بسم الله الرحمن الرحيم
السلام عليكم ورحمة الله وبركاتة
في هذا الموضوع راح أطرح لكم جميع الخطوات الخاصة بنقل اللوحات بين سيارتين أو التنازل عن لوحة مميزه لشخص آخر أو شراء لوحة مميزه لصالحك - كلها نفس الخطوات اللي راح أذكرها.
طبعآ قبل كل شي هذه لوحتي السابقة مع أنها احلى شكل لكن وش نسوي أمرنا لله ونبي نتميز ولو بشي بسيط :d
مره من المرات كنت واقف مع رجال ( مايحتاج تعرفون مين هو :rolleyes:) المهم أسولف معه وكان على موتره لوحة نقدر نقول حلوة شوي وفجأة قلت له وش رايك تبيعني اللوحة بـ 500 ريال << أول ماطلع خبر حذف الأصفار.
رد علي وقال يارجال تبيها ببلاش خذها وتركته ودارت الأيام ويوم شفت المرور طبق حذف الأصفار دقيت عليه وقلت له وش رايك للحين على كلامك قال مر علي وأبشر
مريت عليه ودردشنا شوي وانا أحاول فيه كم تبي في اللوحة وهو يقول مابي أخسرك وخذها ببلاش وأنا أحاول فيه آخر شي أتفقنا على مبلغ 500 ريال فقلت له عيب والله المبلغ شوي وخلني أعطيك 1000 ريال علشان ماتزعل ولا زال معاند وأخيرآ رسينا على 500 ريال.
طيب الحين الموتر تبع الرجال كان يبيله شويه شغلات ( فحمات ) ( تواير ) علشان الفحص
ضبطنا الفحمات وركبنا تواير من عند رجال
ودينا المواتر للفحص مع المبروكه الأكورد والحمدلله السيارتين ناجحة
والحين بختصر عليكم الموضوع بالخطوات كاملة وش المطلوب والتكلفة
قبل كل شي حط في بالك لا بد نقل ملكية السيارتين بأسم مالك واحد
للمعلومية جاني كم واحد وقال مايحتاج تقدر تنقل اللوحات بدون نقل ملكية ( << غلطانين لابد من نقل الملكية )
1- أول خطوة فحص السيارتين بقيمة 73 ريال للسيارة الواحدة بمجموع 146 ريال
2- ثاني خطوة عمل مبايعه بمعرض سيارات للسيارة اللي عليها الرقم اللي تبيه يعني تنقلها بأسمك وتدفع للمعرض 100 ريال اذا بتراجع المرور بنفسك
3- تاخذ ورقة المبايعه وتحطها بملف وتروح تأمن على السيارة بمبلغ 350 ريال
4- تاخذ أوراقك بعد ماتحطها بملف وتروح للمرور بعد ماتسدد 75 ريال بصراف الرياض أو الأنترنت المصرفي وتختار ( نقل ملكية )
( مبايعه المعرض / صورة بطاقة الأحوال أو الهوية الوطنية / صورة الفحص الدوري للسيارة / صورة التأمين - مع الأصل ومع صورة الهوية الوطنية لصاحب المركبة السابق ) المعرض يضبط لك الأوراق كلها ، وفي المرور تعبي ورقة خاصة للأستمارة مع تحديث عناوين وتحطها بالملف وتقدمه لهم.
تقدم المعاملة الصباح وتاخذ أستمارة السيارة بعد الظهر بأسمك ونقدر نقول خلصنا أول خطوة
الخطوة الثانية ( طلب نقل اللوحات بين السيارتين )
تروح للمرور أول شي وتقولهم أبي أنقل لوحات بين سيارتين كلها بأسمي
وطبعآ تجهز أوراقك وهي :
1- معروض مقدم لمدير المرور بالمنطقة تطلب فيه نقل لوحات بين سيارتين وترفق صورة الأستمارات للسيارات مع صورة الهوية الوطنية للمالك
2- توقيع المعروض من مدير المرور وتحول للمحفوظات وبعدها المحفوظات يحولونك للحاسب الآلي لطباعة برنت للسيارتين مع برنت ثاني للعمليات لكل سيارة
3- طلب الملفات الخاصة بالسيارات من مصدرها بواسطة المرور ( سيارتي الأولى مصدر الأستمارة مرور الخبر والثانية الظهران ) - يفضل لو كانت مصدر الأستمارات من مدينة واحدة لتسريع العملية وأذا كانت من مدينة بعيده فردد ياليل
بخصوص سيارتي الملف وصل بعد 18 يوم والسيارة الثانية وصل بعد شهر كذا أو زيادة ( طبعآ بعد الأتصالات والواسطات والشباب في المرور بيض الله وجههم ماقصروا والله أرسلوا خطابات طلب ثانية علشان يسرعون الموضوع شوي
المهم الملفات وصلت على خير وكان المطلوب هو :
1- ملفات علاقية / صورة الأستمارات / صور الفحص الدوري / صور التأمين / صور الهوية الوطنية للمالك الحالي توضع بكل ملف
2- تعبي أوراق المرور ( الورقة العادية اللي تعبيها عند طلب تجديد أستمارة أو نقل ملكية )
3- تعبي ورقتين تحديث عناوين وتحط كل وحده في ملف وتسلم الأستمارات الأصلية
4- قبل كل شي تسدد مبلغ 500 ريال للسيارتين
كل سيارة 250 ريال كما هو موضح بالصورة
تقدم طلباتك الصباح وتستلم الأستمارات بعد الظهر .
وبكذا أنتهينا وتفك اللوحات بين السيارات وتبدلهم واليوم الثاني تروح لأقرب معرض وتسوي مبايعه جديدة لصاحب السيارة يعني تبيع الموتر عليه واذا ماله نفس يراجع المرور يخلي المعرض يخلصها ( أتفقنا مع معرض وشركة تأمين انه يبدل لنا التأمين اللي سويناه قبل بـ 150 ريال علشان يصير بأسم صاحب السيارة وبرقم لوحة الجديد
باقي حذف الأصفار الشباب في المرور نصحوني أروح للرياض لمرور الناصرية وأقدم الطلب هناك في الصباح والظهر مخلص أحسن لأنهم يقولون تتأخر اذا طلبتها من الشرقية ويمكن تاخذ شهرين وممكن أربعة وممكن أسبوعين يعني أنت وحظك
تاريخ بدء الأجراءات
2009/05/12
تاريخ انتهاء الأجراءات
2009/06/23
نموذج المعروض موجود بالمرفقات
وسلامتكم ولأي أستفسار أنا بالخدمة قبل لا أنسى الخطوات :d
( الموضوع خاص بنادي محبي هوندا ولا يسمح بنقله الا بعد ذكر المصدر )
