك فوق الـ 179 .. تتلخبط الأرقام بالرّادار .. لـكنّك راح تنمسك على السرعه .. وراح تتخالف انّك ماشي على سرعه أقل من سرعتك بكثير ;)..

تحياتي

:rolleyes:

---

صدقت والله ..انا كنت ماشي 190 او بالضبط 195 يعني تقريبا كنت قريب من الــ200 وماكنت داري ان قدامي نقطة ومسكوني واسوي وجهي كأني مظلوم :(قلت ليش ماسكيني قالو انت ماشي 144:confused: ... قلت في نفسي الحمدالله ...لكن مسكوني ولقيت واسطه موجوده في الحال ومشيت والحمدالله :) لكن بعد ايش بعد قمطة :d...
وشكراً،،،

ايييييييييييييييييييييييييييه ياراااراات الاماراات ..
في كل مكاان وكل زماان وكل شاارع وكل حااره وورا كل زبااله الله يعزكم ..
واكبر دليييل المخاالفه الي انفقعوها الشبااب يووم اجو على الاماراات ...
قطعوو اشااره حمرا بدببي .. هذه فيها تسفير :d

بس للحين مابين شي .. والله يستر ..

كلكم مساكين ياخي عيب السرعه الي يسمعني ما اسرع:d

انا اقول نظام التفتيش بايخ المفروض يحطون طراد اصرف عشان ما احد ينظلم
وبعدين خلاص حطو نظام الكمرات في كل دوريه يعني اذا لحقك يصورك لين تمشي من عنده

أنا مره رايح من القصيم إلى جدة طبعا طلت على طريق المدينة ومن المدينة إلى جدة وأنا في طريقي على طريق القصيم المدينة صكوني مرتين سرعة الأولا صكوني ومشيت ومسجلين السرعة 140 والثاني برضو عطوني 140 ويوم عطاني الخالفة قلتله ليش سجلت 140 أنا ماشي أكثر من كذا قال إذا سجلنا أكثر فيها حجز وقلت هو معطين المخالفة وخلص خلنا إن طلع حره المخالفة وقلتله تفزعلي عند التفتيش الي قدام قال ليش قلت راح يعطونن مخالفة سرعة وقال رح ورانا ناس غيرك قلت لازم يخلص الدفتر اليوم يعني قال إيه قالت طيب تمسح المخالفة قال إنشاء الله قلت خذ الورقة حقتي وإمسحها قال شكلك مروق قلت لا قال حرك ولا عطيناك مخالفة إزعاج الامن ومشيت طبعا لحالي رايح قلت خل اتسلا فيهم مروق لاكن السرعة ما تتعدا ال190 أو 180 في الخطوط علشان كذا ما أمشي ولا وأنا مطلع حرتي فيهم إذا عطوني مخالفة .:d

الله يعينا على المخالفات

اقتباس:

---

المشاركة الأصلية كتبت بواسطة bassol-act

لك اه على الكاميرات يلي عندنا الشهر يلي طاف دافع اكثر من 300 دينار مخالفات وشرطك كلهم كاميرات :D
الله يستر بس

---

محسوبك دافع 1400 دينار مخالفات ... كلهم كامرات ... و كل هذا المبلغ خلال سنه و نص !
عندي حكم طلع ضدي ... بس مع الواسطه صار مع وقف التنفيذ و ما تسجل بملفي !
امس ظللت كل السياره 30 % علشان الحر ... و انا طالع من المحل الا دوريه مرور يوقفني بشارع الزينه .. قال روح شيله قدامي و لا اسحب السياره ... ما تهنيت فيه حتى نص ساعه !
رحت شلته !!

بسول ..دير بالك من الدوريات الاودي ... ما يغشمرون ابد ... .. نلاقيهم بخط السفر و بخط الشاليهات ... و في 3 منهم بمنطقتنا و السبب ان قبل شهرين في 3 سكايلانات موديل 2002 .. منحاشين من الشرطه و كانو ماشين من غير لوحات ... و مسوين سباقات
اليوم اللي وراه الدوريات الاودي عندنا !

لو تجيب له الف واسطه ما يخليك تمر من عنده !
حتى لو عندك لمبه محروقه يوقفك !

توي مصكوك بمخالفة سرعة 140 كم/س بجيب الوالد
عاد تصدقون اني مظلوم
وابرفع شكوى
مهوب انا اللي ماشي 140 انا ماشي 180 بس<<هذا الأخ يبي يصفق هذا المساء


الله يعين

اما هاذي يا كثرها مره مره كنت ماشي في طريق الملك في جده انا والعضو ملك مملكه جده ووقفنا في التفتيش الي قبل دوار الكره الارضيه ثلاث اكوردات ورا بعض انا والعضو وواحد ما نعرفه والعسكري يسألنا مين فيكم مسرع بس اول شي سألني انا كم كنت ماشي باللهي ايش رايكم وقتها ايش كنتو راح تسو ولا واحد من المسؤولين في التفتيش دق على الدوريه السريه الي تلقط السرعه وهوا نفسه مو متأكد اي واحد فينا قاله الي مركب جناح طيب نفرض كلنا مركبين اجنحه هيا حلها وقتها ام التخلف

بسمه تعالى :

النظام المروري بحاجة لإعادة صياغة --___-- فالجمل راح بما حمل و إختفى عن الأنظار و إرتحل -__- الطرق لدينا عشوائية و تفتقد للإسلوب النموذجي في التصميم كما بدول أوروبا و أمريكا و بعض دول شرق آسيا و أستراليا --__-- الطرق لديهم تتمتع بمواصفات جودة عالية و بنية تحتية قوية بإسلوب رصف حديث و عمالة مدربة ذو خبرة عالية تتمتع بحوافز تشجيعية و إسلوب تقني فذ بطرق عمل تلك الطرق الحيوية -__- طرقاتنا تستنجد و تتهالك يومآ بعد يوم و لا من رقيب --__-- الإزفلت مقشوش ..طرق رصف بدائية ..عماله متهالكة و غير مدربة و لا تتمتع بخبرات كافية ..مقاولون جدد غير أكفاء و يطبع عليهم الإهمال ..إستخدام طبقات الإزفلت الرقيقة بالرصف عوضآ عن الأكثر كثافة كما كانت سابقآ و هذا ما يعلل سرعة تشققها لقربها من القاعدة الرملية المرصوفة..رصف سيء للطرق الكثيرة التعرجات و النتوء و كأنها رصفت منذ 60 سنة عتى عليها الزمن فشوارع السبعينات و الثمانينات هي الأفضل بلا مقارنة..فتحات المجاري أعزكم الله تتوسط طرقاتنا بشكل أوضح للعيان و ببروز يسبب الكثير من المشاكل الميكانيكية للمركبة و بعضها أشبه بحلقات مؤذية للعين و المركبة و سببت تشوهآ واضحآ و منظرآ بيئيآ يتذمر منه الزائر و الحاضر لهذه المدينة أو تلك --__-- إن صلاح الطرق يدل على صلاح المسار المروري نحو التقدم و الرقي ففي بعض تلك المراكز يصيبك الإحباط لرؤية الحال على ما هو عليه قبل 20 عامآ أو أكثر -__- لنأمل لإدارة المرور التقدم و الرقي و تحقيق الأمنية بتقنين نقاط التفتيش المملة و المهلكة لمرتادي الطرق ..ففي بعض نقاط التفتيش إستمر التفتيش لأكثر من ساعة و بعضها نصف ساعة بسبب ضيق المسار و إهمال رجالات التفتيش و بطأهم بالإجرائات الروتينية : أين الرخصة و الإستمارة و هكذا ....و أفضل وجود ببغاء ليردد هاتين الكلمتين عوضآ عنهم لإراحة ألسنتهم من تكرار ذلك مرارآ و تكرارآ ....و شكرآ .

http://www.al-jazirah.com/192029/madi.jpg

يا شباااب وش راايكم اي واحد عزاابي بالرياااض يحط قطته ونضبط الحجز >>>علشان اذا دخلناهـ وحنا تعبانين لين كل واحد يرووح فرااشه ويرقد <<<والله هذا النااقص

<<<<والله جبتها يا جوجو

اقتباس:

---

المشاركة الأصلية كتبت بواسطة BLACK_ACCORD

محسوبك دافع 1400 دينار مخالفات ... كلهم كامرات ... و كل هذا المبلغ خلال سنه و نص !
عندي حكم طلع ضدي ... بس مع الواسطه صار مع وقف التنفيذ و ما تسجل بملفي !
امس ظللت كل السياره 30 % علشان الحر ... و انا طالع من المحل الا دوريه مرور يوقفني بشارع الزينه .. قال روح شيله قدامي و لا اسحب السياره ... ما تهنيت فيه حتى نص ساعه !
رحت شلته !!

بسول ..دير بالك من الدوريات الاودي ... ما يغشمرون ابد ... .. نلاقيهم بخط السفر و بخط الشاليهات ... و في 3 منهم بمنطقتنا و السبب ان قبل شهرين في 3 سكايلانات موديل 2002 .. منحاشين من الشرطه و كانو ماشين من غير لوحات ... و مسوين سباقات
اليوم اللي وراه الدوريات الاودي عندنا !

لو تجيب له الف واسطه ما يخليك تمر من عنده !
حتى لو عندك لمبه محروقه يوقفك !

---

مشكور يا بطل
والله كل يوم طالعين بقانون اشد الحين بعد كم سنة تلاقي الواحد يمشي 80 وهو خايف
عندي واحد من الربع ماشي 80 بطريق 40 بشرق ولا حاطين كاميرا ومصورة
لما راح بيجدد السيارة ولا ساحبين الليسن منا :D

طيب ياصديقي انت وياه واللي سيارته في الحجز وراح يسدد المخالفه اللي عليه ( مسكين اخوه يسرع فيها وتنحجز سيارته) ورحت بسدد والقى علي 700 ريال 3 مخالفات وين جت ما ادري واللي اذكره ماعلي الا وحده سرعه وين جت 400 الباقي ؟؟؟؟
نقول سرعه ماسكيني وانا مادري اوكيه هذي 300 طيب 100 على ايش؟؟؟؟؟؟

^^^^^^^^^
تظليل
^_*

مشكورين جميعاً على مروركم ..



لكن المشكله انّ المخالفه صار لها اسبوع

رحت صرّاف الرياض بسدد .. ماشفت مخالفات علي ؟؟؟
؟؟؟
والورقه الصفرا اللي اعطاني ايّاها الأرقام فيها مو واضحه
ولا الكتابه ولاشي ..
تتوقعون كتب لوحه غير لوحتي ؟؟

والله مادري ؟؟



























.

صحيح الارقااام ساعات تصير مو واضحه

انا اعرف واحد عنده ثلاث مخالفات ما نزلت لان الارقام غلط الشرطي كتب في الاولى الـ3كتبها 9 والـ 1 كتبهااكسx ادري دي قويه والـ7 كتبها 1